| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
7. வத்த²ஸுத்தவண்ணனா
7. Vatthasuttavaṇṇanā
70. ஏவங் மே ஸுதந்தி வத்த²ஸுத்தங். தத்த² ஸெய்யதா²பி, பி⁴க்க²வே, வத்த²ந்தி உபமாவசனமேவேதங். உபமங் கரொந்தோ ச ப⁴க³வா கத்த²சி பட²மங்யேவ உபமங் த³ஸ்ஸெத்வா பச்சா² அத்த²ங் த³ஸ்ஸேதி, கத்த²சி பட²மமத்த²ங் த³ஸ்ஸெத்வா பச்சா² உபமங், கத்த²சி உபமாய அத்த²ங் பரிவாரெத்வா த³ஸ்ஸேதி, கத்த²சி அத்தே²ன உபமங்.
70.Evaṃme sutanti vatthasuttaṃ. Tattha seyyathāpi, bhikkhave, vatthanti upamāvacanamevetaṃ. Upamaṃ karonto ca bhagavā katthaci paṭhamaṃyeva upamaṃ dassetvā pacchā atthaṃ dasseti, katthaci paṭhamamatthaṃ dassetvā pacchā upamaṃ, katthaci upamāya atthaṃ parivāretvā dasseti, katthaci atthena upamaṃ.
ததா² ஹேஸ – ‘‘ஸெய்யதா²பிஸ்ஸு, பி⁴க்க²வே, த்³வே அகா³ரா ஸத்³வாரா, தத்த² சக்கு²மா புரிஸோ மஜ்ஜே² டி²தோ பஸ்ஸெய்யா’’தி (ம॰ நி॰ 3.261) ஸகலம்பி தே³வதூ³தஸுத்தங் உபமங் பட²மங் த³ஸ்ஸெத்வா பச்சா² அத்த²ங் த³ஸ்ஸெந்தோ ஆஹ. ‘‘திரோகுட்டங் திரோபாகாரங் திரோபப்³ப³தங் அஸஜ்ஜமானோ க³ச்ச²தி, ஸெய்யதா²பி ஆகாஸே’’திஆதி³னா (தீ³॰ நி॰ 1.238; படி॰ ம॰ 1.102) பன நயேன ஸகலம்பி இத்³தி⁴வித⁴மத்த²ங் பட²மங் த³ஸ்ஸெத்வா பச்சா² உபமங் த³ஸ்ஸெந்தோ ஆஹ. ‘‘ஸெய்யதா²பி ப்³ராஹ்மணபுரிஸோ ஸாரத்தி²கோ ஸாரக³வேஸீ’’திஆதி³னாவ (ம॰ நி॰ 1.318) நயேன ஸகலம்பி சூளஸாரோபமஸுத்தங் உபமாய அத்த²ங் பரிவாரெத்வா த³ஸ்ஸெந்தோ ஆஹ. ‘‘இத⁴ பன, பி⁴க்க²வே, ஏகச்சே குலபுத்தா த⁴ம்மங் பரியாபுணந்தி ஸுத்தங்…பே॰… ஸெய்யதா²பி, பி⁴க்க²வே, புரிஸோ அலக³த்³த³த்தி²கோ’’திஆதி³னா (ம॰ நி॰ 1.238) நயேன ஸகலம்பி அலக³த்³த³ஸுத்தங் மஹாஸாரோபமஸுத்தந்தி ஏவமாதீ³னி ஸுத்தானி அத்தே²ன உபமங் பரிவாரெத்வா த³ஸ்ஸெந்தோ ஆஹ.
