| Library / Tipiṭaka / திபிடக • Tipiṭaka / மஜ்ஜி²மனிகாய • Majjhimanikāya |
7. வத்த²ஸுத்தங்
7. Vatthasuttaṃ
70. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
70. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘ஸெய்யதா²பி, பி⁴க்க²வே, வத்த²ங் ஸங்கிலிட்ட²ங் மலக்³க³ஹிதங்; தமேனங் ரஜகோ யஸ்மிங் யஸ்மிங் ரங்க³ஜாதே உபஸங்ஹரெய்ய – யதி³ நீலகாய யதி³ பீதகாய யதி³ லோஹிதகாய யதி³ மஞ்ஜிட்ட²காய 1 து³ரத்தவண்ணமேவஸ்ஸ அபரிஸுத்³த⁴வண்ணமேவஸ்ஸ. தங் கிஸ்ஸ ஹேது? அபரிஸுத்³த⁴த்தா, பி⁴க்க²வே, வத்த²ஸ்ஸ. ஏவமேவ கோ², பி⁴க்க²வே, சித்தே ஸங்கிலிட்டே², து³க்³க³தி பாடிகங்கா². ஸெய்யதா²பி, பி⁴க்க²வே, வத்த²ங் பரிஸுத்³த⁴ங் பரியோதா³தங்; தமேனங் ரஜகோ யஸ்மிங் யஸ்மிங் ரங்க³ஜாதே உபஸங்ஹரெய்ய – யதி³ நீலகாய யதி³ பீதகாய யதி³ லோஹிதகாய யதி³ மஞ்ஜிட்ட²காய – ஸுரத்தவண்ணமேவஸ்ஸ பரிஸுத்³த⁴வண்ணமேவஸ்ஸ. தங் கிஸ்ஸ ஹேது? பரிஸுத்³த⁴த்தா, பி⁴க்க²வே, வத்த²ஸ்ஸ. ஏவமேவ கோ², பி⁴க்க²வே, சித்தே அஸங்கிலிட்டே², ஸுக³தி பாடிகங்கா².
‘‘Seyyathāpi, bhikkhave, vatthaṃ saṃkiliṭṭhaṃ malaggahitaṃ; tamenaṃ rajako yasmiṃ yasmiṃ raṅgajāte upasaṃhareyya – yadi nīlakāya yadi pītakāya yadi lohitakāya yadi mañjiṭṭhakāya 2 durattavaṇṇamevassa aparisuddhavaṇṇamevassa. Taṃ kissa hetu? Aparisuddhattā, bhikkhave, vatthassa. Evameva kho, bhikkhave, citte saṃkiliṭṭhe, duggati pāṭikaṅkhā. Seyyathāpi, bhikkhave, vatthaṃ parisuddhaṃ pariyodātaṃ; tamenaṃ rajako yasmiṃ yasmiṃ raṅgajāte upasaṃhareyya – yadi nīlakāya yadi pītakāya yadi lohitakāya yadi mañjiṭṭhakāya – surattavaṇṇamevassa parisuddhavaṇṇamevassa. Taṃ kissa hetu? Parisuddhattā, bhikkhave, vatthassa. Evameva kho, bhikkhave, citte asaṃkiliṭṭhe, sugati pāṭikaṅkhā.
71. ‘‘கதமே ச, பி⁴க்க²வே, சித்தஸ்ஸ உபக்கிலேஸா? அபி⁴ஜ்ஜா²விஸமலோபோ⁴ சித்தஸ்ஸ உபக்கிலேஸோ, ப்³யாபாதோ³ சித்தஸ்ஸ உபக்கிலேஸோ, கோதோ⁴ சித்தஸ்ஸ உபக்கிலேஸோ, உபனாஹோ சித்தஸ்ஸ உபக்கிலேஸோ, மக்கோ² சித்தஸ்ஸ உபக்கிலேஸோ, பளாஸோ சித்தஸ்ஸ உபக்கிலேஸோ, இஸ்ஸா சித்தஸ்ஸ உபக்கிலேஸோ, மச்ச²ரியங் சித்தஸ்ஸ உபக்கிலேஸோ, மாயா சித்தஸ்ஸ உபக்கிலேஸோ, ஸாடெ²ய்யங் சித்தஸ்ஸ உபக்கிலேஸோ, த²ம்போ⁴ சித்தஸ்ஸ உபக்கிலேஸோ, ஸாரம்போ⁴ சித்தஸ்ஸ உபக்கிலேஸோ, மானோ சித்தஸ்ஸ உபக்கிலேஸோ, அதிமானோ சித்தஸ்ஸ உபக்கிலேஸோ, மதோ³ சித்தஸ்ஸ உபக்கிலேஸோ, பமாதோ³ சித்தஸ்ஸ உபக்கிலேஸோ.
