| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
9. வாஸிஜடஸுத்தவண்ணனா
9. Vāsijaṭasuttavaṇṇanā
101. அத்த²ஸ்ஸாதி ஹிதஸ்ஸ. அஸாதி⁴கா ‘‘பா⁴வனானுயோக³ங் அனநுயுத்தஸ்ஸா’’தி அனநுயுத்தஸ்ஸ வுத்தத்தா. இதராதி ஸுக்கபக்க²உபமா. ஸாதி⁴கா பா⁴வனாயோக³ஸ்ஸ அனுயுத்தத்தா. தஞ்ஹி தஸ்ஸ ஸாதி⁴கா வேதி³தப்³பா³. ஸம்பா⁴வனத்தே²தி பரமத்த²ஸம்பா⁴வனே. ஏவஞ்ஹி கண்ஹபக்கே²பி அபிஸத்³த³க்³க³ஹணங் ஸமத்தி²தங் ஹோதி. ஸம்பா⁴வனத்தே²தி வா பரிகப்பனத்தே²தி அத்தோ². ஸங்கா²தப்³பே³ அத்தே² அனியமதோ வுச்சமானே ஸங்கா²தோ அனியமத்தோ² வாஸத்³தோ³ வத்தப்³போ³தி ‘‘அட்ட² வா’’திஆதி³ வுத்தங். ஊனாதி⁴கானீதி ஊனானிபி அதி⁴கானிபி கிஞ்சாபி ஹொந்தி, ஏகங்ஸோ பன க³ஹேதப்³போ³தி ‘‘அட்ட² வா த³ஸ வா த்³வாத³ஸ வா’’தி வுத்தங். ஏவங் வசனங் ஸந்தா⁴ய ‘‘வசனஸிலிட்ட²தாயா’’திஆதி³ வுத்தங். பாத³னக²ஸிகா²ஹி அகோபனவஸேன ஸம்மா அதி⁴ஸயிதானி. உதுந்தி உண்ஹஉதுங் காயுஸ்மாவஸேன. தேனாஹ ‘‘உஸ்மீகதானீ’’தி. பா⁴விதானீதி குக்குடவாஸனாய வாஸிதானி. ஸம்மாஅதி⁴ஸயனாதி³திவித⁴கிரியாகரணேன இமங் அப்பமாத³ங் கத்வா. ஸொத்தி²னா அபி⁴னிப்³பி⁴ஜ்ஜிதுந்தி அனந்தராயேன ததோ நிக்க²மிதுங். இதா³னி தமத்த²ங் விவரந்தோ ‘‘தே ஹீ’’திஆதி³மாஹ. ஸயம்பீதி அண்டா³னி. பரிணாமந்தி பரிபக்கங் ப³ஹினிக்க²மனயொக்³க³தங்.
101.Atthassāti hitassa. Asādhikā ‘‘bhāvanānuyogaṃ ananuyuttassā’’ti ananuyuttassa vuttattā. Itarāti sukkapakkhaupamā. Sādhikā bhāvanāyogassa anuyuttattā. Tañhi tassa sādhikā veditabbā. Sambhāvanattheti paramatthasambhāvane. Evañhi kaṇhapakkhepi apisaddaggahaṇaṃ samatthitaṃ hoti. Sambhāvanattheti vā parikappanattheti attho. Saṅkhātabbe atthe aniyamato vuccamāne saṅkhāto aniyamattho vāsaddo vattabboti ‘‘aṭṭha vā’’tiādi vuttaṃ. Ūnādhikānīti ūnānipi adhikānipi kiñcāpi honti, ekaṃso pana gahetabboti ‘‘aṭṭha vā dasa vā dvādasa vā’’ti vuttaṃ. Evaṃ vacanaṃ sandhāya ‘‘vacanasiliṭṭhatāyā’’tiādi vuttaṃ. Pādanakhasikhāhi akopanavasena sammā adhisayitāni. Utunti uṇhautuṃ kāyusmāvasena. Tenāha ‘‘usmīkatānī’’ti. Bhāvitānīti kukkuṭavāsanāya vāsitāni. Sammāadhisayanāditividhakiriyākaraṇena imaṃ appamādaṃ katvā. Sotthinā abhinibbhijjitunti anantarāyena tato nikkhamituṃ. Idāni tamatthaṃ vivaranto ‘‘te hī’’tiādimāha. Sayampīti aṇḍāni. Pariṇāmanti paripakkaṃ bahinikkhamanayoggataṃ.