Tathā hesa – ‘‘seyyathāpissu, bhikkhave, dve agārā sadvārā, tattha cakkhumā puriso majjhe ṭhito passeyyā’’ti (ma. ni. 3.261) sakalampi devadūtasuttaṃ upamaṃ paṭhamaṃ dassetvā pacchā atthaṃ dassento āha. ‘‘Tirokuṭṭaṃ tiropākāraṃ tiropabbataṃ asajjamāno gacchati, seyyathāpi ākāse’’tiādinā (dī. ni. 1.238; paṭi. ma. 1.102) pana nayena sakalampi iddhividhamatthaṃ paṭhamaṃ dassetvā pacchā upamaṃ dassento āha. ‘‘Seyyathāpi brāhmaṇapuriso sāratthiko sāragavesī’’tiādināva (ma. ni. 1.318) nayena sakalampi cūḷasāropamasuttaṃ upamāya atthaṃ parivāretvā dassento āha. ‘‘Idha pana, bhikkhave, ekacce kulaputtā dhammaṃ pariyāpuṇanti suttaṃ…pe… seyyathāpi, bhikkhave, puriso alagaddatthiko’’tiādinā (ma. ni. 1.238) nayena sakalampi alagaddasuttaṃ mahāsāropamasuttanti evamādīni suttāni atthena upamaṃ parivāretvā dassento āha.
ஸ்வாயங் இத⁴ பட²மங் உபமங் த³ஸ்ஸெத்வா பச்சா² அத்த²ங் த³ஸ்ஸேதி. கஸ்மா பனேவங் ப⁴க³வா த³ஸ்ஸேதீதி? புக்³க³லஜ்ஜா²ஸயேன வா தே³ஸனாவிலாஸேன வா. யே ஹி புக்³க³லா பட²மங் உபமங் த³ஸ்ஸெத்வா வுச்சமானமத்த²ங் ஸுகே²ன படிவிஜ்ஜ²ந்தி, தேஸங் பட²மங் உபமங் த³ஸ்ஸேதி. ஏஸ நயோ ஸப்³ப³த்த². யஸ்ஸா ச த⁴ம்மதா⁴துயா ஸுப்படிவித்³த⁴த்தா தே³ஸனாவிலாஸங் பத்தோ ஹோதி, தஸ்ஸா ஸுப்படிவித்³தா⁴. தஸ்மா ஏஸ தே³ஸனாவிலாஸம்பத்தோ த⁴ம்மிஸ்ஸரோ த⁴ம்மராஜா, ஸோ யதா² யதா² இச்ச²தி, ததா² ததா² த⁴ம்மங் தே³ஸேதீதி ஏவங் இமினா புக்³க³லஜ்ஜா²ஸயேன வா தே³ஸனாவிலாஸேன வா ஏவங் த³ஸ்ஸேதீதி வேதி³தப்³போ³.
Svāyaṃ idha paṭhamaṃ upamaṃ dassetvā pacchā atthaṃ dasseti. Kasmā panevaṃ bhagavā dassetīti? Puggalajjhāsayena vā desanāvilāsena vā. Ye hi puggalā paṭhamaṃ upamaṃ dassetvā vuccamānamatthaṃ sukhena paṭivijjhanti, tesaṃ paṭhamaṃ upamaṃ dasseti. Esa nayo sabbattha. Yassā ca dhammadhātuyā suppaṭividdhattā desanāvilāsaṃ patto hoti, tassā suppaṭividdhā. Tasmā esa desanāvilāsampatto dhammissaro dhammarājā, so yathā yathā icchati, tathā tathā dhammaṃ desetīti evaṃ iminā puggalajjhāsayena vā desanāvilāsena vā evaṃ dassetīti veditabbo.