71. ‘‘Katame ca, bhikkhave, cittassa upakkilesā? Abhijjhāvisamalobho cittassa upakkileso, byāpādo cittassa upakkileso, kodho cittassa upakkileso, upanāho cittassa upakkileso, makkho cittassa upakkileso, paḷāso cittassa upakkileso, issā cittassa upakkileso, macchariyaṃ cittassa upakkileso, māyā cittassa upakkileso, sāṭheyyaṃ cittassa upakkileso, thambho cittassa upakkileso, sārambho cittassa upakkileso, māno cittassa upakkileso, atimāno cittassa upakkileso, mado cittassa upakkileso, pamādo cittassa upakkileso.
72. ‘‘ஸ கோ² ஸோ, பி⁴க்க²வே, பி⁴க்கு² ‘அபி⁴ஜ்ஜா²விஸமலோபோ⁴ சித்தஸ்ஸ உபக்கிலேஸோ’தி – இதி விதி³த்வா அபி⁴ஜ்ஜா²விஸமலோப⁴ங் சித்தஸ்ஸ உபக்கிலேஸங் பஜஹதி; ‘ப்³யாபாதோ³ சித்தஸ்ஸ உபக்கிலேஸோ’தி – இதி விதி³த்வா ப்³யாபாத³ங் சித்தஸ்ஸ உபக்கிலேஸங் பஜஹதி ; ‘கோதோ⁴ சித்தஸ்ஸ உபக்கிலேஸோ’தி – இதி விதி³த்வா கோத⁴ங் சித்தஸ்ஸ உபக்கிலேஸங் பஜஹதி; ‘உபனாஹோ சித்தஸ்ஸ உபக்கிலேஸோ’தி – இதி விதி³த்வா உபனாஹங் சித்தஸ்ஸ உபக்கிலேஸங் பஜஹதி; ‘மக்கோ² சித்தஸ்ஸ உபக்கிலேஸோ’தி – இதி விதி³த்வா மக்க²ங் சித்தஸ்ஸ உபக்கிலேஸங் பஜஹதி; ‘பளாஸோ சித்தஸ்ஸ உபக்கிலேஸோ’தி – இதி விதி³த்வா பளாஸங் சித்தஸ்ஸ உபக்கிலேஸங் பஜஹதி; ‘இஸ்ஸா சித்தஸ்ஸ உபக்கிலேஸோ’தி – இதி விதி³த்வா இஸ்ஸங் சித்தஸ்ஸ உபக்கிலேஸங் பஜஹதி; ‘மச்ச²ரியங் சித்தஸ்ஸ உபக்கிலேஸோ’தி – இதி விதி³த்வா மச்ச²ரியங் சித்தஸ்ஸ உபக்கிலேஸங் பஜஹதி; ‘மாயா சித்தஸ்ஸ உபக்கிலேஸோ’தி – இதி விதி³த்வா மாயங் சித்தஸ்ஸ உபக்கிலேஸங் பஜஹதி; ‘ஸாடெ²ய்யங் சித்தஸ்ஸ உபக்கிலேஸோ’தி – இதி விதி³த்வா ஸாடெ²ய்யங் சித்தஸ்ஸ உபக்கிலேஸங் பஜஹதி; ‘த²ம்போ⁴ சித்தஸ்ஸ உபக்கிலேஸோ’தி – இதி விதி³த்வா த²ம்ப⁴ங் சித்தஸ்ஸ உபக்கிலேஸங் பஜஹதி; ‘ஸாரம்போ⁴ சித்தஸ்ஸ உபக்கிலேஸோ’தி – இதி விதி³த்வா ஸாரம்ப⁴ங் சித்தஸ்ஸ உபக்கிலேஸங் பஜஹதி; ‘மானோ சித்தஸ்ஸ உபக்கிலேஸோ’தி – இதி விதி³த்வா மானங் சித்தஸ்ஸ உபக்கிலேஸங் பஜஹதி; ‘அதிமானோ சித்தஸ்ஸ உபக்கிலேஸோ’தி – இதி விதி³த்வா அதிமானங் சித்தஸ்ஸ உபக்கிலேஸங் பஜஹதி; ‘மதோ³ சித்தஸ்ஸ உபக்கிலேஸோ’தி – இதி விதி³த்வா மத³ங் சித்தஸ்ஸ உபக்கிலேஸங் பஜஹதி; ‘பமாதோ³ சித்தஸ்ஸ உபக்கிலேஸோ’தி – இதி விதி³த்வா பமாத³ங் சித்தஸ்ஸ உபக்கிலேஸங் பஜஹதி.
