| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
9. வமனஸுத்தங்
9. Vamanasuttaṃ
109. ‘‘திகிச்ச²கா , பி⁴க்க²வே, வமனங் தெ³ந்தி பித்தஸமுட்டா²னானம்பி ஆபா³தா⁴னங் படிகா⁴தாய, ஸெம்ஹஸமுட்டா²னானம்பி ஆபா³தா⁴னங் படிகா⁴தாய, வாதஸமுட்டா²னானம்பி ஆபா³தா⁴னங் படிகா⁴தாய. அத்தே²தங், பி⁴க்க²வே, வமனங்; ‘நேதங் நத்தீ²’தி வதா³மி. தஞ்ச கோ² ஏதங், பி⁴க்க²வே, வமனங் ஸம்பஜ்ஜதிபி விபஜ்ஜதிபி.
109. ‘‘Tikicchakā , bhikkhave, vamanaṃ denti pittasamuṭṭhānānampi ābādhānaṃ paṭighātāya, semhasamuṭṭhānānampi ābādhānaṃ paṭighātāya, vātasamuṭṭhānānampi ābādhānaṃ paṭighātāya. Atthetaṃ, bhikkhave, vamanaṃ; ‘netaṃ natthī’ti vadāmi. Tañca kho etaṃ, bhikkhave, vamanaṃ sampajjatipi vipajjatipi.
‘‘அஹஞ்ச கோ², பி⁴க்க²வே, அரியங் வமனங் தே³ஸெஸ்ஸாமி, யங் வமனங் ஸம்பஜ்ஜதியேவ நோ விபஜ்ஜதி, யங் வமனங் ஆக³ம்ம ஜாதித⁴ம்மா ஸத்தா ஜாதியா பரிமுச்சந்தி, ஜராத⁴ம்மா ஸத்தா ஜராய பரிமுச்சந்தி, மரணத⁴ம்மா ஸத்தா மரணேன பரிமுச்சந்தி, ஸோகபரிதே³வது³க்க²தோ³மனஸ்ஸுபாயாஸத⁴ம்மா ஸத்தா ஸோகபரிதே³வது³க்க²தோ³மனஸ்ஸுபாயாஸேஹி பரிமுச்சந்தி. தங் ஸுணாத²…பே॰….
‘‘Ahañca kho, bhikkhave, ariyaṃ vamanaṃ desessāmi, yaṃ vamanaṃ sampajjatiyeva no vipajjati, yaṃ vamanaṃ āgamma jātidhammā sattā jātiyā parimuccanti, jarādhammā sattā jarāya parimuccanti, maraṇadhammā sattā maraṇena parimuccanti, sokaparidevadukkhadomanassupāyāsadhammā sattā sokaparidevadukkhadomanassupāyāsehi parimuccanti. Taṃ suṇātha…pe….
‘‘கதமஞ்ச தங், பி⁴க்க²வே, அரியங் வமனங், யங் வமனங் ஸம்பஜ்ஜதியேவ நோ விபஜ்ஜதி, யங் வமனங் ஆக³ம்ம ஜாதித⁴ம்மா ஸத்தா ஜாதியா பரிமுச்சந்தி…பே॰… ஸோகபரிதே³வது³க்க²தோ³மனஸ்ஸுபாயாஸத⁴ம்மா ஸத்தா ஸோகபரிதே³வது³க்க²தோ³மனஸ்ஸுபாயாஸேஹி பரிமுச்சந்தி?
‘‘Katamañca taṃ, bhikkhave, ariyaṃ vamanaṃ, yaṃ vamanaṃ sampajjatiyeva no vipajjati, yaṃ vamanaṃ āgamma jātidhammā sattā jātiyā parimuccanti…pe… sokaparidevadukkhadomanassupāyāsadhammā sattā sokaparidevadukkhadomanassupāyāsehi parimuccanti?
‘‘ஸம்மாதி³ட்டி²கஸ்ஸ , பி⁴க்க²வே, மிச்சா²தி³ட்டி² வந்தா ஹோதி; யே ச மிச்சா²தி³ட்டி²பச்சயா அனேகே பாபகா அகுஸலா த⁴ம்மா ஸம்ப⁴வந்தி தே சஸ்ஸ வந்தா ஹொந்தி; ஸம்மாதி³ட்டி²பச்சயா ச அனேகே குஸலா த⁴ம்மா பா⁴வனாபாரிபூரிங் க³ச்ச²ந்தி.
