| Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૭. વત્થદાયકત્થેરઅપદાનવણ્ણના
7. Vatthadāyakattheraapadānavaṇṇanā
પક્ખિજાતો તદા આસિન્તિઆદિકં આયસ્મતો વત્થદાયકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો અત્થદસ્સિસ્સ ભગવતો કાલે સુપણ્ણયોનિયં નિબ્બત્તો ગન્ધમાદનપબ્બતં ગચ્છન્તં અત્થદસ્સિં ભગવન્તં દિસ્વા પસન્નમાનસો સુપણ્ણવણ્ણં વિજહિત્વા માણવકવણ્ણં નિમ્મિનિત્વા મહગ્ઘં દિબ્બવત્થં આદાય ભગવન્તં પૂજેસિ. સોપિ ભગવા પટિગ્ગહેત્વા અનુમોદનં વત્વા પક્કામિ. સો તેનેવ સોમનસ્સેન વીતિનામેત્વા યાવતાયુકં ઠત્વા તતો ચુતો દેવલોકે નિબ્બત્તો તત્થ અપરાપરં સંસરન્તો પુઞ્ઞાનિ અનુભવિત્વા તતો મનુસ્સેસુ મનુસ્સસમ્પત્તિન્તિ સબ્બત્થ મહગ્ઘં વત્થાભરણં લદ્ધં, તતો ઉપ્પન્નુપ્પન્નભવે વત્થચ્છાયાય ગતગતટ્ઠાને વસન્તો ઇમસ્મિં બુદ્ધુપ્પાદે એકસ્મિં કુલગેહે નિબ્બત્તો વિઞ્ઞુતં પત્તો સત્થરિ પસીદિત્વા પબ્બજિતો નચિરસ્સેવ છળભિઞ્ઞપ્પત્તખીણાસવો અહોસિ, પુબ્બે કતપુઞ્ઞનામેન વત્થદાયકત્થેરોતિ પાકટો.
Pakkhijātotadā āsintiādikaṃ āyasmato vatthadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle supaṇṇayoniyaṃ nibbatto gandhamādanapabbataṃ gacchantaṃ atthadassiṃ bhagavantaṃ disvā pasannamānaso supaṇṇavaṇṇaṃ vijahitvā māṇavakavaṇṇaṃ nimminitvā mahagghaṃ dibbavatthaṃ ādāya bhagavantaṃ pūjesi. Sopi bhagavā paṭiggahetvā anumodanaṃ vatvā pakkāmi. So teneva somanassena vītināmetvā yāvatāyukaṃ ṭhatvā tato cuto devaloke nibbatto tattha aparāparaṃ saṃsaranto puññāni anubhavitvā tato manussesu manussasampattinti sabbattha mahagghaṃ vatthābharaṇaṃ laddhaṃ, tato uppannuppannabhave vatthacchāyāya gatagataṭṭhāne vasanto imasmiṃ buddhuppāde ekasmiṃ kulagehe nibbatto viññutaṃ patto satthari pasīditvā pabbajito nacirasseva chaḷabhiññappattakhīṇāsavo ahosi, pubbe katapuññanāmena vatthadāyakattheroti pākaṭo.
૪૫. સો અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો પક્ખિજાતો તદા આસિન્તિઆદિમાહ. તત્થ પક્ખિજાતોતિ પક્ખન્દતિ ઉપલવતિ સકુણો એતેનાતિ પક્ખં, પક્ખમસ્સ અત્થીતિ પક્ખી, પક્ખિયોનિયં જાતો નિબ્બત્તોતિ અત્થો. સુપણ્ણોતિ સુન્દરં પણ્ણં પત્તં યસ્સ સો સુપણ્ણો, વાતગ્ગાહસુવણ્ણવણ્ણજલમાનપત્તમહાભારોતિ અત્થો. ગરુળાધિપોતિ નાગે ગણ્હનત્થાય ગરું ભારં પાસાણં ગિળન્તીતિ ગરુળા, ગરુળાનં અધિપો રાજાતિ ગરુળાધિપો, વિરજં બુદ્ધં અદ્દસાહન્તિ સમ્બન્ધો.
45. So attano pubbakammaṃ saritvā somanassajāto pubbacaritāpadānaṃ pakāsento pakkhijāto tadā āsintiādimāha. Tattha pakkhijātoti pakkhandati upalavati sakuṇo etenāti pakkhaṃ, pakkhamassa atthīti pakkhī, pakkhiyoniyaṃ jāto nibbattoti attho. Supaṇṇoti sundaraṃ paṇṇaṃ pattaṃ yassa so supaṇṇo, vātaggāhasuvaṇṇavaṇṇajalamānapattamahābhāroti attho. Garuḷādhipoti nāge gaṇhanatthāya garuṃ bhāraṃ pāsāṇaṃ giḷantīti garuḷā, garuḷānaṃ adhipo rājāti garuḷādhipo, virajaṃ buddhaṃ addasāhanti sambandho.
વત્થદાયકત્થેરઅપદાનવણ્ણના સમત્તા.
Vatthadāyakattheraapadānavaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi / ૭. વત્થદાયકત્થેરઅપદાનં • 7. Vatthadāyakattheraapadānaṃ