72. ‘‘Sa kho so, bhikkhave, bhikkhu ‘abhijjhāvisamalobho cittassa upakkileso’ti – iti viditvā abhijjhāvisamalobhaṃ cittassa upakkilesaṃ pajahati; ‘byāpādo cittassa upakkileso’ti – iti viditvā byāpādaṃ cittassa upakkilesaṃ pajahati ; ‘kodho cittassa upakkileso’ti – iti viditvā kodhaṃ cittassa upakkilesaṃ pajahati; ‘upanāho cittassa upakkileso’ti – iti viditvā upanāhaṃ cittassa upakkilesaṃ pajahati; ‘makkho cittassa upakkileso’ti – iti viditvā makkhaṃ cittassa upakkilesaṃ pajahati; ‘paḷāso cittassa upakkileso’ti – iti viditvā paḷāsaṃ cittassa upakkilesaṃ pajahati; ‘issā cittassa upakkileso’ti – iti viditvā issaṃ cittassa upakkilesaṃ pajahati; ‘macchariyaṃ cittassa upakkileso’ti – iti viditvā macchariyaṃ cittassa upakkilesaṃ pajahati; ‘māyā cittassa upakkileso’ti – iti viditvā māyaṃ cittassa upakkilesaṃ pajahati; ‘sāṭheyyaṃ cittassa upakkileso’ti – iti viditvā sāṭheyyaṃ cittassa upakkilesaṃ pajahati; ‘thambho cittassa upakkileso’ti – iti viditvā thambhaṃ cittassa upakkilesaṃ pajahati; ‘sārambho cittassa upakkileso’ti – iti viditvā sārambhaṃ cittassa upakkilesaṃ pajahati; ‘māno cittassa upakkileso’ti – iti viditvā mānaṃ cittassa upakkilesaṃ pajahati; ‘atimāno cittassa upakkileso’ti – iti viditvā atimānaṃ cittassa upakkilesaṃ pajahati; ‘mado cittassa upakkileso’ti – iti viditvā madaṃ cittassa upakkilesaṃ pajahati; ‘pamādo cittassa upakkileso’ti – iti viditvā pamādaṃ cittassa upakkilesaṃ pajahati.
73. ‘‘யதோ கோ² 3, பி⁴க்க²வே, பி⁴க்கு²னோ ‘அபி⁴ஜ்ஜா²விஸமலோபோ⁴ சித்தஸ்ஸ உபக்கிலேஸோ’தி – இதி விதி³த்வா அபி⁴ஜ்ஜா²விஸமலோபோ⁴ சித்தஸ்ஸ உபக்கிலேஸோ பஹீனோ ஹோதி, ‘ப்³யாபாதோ³ சித்தஸ்ஸ உபக்கிலேஸோ’தி – இதி விதி³த்வா ப்³யாபாதோ³ சித்தஸ்ஸ உபக்கிலேஸோ பஹீனோ ஹோதி; ‘கோதோ⁴ சித்தஸ்ஸ உபக்கிலேஸோ’தி – இதி விதி³த்வா கோதோ⁴ சித்தஸ்ஸ உபக்கிலேஸோ பஹீனோ ஹோதி; ‘உபனாஹோ சித்தஸ்ஸ உபக்கிலேஸோ’தி – இதி விதி³த்வா உபனாஹோ சித்தஸ்ஸ உபக்கிலேஸோ பஹீனோ ஹோதி; ‘மக்கோ² சித்தஸ்ஸ உபக்கிலேஸோ’தி – இதி விதி³த்வா மக்கோ² சித்தஸ்ஸ உபக்கிலேஸோ பஹீனோ ஹோதி; ‘பளாஸோ சித்தஸ்ஸ உபக்கிலேஸோ’தி – இதி விதி³த்வா பளாஸோ சித்தஸ்ஸ உபக்கிலேஸோ பஹீனோ ஹோதி; ‘இஸ்ஸா சித்தஸ்ஸ உபக்கிலேஸோ’தி – இதி விதி³த்வா இஸ்ஸா சித்தஸ்ஸ உபக்கிலேஸோ பஹீனோ ஹோதி; ‘மச்ச²ரியங் சித்தஸ்ஸ உபக்கிலேஸோ’தி – இதி விதி³த்வா மச்ச²ரியங் சித்தஸ்ஸ உபக்கிலேஸோ பஹீனோ ஹோதி; ‘மாயா சித்தஸ்ஸ உபக்கிலேஸோ’தி – இதி விதி³த்வா மாயா சித்தஸ்ஸ உபக்கிலேஸோ பஹீனோ ஹோதி; ‘ஸாடெ²ய்யங் சித்தஸ்ஸ உபக்கிலேஸோ’தி – இதி விதி³த்வா ஸாடெ²ய்யங் சித்தஸ்ஸ உபக்கிலேஸோ பஹீனோ ஹோதி; ‘த²ம்போ⁴ சித்தஸ்ஸ உபக்கிலேஸோ’தி – இதி விதி³த்வா த²ம்போ⁴ சித்தஸ்ஸ உபக்கிலேஸோ பஹீனோ ஹோதி; ‘ஸாரம்போ⁴ சித்தஸ்ஸ உபக்கிலேஸோ’தி – இதி விதி³த்வா ஸாரம்போ⁴ சித்தஸ்ஸ உபக்கிலேஸோ பஹீனோ ஹோதி; ‘மானோ சித்தஸ்ஸ உபக்கிலேஸோ’தி – இதி விதி³த்வா மானோ சித்தஸ்ஸ உபக்கிலேஸோ பஹீனோ ஹோதி; ‘அதிமானோ சித்தஸ்ஸ உபக்கிலேஸோ’தி – இதி விதி³த்வா அதிமானோ சித்தஸ்ஸ உபக்கிலேஸோ பஹீனோ ஹோதி; ‘மதோ³ சித்தஸ்ஸ உபக்கிலேஸோ’தி – இதி விதி³த்வா மதோ³ சித்தஸ்ஸ உபக்கிலேஸோ பஹீனோ ஹோதி; ‘பமாதோ³ சித்தஸ்ஸ உபக்கிலேஸோ’தி – இதி விதி³த்வா பமாதோ³ சித்தஸ்ஸ உபக்கிலேஸோ பஹீனோ ஹோதி.
