| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
4. வாஸெட்ட²ஸுத்தங்
4. Vāseṭṭhasuttaṃ
44. ஏகங் ஸமயங் ப⁴க³வா வேஸாலியங் விஹரதி மஹாவனே கூடாகா³ரஸாலாயங். அத² கோ² வாஸெட்டோ² உபாஸகோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² வாஸெட்ட²ங் உபாஸகங் ப⁴க³வா ஏதத³வோச – ‘‘அட்ட²ங்க³ஸமன்னாக³தோ, வாஸெட்ட², உபோஸதோ² உபவுத்தோ² மஹப்ப²லோ ஹோதி…பே॰… அனிந்தி³தா ஸக்³க³முபெந்தி டா²ன’’ந்தி.
44. Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho vāseṭṭho upāsako yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho vāseṭṭhaṃ upāsakaṃ bhagavā etadavoca – ‘‘aṭṭhaṅgasamannāgato, vāseṭṭha, uposatho upavuttho mahapphalo hoti…pe… aninditā saggamupenti ṭhāna’’nti.
ஏவங் வுத்தே வாஸெட்டோ² உபாஸகோ ப⁴க³வந்தங் ஏதத³வோச – ‘‘பியா மே, ப⁴ந்தே, ஞாதிஸாலோஹிதா அட்ட²ங்க³ஸமன்னாக³தங் உபோஸத²ங் உபவஸெய்யுங், பியானம்பி மே அஸ்ஸ ஞாதிஸாலோஹிதானங் தீ³க⁴ரத்தங் ஹிதாய ஸுகா²ய. ஸப்³பே³ சேபி, ப⁴ந்தே, க²த்தியா அட்ட²ங்க³ஸமன்னாக³தங் உபோஸத²ங் உபவஸெய்யுங், ஸப்³பே³ஸம்பிஸ்ஸ க²த்தியானங் தீ³க⁴ரத்தங் ஹிதாய ஸுகா²ய. ஸப்³பே³ சேபி, ப⁴ந்தே, ப்³ராஹ்மணா…பே॰… வெஸ்ஸா … ஸுத்³தா³ அட்ட²ங்க³ஸமன்னாக³தங் உபோஸத²ங் உபவஸெய்யுங், ஸப்³பே³ஸம்பிஸ்ஸ ஸுத்³தா³னங் தீ³க⁴ரத்தங் ஹிதாய ஸுகா²யா’’தி.
Evaṃ vutte vāseṭṭho upāsako bhagavantaṃ etadavoca – ‘‘piyā me, bhante, ñātisālohitā aṭṭhaṅgasamannāgataṃ uposathaṃ upavaseyyuṃ, piyānampi me assa ñātisālohitānaṃ dīgharattaṃ hitāya sukhāya. Sabbe cepi, bhante, khattiyā aṭṭhaṅgasamannāgataṃ uposathaṃ upavaseyyuṃ, sabbesampissa khattiyānaṃ dīgharattaṃ hitāya sukhāya. Sabbe cepi, bhante, brāhmaṇā…pe… vessā … suddā aṭṭhaṅgasamannāgataṃ uposathaṃ upavaseyyuṃ, sabbesampissa suddānaṃ dīgharattaṃ hitāya sukhāyā’’ti.
‘‘ஏவமேதங், வாஸெட்ட², ஏவமேதங், வாஸெட்ட²! ஸப்³பே³ சேபி, வாஸெட்ட², க²த்தியா அட்ட²ங்க³ஸமன்னாக³தங் உபோஸத²ங் உபவஸெய்யுங், ஸப்³பே³ஸம்பிஸ்ஸ க²த்தியானங் தீ³க⁴ரத்தங் ஹிதாய ஸுகா²ய. ஸப்³பே³ சேபி, வாஸெட்ட², ப்³ராஹ்மணா…பே॰… வெஸ்ஸா… ஸுத்³தா³ அட்ட²ங்க³ஸமன்னாக³தங் உபோஸத²ங் உபவஸெய்யுங், ஸப்³பே³ஸம்பிஸ்ஸ ஸுத்³தா³னங் தீ³க⁴ரத்தங் ஹிதாய ஸுகா²ய. ஸதே³வகோ சேபி, வாஸெட்ட², லோகோ ஸமாரகோ ஸப்³ரஹ்மகோ ஸஸ்ஸமணப்³ராஹ்மணீ பஜா ஸதே³வமனுஸ்ஸா அட்ட²ங்க³ஸமன்னாக³தங் உபோஸத²ங் உபவஸெய்யுங் 1, ஸதே³வகஸ்ஸபிஸ்ஸ 2 லோகஸ்ஸ ஸமாரகஸ்ஸ ஸப்³ரஹ்மகஸ்ஸ ஸஸ்ஸமணப்³ராஹ்மணியா பஜாய ஸதே³வமனுஸ்ஸாய தீ³க⁴ரத்தங் ஹிதாய ஸுகா²ய. இமே சேபி, வாஸெட்ட², மஹாஸாலா அட்ட²ங்க³ஸமன்னாக³தங் உபோஸத²ங் உபவஸெய்யுங், இமேஸம்பிஸ்ஸ மஹாஸாலானங் தீ³க⁴ரத்தங் ஹிதாய ஸுகா²ய ( ) 3. கோ பன வாதோ³ மனுஸ்ஸபூ⁴தஸ்ஸா’’தி! சதுத்த²ங்.
‘‘Evametaṃ, vāseṭṭha, evametaṃ, vāseṭṭha! Sabbe cepi, vāseṭṭha, khattiyā aṭṭhaṅgasamannāgataṃ uposathaṃ upavaseyyuṃ, sabbesampissa khattiyānaṃ dīgharattaṃ hitāya sukhāya. Sabbe cepi, vāseṭṭha, brāhmaṇā…pe… vessā… suddā aṭṭhaṅgasamannāgataṃ uposathaṃ upavaseyyuṃ, sabbesampissa suddānaṃ dīgharattaṃ hitāya sukhāya. Sadevako cepi, vāseṭṭha, loko samārako sabrahmako sassamaṇabrāhmaṇī pajā sadevamanussā aṭṭhaṅgasamannāgataṃ uposathaṃ upavaseyyuṃ 4, sadevakassapissa 5 lokassa samārakassa sabrahmakassa sassamaṇabrāhmaṇiyā pajāya sadevamanussāya dīgharattaṃ hitāya sukhāya. Ime cepi, vāseṭṭha, mahāsālā aṭṭhaṅgasamannāgataṃ uposathaṃ upavaseyyuṃ, imesampissa mahāsālānaṃ dīgharattaṃ hitāya sukhāya ( ) 6. Ko pana vādo manussabhūtassā’’ti! Catutthaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4. வாஸெட்ட²ஸுத்தவண்ணனா • 4. Vāseṭṭhasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-8. ஸங்கி²த்தூபோஸத²ஸுத்தாதி³வண்ணனா • 1-8. Saṃkhittūposathasuttādivaṇṇanā
