| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
8. வாஸெட்ட²ஸுத்தவண்ணனா
8. Vāseṭṭhasuttavaṇṇanā
454. ஏவங் மே ஸுதந்தி வாஸெட்ட²ஸுத்தங். தத்த² இச்சா²னங்க³லவனஸண்டே³தி இச்சா²னங்க³லகா³மஸ்ஸ அவிதூ³ரே வனஸண்டே³. சங்கீதி ஆத³யோ பஞ்சபி ஜனா ரஞ்ஞோ பஸேனதி³ஸ்ஸ கோஸலஸ்ஸ புரோஹிதா ஏவ. அஞ்ஞே ச அபி⁴ஞ்ஞாதாதி அஞ்ஞே ச ப³ஹூ அபி⁴ஞ்ஞாதா ப்³ராஹ்மணா. தே கிர ச²ட்டே² ச²ட்டே² மாஸே த்³வீஸு டா²னேஸு ஸன்னிபதந்தி. யதா³ ஜாதிங் ஸோதே⁴துகாமா ஹொந்தி, ததா³ பொக்க²ரஸாதிஸ்ஸ ஸந்திகே ஜாதிஸோத⁴னத்த²ங் உக்கட்டா²ய ஸன்னிபதந்தி. யதா³ மந்தே ஸோதே⁴துகாமா ஹொந்தி, ததா³ இச்சா²னங்க³லே ஸன்னிபதந்தி. இமஸ்மிங் காலே மந்தஸோத⁴னத்த²ங் ஸன்னிபதிங்ஸு. அயமந்தரா கதா²தி யங் அத்தனோ ஸஹாயகபா⁴வானுரூபங் கத²ங் கதெ²ந்தா அனுவிசரிங்ஸு, தஸ்ஸா கதா²ய அந்தரா அயமஞ்ஞா கதா² உத³பாதி³. ஸீலவாதி கு³ணவா. வத்தஸம்பன்னோதி ஆசாரஸம்பன்னோ.
454.Evaṃme sutanti vāseṭṭhasuttaṃ. Tattha icchānaṅgalavanasaṇḍeti icchānaṅgalagāmassa avidūre vanasaṇḍe. Caṅkīti ādayo pañcapi janā rañño pasenadissa kosalassa purohitā eva. Aññe ca abhiññātāti aññe ca bahū abhiññātā brāhmaṇā. Te kira chaṭṭhe chaṭṭhe māse dvīsu ṭhānesu sannipatanti. Yadā jātiṃ sodhetukāmā honti, tadā pokkharasātissa santike jātisodhanatthaṃ ukkaṭṭhāya sannipatanti. Yadā mante sodhetukāmā honti, tadā icchānaṅgale sannipatanti. Imasmiṃ kāle mantasodhanatthaṃ sannipatiṃsu. Ayamantarā kathāti yaṃ attano sahāyakabhāvānurūpaṃ kathaṃ kathentā anuvicariṃsu, tassā kathāya antarā ayamaññā kathā udapādi. Sīlavāti guṇavā. Vattasampannoti ācārasampanno.
455. அனுஞ்ஞாதபடிஞ்ஞாதாதி ஸிக்கி²தா தும்ஹேதி ஏவங் ஆசரியேஹி அனுஞ்ஞாதா, ஆம ஆசரிய ஸிக்கி²தம்ஹாதி ஏவங் ஸயஞ்ச படிஞ்ஞாதா. அஸ்மாதி ப⁴வாம. அஹங் பொக்க²ரஸாதிஸ்ஸ, தாருக்க²ஸ்ஸாயங் மாணவோதி அஹங் பொக்க²ரஸாதிஸ்ஸ ஜெட்ட²ந்தேவாஸீ அக்³க³ஸிஸ்ஸோ, அயங் தாருக்க²ஸ்ஸாதி தீ³பேதி.
455.Anuññātapaṭiññātāti sikkhitā tumheti evaṃ ācariyehi anuññātā, āma ācariya sikkhitamhāti evaṃ sayañca paṭiññātā. Asmāti bhavāma. Ahaṃ pokkharasātissa, tārukkhassāyaṃ māṇavoti ahaṃ pokkharasātissa jeṭṭhantevāsī aggasisso, ayaṃ tārukkhassāti dīpeti.
தேவிஜ்ஜானந்தி திவேதா³னங் ப்³ராஹ்மணானங். யத³க்கா²தந்தி யங் அத்த²தோ ச ப்³யஞ்ஜனதோ ச ஏகங் பத³ம்பி அக்கா²தங். தத்ர கேவலினொஸ்மஸேதி தங் ஸகலங் ஜானநதோ தத்த² நிட்டா²க³தம்ஹாதி அத்தோ². இதா³னி தங் கேவலிபா⁴வங் ஆவிகரொந்தோ பத³கஸ்மாதிஆதி³மாஹ. தத்த² ஜப்பே ஆசரியஸாதி³ஸாதி கத²னட்டா²னே மயங் ஆசரியஸதி³ஸாயேவ.
Tevijjānanti tivedānaṃ brāhmaṇānaṃ. Yadakkhātanti yaṃ atthato ca byañjanato ca ekaṃ padampi akkhātaṃ. Tatra kevalinosmaseti taṃ sakalaṃ jānanato tattha niṭṭhāgatamhāti attho. Idāni taṃ kevalibhāvaṃ āvikaronto padakasmātiādimāha. Tattha jappe ācariyasādisāti kathanaṭṭhāne mayaṃ ācariyasadisāyeva.
கம்முனாதி த³ஸகுஸலகம்மபத²கம்முனா. அயஞ்ஹி புப்³பே³ ஸத்தவித⁴ங் காயவசீகம்மங் ஸந்தா⁴ய ‘‘யதோ கோ², போ⁴, ஸீலவா ஹோதீ’’தி ஆஹ, திவித⁴ங் மனோகம்மங் ஸந்தா⁴ய ‘‘வத்தஸம்பன்னோ’’தி. தேன ஸமன்னாக³தோ ஹி ஆசாரஸம்பன்னோ ஹோதி. சக்கு²மாதி பஞ்சஹி சக்கூ²ஹி சக்கு²மந்தபா⁴வேன ப⁴க³வந்தங் ஆலபதி.
Kammunāti dasakusalakammapathakammunā. Ayañhi pubbe sattavidhaṃ kāyavacīkammaṃ sandhāya ‘‘yato kho, bho, sīlavā hotī’’ti āha, tividhaṃ manokammaṃ sandhāya ‘‘vattasampanno’’ti. Tena samannāgato hi ācārasampanno hoti. Cakkhumāti pañcahi cakkhūhi cakkhumantabhāvena bhagavantaṃ ālapati.
க²யாதீதந்தி ஊனபா⁴வங் அதீதங், பரிபுண்ணந்தி அத்தோ². பேச்சாதி உபக³ந்த்வா. நமஸ்ஸந்தீதி நமோ கரொந்தி.
Khayātītanti ūnabhāvaṃ atītaṃ, paripuṇṇanti attho. Peccāti upagantvā. Namassantīti namo karonti.