73. ‘‘Yato kho 4, bhikkhave, bhikkhuno ‘abhijjhāvisamalobho cittassa upakkileso’ti – iti viditvā abhijjhāvisamalobho cittassa upakkileso pahīno hoti, ‘byāpādo cittassa upakkileso’ti – iti viditvā byāpādo cittassa upakkileso pahīno hoti; ‘kodho cittassa upakkileso’ti – iti viditvā kodho cittassa upakkileso pahīno hoti; ‘upanāho cittassa upakkileso’ti – iti viditvā upanāho cittassa upakkileso pahīno hoti; ‘makkho cittassa upakkileso’ti – iti viditvā makkho cittassa upakkileso pahīno hoti; ‘paḷāso cittassa upakkileso’ti – iti viditvā paḷāso cittassa upakkileso pahīno hoti; ‘issā cittassa upakkileso’ti – iti viditvā issā cittassa upakkileso pahīno hoti; ‘macchariyaṃ cittassa upakkileso’ti – iti viditvā macchariyaṃ cittassa upakkileso pahīno hoti; ‘māyā cittassa upakkileso’ti – iti viditvā māyā cittassa upakkileso pahīno hoti; ‘sāṭheyyaṃ cittassa upakkileso’ti – iti viditvā sāṭheyyaṃ cittassa upakkileso pahīno hoti; ‘thambho cittassa upakkileso’ti – iti viditvā thambho cittassa upakkileso pahīno hoti; ‘sārambho cittassa upakkileso’ti – iti viditvā sārambho cittassa upakkileso pahīno hoti; ‘māno cittassa upakkileso’ti – iti viditvā māno cittassa upakkileso pahīno hoti; ‘atimāno cittassa upakkileso’ti – iti viditvā atimāno cittassa upakkileso pahīno hoti; ‘mado cittassa upakkileso’ti – iti viditvā mado cittassa upakkileso pahīno hoti; ‘pamādo cittassa upakkileso’ti – iti viditvā pamādo cittassa upakkileso pahīno hoti.
74. ‘‘ஸோ பு³த்³தே⁴ அவேச்சப்பஸாதே³ன ஸமன்னாக³தோ ஹோதி – ‘இதிபி ஸோ ப⁴க³வா அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா’தி; த⁴ம்மே அவேச்சப்பஸாதே³ன ஸமன்னாக³தோ ஹோதி – ‘ஸ்வாக்கா²தோ ப⁴க³வதா த⁴ம்மோ ஸந்தி³ட்டி²கோ அகாலிகோ ஏஹிபஸ்ஸிகோ ஓபனெய்யிகோ பச்சத்தங் வேதி³தப்³போ³ விஞ்ஞூஹீ’தி; ஸங்கே⁴ அவேச்சப்பஸாதே³ன ஸமன்னாக³தோ ஹோதி – ‘ஸுப்படிபன்னோ ப⁴க³வதோ ஸாவகஸங்கோ⁴, உஜுப்படிபன்னோ ப⁴க³வதோ ஸாவகஸங்கோ⁴, ஞாயப்படிபன்னோ ப⁴க³வதோ ஸாவகஸங்கோ⁴, ஸாமீசிப்படிபன்னோ ப⁴க³வதோ ஸாவகஸங்கோ⁴, யதி³த³ங் சத்தாரி புரிஸயுகா³னி, அட்ட² புரிஸபுக்³க³லா. ஏஸ ப⁴க³வதோ ஸாவகஸங்கோ⁴ ஆஹுனெய்யோ பாஹுனெய்யோ த³க்கி²ணெய்யோ அஞ்ஜலிகரணீயோ , அனுத்தரங் புஞ்ஞக்கெ²த்தங் லோகஸ்ஸா’தி.