தந்தி ஓபம்மஸம்படிபாத³னங். ஏவந்தி இதா³னி வுச்சமானாகாரேன. அத்தே²னாதி உபமெய்யத்தே²ன. ஸங்ஸந்தி³த்வா ஸம்மா யோஜெத்வா. ஸம்பயுத்தத⁴ம்மவஸேன ஞாணஸ்ஸ திக்கா²தி³பா⁴வோ வேதி³தப்³போ³. ஞாணஸ்ஸ ஹி ஸபா⁴வதோ ஸதினேபக்கதோ ச திக்க²பா⁴வோ, ஸமாதி⁴வஸேன ஸூரபா⁴வோ, ஸத்³தா⁴வஸேன விப்பஸன்னபா⁴வோ , வீரியவஸேன பரிணாமபா⁴வோ. பரிணாமகாலோதி ப³லவவிபஸ்ஸனாகாலோ. வட்³டி⁴தகாலோதி வுட்டா²னகா³மினிவிபஸ்ஸனாகாலோ. அனுலோமட்டா²னஸ்ஸ ஹி விபஸ்ஸனா க³ஹிதக³ப்³பா⁴ நாம ததா³ மக்³க³க³ப்³ப⁴ஸ்ஸ க³ஹிதத்தா. தஜ்ஜாதிகந்தி தஸ்ஸ விபஸ்ஸனானுயோக³ஸ்ஸ அனுரூபங். ஸத்தா²பி கா³தா²ய அவிஜ்ஜண்ட³கோஸங் பஹரதி பி⁴ந்தா³பேதி.
Tanti opammasampaṭipādanaṃ. Evanti idāni vuccamānākārena. Atthenāti upameyyatthena. Saṃsanditvā sammā yojetvā. Sampayuttadhammavasena ñāṇassa tikkhādibhāvo veditabbo. Ñāṇassa hi sabhāvato satinepakkato ca tikkhabhāvo, samādhivasena sūrabhāvo, saddhāvasena vippasannabhāvo , vīriyavasena pariṇāmabhāvo. Pariṇāmakāloti balavavipassanākālo. Vaḍḍhitakāloti vuṭṭhānagāminivipassanākālo. Anulomaṭṭhānassa hi vipassanā gahitagabbhā nāma tadā maggagabbhassa gahitattā. Tajjātikanti tassa vipassanānuyogassa anurūpaṃ. Satthāpi gāthāya avijjaṇḍakosaṃ paharati bhindāpeti.
ஓலம்ப³கஸங்கா²தந்தி ஓலம்ப³கஸுத்தஸங்கா²தங். பலந்தி தஸ்ஸ ஸுத்தஸ்ஸ நாமங். தா⁴ரெத்வாதி தா³ரூனங் ஹெய்யாதி³ஜானநத்த²ங் உபனெத்வா. தா³ரூனங் க³ண்ட³ங் ஹரதீதி பலக³ண்டோ³தி ஏதேன பலேன க³ண்ட³ஹாரோ ‘‘பலக³ண்டோ³’’தி பச்சி²மபதே³ உத்தரபத³லோபேன நித்³தே³ஸோதி த³ஸ்ஸேதி. க³ஹணட்டா²னேதி ஹத்தே²ன க³ஹேதப்³ப³ட்டா²னே. ஸம்மதே³வ கே²பீயந்தி ஏதேன காயது³ச்சரிதாதீ³னீதி ஸங்கே²போ, தேன. விபஸ்ஸனங் அனுயுஞ்ஜந்தஸ்ஸ புக்³க³லஸ்ஸேவ தி³வஸே தி³வஸே ஆஸவானங் பரிக்க²யோ இத⁴ ‘‘விபஸ்ஸனாயானிஸங்ஸோ’’தி அதி⁴ப்பேதோ. ஹேமந்திகேன கரணபூ⁴தேன. பு⁴ம்மத்தே² வா ஏதங் கரணவசனங், ஹேமந்திகேதி அத்தோ². படிப்பஸ்ஸம்ப⁴ந்தீதி படிப்பஸ்ஸத்³த⁴ப²லானி ஹொந்தி. தேனாஹ ‘‘பூதிகானி ப⁴வந்தீ’’தி.