‘‘Sammādiṭṭhikassa , bhikkhave, micchādiṭṭhi vantā hoti; ye ca micchādiṭṭhipaccayā aneke pāpakā akusalā dhammā sambhavanti te cassa vantā honti; sammādiṭṭhipaccayā ca aneke kusalā dhammā bhāvanāpāripūriṃ gacchanti.
‘‘ஸம்மாஸங்கப்பஸ்ஸ, பி⁴க்க²வே, மிச்சா²ஸங்கப்போ வந்தோ ஹோதி…பே॰… ஸம்மாவாசஸ்ஸ, பி⁴க்க²வே, மிச்சா²வாசா வந்தா ஹோதி… ஸம்மாகம்மந்தஸ்ஸ, பி⁴க்க²வே, மிச்சா²கம்மந்தோ வந்தோ ஹோதி… ஸம்மாஆஜீவஸ்ஸ பி⁴க்க²வே, மிச்சா²ஆஜீவோ வந்தோ ஹோதி… ஸம்மாவாயாமஸ்ஸ, பி⁴க்க²வே, மிச்சா²வாயாமோ வந்தோ ஹோதி… ஸம்மாஸதிஸ்ஸ, பி⁴க்க²வே, மிச்சா²ஸதி வந்தா ஹோதி… ஸம்மாஸமாதி⁴ஸ்ஸ, பி⁴க்க²வே, மிச்சா²ஸமாதி⁴ வந்தோ ஹோதி… ஸம்மாஞாணிஸ்ஸ, பி⁴க்க²வே, மிச்சா²ஞாணங் வந்தங் ஹோதி …பே॰….
‘‘Sammāsaṅkappassa, bhikkhave, micchāsaṅkappo vanto hoti…pe… sammāvācassa, bhikkhave, micchāvācā vantā hoti… sammākammantassa, bhikkhave, micchākammanto vanto hoti… sammāājīvassa bhikkhave, micchāājīvo vanto hoti… sammāvāyāmassa, bhikkhave, micchāvāyāmo vanto hoti… sammāsatissa, bhikkhave, micchāsati vantā hoti… sammāsamādhissa, bhikkhave, micchāsamādhi vanto hoti… sammāñāṇissa, bhikkhave, micchāñāṇaṃ vantaṃ hoti …pe….
‘‘ஸம்மாவிமுத்திஸ்ஸ , பி⁴க்க²வே, மிச்சா²விமுத்தி வந்தா ஹோதி; யே ச மிச்சா²விமுத்திபச்சயா அனேகே பாபகா அகுஸலா த⁴ம்மா ஸம்ப⁴வந்தி தே சஸ்ஸ வந்தா ஹொந்தி; ஸம்மாவிமுத்திபச்சயா ச அனேகே குஸலா த⁴ம்மா பா⁴வனாபாரிபூரிங் க³ச்ச²ந்தி. இத³ங் கோ² தங், பி⁴க்க²வே, அரியங் வமனங் யங் வமனங் ஸம்பஜ்ஜதியேவ நோ விபஜ்ஜதி, யங் வமனங் ஆக³ம்ம ஜாதித⁴ம்மா ஸத்தா ஜாதியா பரிமுச்சந்தி…பே॰… ஸோகபரிதே³வது³க்க²தோ³மனஸ்ஸுபாயாஸேஹி பரிமுச்சந்தீ’’தி. நவமங்.
‘‘Sammāvimuttissa , bhikkhave, micchāvimutti vantā hoti; ye ca micchāvimuttipaccayā aneke pāpakā akusalā dhammā sambhavanti te cassa vantā honti; sammāvimuttipaccayā ca aneke kusalā dhammā bhāvanāpāripūriṃ gacchanti. Idaṃ kho taṃ, bhikkhave, ariyaṃ vamanaṃ yaṃ vamanaṃ sampajjatiyeva no vipajjati, yaṃ vamanaṃ āgamma jātidhammā sattā jātiyā parimuccanti…pe… sokaparidevadukkhadomanassupāyāsehi parimuccantī’’ti. Navamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8-10. திகிச்ச²கஸுத்தாதி³வண்ணனா • 8-10. Tikicchakasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-12. ஸமணஸஞ்ஞாஸுத்தாதி³வண்ணனா • 1-12. Samaṇasaññāsuttādivaṇṇanā