சக்கு²ங் லோகே ஸமுப்பன்னந்தி அவிஜ்ஜந்த⁴காரே லோகே தங் அந்த⁴காரங் வித⁴மித்வா லோகஸ்ஸ தி³ட்ட²த⁴ம்மிகாதி³அத்த²த³ஸ்ஸனேன சக்கு² ஹுத்வா ஸமுப்பன்னங்.
Cakkhuṃ loke samuppannanti avijjandhakāre loke taṃ andhakāraṃ vidhamitvā lokassa diṭṭhadhammikādiatthadassanena cakkhu hutvā samuppannaṃ.
456. ஏவங் வாஸெட்டே²ன தோ²மெத்வா யாசிதோ ப⁴க³வா த்³வேபி ஜனே ஸங்க³ண்ஹந்தோ தேஸங் வோ அஹங் ப்³யக்கி²ஸ்ஸந்திஆதி³மாஹ. தத்த² ப்³யக்கி²ஸ்ஸந்தி ப்³யாகரிஸ்ஸாமி. அனுபுப்³ப³ந்தி திட்ட²து தாவ ப்³ராஹ்மணசிந்தா, திணருக்க²கீடபடங்க³தோ பட்டா²ய அனுபடிபாடியா ஆசிக்கி²ஸ்ஸாமீதி அத்தோ². ஜாதிவிப⁴ங்க³ந்தி ஜாதிவித்தா²ரங். அஞ்ஞமஞ்ஞா ஹி ஜாதியோதி தேஸங் தேஸஞ்ஹி பாணானங் ஜாதியோ அஞ்ஞமஞ்ஞா நானப்பகாராதி அத்தோ².
456. Evaṃ vāseṭṭhena thometvā yācito bhagavā dvepi jane saṅgaṇhanto tesaṃ vo ahaṃ byakkhissantiādimāha. Tattha byakkhissanti byākarissāmi. Anupubbanti tiṭṭhatu tāva brāhmaṇacintā, tiṇarukkhakīṭapaṭaṅgato paṭṭhāya anupaṭipāṭiyā ācikkhissāmīti attho. Jātivibhaṅganti jātivitthāraṃ. Aññamaññā hi jātiyoti tesaṃ tesañhi pāṇānaṃ jātiyo aññamaññā nānappakārāti attho.
திணருக்கே²தி அனுபாதி³ன்னகஜாதிங் கத்வா பச்சா² உபாதி³ன்னகஜாதிங் கதெ²ஸ்ஸாமி, ஏவங் தஸ்ஸ ஜாதிபே⁴தோ³ பாகடோ ப⁴விஸ்ஸதீதி இமங் தே³ஸனங் ஆரபி⁴. மஹாஸீவத்தே²ரோ பன ‘‘கிங், ப⁴ந்தே, அனுபாதி³ன்னகங் பீ³ஜனானதாய நானங், உபாதி³ன்னங் கம்மனானதாயாதி? ஏவங் வத்துங் ந வட்டதீ’’தி புச்சி²தோ ஆம ந வட்டதி. கம்மஞ்ஹி யோனியங் கி²பதி. யோனிஸித்³தா⁴ இமே ஸத்தா நானாவண்ணா ஹொந்தீதி. திணருக்கே²தி எத்த² அந்தோபெ²க்³கூ³ ப³ஹிஸாரா அந்தமஸோ தாலனாளிகேராத³யோபி திணானேவ, அந்தோஸாரா பன ப³ஹிபெ²க்³கூ³ ஸப்³பே³ ருக்கா² நாம. ந சாபி படிஜானரேதி மயங் திணா மயங் ருக்கா²தி வா, அஹங் திணங், அஹங் ருக்கோ²தி வா ஏவங் ந ஜானந்தி. லிங்க³ங் ஜாதிமயந்தி அஜானந்தானம்பி ச தேஸங் ஜாதிமயமேவ ஸண்டா²னங் அத்தனோ மூலபூ⁴ததிணாதி³ஸதி³ஸமேவ ஹோதி. கிங் காரணா? அஞ்ஞமஞ்ஞா ஹி ஜாதியோ. யஸ்மா அஞ்ஞா திணஜாதி, அஞ்ஞா ருக்க²ஜாதி. திணேஸுபி அஞ்ஞா தாலஜாதி, அஞ்ஞா நாளிகேரஜாதி, ஏவங் வித்தா²ரேதப்³ப³ங். இமினா இத³ங் த³ஸ்ஸேதி – யங் ஜாதிவஸேன நானா ஹோதி, தங் அத்தனோ படிஞ்ஞங் பரேஸங் வா உபதே³ஸங் வினாபி அஞ்ஞஜாதிதோ விஸேஸேன க³ய்ஹதி. யதி³ ச ஜாதியா ப்³ராஹ்மணோ ப⁴வெய்ய, ஸோபி அத்தனோ படிஞ்ஞங் பரேஸங் வா உபதே³ஸங் வினா க²த்தியதோ வெஸ்ஸதோ ஸுத்³த³தோ வா விஸேஸேன க³ய்ஹெய்ய, ந ச க³ய்ஹதி. தஸ்மா ந ஜாதியா ப்³ராஹ்மணோதி. பரதோ பன ‘‘யதா² ஏதாஸு ஜாதீஸூ’’தி கா³தா²ய ஏதமத்த²ங் வசீபே⁴தே³னேவ ஆவிகரிஸ்ஸதி.
Tiṇarukkheti anupādinnakajātiṃ katvā pacchā upādinnakajātiṃ kathessāmi, evaṃ tassa jātibhedo pākaṭo bhavissatīti imaṃ desanaṃ ārabhi. Mahāsīvatthero pana ‘‘kiṃ, bhante, anupādinnakaṃ bījanānatāya nānaṃ, upādinnaṃ kammanānatāyāti? Evaṃ vattuṃ na vaṭṭatī’’ti pucchito āma na vaṭṭati. Kammañhi yoniyaṃ khipati. Yonisiddhā ime sattā nānāvaṇṇā hontīti. Tiṇarukkheti ettha antopheggū bahisārā antamaso tālanāḷikerādayopi tiṇāneva, antosārā pana bahipheggū sabbe rukkhā nāma. Na cāpi paṭijānareti mayaṃ tiṇā mayaṃ rukkhāti vā, ahaṃ tiṇaṃ, ahaṃ rukkhoti vā evaṃ na jānanti. Liṅgaṃ jātimayanti ajānantānampi ca tesaṃ jātimayameva saṇṭhānaṃ attano mūlabhūtatiṇādisadisameva hoti. Kiṃ kāraṇā? Aññamaññā hi jātiyo. Yasmā aññā tiṇajāti, aññā rukkhajāti. Tiṇesupi aññā tālajāti, aññā nāḷikerajāti, evaṃ vitthāretabbaṃ. Iminā idaṃ dasseti – yaṃ jātivasena nānā hoti, taṃ attano paṭiññaṃ paresaṃ vā upadesaṃ vināpi aññajātito visesena gayhati. Yadi ca jātiyā brāhmaṇo bhaveyya, sopi attano paṭiññaṃ paresaṃ vā upadesaṃ vinā khattiyato vessato suddato vā visesena gayheyya, na ca gayhati. Tasmā na jātiyā brāhmaṇoti. Parato pana ‘‘yathā etāsu jātīsū’’ti gāthāya etamatthaṃ vacībhedeneva āvikarissati.