74. ‘‘So buddhe aveccappasādena samannāgato hoti – ‘itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā’ti; dhamme aveccappasādena samannāgato hoti – ‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṃ veditabbo viññūhī’ti; saṅghe aveccappasādena samannāgato hoti – ‘suppaṭipanno bhagavato sāvakasaṅgho, ujuppaṭipanno bhagavato sāvakasaṅgho, ñāyappaṭipanno bhagavato sāvakasaṅgho, sāmīcippaṭipanno bhagavato sāvakasaṅgho, yadidaṃ cattāri purisayugāni, aṭṭha purisapuggalā. Esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo , anuttaraṃ puññakkhettaṃ lokassā’ti.
75. ‘‘யதோ²தி⁴ 5 கோ² பனஸ்ஸ சத்தங் ஹோதி வந்தங் முத்தங் பஹீனங் படினிஸ்ஸட்ட²ங், ஸோ ‘பு³த்³தே⁴ அவேச்சப்பஸாதே³ன ஸமன்னாக³தொம்ஹீ’தி லப⁴தி அத்த²வேத³ங், லப⁴தி த⁴ம்மவேத³ங், லப⁴தி த⁴ம்மூபஸங்ஹிதங் பாமோஜ்ஜங். பமுதி³தஸ்ஸ பீதி ஜாயதி, பீதிமனஸ்ஸ காயோ பஸ்ஸம்ப⁴தி, பஸ்ஸத்³த⁴காயோ ஸுக²ங் வேதே³தி, ஸுகி²னோ சித்தங் ஸமாதி⁴யதி; ‘த⁴ம்மே…பே॰… ஸங்கே⁴ அவேச்சப்பஸாதே³ன ஸமன்னாக³தொம்ஹீ’தி லப⁴தி அத்த²வேத³ங், லப⁴தி த⁴ம்மவேத³ங், லப⁴தி த⁴ம்மூபஸங்ஹிதங் பாமோஜ்ஜங்; பமுதி³தஸ்ஸ பீதி ஜாயதி, பீதிமனஸ்ஸ காயோ பஸ்ஸம்ப⁴தி, பஸ்ஸத்³த⁴காயோ ஸுக²ங் வேதே³தி, ஸுகி²னோ சித்தங் ஸமாதி⁴யதி. ‘யதோ²தி⁴ கோ² பன மே சத்தங் வந்தங் முத்தங் பஹீனங் படினிஸ்ஸட்ட²’ந்தி லப⁴தி அத்த²வேத³ங், லப⁴தி த⁴ம்மவேத³ங், லப⁴தி த⁴ம்மூபஸங்ஹிதங் பாமோஜ்ஜங்; பமுதி³தஸ்ஸ பீதி ஜாயதி, பீதிமனஸ்ஸ காயோ பஸ்ஸம்ப⁴தி, பஸ்ஸத்³த⁴காயோ ஸுக²ங் வேதே³தி, ஸுகி²னோ சித்தங் ஸமாதி⁴யதி.
75. ‘‘Yathodhi 6 kho panassa cattaṃ hoti vantaṃ muttaṃ pahīnaṃ paṭinissaṭṭhaṃ, so ‘buddhe aveccappasādena samannāgatomhī’ti labhati atthavedaṃ, labhati dhammavedaṃ, labhati dhammūpasaṃhitaṃ pāmojjaṃ. Pamuditassa pīti jāyati, pītimanassa kāyo passambhati, passaddhakāyo sukhaṃ vedeti, sukhino cittaṃ samādhiyati; ‘dhamme…pe… saṅghe aveccappasādena samannāgatomhī’ti labhati atthavedaṃ, labhati dhammavedaṃ, labhati dhammūpasaṃhitaṃ pāmojjaṃ; pamuditassa pīti jāyati, pītimanassa kāyo passambhati, passaddhakāyo sukhaṃ vedeti, sukhino cittaṃ samādhiyati. ‘Yathodhi kho pana me cattaṃ vantaṃ muttaṃ pahīnaṃ paṭinissaṭṭha’nti labhati atthavedaṃ, labhati dhammavedaṃ, labhati dhammūpasaṃhitaṃ pāmojjaṃ; pamuditassa pīti jāyati, pītimanassa kāyo passambhati, passaddhakāyo sukhaṃ vedeti, sukhino cittaṃ samādhiyati.
