| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. து³தியவக்³கோ³
2. Dutiyavaggo
1. வதபத³ஸுத்தவண்ணனா
1. Vatapadasuttavaṇṇanā
257. ஸமாதா³தப்³ப³தோ வதானி, அஞ்ஞமஞ்ஞங் அஸங்கரஸபா⁴வேன பப்³ப³ஜிதப்³ப³தோ பதா³னி, ததோ ஏவ அஸங்கிண்ணபா⁴கா³தி கத்வா ‘‘வதகொட்டா²ஸானீ’’தி வுத்தங். ஸமத்தானீதி புஞ்ஞவிஸேஸதாய புஜ்ஜப⁴வப²லனிப்³ப³த்தனேன கித்திஸஞ்ஞானேன ச ஸமங் அத்தானி ஸமத்தானி. பரிபுண்ணானீதி அக²ண்டா³தி³பா⁴வேன ஸப்³ப³ஸோ புண்ணானி. ஸமாதி³ன்னானீதி தத்த² ஸக்கச்சகாரிதாய ஸம்மா ஆதி³ன்னானி. மாதுலானீதி பிதுப⁴கி³னீ, ந யா காசி மாதுலஸ்ஸ ப⁴ரியா குலஜெட்ட²கானங் அதி⁴ப்பேதத்தா, ப⁴ரியாபி வா மாதுலஸம்ப³ந்த⁴தோ க³ஹேதப்³பா³, ததா² ஸதி மஹாபிதுப⁴ரியாதீ³னம்பி ஸங்க³ஹோ த³ட்ட²ப்³போ³.
257. Samādātabbato vatāni, aññamaññaṃ asaṅkarasabhāvena pabbajitabbato padāni, tato eva asaṃkiṇṇabhāgāti katvā ‘‘vatakoṭṭhāsānī’’ti vuttaṃ. Samattānīti puññavisesatāya pujjabhavaphalanibbattanena kittisaññānena ca samaṃ attāni samattāni. Paripuṇṇānīti akhaṇḍādibhāvena sabbaso puṇṇāni. Samādinnānīti tattha sakkaccakāritāya sammā ādinnāni. Mātulānīti pitubhaginī, na yā kāci mātulassa bhariyā kulajeṭṭhakānaṃ adhippetattā, bhariyāpi vā mātulasambandhato gahetabbā, tathā sati mahāpitubhariyādīnampi saṅgaho daṭṭhabbo.
ஆதி³-ஸத்³தே³ன ஜெட்ட²ப⁴கி³னீனங் ஸங்க³ஹோ. அபசிதிகாரகோதி தேஸங் பச்சுட்டா²னகரோ. யோ கோசி த³த³ந்தோபி ஸாபெக்கோ² தே³தி, ஸோ முத்தசாகோ³ ந ஹோதி, அயங் பன ந ஏவந்தி ‘‘முத்தசாகோ³ ஹோதீ’’தி வுத்தங். விஸ்ஸட்ட²சாகோ³தி நிரபெக்க²பரிச்சாகோ³தி அத்தோ². யதா² பாணாதிபாதப³ஹுலோ ‘‘லோஹிதபாணீ’’தி வுச்சதி, ததா² தா³னப³ஹுலோ ‘‘பயதபாணீ’’தி வுத்தோதி ஆஹ ‘‘தெ³ய்யத⁴ம்மதா³னத்தா²ய ஸதா³ தோ⁴தஹத்தோ²’’தி. வொஸ்ஸக்³க³ரதோதி தெ³ய்யத⁴ம்மஸ்ஸ பரிச்சஜனே அபி⁴ரதோ. பரேஹி யாசிதப்³பா³ரஹோதி பரேஹி யாசிதுங் யுத்தோ இச்சி²தஸ்ஸ அத்த²ஸ்ஸ தாவதே³வ விஸ்ஸஜ்ஜனதோ. தா³னேனேவ யுத்தோதி ஸப்³ப³காலங் தா³னேனேவ யுத்தோ அபி⁴ண்ஹங் பவத்தமஹாதா³னத்தா. தா³னே ச ஸங்விபா⁴கே³ சாதி பரஸ்ஸ ஸம்புண்ணங் கத்வா பரிச்சஜனஸங்கா²தே தா³னே ச அத்தனா பரிபு⁴ஞ்ஜிதப்³ப³தோ ஸங்விப⁴ஜனஸங்கா²தே ஸங்விபா⁴கே³ ச ரதோ அபி⁴ரதோ.
Ādi-saddena jeṭṭhabhaginīnaṃ saṅgaho. Apacitikārakoti tesaṃ paccuṭṭhānakaro. Yo koci dadantopi sāpekkho deti, so muttacāgo na hoti, ayaṃ pana na evanti ‘‘muttacāgo hotī’’ti vuttaṃ. Vissaṭṭhacāgoti nirapekkhapariccāgoti attho. Yathā pāṇātipātabahulo ‘‘lohitapāṇī’’ti vuccati, tathā dānabahulo ‘‘payatapāṇī’’ti vuttoti āha ‘‘deyyadhammadānatthāya sadā dhotahattho’’ti. Vossaggaratoti deyyadhammassa pariccajane abhirato. Parehi yācitabbārahoti parehi yācituṃ yutto icchitassa atthassa tāvadeva vissajjanato. Dāneneva yuttoti sabbakālaṃ dāneneva yutto abhiṇhaṃ pavattamahādānattā. Dāne ca saṃvibhāge cāti parassa sampuṇṇaṃ katvā pariccajanasaṅkhāte dāne ca attanā paribhuñjitabbato saṃvibhajanasaṅkhāte saṃvibhāge ca rato abhirato.
வதபத³ஸுத்தவண்ணனா நிட்டி²தா.
Vatapadasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. வதபத³ஸுத்தங் • 1. Vatapadasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. வதபத³ஸுத்தவண்ணனா • 1. Vatapadasuttavaṇṇanā
