| Library / Tipiṭaka / திபிடக • Tipiṭaka / மஜ்ஜி²மனிகாய • Majjhimanikāya |
3. வம்மிகஸுத்தங்
3. Vammikasuttaṃ
249. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா குமாரகஸ்ஸபோ அந்த⁴வனே விஹரதி. அத² கோ² அஞ்ஞதரா தே³வதா அபி⁴க்கந்தாய ரத்தியா அபி⁴க்கந்தவண்ணா கேவலகப்பங் அந்த⁴வனங் ஓபா⁴ஸெத்வா யேனாயஸ்மா குமாரகஸ்ஸபோ தேனுபஸங்கமி; உபஸங்கமித்வா ஏகமந்தங் அட்டா²ஸி. ஏகமந்தங் டி²தா கோ² ஸா தே³வதா ஆயஸ்மந்தங் குமாரகஸ்ஸபங் ஏதத³வோச –
249. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā kumārakassapo andhavane viharati. Atha kho aññatarā devatā abhikkantāya rattiyā abhikkantavaṇṇā kevalakappaṃ andhavanaṃ obhāsetvā yenāyasmā kumārakassapo tenupasaṅkami; upasaṅkamitvā ekamantaṃ aṭṭhāsi. Ekamantaṃ ṭhitā kho sā devatā āyasmantaṃ kumārakassapaṃ etadavoca –
‘‘பி⁴க்கு² பி⁴க்கு², அயங் வம்மிகோ 1 ரத்திங் தூ⁴மாயதி, தி³வா பஜ்ஜலதி. ப்³ராஹ்மணோ ஏவமாஹ – ‘அபி⁴க்க²ண, ஸுமேத⁴, ஸத்த²ங் ஆதா³யா’தி. அபி⁴க்க²ணந்தோ ஸுமேதோ⁴ ஸத்த²ங் ஆதா³ய அத்³த³ஸ லங்கி³ங் ‘லங்கீ³, ப⁴த³ந்தே’தி. ப்³ராஹ்மணோ ஏவமாஹ – ‘உக்கி²ப லங்கி³ங்; அபி⁴க்க²ண, ஸுமேத⁴, ஸத்த²ங் ஆதா³யா’தி. அபி⁴க்க²ணந்தோ ஸுமேதோ⁴ ஸத்த²ங் ஆதா³ய அத்³த³ஸ உத்³து⁴மாயிகங். ‘உத்³து⁴மாயிகா, ப⁴த³ந்தே’தி. ப்³ராஹ்மணோ ஏவமாஹ – ‘உக்கி²ப உத்³து⁴மாயிகங்; அபி⁴க்க²ண, ஸுமேத⁴, ஸத்த²ங் ஆதா³யா’தி. அபி⁴க்க²ணந்தோ ஸுமேதோ⁴ ஸத்த²ங் ஆதா³ய அத்³த³ஸ த்³விதா⁴பத²ங். ‘த்³விதா⁴பதோ², ப⁴த³ந்தே’தி. ப்³ராஹ்மணோ ஏவமாஹ – ‘உக்கி²ப த்³விதா⁴பத²ங்; அபி⁴க்க²ண, ஸுமேத⁴, ஸத்த²ங் ஆதா³யா’தி. அபி⁴க்க²ணந்தோ ஸுமேதோ⁴ ஸத்த²ங் ஆதா³ய அத்³த³ஸ சங்க³வாரங் 2. ‘சங்க³வாரோ, ப⁴த³ந்தே’தி. ப்³ராஹ்மணோ ஏவமாஹ – ‘உக்கி²ப சங்க³வாரங்; அபி⁴க்க²ண, ஸுமேத⁴, ஸத்த²ங் ஆதா³யா’தி. அபி⁴க்க²ணந்தோ ஸுமேதோ⁴ ஸத்த²ங் ஆதா³ய அத்³த³ஸ கும்மங். ‘கும்மோ , ப⁴த³ந்தே’தி. ப்³ராஹ்மணோ ஏவமாஹ – ‘உக்கி²ப கும்மங்; அபி⁴க்க²ண, ஸுமேத⁴, ஸத்த²ங் ஆதா³யா’தி. அபி⁴க்க²ணந்தோ ஸுமேதோ⁴ ஸத்த²ங் ஆதா³ய அத்³த³ஸ அஸிஸூனங். ‘அஸிஸூனா, ப⁴த³ந்தே’தி. ப்³ராஹ்மணோ ஏவமாஹ – ‘உக்கி²ப அஸிஸூனங்; அபி⁴க்க²ண, ஸுமேத⁴, ஸத்த²ங் ஆதா³யா’தி. அபி⁴க்க²ணந்தோ ஸுமேதோ⁴ ஸத்த²ங் ஆதா³ய அத்³த³ஸ மங்ஸபேஸிங். ‘மங்ஸபேஸி, ப⁴த³ந்தே’தி. ப்³ராஹ்மணோ ஏவமாஹ – ‘உக்கி²ப மங்ஸபேஸிங்; அபி⁴க்க²ண, ஸுமேத⁴, ஸத்த²ங் ஆதா³யா’தி. அபி⁴க்க²ணந்தோ ஸுமேதோ⁴ ஸத்த²ங் ஆதா³ய அத்³த³ஸ நாக³ங். ‘நாகோ³, ப⁴த³ந்தே’தி. ப்³ராஹ்மணோ ஏவமாஹ – ‘திட்ட²து நாகோ³, மா நாக³ங் க⁴ட்டேஸி; நமோ கரோஹி நாக³ஸ்ஸா’’’தி.