76. ‘‘ஸ கோ² ஸோ, பி⁴க்க²வே, பி⁴க்கு² ஏவங்ஸீலோ ஏவங்த⁴ம்மோ ஏவங்பஞ்ஞோ ஸாலீனங் சேபி பிண்ட³பாதங் பு⁴ஞ்ஜதி விசிதகாளகங் அனேகஸூபங் அனேகப்³யஞ்ஜனங், நேவஸ்ஸ தங் ஹோதி அந்தராயாய. ஸெய்யதா²பி, பி⁴க்க²வே, வத்த²ங் ஸங்கிலிட்ட²ங் மலக்³க³ஹிதங் அச்சோ²த³கங் ஆக³ம்ம பரிஸுத்³த⁴ங் ஹோதி பரியோதா³தங் , உக்காமுக²ங் வா பனாக³ம்ம ஜாதரூபங் பரிஸுத்³த⁴ங் ஹோதி பரியோதா³தங், ஏவமேவ கோ², பி⁴க்க²வே, பி⁴க்கு² ஏவங்ஸீலோ ஏவங்த⁴ம்மோ ஏவங்பஞ்ஞோ ஸாலீனங் சேபி பிண்ட³பாதங் பு⁴ஞ்ஜதி விசிதகாளகங் அனேகஸூபங் அனேகப்³யஞ்ஜனங் , நேவஸ்ஸ தங் ஹோதி அந்தராயாய.
76. ‘‘Sa kho so, bhikkhave, bhikkhu evaṃsīlo evaṃdhammo evaṃpañño sālīnaṃ cepi piṇḍapātaṃ bhuñjati vicitakāḷakaṃ anekasūpaṃ anekabyañjanaṃ, nevassa taṃ hoti antarāyāya. Seyyathāpi, bhikkhave, vatthaṃ saṃkiliṭṭhaṃ malaggahitaṃ acchodakaṃ āgamma parisuddhaṃ hoti pariyodātaṃ , ukkāmukhaṃ vā panāgamma jātarūpaṃ parisuddhaṃ hoti pariyodātaṃ, evameva kho, bhikkhave, bhikkhu evaṃsīlo evaṃdhammo evaṃpañño sālīnaṃ cepi piṇḍapātaṃ bhuñjati vicitakāḷakaṃ anekasūpaṃ anekabyañjanaṃ , nevassa taṃ hoti antarāyāya.
77. ‘‘ஸோ மெத்தாஸஹக³தேன சேதஸா ஏகங் தி³ஸங் ப²ரித்வா விஹரதி, ததா² து³தியங், ததா² ததியங், ததா² சதுத்த²ங் 7. இதி உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய ஸப்³பா³வந்தங் லோகங் மெத்தாஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதி; கருணாஸஹக³தேன சேதஸா…பே॰… முதி³தாஸஹக³தேன சேதஸா…பே॰… உபெக்கா²ஸஹக³தேன சேதஸா ஏகங் தி³ஸங் ப²ரித்வா விஹரதி, ததா² து³தியங், ததா² ததியங், ததா² சதுத்த²ங். இதி உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய ஸப்³பா³வந்தங் லோகங் உபெக்கா²ஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதி.
77. ‘‘So mettāsahagatena cetasā ekaṃ disaṃ pharitvā viharati, tathā dutiyaṃ, tathā tatiyaṃ, tathā catutthaṃ 8. Iti uddhamadho tiriyaṃ sabbadhi sabbattatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyāpajjena pharitvā viharati; karuṇāsahagatena cetasā…pe… muditāsahagatena cetasā…pe… upekkhāsahagatena cetasā ekaṃ disaṃ pharitvā viharati, tathā dutiyaṃ, tathā tatiyaṃ, tathā catutthaṃ. Iti uddhamadho tiriyaṃ sabbadhi sabbattatāya sabbāvantaṃ lokaṃ upekkhāsahagatena cetasā vipulena mahaggatena appamāṇena averena abyāpajjena pharitvā viharati.
78. ‘‘ஸோ ‘அத்தி² இத³ங், அத்தி² ஹீனங், அத்தி² பணீதங், அத்தி² இமஸ்ஸ ஸஞ்ஞாக³தஸ்ஸ உத்தரிங் நிஸ்ஸரண’ந்தி பஜானாதி. தஸ்ஸ ஏவங் ஜானதோ ஏவங் பஸ்ஸதோ காமாஸவாபி சித்தங் விமுச்சதி, ப⁴வாஸவாபி சித்தங் விமுச்சதி, அவிஜ்ஜாஸவாபி சித்தங் விமுச்சதி. விமுத்தஸ்மிங் விமுத்தமிதி ஞாணங் ஹோதி. ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாதி . அயங் வுச்சதி, பி⁴க்க²வே – ‘பி⁴க்கு² ஸினாதோ அந்தரேன ஸினானேனா’’’தி.
