| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
7. வனபத்த²பரியாயஸுத்தவண்ணனா
7. Vanapatthapariyāyasuttavaṇṇanā
190. ஏவங் மே ஸுதந்தி வனபத்த²பரியாயங். தத்த² வனபத்த²பரியாயந்தி வனபத்த²காரணங், வனபத்த²தே³ஸனங் வா.
190.Evaṃme sutanti vanapatthapariyāyaṃ. Tattha vanapatthapariyāyanti vanapatthakāraṇaṃ, vanapatthadesanaṃ vā.
191. வனபத்த²ங் உபனிஸ்ஸாய விஹரதீதி மனுஸ்ஸூபசாராதிக்கந்தங் வனஸண்ட³ஸேனாஸனங் நிஸ்ஸாய ஸமணத⁴ம்மங் கரொந்தோ விஹரதி. அனுபட்டி²தாதிஆதீ³ஸு புப்³பே³ அனுபட்டி²தா ஸதி தங் உபனிஸ்ஸாய விஹரதோபி ந உபட்டா²தி, புப்³பே³ அஸமாஹிதங் சித்தங் ந ஸமாதி⁴யதி, புப்³பே³ அபரிக்கீ²ணா ஆஸவா ந பரிக்க²யங் க³ச்ச²ந்தி, புப்³பே³ அனநுப்பத்தங் அனுத்தரங் யோக³க்கே²மஸங்கா²தங் அரஹத்தஞ்ச ந பாபுணாதீதி அத்தோ². ஜீவிதபரிக்கா²ராதி ஜீவிதஸம்பா⁴ரா. ஸமுதா³னேதப்³பா³தி ஸமாஹரிதப்³பா³. கஸிரேன ஸமுதா³க³ச்ச²ந்தீதி து³க்கே²ன உப்பஜ்ஜந்தி. ரத்திபா⁴க³ங் வா தி³வஸபா⁴க³ங் வாதி ரத்திகொட்டா²ஸே வா தி³வஸகொட்டா²ஸே வா. எத்த² ச ரத்திபா⁴கே³ படிஸஞ்சிக்க²மானேன ஞத்வா ரத்திங்யேவ பக்கமிதப்³ப³ங், ரத்திங் சண்ட³வாளாதீ³னங் பரிப³ந்தே⁴ ஸதி அருணுக்³க³மனங் ஆக³மேதப்³ப³ங். தி³வஸபா⁴கே³ ஞத்வா தி³வாவ பக்கமிதப்³ப³ங், தி³வா பரிப³ந்தே⁴ ஸதி ஸூரியத்த²ங்க³மனங் ஆக³மேதப்³ப³ங்.
191.Vanapatthaṃ upanissāya viharatīti manussūpacārātikkantaṃ vanasaṇḍasenāsanaṃ nissāya samaṇadhammaṃ karonto viharati. Anupaṭṭhitātiādīsu pubbe anupaṭṭhitā sati taṃ upanissāya viharatopi na upaṭṭhāti, pubbe asamāhitaṃ cittaṃ na samādhiyati, pubbe aparikkhīṇā āsavā na parikkhayaṃ gacchanti, pubbe ananuppattaṃ anuttaraṃ yogakkhemasaṅkhātaṃ arahattañca na pāpuṇātīti attho. Jīvitaparikkhārāti jīvitasambhārā. Samudānetabbāti samāharitabbā. Kasirena samudāgacchantīti dukkhena uppajjanti. Rattibhāgaṃ vā divasabhāgaṃ vāti rattikoṭṭhāse vā divasakoṭṭhāse vā. Ettha ca rattibhāge paṭisañcikkhamānena ñatvā rattiṃyeva pakkamitabbaṃ, rattiṃ caṇḍavāḷādīnaṃ paribandhe sati aruṇuggamanaṃ āgametabbaṃ. Divasabhāge ñatvā divāva pakkamitabbaṃ, divā paribandhe sati sūriyatthaṅgamanaṃ āgametabbaṃ.
192. ஸங்கா²பீதி ஏவங் ஸமணத⁴ம்மஸ்ஸ அனிப்ப²ஜ்ஜனபா⁴வங் ஜானித்வா. அனந்தரவாரே பன ஸங்கா²பீதி ஏவங் ஸமணத⁴ம்மஸ்ஸ நிப்ப²ஜ்ஜனபா⁴வங் ஜானித்வா.
192.Saṅkhāpīti evaṃ samaṇadhammassa anipphajjanabhāvaṃ jānitvā. Anantaravāre pana saṅkhāpīti evaṃ samaṇadhammassa nipphajjanabhāvaṃ jānitvā.
194. யாவஜீவந்தி யாவ ஜீவிதங் பவத்ததி, தாவ வத்த²ப்³ப³மேவ.
194.Yāvajīvanti yāva jīvitaṃ pavattati, tāva vatthabbameva.
195. ஸோ புக்³க³லோதி பத³ஸ்ஸ நானுப³ந்தி⁴தப்³போ³தி இமினா ஸம்ப³ந்தோ⁴. அனாபுச்சா²தி இத⁴ பன தங் புக்³க³லங் அனாபுச்சா² பக்கமிதப்³ப³ந்தி அத்தோ².
195.So puggaloti padassa nānubandhitabboti iminā sambandho. Anāpucchāti idha pana taṃ puggalaṃ anāpucchā pakkamitabbanti attho.
197. ஸங்கா²பீதி ஏவங் ஸமணத⁴ம்மஸ்ஸ அனிப்ப²ஜ்ஜனபா⁴வங் ஞத்வா ஸோ புக்³க³லோ நானுப³ந்தி⁴தப்³போ³, தங் ஆபுச்சா² பக்கமிதப்³ப³ங்.
197.Saṅkhāpīti evaṃ samaṇadhammassa anipphajjanabhāvaṃ ñatvā so puggalo nānubandhitabbo, taṃ āpucchā pakkamitabbaṃ.
198. அபி பனுஜ்ஜமானேனாபீதி அபி நிக்கட்³டீ⁴யமானேனாபி. ஏவரூபோ ஹி புக்³க³லோ ஸசேபி தா³ருகலாபஸதங் வா உத³கக⁴டஸதங் வா வாலிகம்ப³ணஸதங் வா த³ண்ட³ங் ஆஹராபேதி, மா இத⁴ வஸீதி நிக்கட்³டா⁴பேதி வா, தங் தங் க²மாபெத்வா யாவஜீவங் வத்த²ப்³ப³மேவாதி.
198.Apipanujjamānenāpīti api nikkaḍḍhīyamānenāpi. Evarūpo hi puggalo sacepi dārukalāpasataṃ vā udakaghaṭasataṃ vā vālikambaṇasataṃ vā daṇḍaṃ āharāpeti, mā idha vasīti nikkaḍḍhāpeti vā, taṃ taṃ khamāpetvā yāvajīvaṃ vatthabbamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
வனபத்த²பரியாயஸுத்தவண்ணனா நிட்டி²தா.
Vanapatthapariyāyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 7. வனபத்த²ஸுத்தங் • 7. Vanapatthasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 7. வனபத்த²பரியாயஸுத்தவண்ணனா • 7. Vanapatthapariyāyasuttavaṇṇanā