‘‘Bhikkhu bhikkhu, ayaṃ vammiko 3 rattiṃ dhūmāyati, divā pajjalati. Brāhmaṇo evamāha – ‘abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya addasa laṅgiṃ ‘laṅgī, bhadante’ti. Brāhmaṇo evamāha – ‘ukkhipa laṅgiṃ; abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya addasa uddhumāyikaṃ. ‘Uddhumāyikā, bhadante’ti. Brāhmaṇo evamāha – ‘ukkhipa uddhumāyikaṃ; abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya addasa dvidhāpathaṃ. ‘Dvidhāpatho, bhadante’ti. Brāhmaṇo evamāha – ‘ukkhipa dvidhāpathaṃ; abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya addasa caṅgavāraṃ 4. ‘Caṅgavāro, bhadante’ti. Brāhmaṇo evamāha – ‘ukkhipa caṅgavāraṃ; abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya addasa kummaṃ. ‘Kummo , bhadante’ti. Brāhmaṇo evamāha – ‘ukkhipa kummaṃ; abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya addasa asisūnaṃ. ‘Asisūnā, bhadante’ti. Brāhmaṇo evamāha – ‘ukkhipa asisūnaṃ; abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya addasa maṃsapesiṃ. ‘Maṃsapesi, bhadante’ti. Brāhmaṇo evamāha – ‘ukkhipa maṃsapesiṃ; abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya addasa nāgaṃ. ‘Nāgo, bhadante’ti. Brāhmaṇo evamāha – ‘tiṭṭhatu nāgo, mā nāgaṃ ghaṭṭesi; namo karohi nāgassā’’’ti.
‘‘இமே கோ² த்வங், பி⁴க்கு², பஞ்ஹே ப⁴க³வந்தங் உபஸங்கமித்வா புச்செ²ய்யாஸி, யதா² ச தே ப⁴க³வா ப்³யாகரோதி ததா² நங் தா⁴ரெய்யாஸி. நாஹங் தங், பி⁴க்கு², பஸ்ஸாமி ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய, யோ இமேஸங் பஞ்ஹானங் வெய்யாகரணேன சித்தங் ஆராதெ⁴ய்ய அஞ்ஞத்ர ததா²க³தேன வா, ததா²க³தஸாவகேன வா, இதோ வா பன ஸுத்வா’’தி – இத³மவோச ஸா தே³வதா. இத³ங் வத்வா தத்தே²வந்தரதா⁴யி.