ஏவங் அனுபாதி³ன்னகேஸு ஜாதிங் த³ஸ்ஸெத்வா உபாதி³ன்னகேஸு த³ஸ்ஸெந்தோ ததோ கீடேதிஆதி³மாஹ. யாவ குந்த²கிபில்லிகேதி குந்த²கிபில்லிகங் பரியந்தங் கத்வாதி அத்தோ². எத்த² ச யே உப்பதித்வா க³ச்ச²ந்தி, தே படங்கா³ நாம. அஞ்ஞமஞ்ஞா ஹி ஜாதியோதி தேஸம்பி நீலரத்தாதி³வண்ணவஸேன ஜாதியோ நானப்பகாராவ ஹொந்தி.
Evaṃ anupādinnakesu jātiṃ dassetvā upādinnakesu dassento tato kīṭetiādimāha. Yāva kunthakipilliketi kunthakipillikaṃ pariyantaṃ katvāti attho. Ettha ca ye uppatitvā gacchanti, te paṭaṅgā nāma. Aññamaññā hi jātiyoti tesampi nīlarattādivaṇṇavasena jātiyo nānappakārāva honti.
கு²த்³த³கேதி காளகாத³யோ. மஹல்லகேதி ஸஸபி³ளாராத³யோ.
Khuddaketi kāḷakādayo. Mahallaketi sasabiḷārādayo.
பாதூ³த³ரேதி உத³ரபாதே³, உத³ரங்யேவ நேஸங் பாதா³தி வுத்தங் ஹோதி. தீ³க⁴பிட்டி²கேதி ஸப்பானஞ்ஹி ஸீஸதோ யாவ நங்கு³ட்டா² பிட்டி²யேவ ஹோதி, தேன தே ‘‘தீ³க⁴பிட்டி²கா’’தி வுச்சந்தி.
Pādūdareti udarapāde, udaraṃyeva nesaṃ pādāti vuttaṃ hoti. Dīghapiṭṭhiketi sappānañhi sīsato yāva naṅguṭṭhā piṭṭhiyeva hoti, tena te ‘‘dīghapiṭṭhikā’’ti vuccanti.
உத³கேதி ஓத³கே, உத³கம்ஹி ஜாதே.
Udaketi odake, udakamhi jāte.
பக்கீ²தி ஸகுணே. தே ஹி பத்தேஹி யந்தீதி பத்தயானா, வேஹாஸங் க³ச்ச²ந்தீதி விஹங்க³மா.
Pakkhīti sakuṇe. Te hi pattehi yantīti pattayānā, vehāsaṃ gacchantīti vihaṅgamā.
ஏவங் த²லஜலாகாஸகோ³சரானங் பாணானங் ஜாதிபே⁴த³ங் த³ஸ்ஸெத்வா இதா³னி யேனாதி⁴ப்பாயேன தங் த³ஸ்ஸேதி, தங் ஆவிகரொந்தோ யதா² ஏதாஸூதி கா³த²மாஹ. தஸ்ஸத்தோ² ஸங்கே²பேன வுத்தோவ. வித்தா²ரதோ பனெத்த² யங் வத்தப்³ப³ங், தங் ஸயமேவ த³ஸ்ஸெந்தோ ந கேஸேஹீதிஆதி³மாஹ. தத்ராயங் யோஜனா – யங் வுத்தங் ‘‘நத்தி² மனுஸ்ஸேஸு லிங்க³ஜாதிமயங் புதூ²’’தி, தங் ஏவங் நத்தீ²தி வேதி³தப்³ப³ங். ஸெய்யதி²த³ங்? ந கேஸேஹீதி. ந ஹி – ‘‘ப்³ராஹ்மணானங் ஏதி³ஸா கேஸா ஹொந்தி, க²த்தியானங் ஏதி³ஸா’’தி நியமோ அத்தி² யதா² ஹத்தி²அஸ்ஸமிகா³தீ³னந்தி இமினா நயேன ஸப்³ப³ங் யோஜேதப்³ப³ங்.
Evaṃ thalajalākāsagocarānaṃ pāṇānaṃ jātibhedaṃ dassetvā idāni yenādhippāyena taṃ dasseti, taṃ āvikaronto yathā etāsūti gāthamāha. Tassattho saṅkhepena vuttova. Vitthārato panettha yaṃ vattabbaṃ, taṃ sayameva dassento na kesehītiādimāha. Tatrāyaṃ yojanā – yaṃ vuttaṃ ‘‘natthi manussesu liṅgajātimayaṃ puthū’’ti, taṃ evaṃ natthīti veditabbaṃ. Seyyathidaṃ? Na kesehīti. Na hi – ‘‘brāhmaṇānaṃ edisā kesā honti, khattiyānaṃ edisā’’ti niyamo atthi yathā hatthiassamigādīnanti iminā nayena sabbaṃ yojetabbaṃ.
லிங்க³ங் ஜாதிமயங் நேவ, யதா² அஞ்ஞாஸு ஜாதிஸூதி இத³ங் பன வுத்தஸ்ஸேவத்த²ஸ்ஸ நிக³மனந்தி வேதி³தப்³ப³ங். தஸ்ஸாயங் யோஜனா – ஏவங் யஸ்மா இமேஹி கேஸாதீ³ஹி நத்தி² மனுஸ்ஸேஸு லிங்க³ங் ஜாதிமயங் புது², தஸ்மா வேதி³தப்³ப³மேதங் ‘‘ப்³ராஹ்மணாதி³பே⁴தே³ஸு மனுஸ்ஸேஸு லிங்க³ங் ஜாதிமயங் நேவ, யதா² அஞ்ஞாஸு ஜாதிஸூ’’தி.
Liṅgaṃ jātimayaṃ neva, yathā aññāsu jātisūti idaṃ pana vuttassevatthassa nigamananti veditabbaṃ. Tassāyaṃ yojanā – evaṃ yasmā imehi kesādīhi natthi manussesu liṅgaṃ jātimayaṃ puthu, tasmā veditabbametaṃ ‘‘brāhmaṇādibhedesu manussesu liṅgaṃ jātimayaṃ neva, yathā aññāsu jātisū’’ti.
457. இதா³னி ஏவங் ஜாதிபே⁴தே³ அஸதிபி ‘‘ப்³ராஹ்மணோ க²த்தியோ’’தி இத³ங் நானத்தங் யதா² ஜாதங் , தங் த³ஸ்ஸேதுங் பச்சத்தந்தி கா³த²மாஹ. தத்த² வோகாரந்தி நானத்தங். அயங் பனெத்த² ஸங்கே²பத்தோ² – யதா² ஹி திரச்சா²னானங் யோனிஸித்³த⁴மேவ கேஸாதி³ஸண்டா²னேன நானத்தங், ததா² ப்³ராஹ்மணாதீ³னங் அத்தனோ அத்தனோ ஸரீரே தங் நத்தி². ஏவங் ஸந்தேபி யதே³தங் ‘‘ப்³ராஹ்மணோ க²த்தியோ’’தி வோகாரங், தங் வோகாரஞ்ச மனுஸ்ஸேஸு ஸமஞ்ஞாய பவுச்சதி, வோஹாரமத்தேனேவ பவுச்சதீதி.
