| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૨. દુતિયવગ્ગો
2. Dutiyavaggo
૧. વતપદસુત્તવણ્ણના
1. Vatapadasuttavaṇṇanā
૨૫૭. સમાદાતબ્બતો વતાનિ, અઞ્ઞમઞ્ઞં અસઙ્કરસભાવેન પબ્બજિતબ્બતો પદાનિ, તતો એવ અસંકિણ્ણભાગાતિ કત્વા ‘‘વતકોટ્ઠાસાની’’તિ વુત્તં. સમત્તાનીતિ પુઞ્ઞવિસેસતાય પુજ્જભવફલનિબ્બત્તનેન કિત્તિસઞ્ઞાનેન ચ સમં અત્તાનિ સમત્તાનિ. પરિપુણ્ણાનીતિ અખણ્ડાદિભાવેન સબ્બસો પુણ્ણાનિ. સમાદિન્નાનીતિ તત્થ સક્કચ્ચકારિતાય સમ્મા આદિન્નાનિ. માતુલાનીતિ પિતુભગિની, ન યા કાચિ માતુલસ્સ ભરિયા કુલજેટ્ઠકાનં અધિપ્પેતત્તા, ભરિયાપિ વા માતુલસમ્બન્ધતો ગહેતબ્બા, તથા સતિ મહાપિતુભરિયાદીનમ્પિ સઙ્ગહો દટ્ઠબ્બો.
257. Samādātabbato vatāni, aññamaññaṃ asaṅkarasabhāvena pabbajitabbato padāni, tato eva asaṃkiṇṇabhāgāti katvā ‘‘vatakoṭṭhāsānī’’ti vuttaṃ. Samattānīti puññavisesatāya pujjabhavaphalanibbattanena kittisaññānena ca samaṃ attāni samattāni. Paripuṇṇānīti akhaṇḍādibhāvena sabbaso puṇṇāni. Samādinnānīti tattha sakkaccakāritāya sammā ādinnāni. Mātulānīti pitubhaginī, na yā kāci mātulassa bhariyā kulajeṭṭhakānaṃ adhippetattā, bhariyāpi vā mātulasambandhato gahetabbā, tathā sati mahāpitubhariyādīnampi saṅgaho daṭṭhabbo.
આદિ-સદ્દેન જેટ્ઠભગિનીનં સઙ્ગહો. અપચિતિકારકોતિ તેસં પચ્ચુટ્ઠાનકરો. યો કોચિ દદન્તોપિ સાપેક્ખો દેતિ, સો મુત્તચાગો ન હોતિ, અયં પન ન એવન્તિ ‘‘મુત્તચાગો હોતી’’તિ વુત્તં. વિસ્સટ્ઠચાગોતિ નિરપેક્ખપરિચ્ચાગોતિ અત્થો. યથા પાણાતિપાતબહુલો ‘‘લોહિતપાણી’’તિ વુચ્ચતિ, તથા દાનબહુલો ‘‘પયતપાણી’’તિ વુત્તોતિ આહ ‘‘દેય્યધમ્મદાનત્થાય સદા ધોતહત્થો’’તિ. વોસ્સગ્ગરતોતિ દેય્યધમ્મસ્સ પરિચ્ચજને અભિરતો. પરેહિ યાચિતબ્બારહોતિ પરેહિ યાચિતું યુત્તો ઇચ્છિતસ્સ અત્થસ્સ તાવદેવ વિસ્સજ્જનતો. દાનેનેવ યુત્તોતિ સબ્બકાલં દાનેનેવ યુત્તો અભિણ્હં પવત્તમહાદાનત્તા. દાને ચ સંવિભાગે ચાતિ પરસ્સ સમ્પુણ્ણં કત્વા પરિચ્ચજનસઙ્ખાતે દાને ચ અત્તના પરિભુઞ્જિતબ્બતો સંવિભજનસઙ્ખાતે સંવિભાગે ચ રતો અભિરતો.
Ādi-saddena jeṭṭhabhaginīnaṃ saṅgaho. Apacitikārakoti tesaṃ paccuṭṭhānakaro. Yo koci dadantopi sāpekkho deti, so muttacāgo na hoti, ayaṃ pana na evanti ‘‘muttacāgo hotī’’ti vuttaṃ. Vissaṭṭhacāgoti nirapekkhapariccāgoti attho. Yathā pāṇātipātabahulo ‘‘lohitapāṇī’’ti vuccati, tathā dānabahulo ‘‘payatapāṇī’’ti vuttoti āha ‘‘deyyadhammadānatthāya sadā dhotahattho’’ti. Vossaggaratoti deyyadhammassa pariccajane abhirato. Parehi yācitabbārahoti parehi yācituṃ yutto icchitassa atthassa tāvadeva vissajjanato. Dāneneva yuttoti sabbakālaṃ dāneneva yutto abhiṇhaṃ pavattamahādānattā. Dāne ca saṃvibhāge cāti parassa sampuṇṇaṃ katvā pariccajanasaṅkhāte dāne ca attanā paribhuñjitabbato saṃvibhajanasaṅkhāte saṃvibhāge ca rato abhirato.
વતપદસુત્તવણ્ણના નિટ્ઠિતા.
Vatapadasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૧. વતપદસુત્તં • 1. Vatapadasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૧. વતપદસુત્તવણ્ણના • 1. Vatapadasuttavaṇṇanā