‘‘Ime kho tvaṃ, bhikkhu, pañhe bhagavantaṃ upasaṅkamitvā puccheyyāsi, yathā ca te bhagavā byākaroti tathā naṃ dhāreyyāsi. Nāhaṃ taṃ, bhikkhu, passāmi sadevake loke samārake sabrahmake sassamaṇabrāhmaṇiyā pajāya sadevamanussāya, yo imesaṃ pañhānaṃ veyyākaraṇena cittaṃ ārādheyya aññatra tathāgatena vā, tathāgatasāvakena vā, ito vā pana sutvā’’ti – idamavoca sā devatā. Idaṃ vatvā tatthevantaradhāyi.
250. அத² கோ² ஆயஸ்மா குமாரகஸ்ஸபோ தஸ்ஸா ரத்தியா அச்சயேன யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா குமாரகஸ்ஸபோ ப⁴க³வந்தங் ஏதத³வோச – ‘‘இமங், ப⁴ந்தே, ரத்திங் அஞ்ஞதரா தே³வதா அபி⁴க்கந்தாய ரத்தியா அபி⁴க்கந்தவண்ணா கேவலகப்பங் அந்த⁴வனங் ஓபா⁴ஸெத்வா யேனாஹங் தேனுபஸங்கமி; உபஸங்கமித்வா ஏகமந்தங் அட்டா²ஸி. ஏகமந்தங் டி²தா கோ², ப⁴ந்தே, ஸா தே³வதா மங் ஏதத³வோச – ‘பி⁴க்கு² பி⁴க்கு², அயங் வம்மிகோ ரத்திங் தூ⁴மாயதி, தி³வா பஜ்ஜலதி’. ப்³ராஹ்மணோ ஏவமாஹ – ‘அபி⁴க்க²ண, ஸுமேத⁴, ஸத்த²ங் ஆதா³யா’தி. அபி⁴க்க²ணந்தோ ஸுமேதோ⁴ ஸத்த²ங் ஆதா³ய…பே॰… இதோ வா பன ஸுத்வாதி. இத³மவோச, ப⁴ந்தே, ஸா தே³வதா. இத³ங் வத்வா தத்தே²வந்தரதா⁴யி. ‘கோ நு கோ², ப⁴ந்தே, வம்மிகோ, கா ரத்திங் தூ⁴மாயனா, கா தி³வா பஜ்ஜலனா, கோ ப்³ராஹ்மணோ, கோ ஸுமேதோ⁴, கிங் ஸத்த²ங், கிங் அபி⁴க்க²ணங், கா லங்கீ³, கா உத்³து⁴மாயிகா, கோ த்³விதா⁴பதோ², கிங் சங்க³வாரங், கோ கும்மோ, கா அஸிஸூனா , கா மங்ஸபேஸி, கோ நாகோ³’’’தி?
250. Atha kho āyasmā kumārakassapo tassā rattiyā accayena yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā kumārakassapo bhagavantaṃ etadavoca – ‘‘imaṃ, bhante, rattiṃ aññatarā devatā abhikkantāya rattiyā abhikkantavaṇṇā kevalakappaṃ andhavanaṃ obhāsetvā yenāhaṃ tenupasaṅkami; upasaṅkamitvā ekamantaṃ aṭṭhāsi. Ekamantaṃ ṭhitā kho, bhante, sā devatā maṃ etadavoca – ‘bhikkhu bhikkhu, ayaṃ vammiko rattiṃ dhūmāyati, divā pajjalati’. Brāhmaṇo evamāha – ‘abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya…pe… ito vā pana sutvāti. Idamavoca, bhante, sā devatā. Idaṃ vatvā tatthevantaradhāyi. ‘Ko nu kho, bhante, vammiko, kā rattiṃ dhūmāyanā, kā divā pajjalanā, ko brāhmaṇo, ko sumedho, kiṃ satthaṃ, kiṃ abhikkhaṇaṃ, kā laṅgī, kā uddhumāyikā, ko dvidhāpatho, kiṃ caṅgavāraṃ, ko kummo, kā asisūnā , kā maṃsapesi, ko nāgo’’’ti?