Olambakasaṅkhātanti olambakasuttasaṅkhātaṃ. Palanti tassa suttassa nāmaṃ. Dhāretvāti dārūnaṃ heyyādijānanatthaṃ upanetvā. Dārūnaṃ gaṇḍaṃ haratīti palagaṇḍoti etena palena gaṇḍahāro ‘‘palagaṇḍo’’ti pacchimapade uttarapadalopena niddesoti dasseti. Gahaṇaṭṭhāneti hatthena gahetabbaṭṭhāne. Sammadeva khepīyanti etena kāyaduccaritādīnīti saṅkhepo, tena. Vipassanaṃ anuyuñjantassa puggalasseva divase divase āsavānaṃ parikkhayo idha ‘‘vipassanāyānisaṃso’’ti adhippeto. Hemantikena karaṇabhūtena. Bhummatthe vā etaṃ karaṇavacanaṃ, hemantiketi attho. Paṭippassambhantīti paṭippassaddhaphalāni honti. Tenāha ‘‘pūtikāni bhavantī’’ti.
மஹாஸமுத்³தோ³ விய ஸாஸனங் ஸபா⁴வக³ம்பீ⁴ரபா⁴வதோ. நாவா விய யோகா³வசரோ மஹோகு⁴த்தரணதோ. பரியாதா³னங் வியாதி பரிதோ அபரிபூரணங் விய. க²ஜ்ஜமானானந்தி ஸங்கா²த³ந்தேன விய உத³கேன கே²பியமானானங் ப³ந்த⁴னானங். தனுபா⁴வோதி பரியுட்டா²னுப்பத்தியா அஸமத்த²தாய து³ப்³ப³லபா⁴வோ. விபஸ்ஸனாஞாணபீதிபாமோஜ்ஜேஹீதி விபஸ்ஸனாஞாணஸமுட்டி²தேஹி பீதிபாமோஜ்ஜேஹி. ஒக்கா²யமானே பக்கா²யமானேதி விவித⁴படிபத்தியா உக்கா²யமானே படிஸங்கா²னுபஸ்ஸனாய பக்கா²யமானே. து³ப்³ப³லதா தீ³பிதா ‘‘அப்பகஸிரேனேவ ஸங்யோஜனானி படிப்பஸ்ஸம்ப⁴ந்தி, பூதிகானி ப⁴வந்தீ’’தி வுத்தத்தா.
Mahāsamuddo viya sāsanaṃ sabhāvagambhīrabhāvato. Nāvā viya yogāvacaro mahoghuttaraṇato. Pariyādānaṃ viyāti parito aparipūraṇaṃ viya. Khajjamānānanti saṅkhādantena viya udakena khepiyamānānaṃ bandhanānaṃ. Tanubhāvoti pariyuṭṭhānuppattiyā asamatthatāya dubbalabhāvo. Vipassanāñāṇapītipāmojjehīti vipassanāñāṇasamuṭṭhitehi pītipāmojjehi. Okkhāyamāne pakkhāyamāneti vividhapaṭipattiyā ukkhāyamāne paṭisaṅkhānupassanāya pakkhāyamāne. Dubbalatā dīpitā ‘‘appakasireneva saṃyojanāni paṭippassambhanti, pūtikāni bhavantī’’ti vuttattā.
வாஸிஜடஸுத்தவண்ணனா நிட்டி²தா.
Vāsijaṭasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 9. வாஸிஜடஸுத்தங் • 9. Vāsijaṭasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9. வாஸிஜடஸுத்தவண்ணனா • 9. Vāsijaṭasuttavaṇṇanā