457. Idāni evaṃ jātibhede asatipi ‘‘brāhmaṇo khattiyo’’ti idaṃ nānattaṃ yathā jātaṃ , taṃ dassetuṃ paccattanti gāthamāha. Tattha vokāranti nānattaṃ. Ayaṃ panettha saṅkhepattho – yathā hi tiracchānānaṃ yonisiddhameva kesādisaṇṭhānena nānattaṃ, tathā brāhmaṇādīnaṃ attano attano sarīre taṃ natthi. Evaṃ santepi yadetaṃ ‘‘brāhmaṇo khattiyo’’ti vokāraṃ, taṃ vokārañca manussesu samaññāya pavuccati, vohāramatteneva pavuccatīti.
எத்தாவதா ப⁴க³வா பா⁴ரத்³வாஜஸ்ஸ வாத³ங் நிக்³க³ண்ஹித்வா இதா³னி யதி³ ஜாதியா ப்³ராஹ்மணோ ப⁴வெய்ய, ஆஜீவஸீலாசாரவிபன்னோபி ப்³ராஹ்மணோ ப⁴வெய்ய. யஸ்மா பன போராணா ப்³ராஹ்மணா தஸ்ஸ ப்³ராஹ்மணபா⁴வங் ந இச்ச²ந்தி, லோகே ச அஞ்ஞேபி பண்டி³தமனுஸ்ஸா, தஸ்மா வாஸெட்ட²ஸ்ஸ வாத³ங் பக்³க³ண்ஹந்தோ யோ ஹி கோசி மனுஸ்ஸேஸூதி அட்ட² கா³தா² ஆஹ. தத்த² கோ³ரக்க²ந்தி கெ²த்தரக்க²ங், கஸிகம்மந்தி வுத்தங் ஹோதி. கோ³தி ஹி பத²வியா நாமங், தஸ்மா ஏவமாஹ. புது²ஸிப்பேனாதி தந்தவாயகம்மாதி³னானாஸிப்பேன. வோஹாரந்தி வணிஜ்ஜங். பரபெஸ்ஸேனாதி பரேஸங் வெய்யாவச்சகம்மேன. இஸ்ஸத்த²ந்தி ஆவுத⁴ஜீவிகங், உஸுஞ்ச ஸத்திங் சாதி வுத்தங் ஹோதி. போரோஹிச்சேனாதி புரோஹிதகம்மேன.
Ettāvatā bhagavā bhāradvājassa vādaṃ niggaṇhitvā idāni yadi jātiyā brāhmaṇo bhaveyya, ājīvasīlācāravipannopi brāhmaṇo bhaveyya. Yasmā pana porāṇā brāhmaṇā tassa brāhmaṇabhāvaṃ na icchanti, loke ca aññepi paṇḍitamanussā, tasmā vāseṭṭhassa vādaṃ paggaṇhanto yo hi koci manussesūti aṭṭha gāthā āha. Tattha gorakkhanti khettarakkhaṃ, kasikammanti vuttaṃ hoti. Goti hi pathaviyā nāmaṃ, tasmā evamāha. Puthusippenāti tantavāyakammādinānāsippena. Vohāranti vaṇijjaṃ. Parapessenāti paresaṃ veyyāvaccakammena. Issatthanti āvudhajīvikaṃ, usuñca sattiṃ cāti vuttaṃ hoti. Porohiccenāti purohitakammena.
ஏவங் ப்³ராஹ்மணஸமயேன ச லோகவோஹாரேன ச ஆஜீவஸீலாசாரவிபன்னஸ்ஸ அப்³ராஹ்மணபா⁴வங் ஸாதெ⁴த்வா ஏவங் ஸந்தே ந ஜாதியா ப்³ராஹ்மணோ, கு³ணேஹி பன ப்³ராஹ்மணோ ஹோதி. தஸ்மா யத்த² கத்த²சி குலே ஜாதோ யோ கு³ணவா, ஸோ ப்³ராஹ்மணோ, அயமெத்த² ஞாயோதி ஏவமேதங் ஞாயங் அத்த²தோ ஆபாதெ³த்வா இதா³னி நங் வசீபே⁴தே³ன பகாஸெந்தோ ந சாஹங் ப்³ராஹ்மணந்திஆதி³மாஹ. தஸ்ஸத்தோ² – அஹஞ்ஹி ய்வாயங் சதுன்னங் யோனீனங் யத்த² கத்த²சி ஜாதோ, தத்ராபி விஸேஸேன யோ ப்³ராஹ்மணஸ்ஸ ஸங்வண்ணிதாய மாதரி ஸம்பூ⁴தோ, தங் யோனிஜங் மத்திஸம்ப⁴வங், யா சாயங் உப⁴தோ ஸுஜாதோதிஆதி³னா நயேன ப்³ராஹ்மணேஹி ப்³ராஹ்மணஸ்ஸ பரிஸுத்³த⁴உப்பத்திமக்³க³ஸங்கா²தா யோனி வுத்தா, ஸங்ஸுத்³த⁴க³ஹணிகோதி இமினா ச மாதிஸம்பத்தி, ததோபி ஜாதஸம்பூ⁴தத்தா யோனிஜோ மத்திஸம்ப⁴வோதி வுச்சதி, தங் யோனிஜங் மத்திஸம்ப⁴வங் இமினா ச யோனிஜமத்திஸம்ப⁴வமத்தேன ந ப்³ராஹ்மணங் ப்³ரூமி. கஸ்மா? யஸ்மா, போ⁴ போ⁴தி, வசனமத்தேன அஞ்ஞேஹி ஸகிஞ்சனேஹி விஸிட்ட²த்தா போ⁴வாதி³ நாம ஸோ ஹோதி, ஸசே ஹோதி ஸகிஞ்சனோ ஸபலிபோ³தோ⁴. யோ பனாயங் யத்த² கத்த²சி ஜாதோபி ராகா³தி³கிஞ்சனாபா⁴வேன அகிஞ்சனோ, ஸப்³ப³க³ஹணபடினிஸ்ஸக்³கே³ன அனாதா³னோ, அகிஞ்சனங் அனாதா³னங், தமஹங் ப்³ரூமி ப்³ராஹ்மணங். கஸ்மா? யஸ்மா பா³ஹிதபாபோதி.
Evaṃ brāhmaṇasamayena ca lokavohārena ca ājīvasīlācāravipannassa abrāhmaṇabhāvaṃ sādhetvā evaṃ sante na jātiyā brāhmaṇo, guṇehi pana brāhmaṇo hoti. Tasmā yattha katthaci kule jāto yo guṇavā, so brāhmaṇo, ayamettha ñāyoti evametaṃ ñāyaṃ atthato āpādetvā idāni naṃ vacībhedena pakāsento na cāhaṃ brāhmaṇantiādimāha. Tassattho – ahañhi yvāyaṃ catunnaṃ yonīnaṃ yattha katthaci jāto, tatrāpi visesena yo brāhmaṇassa saṃvaṇṇitāya mātari sambhūto, taṃ yonijaṃ mattisambhavaṃ, yā cāyaṃ ubhato sujātotiādinā nayena brāhmaṇehi brāhmaṇassa parisuddhauppattimaggasaṅkhātā yoni vuttā, saṃsuddhagahaṇikoti iminā ca mātisampatti, tatopi jātasambhūtattā yonijo mattisambhavoti vuccati, taṃ yonijaṃ mattisambhavaṃ iminā ca yonijamattisambhavamattena na brāhmaṇaṃ brūmi. Kasmā? Yasmā, bho bhoti, vacanamattena aññehi sakiñcanehi visiṭṭhattā bhovādi nāma so hoti, sace hoti sakiñcano sapalibodho. Yo panāyaṃ yattha katthaci jātopi rāgādikiñcanābhāvena akiñcano, sabbagahaṇapaṭinissaggena anādāno, akiñcanaṃ anādānaṃ, tamahaṃ brūmibrāhmaṇaṃ. Kasmā? Yasmā bāhitapāpoti.