251. ‘‘‘வம்மிகோ’தி கோ², பி⁴க்கு², இமஸ்ஸேதங் சாதுமஹாபூ⁴திகஸ்ஸ 5 காயஸ்ஸ அதி⁴வசனங், மாதாபெத்திகஸம்ப⁴வஸ்ஸ ஓத³னகும்மாஸூபசயஸ்ஸ அனிச்சுச்சா²த³ன-பரிமத்³த³னபே⁴த³ன-வித்³த⁴ங்ஸன-த⁴ம்மஸ்ஸ.
251. ‘‘‘Vammiko’ti kho, bhikkhu, imassetaṃ cātumahābhūtikassa 6 kāyassa adhivacanaṃ, mātāpettikasambhavassa odanakummāsūpacayassa aniccucchādana-parimaddanabhedana-viddhaṃsana-dhammassa.
‘‘‘ப்³ராஹ்மணோ’தி கோ², பி⁴க்கு², ததா²க³தஸ்ஸேதங் அதி⁴வசனங் அரஹதோ ஸம்மாஸம்பு³த்³த⁴ஸ்ஸ. ‘ஸுமேதோ⁴’தி கோ² பி⁴க்கு² ஸெக்க²ஸ்ஸேதங் பி⁴க்கு²னோ அதி⁴வசனங்.
‘‘‘Brāhmaṇo’ti kho, bhikkhu, tathāgatassetaṃ adhivacanaṃ arahato sammāsambuddhassa. ‘Sumedho’ti kho bhikkhu sekkhassetaṃ bhikkhuno adhivacanaṃ.
‘‘‘ஸத்த²’ந்தி கோ², பி⁴க்கு², அரியாயேதங் பஞ்ஞாய அதி⁴வசனங். ‘அபி⁴க்க²ண’ந்தி கோ², பி⁴க்கு², வீரியாரம்ப⁴ஸ்ஸேதங் அதி⁴வசனங்.
‘‘‘Sattha’nti kho, bhikkhu, ariyāyetaṃ paññāya adhivacanaṃ. ‘Abhikkhaṇa’nti kho, bhikkhu, vīriyārambhassetaṃ adhivacanaṃ.
‘‘‘லங்கீ³’தி கோ², பி⁴க்கு², அவிஜ்ஜாயேதங் அதி⁴வசனங். உக்கி²ப லங்கி³ங், பஜஹ அவிஜ்ஜங்; அபி⁴க்க²ண, ஸுமேத⁴, ஸத்த²ங் ஆதா³யாதி அயமேதஸ்ஸ அத்தோ².
‘‘‘Laṅgī’ti kho, bhikkhu, avijjāyetaṃ adhivacanaṃ. Ukkhipa laṅgiṃ, pajaha avijjaṃ; abhikkhaṇa, sumedha, satthaṃ ādāyāti ayametassa attho.
‘‘‘உத்³து⁴மாயிகா’தி கோ², பி⁴க்கு², கோதூ⁴பாயாஸஸ்ஸேதங் அதி⁴வசனங். உக்கி²ப உத்³து⁴மாயிகங், பஜஹ கோதூ⁴பாயாஸங்; அபி⁴க்க²ண, ஸுமேத⁴, ஸத்த²ங் ஆதா³யாதி அயமேதஸ்ஸ அத்தோ².
‘‘‘Uddhumāyikā’ti kho, bhikkhu, kodhūpāyāsassetaṃ adhivacanaṃ. Ukkhipa uddhumāyikaṃ, pajaha kodhūpāyāsaṃ; abhikkhaṇa, sumedha, satthaṃ ādāyāti ayametassa attho.