78. ‘‘So ‘atthi idaṃ, atthi hīnaṃ, atthi paṇītaṃ, atthi imassa saññāgatassa uttariṃ nissaraṇa’nti pajānāti. Tassa evaṃ jānato evaṃ passato kāmāsavāpi cittaṃ vimuccati, bhavāsavāpi cittaṃ vimuccati, avijjāsavāpi cittaṃ vimuccati. Vimuttasmiṃ vimuttamiti ñāṇaṃ hoti. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānāti . Ayaṃ vuccati, bhikkhave – ‘bhikkhu sināto antarena sinānenā’’’ti.
79. தேன கோ² பன ஸமயேன ஸுந்த³ரிகபா⁴ரத்³வாஜோ ப்³ராஹ்மணோ ப⁴க³வதோ அவிதூ³ரே நிஸின்னோ ஹோதி. அத² கோ² ஸுந்த³ரிகபா⁴ரத்³வாஜோ ப்³ராஹ்மணோ ப⁴க³வந்தங் ஏதத³வோச – ‘‘க³ச்ச²தி பன ப⁴வங் கோ³தமோ பா³ஹுகங் நதி³ங் ஸினாயிது’’ந்தி? ‘‘கிங், ப்³ராஹ்மண, பா³ஹுகாய நதி³யா? கிங் பா³ஹுகா நதீ³ கரிஸ்ஸதீ’’தி? ‘‘லொக்க²ஸம்மதா 9 ஹி, போ⁴ கோ³தம, பா³ஹுகா நதீ³ ப³ஹுஜனஸ்ஸ, புஞ்ஞஸம்மதா ஹி, போ⁴ கோ³தம, பா³ஹுகா நதீ³ ப³ஹுஜனஸ்ஸ, பா³ஹுகாய பன நதி³யா ப³ஹுஜனோ பாபகம்மங் கதங் பவாஹேதீ’’தி. அத² கோ² ப⁴க³வா ஸுந்த³ரிகபா⁴ரத்³வாஜங் ப்³ராஹ்மணங் கா³தா²ஹி அஜ்ஜ²பா⁴ஸி –
79. Tena kho pana samayena sundarikabhāradvājo brāhmaṇo bhagavato avidūre nisinno hoti. Atha kho sundarikabhāradvājo brāhmaṇo bhagavantaṃ etadavoca – ‘‘gacchati pana bhavaṃ gotamo bāhukaṃ nadiṃ sināyitu’’nti? ‘‘Kiṃ, brāhmaṇa, bāhukāya nadiyā? Kiṃ bāhukā nadī karissatī’’ti? ‘‘Lokkhasammatā 10 hi, bho gotama, bāhukā nadī bahujanassa, puññasammatā hi, bho gotama, bāhukā nadī bahujanassa, bāhukāya pana nadiyā bahujano pāpakammaṃ kataṃ pavāhetī’’ti. Atha kho bhagavā sundarikabhāradvājaṃ brāhmaṇaṃ gāthāhi ajjhabhāsi –
ஸரஸ்ஸதிங் பயாக³ஞ்ச, அதோ² பா³ஹுமதிங் நதி³ங்;
Sarassatiṃ payāgañca, atho bāhumatiṃ nadiṃ;
நிச்சம்பி பா³லோ பக்க²ந்தோ³ 13, கண்ஹகம்மோ ந ஸுஜ்ஜ²தி.
Niccampi bālo pakkhando 14, kaṇhakammo na sujjhati.
‘‘கிங் ஸுந்த³ரிகா கரிஸ்ஸதி, கிங் பயாகா³ 15 கிங் பா³ஹுகா நதீ³;
‘‘Kiṃ sundarikā karissati, kiṃ payāgā 16 kiṃ bāhukā nadī;
வேரிங் கதகிப்³பி³ஸங் நரங், ந ஹி நங் ஸோத⁴யே பாபகம்மினங்.
Veriṃ katakibbisaṃ naraṃ, na hi naṃ sodhaye pāpakamminaṃ.
‘‘ஸுத்³த⁴ஸ்ஸ வே ஸதா³ ப²க்³கு³, ஸுத்³த⁴ஸ்ஸுபோஸதோ² ஸதா³;
‘‘Suddhassa ve sadā phaggu, suddhassuposatho sadā;
ஸுத்³த⁴ஸ்ஸ ஸுசிகம்மஸ்ஸ, ஸதா³ ஸம்பஜ்ஜதே வதங்;
Suddhassa sucikammassa, sadā sampajjate vataṃ;
இதே⁴வ ஸினாஹி ப்³ராஹ்மண, ஸப்³ப³பூ⁴தேஸு கரோஹி கே²மதங்.
Idheva sināhi brāhmaṇa, sabbabhūtesu karohi khemataṃ.