458. கிஞ்சபி⁴ய்யோ ஸப்³ப³ஸங்யோஜனங் செ²த்வாதிஆதி³ ஸத்தவீஸதி கா³தா². தத்த² ஸப்³ப³ஸங்யோஜனந்தி த³ஸவித⁴ஸங்யோஜனங். ந பரிதஸ்ஸதீதி தண்ஹாபரிதஸ்ஸனாய ந பரிதஸ்ஸதி. ஸங்கா³திக³ந்தி ராக³ஸங்கா³த³யோ அதிக்கந்தங். விஸங்யுத்தந்தி சதூஹி யோனீஹி ஸப்³ப³கிலேஸேஹி வா விஸங்யுத்தங்.
458. Kiñcabhiyyo sabbasaṃyojanaṃ chetvātiādi sattavīsati gāthā. Tattha sabbasaṃyojananti dasavidhasaṃyojanaṃ. Na paritassatīti taṇhāparitassanāya na paritassati. Saṅgātiganti rāgasaṅgādayo atikkantaṃ. Visaṃyuttanti catūhi yonīhi sabbakilesehi vā visaṃyuttaṃ.
நத்³தி⁴ந்தி உபனாஹங். வரத்தந்தி தண்ஹங். ஸந்தா³னந்தி யுத்தபாஸங், தி³ட்டி²பரியுட்டா²னஸ்ஸேதங் அதி⁴வசனங். ஸஹனுக்கமந்தி அனுக்கமோ வுச்சதி பாஸே பவேஸனக³ண்டி², தி³ட்டா²னுஸயஸ்ஸேதங் நாமங். உக்கி²த்தபலிக⁴ந்தி எத்த² பலிகோ⁴தி அவிஜ்ஜா. பு³த்³த⁴ந்தி சதுஸச்சபு³த்³த⁴ங். திதிக்க²தீதி க²மதி.
Naddhinti upanāhaṃ. Varattanti taṇhaṃ. Sandānanti yuttapāsaṃ, diṭṭhipariyuṭṭhānassetaṃ adhivacanaṃ. Sahanukkamanti anukkamo vuccati pāse pavesanagaṇṭhi, diṭṭhānusayassetaṃ nāmaṃ. Ukkhittapalighanti ettha palighoti avijjā. Buddhanti catusaccabuddhaṃ. Titikkhatīti khamati.
க²ந்திப³லந்தி அதி⁴வாஸனக²ந்திப³லங். ஸா பன ஸகிங் உப்பன்னா ப³லானீகங் நாம ந ஹோதி, புனப்புனங் உப்பன்னா பன ஹோதி. தஸ்ஸா அத்தி²தாய ப³லானீகங்.
Khantibalanti adhivāsanakhantibalaṃ. Sā pana sakiṃ uppannā balānīkaṃ nāma na hoti, punappunaṃ uppannā pana hoti. Tassā atthitāya balānīkaṃ.
வதவந்தந்தி து⁴தங்க³வந்தங். ஸீலவந்தந்தி கு³ணவந்தங். அனுஸ்ஸத³ந்தி ராகா³தி³உஸ்ஸத³விரஹிதங். ‘‘அனுஸ்ஸுத’’ந்திபி பாடோ², அனவஸ்ஸுதந்தி அத்தோ². த³ந்தந்தி நிப்³பி³ஸேவனங்.
Vatavantanti dhutaṅgavantaṃ. Sīlavantanti guṇavantaṃ. Anussadanti rāgādiussadavirahitaṃ. ‘‘Anussuta’’ntipi pāṭho, anavassutanti attho. Dantanti nibbisevanaṃ.
ந லிம்பதீதி ந அல்லீயதி. காமேஸூதி கிலேஸகாமவத்து²காமேஸு.
Na limpatīti na allīyati. Kāmesūti kilesakāmavatthukāmesu.
து³க்க²ஸ்ஸ பஜானாதி, இதே⁴வ க²யந்தி எத்த² அரஹத்தப²லங் து³க்க²க்க²யோதி அதி⁴ப்பேதங். பஜானாதீதி அதி⁴க³மவஸேன ஜானாதி. பன்னபா⁴ரந்தி ஓஹிதபா⁴ரங், க²ந்த⁴கிலேஸஅபி⁴ஸங்கா²ரகாமகு³ணபா⁴ரே ஓதாரெத்வா டி²தங். விஸங்யுத்தபத³ங் வுத்தத்த²மேவ.
Dukkhassapajānāti, idheva khayanti ettha arahattaphalaṃ dukkhakkhayoti adhippetaṃ. Pajānātīti adhigamavasena jānāti. Pannabhāranti ohitabhāraṃ, khandhakilesaabhisaṅkhārakāmaguṇabhāre otāretvā ṭhitaṃ. Visaṃyuttapadaṃ vuttatthameva.
க³ம்பீ⁴ரபஞ்ஞந்தி க³ம்பீ⁴ரேஸு ஆரம்மணேஸு பவத்தபஞ்ஞங். மேதா⁴விந்தி பகதிபஞ்ஞாய பஞ்ஞவந்தங்.
Gambhīrapaññanti gambhīresu ārammaṇesu pavattapaññaṃ. Medhāvinti pakatipaññāya paññavantaṃ.
அனாகா³ரேஹி சூப⁴யந்தி அனாகா³ரேஹி ச விஸங்ஸட்ட²ங் உப⁴யஞ்ச, த்³வீஹிபி சேதேஹி விஸங்ஸட்ட²மேவாதி அத்தோ². அனோகஸாரிந்தி ஓகங் வுச்சதி பஞ்சகாமகு³ணாலயோ, தங் அனல்லீயமானந்தி அத்தோ². அப்பிச்ச²ந்தி அனிச்ச²ங்.
Anāgārehicūbhayanti anāgārehi ca visaṃsaṭṭhaṃ ubhayañca, dvīhipi cetehi visaṃsaṭṭhamevāti attho. Anokasārinti okaṃ vuccati pañcakāmaguṇālayo, taṃ anallīyamānanti attho. Appicchanti anicchaṃ.
தஸேஸூதி ஸதண்ஹேஸு. தா²வரேஸூதி நித்தண்ஹேஸு.
Tasesūti sataṇhesu. Thāvaresūti nittaṇhesu.
அத்தத³ண்டே³ஸூதி க³ஹிதத³ண்டே³ஸு. நிப்³பு³தந்தி கிலேஸனிப்³பா³னேன நிப்³பு³தங். ஸாதா³னேஸூதி ஸஉபாதா³னேஸு.