‘‘‘த்³விதா⁴பதோ²’தி கோ², பி⁴க்கு², விசிகிச்சா²யேதங் அதி⁴வசனங். உக்கி²ப த்³விதா⁴பத²ங், பஜஹ விசிகிச்ச²ங்; அபி⁴க்க²ண, ஸுமேத⁴, ஸத்த²ங் ஆதா³யாதி அயமேதஸ்ஸ அத்தோ².
‘‘‘Dvidhāpatho’ti kho, bhikkhu, vicikicchāyetaṃ adhivacanaṃ. Ukkhipa dvidhāpathaṃ, pajaha vicikicchaṃ; abhikkhaṇa, sumedha, satthaṃ ādāyāti ayametassa attho.
‘‘‘சங்க³வார’ந்தி கோ², பி⁴க்கு², பஞ்சன்னேதங் நீவரணானங் அதி⁴வசனங், ஸெய்யதி²த³ங் – காமச்ச²ந்த³னீவரணஸ்ஸ, ப்³யாபாத³னீவரணஸ்ஸ, தீ²னமித்³த⁴னீவரணஸ்ஸ, உத்³த⁴ச்சகுக்குச்சனீவரணஸ்ஸ, விசிகிச்சா²னீவரணஸ்ஸ. உக்கி²ப சங்க³வாரங், பஜஹ பஞ்ச நீவரணே ; அபி⁴க்க²ண, ஸுமேத⁴, ஸத்த²ங் ஆதா³யாதி அயமேதஸ்ஸ அத்தோ².
‘‘‘Caṅgavāra’nti kho, bhikkhu, pañcannetaṃ nīvaraṇānaṃ adhivacanaṃ, seyyathidaṃ – kāmacchandanīvaraṇassa, byāpādanīvaraṇassa, thīnamiddhanīvaraṇassa, uddhaccakukkuccanīvaraṇassa, vicikicchānīvaraṇassa. Ukkhipa caṅgavāraṃ, pajaha pañca nīvaraṇe ; abhikkhaṇa, sumedha, satthaṃ ādāyāti ayametassa attho.
‘‘‘கும்மோ’தி கோ², பி⁴க்கு², பஞ்சன்னேதங் உபாதா³னக்க²ந்தா⁴னங் அதி⁴வசனங், ஸெய்யதி²த³ங் – ரூபுபாதா³னக்க²ந்த⁴ஸ்ஸ, வேத³னுபாதா³னக்க²ந்த⁴ஸ்ஸ, ஸஞ்ஞுபாதா³னக்க²ந்த⁴ஸ்ஸ, ஸங்கா²ருபாதா³னக்க²ந்த⁴ஸ்ஸ, விஞ்ஞாணுபாதா³னக்க²ந்த⁴ஸ்ஸ. உக்கி²ப கும்மங், பஜஹ பஞ்சுபாதா³னக்க²ந்தே⁴; அபி⁴க்க²ண, ஸுமேத⁴, ஸத்த²ங் ஆதா³யாதி அயமேதஸ்ஸ அத்தோ².
‘‘‘Kummo’ti kho, bhikkhu, pañcannetaṃ upādānakkhandhānaṃ adhivacanaṃ, seyyathidaṃ – rūpupādānakkhandhassa, vedanupādānakkhandhassa, saññupādānakkhandhassa, saṅkhārupādānakkhandhassa, viññāṇupādānakkhandhassa. Ukkhipa kummaṃ, pajaha pañcupādānakkhandhe; abhikkhaṇa, sumedha, satthaṃ ādāyāti ayametassa attho.