‘‘ஸசே முஸா ந ப⁴ணஸி, ஸசே பாணங் ந ஹிங்ஸஸி;
‘‘Sace musā na bhaṇasi, sace pāṇaṃ na hiṃsasi;
ஸசே அதி³ன்னங் நாதி³யஸி, ஸத்³த³ஹானோ அமச்ச²ரீ;
Sace adinnaṃ nādiyasi, saddahāno amaccharī;
கிங் காஹஸி க³யங் க³ந்த்வா, உத³பானோபி தே க³யா’’தி.
Kiṃ kāhasi gayaṃ gantvā, udapānopi te gayā’’ti.
80. ஏவங் வுத்தே, ஸுந்த³ரிகபா⁴ரத்³வாஜோ ப்³ராஹ்மணோ ப⁴க³வந்தங் ஏதத³வோச – ‘‘அபி⁴க்கந்தங், போ⁴ கோ³தம, அபி⁴க்கந்தங், போ⁴ கோ³தம! ஸெய்யதா²பி, போ⁴ கோ³தம, நிக்குஜ்ஜிதங் வா உக்குஜ்ஜெய்ய, படிச்ச²ன்னங் வா விவரெய்ய, மூள்ஹஸ்ஸ வா மக்³க³ங் ஆசிக்கெ²ய்ய, அந்த⁴காரே வா தேலபஜ்ஜோதங் தா⁴ரெய்ய – சக்கு²மந்தோ ரூபானி த³க்க²ந்தீதி; ஏவமேவங் போ⁴தா கோ³தமேன அனேகபரியாயேன த⁴ம்மோ பகாஸிதோ. ஏஸாஹங் ப⁴வந்தங் கோ³தமங் ஸரணங் க³ச்சா²மி த⁴ம்மஞ்ச பி⁴க்கு²ஸங்க⁴ஞ்ச. லபெ⁴ய்யாஹங் போ⁴தோ கோ³தமஸ்ஸ ஸந்திகே பப்³ப³ஜ்ஜங், லபெ⁴ய்யங் உபஸம்பத³’’ந்தி. அலத்த² கோ² ஸுந்த³ரிகபா⁴ரத்³வாஜோ ப்³ராஹ்மணோ ப⁴க³வதோ ஸந்திகே பப்³ப³ஜ்ஜங், அலத்த² உபஸம்பத³ங். அசிரூபஸம்பன்னோ கோ² பனாயஸ்மா பா⁴ரத்³வாஜோ ஏகோ வூபகட்டோ² அப்பமத்தோ ஆதாபீ பஹிதத்தோ விஹரந்தோ நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியங் பப்³ப³ஜந்தி தத³னுத்தரங் – ப்³ரஹ்மசரியபரியோஸானங் தி³ட்டே²வத⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸி. ‘‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’’தி அப்³ப⁴ஞ்ஞாஸி. அஞ்ஞதரோ கோ² பனாயஸ்மா பா⁴ரத்³வாஜோ அரஹதங் அஹோஸீதி.
80. Evaṃ vutte, sundarikabhāradvājo brāhmaṇo bhagavantaṃ etadavoca – ‘‘abhikkantaṃ, bho gotama, abhikkantaṃ, bho gotama! Seyyathāpi, bho gotama, nikkujjitaṃ vā ukkujjeyya, paṭicchannaṃ vā vivareyya, mūḷhassa vā maggaṃ ācikkheyya, andhakāre vā telapajjotaṃ dhāreyya – cakkhumanto rūpāni dakkhantīti; evamevaṃ bhotā gotamena anekapariyāyena dhammo pakāsito. Esāhaṃ bhavantaṃ gotamaṃ saraṇaṃ gacchāmi dhammañca bhikkhusaṅghañca. Labheyyāhaṃ bhoto gotamassa santike pabbajjaṃ, labheyyaṃ upasampada’’nti. Alattha kho sundarikabhāradvājo brāhmaṇo bhagavato santike pabbajjaṃ, alattha upasampadaṃ. Acirūpasampanno kho panāyasmā bhāradvājo eko vūpakaṭṭho appamatto ātāpī pahitatto viharanto nacirasseva – yassatthāya kulaputtā sammadeva agārasmā anagāriyaṃ pabbajanti tadanuttaraṃ – brahmacariyapariyosānaṃ diṭṭhevadhamme sayaṃ abhiññā sacchikatvā upasampajja vihāsi. ‘‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’’ti abbhaññāsi. Aññataro kho panāyasmā bhāradvājo arahataṃ ahosīti.
வத்த²ஸுத்தங் நிட்டி²தங் ஸத்தமங்.
Vatthasuttaṃ niṭṭhitaṃ sattamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 7. வத்த²ஸுத்தவண்ணனா • 7. Vatthasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 7. வத்த²ஸுத்தவண்ணனா • 7. Vatthasuttavaṇṇanā