Attadaṇḍesūti gahitadaṇḍesu. Nibbutanti kilesanibbānena nibbutaṃ. Sādānesūti saupādānesu.
ஓஹிதோதி பதிதோ.
Ohitoti patito.
459. அகக்கஸந்தி நித்³தோ³ஸங். ஸதோ³ஸோ ஹி ருக்கோ²பி ஸகக்கஸோதி வுச்சதி. விஞ்ஞாபனிந்தி அத்த²விஞ்ஞாபனிகங். ஸச்சந்தி அவிஸங்வாதி³கங். உதீ³ரயேதி ப⁴ணதி. யாய நாபி⁴ஸஜ்ஜேதி யாய கி³ராய பரஸ்ஸ ஸஜ்ஜனங் வா லக்³க³னங் வா ந கரோதி, தாதி³ஸங் அப²ருஸங் கி³ரங் பா⁴ஸதீதி அத்தோ².
459.Akakkasanti niddosaṃ. Sadoso hi rukkhopi sakakkasoti vuccati. Viññāpaninti atthaviññāpanikaṃ. Saccanti avisaṃvādikaṃ. Udīrayeti bhaṇati. Yāyanābhisajjeti yāya girāya parassa sajjanaṃ vā lagganaṃ vā na karoti, tādisaṃ apharusaṃ giraṃ bhāsatīti attho.
தீ³க⁴ந்தி ஸுத்தாருள்ஹப⁴ண்ட³ங். ரஸ்ஸந்தி விப்பகிண்ணப⁴ண்ட³ங். அணுந்தி கு²த்³த³கங். தூ²லந்தி மஹந்தங். ஸுபா⁴ஸுப⁴ந்தி ஸுந்த³ராஸுந்த³ரங். தீ³க⁴ப⁴ண்ட³ஞ்ஹி அப்பக்³க⁴ம்பி ஹோதி மஹக்³க⁴ம்பி. ரஸ்ஸாதீ³ஸுபி ஏஸேவ நயோ. இதி எத்தாவதா ந ஸப்³ப³ங் பரியாதி³ண்ணங், ‘‘ஸுபா⁴ஸுப⁴’’ந்தி இமினா பன பரியாதி³ண்ணங் ஹோதி.
Dīghanti suttāruḷhabhaṇḍaṃ. Rassanti vippakiṇṇabhaṇḍaṃ. Aṇunti khuddakaṃ. Thūlanti mahantaṃ. Subhāsubhanti sundarāsundaraṃ. Dīghabhaṇḍañhi appagghampi hoti mahagghampi. Rassādīsupi eseva nayo. Iti ettāvatā na sabbaṃ pariyādiṇṇaṃ, ‘‘subhāsubha’’nti iminā pana pariyādiṇṇaṃ hoti.
நிராஸயந்தி நித்தண்ஹங்.
Nirāsayanti nittaṇhaṃ.
ஆலயாதி தண்ஹாலயா. அஞ்ஞாயாதி ஜானித்வா. அமதோக³த⁴ந்தி அமதப்³ப⁴ந்தரங். அனுப்பத்தந்தி அனுபவிட்ட²ங்.
Ālayāti taṇhālayā. Aññāyāti jānitvā. Amatogadhanti amatabbhantaraṃ. Anuppattanti anupaviṭṭhaṃ.
உபோ⁴ ஸங்க³ந்தி உப⁴யம்பேதங் ஸங்க³ங். புஞ்ஞஞ்ஹி ஸக்³கே³ லக்³கா³பேதி, அபுஞ்ஞங் அபாயே, தஸ்மா உப⁴யம்பேதங் ஸங்க³ந்தி ஆஹ. உபச்சகா³தி அதீதோ.
Ubho saṅganti ubhayampetaṃ saṅgaṃ. Puññañhi sagge laggāpeti, apuññaṃ apāye, tasmā ubhayampetaṃ saṅganti āha. Upaccagāti atīto.
அனாவிலந்தி ஆவிலகரணகிலேஸவிரஹிதங். நந்தீ³ப⁴வபரிக்கீ²ணந்தி பரிக்கீ²ணனந்தி³ங் பரிக்கீ²ணப⁴வங்.
Anāvilanti āvilakaraṇakilesavirahitaṃ. Nandībhavaparikkhīṇanti parikkhīṇanandiṃ parikkhīṇabhavaṃ.
‘‘யோ இம’’ந்தி கா³தா²ய அவிஜ்ஜாயேவ விஸங்வாத³கட்டே²ன பலிபதோ², மஹாவிது³க்³க³தாய து³க்³க³ங், ஸங்ஸரணட்டே²ன ஸங்ஸாரோ, மோஹனட்டே²ன மோஹோதி வுத்தோ. திண்ணோதி சதுரோக⁴திண்ணோ. பாரங்க³தோதி நிப்³பா³னங் க³தோ. ஜா²யீதி ஆரம்மணலக்க²ணூபனிஜ்ஜா²னவஸேன ஜா²யீ. அனேஜோதி நித்தண்ஹோ. அனுபாதா³ய நிப்³பு³தோதி கிஞ்சி க³ஹணங் அக்³க³ஹெத்வா ஸப்³ப³கிலேஸனிப்³பா³னேன நிப்³பு³தோ.
‘‘Yo ima’’nti gāthāya avijjāyeva visaṃvādakaṭṭhena palipatho, mahāviduggatāya duggaṃ, saṃsaraṇaṭṭhena saṃsāro, mohanaṭṭhena mohoti vutto. Tiṇṇoti caturoghatiṇṇo. Pāraṅgatoti nibbānaṃ gato. Jhāyīti ārammaṇalakkhaṇūpanijjhānavasena jhāyī. Anejoti nittaṇho. Anupādāyanibbutoti kiñci gahaṇaṃ aggahetvā sabbakilesanibbānena nibbuto.
காமேதி து³விதே⁴பி காமே. அனாகா³ரோதி அனாகா³ரோ ஹுத்வா. பரிப்³ப³ஜேதி பரிப்³ப³ஜதி. காமப⁴வபரிக்கீ²ணந்தி கீ²ணகாமங் கீ²ணப⁴வங்.
Kāmeti duvidhepi kāme. Anāgāroti anāgāro hutvā. Paribbajeti paribbajati. Kāmabhavaparikkhīṇanti khīṇakāmaṃ khīṇabhavaṃ.
மானுஸகங் யோக³ந்தி மானுஸகங் பஞ்சகாமகு³ணயோக³ங். தி³ப்³ப³ங் யோக³ந்தி தி³ப்³ப³ங் பஞ்சகாமகு³ணயோக³ங். ஸப்³ப³யோக³விஸங்யுத்தந்தி ஸப்³ப³கிலேஸயோக³விஸங்யுத்தங்.
Mānusakaṃ yoganti mānusakaṃ pañcakāmaguṇayogaṃ. Dibbaṃ yoganti dibbaṃ pañcakāmaguṇayogaṃ. Sabbayogavisaṃyuttanti sabbakilesayogavisaṃyuttaṃ.