‘‘‘அஸிஸூனா’தி கோ², பி⁴க்கு², பஞ்சன்னேதங் காமகு³ணானங் அதி⁴வசனங் – சக்கு²விஞ்ஞெய்யானங் ரூபானங் இட்டா²னங் கந்தானங் மனாபானங் பியரூபானங் காமூபஸங்ஹிதானங் ரஜனீயானங், ஸோதவிஞ்ஞெய்யானங் ஸத்³தா³னங்…பே॰… கா⁴னவிஞ்ஞெய்யானங் க³ந்தா⁴னங்…பே॰… ஜிவ்ஹாவிஞ்ஞெய்யானங் ரஸானங்…பே॰… காயவிஞ்ஞெய்யானங் பொ²ட்ட²ப்³பா³னங் இட்டா²னங் கந்தானங் மனாபானங் பியரூபானங் காமூபஸங்ஹிதானங் ரஜனீயானங். உக்கி²ப அஸிஸூனங், பஜஹ பஞ்ச காமகு³ணே; அபி⁴க்க²ண, ஸுமேத⁴, ஸத்த²ங் ஆதா³யாதி அயமேதஸ்ஸ அத்தோ².
‘‘‘Asisūnā’ti kho, bhikkhu, pañcannetaṃ kāmaguṇānaṃ adhivacanaṃ – cakkhuviññeyyānaṃ rūpānaṃ iṭṭhānaṃ kantānaṃ manāpānaṃ piyarūpānaṃ kāmūpasaṃhitānaṃ rajanīyānaṃ, sotaviññeyyānaṃ saddānaṃ…pe… ghānaviññeyyānaṃ gandhānaṃ…pe… jivhāviññeyyānaṃ rasānaṃ…pe… kāyaviññeyyānaṃ phoṭṭhabbānaṃ iṭṭhānaṃ kantānaṃ manāpānaṃ piyarūpānaṃ kāmūpasaṃhitānaṃ rajanīyānaṃ. Ukkhipa asisūnaṃ, pajaha pañca kāmaguṇe; abhikkhaṇa, sumedha, satthaṃ ādāyāti ayametassa attho.
‘‘‘மங்ஸபேஸீ’தி கோ², பி⁴க்கு², நந்தீ³ராக³ஸ்ஸேதங் அதி⁴வசனங். உக்கி²ப மங்ஸபேஸிங், பஜஹ நந்தீ³ராக³ங்; அபி⁴க்க²ண, ஸுமேத⁴, ஸத்த²ங் ஆதா³யாதி அயமேதஸ்ஸ அத்தோ².
‘‘‘Maṃsapesī’ti kho, bhikkhu, nandīrāgassetaṃ adhivacanaṃ. Ukkhipa maṃsapesiṃ, pajaha nandīrāgaṃ; abhikkhaṇa, sumedha, satthaṃ ādāyāti ayametassa attho.
‘‘‘நாகோ³’தி கோ², பி⁴க்கு², கீ²ணாஸவஸ்ஸேதங் பி⁴க்கு²னோ அதி⁴வசனங். திட்ட²து நாகோ³, மா நாக³ங் க⁴ட்டேஸி; நமோ கரோஹி நாக³ஸ்ஸாதி அயமேதஸ்ஸ அத்தோ²’’தி.
‘‘‘Nāgo’ti kho, bhikkhu, khīṇāsavassetaṃ bhikkhuno adhivacanaṃ. Tiṭṭhatu nāgo, mā nāgaṃ ghaṭṭesi; namo karohi nāgassāti ayametassa attho’’ti.
இத³மவோச ப⁴க³வா. அத்தமனோ ஆயஸ்மா குமாரகஸ்ஸபோ ப⁴க³வதோ பா⁴ஸிதங் அபி⁴னந்தீ³தி.
Idamavoca bhagavā. Attamano āyasmā kumārakassapo bhagavato bhāsitaṃ abhinandīti.
வம்மிகஸுத்தங் நிட்டி²தங் ததியங்.
Vammikasuttaṃ niṭṭhitaṃ tatiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 3. வம்மிகஸுத்தவண்ணனா • 3. Vammikasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 3. வம்மிகஸுத்தவண்ணனா • 3. Vammikasuttavaṇṇanā