ரதிந்தி பஞ்சகாமகு³ணரதிங். அரதிந்தி குஸலபா⁴வனாய உக்கண்டி²தங். வீரந்தி வீரியவந்தங்.
Ratinti pañcakāmaguṇaratiṃ. Aratinti kusalabhāvanāya ukkaṇṭhitaṃ. Vīranti vīriyavantaṃ.
ஸுக³தந்தி ஸுந்த³ரங் டா²னங் க³தங், ஸுந்த³ராய வா படிபத்தியா க³தங்.
Sugatanti sundaraṃ ṭhānaṃ gataṃ, sundarāya vā paṭipattiyā gataṃ.
க³திந்தி நிப்³ப³த்திங். புரேதி அதீதே. பச்சா²தி அனாக³தே. மஜ்ஜே²தி பச்சுப்பன்னே. கிஞ்சனந்தி கிஞ்சனகாரகோ கிலேஸோ.
Gatinti nibbattiṃ. Pureti atīte. Pacchāti anāgate. Majjheti paccuppanne. Kiñcananti kiñcanakārako kileso.
மஹேஸிந்தி மஹந்தே கு³ணே பரியேஸனட்டே²ன மஹேஸிங். விஜிதாவினந்தி விஜிதவிஜயங்.
Mahesinti mahante guṇe pariyesanaṭṭhena mahesiṃ. Vijitāvinanti vijitavijayaṃ.
460. ஏவங் ப⁴க³வா கு³ணதோ கீ²ணாஸவங்யேவ ப்³ராஹ்மணங் த³ஸ்ஸெத்வா யே ஜாதிதோ ப்³ராஹ்மணோதி அபி⁴னிவேஸங் கரொந்தி, தே இத³ங் அஜானந்தா, ஸாவ நேஸங் தி³ட்டி² து³த்³தி³ட்டீ²தி த³ஸ்ஸெந்தோ ஸமஞ்ஞா ஹேஸாதி கா³தா²த்³வயமாஹ. தஸ்ஸத்தோ² – யதி³த³ங் ப்³ராஹ்மணோ க²த்தியோ பா⁴ரத்³வாஜோ வாஸெட்டோ²தி நாமகொ³த்தங் பகப்பிதங் கதங் அபி⁴ஸங்க²தங், ஸமஞ்ஞா ஹேஸா லோகஸ்மிங், வோஹாரமத்தந்தி அத்தோ². கஸ்மா? யஸ்மா ஸமுச்சா ஸமுதா³க³தங் ஸமஞ்ஞாய ஆக³தங். ஏதஞ்ஹி தத்த² தத்த² ஜாதகாலேயேவஸ்ஸ ஞாதிஸாலோஹிதேஹி பகப்பிதங் கதங். நோ சே நங் ஏவங் பகப்பெய்யுங், ந கோசி கிஞ்சி தி³ஸ்வா அயங் ப்³ராஹ்மணோதி வா பா⁴ரத்³வாஜோதி வா ஜானெய்ய. ஏவங் பகப்பிதங் பேதங் தீ³க⁴ரத்தானுஸயிதங், தி³ட்டி²க³தமஜானதங், தங் பகப்பிதங் நாமகொ³த்தங் ‘‘நாமகொ³த்தமத்தமேதங், வோஹாரத்த²ங் பகப்பித’’ந்தி, அஜானந்தானங் ஸத்தானங் ஹத³யே தீ³க⁴ரத்தங் தி³ட்டி²க³தமனுஸயிதங். தஸ்ஸ அனுஸயிதத்தா தங் நாமகொ³த்தங் அஜானந்தா நோ பப்³ருந்தி, ‘‘ஜாதியா ஹோதி ப்³ராஹ்மணோ’’தி அஜானந்தாவ ஏவங் வத³ந்தீதி வுத்தங் ஹோதி.
460. Evaṃ bhagavā guṇato khīṇāsavaṃyeva brāhmaṇaṃ dassetvā ye jātito brāhmaṇoti abhinivesaṃ karonti, te idaṃ ajānantā, sāva nesaṃ diṭṭhi duddiṭṭhīti dassento samaññā hesāti gāthādvayamāha. Tassattho – yadidaṃ brāhmaṇo khattiyo bhāradvājo vāseṭṭhoti nāmagottaṃ pakappitaṃ kataṃ abhisaṅkhataṃ, samaññā hesā lokasmiṃ, vohāramattanti attho. Kasmā? Yasmā samuccā samudāgataṃ samaññāya āgataṃ. Etañhi tattha tattha jātakāleyevassa ñātisālohitehi pakappitaṃ kataṃ. No ce naṃ evaṃ pakappeyyuṃ, na koci kiñci disvā ayaṃ brāhmaṇoti vā bhāradvājoti vā jāneyya. Evaṃ pakappitaṃ petaṃ dīgharattānusayitaṃ, diṭṭhigatamajānataṃ, taṃ pakappitaṃ nāmagottaṃ ‘‘nāmagottamattametaṃ, vohāratthaṃ pakappita’’nti, ajānantānaṃ sattānaṃ hadaye dīgharattaṃ diṭṭhigatamanusayitaṃ. Tassa anusayitattā taṃ nāmagottaṃ ajānantā no pabrunti, ‘‘jātiyā hoti brāhmaṇo’’ti ajānantāva evaṃ vadantīti vuttaṃ hoti.
ஏவங் ‘‘யே ‘ஜாதிதோ ப்³ராஹ்மணோ’தி அபி⁴னிவேஸங் கரொந்தி, தே இத³ங் வோஹாரமத்தங் அஜானந்தா, ஸாவ நேஸங் தி³ட்டி² து³த்³தி³ட்டீ²’’தி த³ஸ்ஸெத்வா இதா³னி நிப்பரியாயமேவ ஜாதிவாத³ங் படிக்கி²பந்தோ கம்மவாத³ஞ்ச பதிட்ட²பெந்தோ ந ஜச்சாதிஆதி³மாஹ. தத்த² ‘‘கம்முனா’’தி உபட்³ட⁴கா³தா²ய வித்தா²ரணத்த²ங் கஸ்ஸகோ கம்முனாதிஆதி³ வுத்தங். தத்த² கம்முனாதி பச்சுப்பன்னேன கஸிகம்மாதி³னிப்³ப³த்தகசேதனாகம்முனா.
Evaṃ ‘‘ye ‘jātito brāhmaṇo’ti abhinivesaṃ karonti, te idaṃ vohāramattaṃ ajānantā, sāva nesaṃ diṭṭhi duddiṭṭhī’’ti dassetvā idāni nippariyāyameva jātivādaṃ paṭikkhipanto kammavādañca patiṭṭhapento na jaccātiādimāha. Tattha ‘‘kammunā’’ti upaḍḍhagāthāya vitthāraṇatthaṃ kassako kammunātiādi vuttaṃ. Tattha kammunāti paccuppannena kasikammādinibbattakacetanākammunā.
படிச்சஸமுப்பாத³த³ஸ்ஸாதி இமினா பச்சயேன ஏவங் ஹோதீதி ஏவங் படிச்சஸமுப்பாத³த³ஸ்ஸாவினோ. கம்மவிபாககோவிதா³தி ஸம்மானாவமானாரஹகுலே கம்மவஸேன உப்பத்தி ஹோதி, அஞ்ஞாபி ஹீனபணீததா ஹீனபணீதே கம்மே விபச்சமானே ஹோதீதி. ஏவங் கம்மவிபாககுஸலா.
Paṭiccasamuppādadassāti iminā paccayena evaṃ hotīti evaṃ paṭiccasamuppādadassāvino. Kammavipākakovidāti sammānāvamānārahakule kammavasena uppatti hoti, aññāpi hīnapaṇītatā hīnapaṇīte kamme vipaccamāne hotīti. Evaṃ kammavipākakusalā.
கம்முனா வத்ததீதி கா³தா²ய பன லோகோதி வா பஜாதி வா ஸத்தோதி வா ஏகோயேவத்தோ², வசனமத்தபே⁴தோ³. புரிமபதே³ன செத்த² ‘‘அத்தி² ப்³ரஹ்மா மஹாப்³ரஹ்மா ஸெட்டோ² ஸஜிதா’’தி தி³ட்டி²யா படிஸேதோ⁴ வேதி³தப்³போ³. கம்முனா ஹி தாஸு தாஸு க³தீஸு வத்ததி லோகோ, தஸ்ஸ கோ ஸஜிதாதி. து³தியபதே³ன ‘‘ஏவங் கம்முனா நிப்³ப³த்தோபி ச பவத்தேபி அதீதபச்சுப்பன்னபே⁴தே³ன கம்முனா வத்ததி, ஸுக²து³க்கா²னி பச்சனுபொ⁴ந்தோ ஹீனபணீதாதி³பே⁴த³ஞ்ச ஆபஜ்ஜந்தோ பவத்ததீ’’தி த³ஸ்ஸேதி. ததியேன தமேவத்த²ங் நிக³மேதி ‘‘ஏவங் ஸப்³ப³தா²பி கம்மனிப³ந்த⁴னா ஸத்தா கம்மேனேவ ப³த்³தா⁴ ஹுத்வா பவத்தந்தி, ந அஞ்ஞதா²’’தி. சதுத்தே²ன தமெத்த²ங் உபமாய விபா⁴வேதி. யதா² ஹி ரத²ஸ்ஸ யாயதோ ஆணி நிப³ந்த⁴னங் ஹோதி, ந தாய அனிப³த்³தோ⁴ யாதி, ஏவங் லோகஸ்ஸ நிப்³ப³த்ததோ ச பவத்ததோ ச கம்மங் நிப³ந்த⁴னங், ந தேன அனிப³த்³தோ⁴ நிப்³ப³த்ததி ந பவத்ததி.
Kammunā vattatīti gāthāya pana lokoti vā pajāti vā sattoti vā ekoyevattho, vacanamattabhedo. Purimapadena cettha ‘‘atthi brahmā mahābrahmā seṭṭho sajitā’’ti diṭṭhiyā paṭisedho veditabbo. Kammunā hi tāsu tāsu gatīsu vattati loko, tassa ko sajitāti. Dutiyapadena ‘‘evaṃ kammunā nibbattopi ca pavattepi atītapaccuppannabhedena kammunā vattati, sukhadukkhāni paccanubhonto hīnapaṇītādibhedañca āpajjanto pavattatī’’ti dasseti. Tatiyena tamevatthaṃ nigameti ‘‘evaṃ sabbathāpi kammanibandhanā sattā kammeneva baddhā hutvā pavattanti, na aññathā’’ti. Catutthena tametthaṃ upamāya vibhāveti. Yathā hi rathassa yāyato āṇi nibandhanaṃ hoti, na tāya anibaddho yāti, evaṃ lokassa nibbattato ca pavattato ca kammaṃ nibandhanaṃ, na tena anibaddho nibbattati na pavattati.
இதா³னி யஸ்மா ஏவங் கம்மனிப³ந்த⁴னோ லோகோ, தஸ்மா ஸெட்டே²ன கம்முனா ஸெட்ட²பா⁴வங் த³ஸ்ஸெந்தோ தபேனாதி கா³தா²த்³வயமாஹ. தத்த² தபேனாதி து⁴தங்க³தபேன. ப்³ரஹ்மசரியேனாதி மேது²னவிரதியா. ஸங்யமேனாதி ஸீலேன . த³மேனாதி இந்த்³ரியத³மேன. ஏதேனாதி ஏதேன ஸெட்டே²ன பரிஸுத்³தே⁴ன ப்³ரஹ்மபூ⁴தேன கம்முனா ப்³ராஹ்மணோ ஹோதி. கஸ்மா? யஸ்மா ஏதங் ப்³ராஹ்மணமுத்தமங், யஸ்மா ஏதங் கம்மங் உத்தமோ ப்³ராஹ்மணகு³ணோதி வுத்தங் ஹோதி. ‘‘ப்³ரஹ்மான’’ந்திபி பாடோ². அயங் பனெத்த² வசனத்தோ² – ப்³ரஹ்மங் ஆனேதீதி ப்³ரஹ்மானங், ப்³ராஹ்மணபா⁴வங் ஆவஹதீதி வுத்தங் ஹோதி.
Idāni yasmā evaṃ kammanibandhano loko, tasmā seṭṭhena kammunā seṭṭhabhāvaṃ dassento tapenāti gāthādvayamāha. Tattha tapenāti dhutaṅgatapena. Brahmacariyenāti methunaviratiyā. Saṃyamenāti sīlena . Damenāti indriyadamena. Etenāti etena seṭṭhena parisuddhena brahmabhūtena kammunā brāhmaṇo hoti. Kasmā? Yasmā etaṃ brāhmaṇamuttamaṃ, yasmā etaṃ kammaṃ uttamo brāhmaṇaguṇoti vuttaṃ hoti. ‘‘Brahmāna’’ntipi pāṭho. Ayaṃ panettha vacanattho – brahmaṃ ānetīti brahmānaṃ, brāhmaṇabhāvaṃ āvahatīti vuttaṃ hoti.
து³தியகா³தா²ய ஸந்தோதி ஸந்தகிலேஸோ. ப்³ரஹ்மா ஸக்கோதி ப்³ரஹ்மா ச ஸக்கோ ச, யோ ஏவரூபோ, ஸோ ந கேவலங் ப்³ராஹ்மணோ, அத² கோ² ப்³ரஹ்மா ச ஸக்கோ ச ஸோ விஜானதங் பண்டி³தானங், ஏவங் வாஸெட்ட², ஜானாஹீதி வுத்தங் ஹோதி. ஸேஸங் ஸப்³ப³த்த² உத்தானமேவாதி.
Dutiyagāthāya santoti santakileso. Brahmā sakkoti brahmā ca sakko ca, yo evarūpo, so na kevalaṃ brāhmaṇo, atha kho brahmā ca sakko ca so vijānataṃ paṇḍitānaṃ, evaṃ vāseṭṭha, jānāhīti vuttaṃ hoti. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
வாஸெட்ட²ஸுத்தவண்ணனா நிட்டி²தா.
Vāseṭṭhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 8. வாஸெட்ட²ஸுத்தங் • 8. Vāseṭṭhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 8. வாஸெட்ட²ஸுத்தவண்ணனா • 8. Vāseṭṭhasuttavaṇṇanā