தத்த² வத்த²ந்தி பகதிபரிஸுத்³த⁴ங் வத்த²ங். ஸங்கிலிட்ட²ங் மலக்³க³ஹிதந்தி ஆக³ந்துகேன பங்ஸுரஜாதி³னா ஸங்கிலேஸேன ஸங்கிலிட்ட²ங், ஸேத³ஜல்லிகாதி³னா மலேன க³ஹிதத்தா மலக்³க³ஹிதங். ரங்க³ஜாதேதி எத்த² ரங்க³மேவ ரங்க³ஜாதங். உபஸங்ஹரெய்யாதி உபனாமெய்ய. யதி³ நீலகாயாதி நீலகாய வா, நீலகத்தா²ய வாதி வுத்தங் ஹோதி. ஏவங் ஸப்³ப³த்த². ரஜகோ ஹி நீலகத்தா²ய உபஸங்ஹரந்தோ கங்ஸனீலபலாஸனீலாதி³கே நீலரங்கே³ உபஸங்ஹரதி. பீதகத்தா²ய உபஸங்ஹரந்தோ கணிகாரபுப்ப²ஸதி³ஸே பீதகரங்கே³. லோஹிதகத்தா²ய உபஸங்ஹரந்தோ ப³ந்து⁴ஜீவகபுப்ப²ஸதி³ஸே லோஹிதகரங்கே³. மஞ்ஜிட்ட²கத்தா²ய உபஸங்ஹரந்தோ கணவீரபுப்ப²ஸதி³ஸே மந்த³ரத்தரங்கே³. தேன வுத்தங் ‘‘யதி³ நீலகாய…பே॰… யதி³ மஞ்ஜிட்ட²காயா’’தி.
Tattha vatthanti pakatiparisuddhaṃ vatthaṃ. Saṃkiliṭṭhaṃ malaggahitanti āgantukena paṃsurajādinā saṃkilesena saṃkiliṭṭhaṃ, sedajallikādinā malena gahitattā malaggahitaṃ. Raṅgajāteti ettha raṅgameva raṅgajātaṃ. Upasaṃhareyyāti upanāmeyya. Yadi nīlakāyāti nīlakāya vā, nīlakatthāya vāti vuttaṃ hoti. Evaṃ sabbattha. Rajako hi nīlakatthāya upasaṃharanto kaṃsanīlapalāsanīlādike nīlaraṅge upasaṃharati. Pītakatthāya upasaṃharanto kaṇikārapupphasadise pītakaraṅge. Lohitakatthāya upasaṃharanto bandhujīvakapupphasadise lohitakaraṅge. Mañjiṭṭhakatthāya upasaṃharanto kaṇavīrapupphasadise mandarattaraṅge. Tena vuttaṃ ‘‘yadi nīlakāya…pe… yadi mañjiṭṭhakāyā’’ti.
து³ரத்தவண்ணமேவஸ்ஸாதி து³ட்டு² ரஞ்ஜிதவண்ணமேவ அஸ்ஸ. அபரிஸுத்³த⁴வண்ணமேவஸ்ஸாதி நீலவண்ணோபிஸ்ஸ பரிஸுத்³தோ⁴ ந ப⁴வெய்ய, ஸேஸவண்ணோபி. தாதி³ஸஞ்ஹி வத்த²ங் நீலகும்பி⁴யா பக்கி²த்தம்பி ஸுனீலங் ந ஹோதி, ஸேஸகும்பீ⁴ஸு பக்கி²த்தம்பி பீதகாதி³வண்ணங் ந ஹோதி, மிலாதனீல குரண்ட³-கணிகார-ப³ந்து⁴ஜீவக-கணவீரபுப்ப²வண்ணமேவ ஹோதி. தங் கிஸ்ஸ ஹேதூதி தங் வத்த²ங் கிஸ்ஸ ஹேது கிங் காரணா ஈதி³ஸங் ஹோதி, தஸ்மிங் வா வத்தே² ரங்க³ஜாதங் கிஸ்ஸ ஹேது ஈதி³ஸங் து³ரத்தவண்ணங் அபரிஸுத்³த⁴வண்ணங் ஹோதீதி? யஸ்மா பனஸ்ஸ வத்த²ஸ்ஸ ஸங்கிலிட்ட²பா⁴வோயேவெத்த² காரணங், ந அஞ்ஞங் கிஞ்சி, தஸ்மா ‘‘அபரிஸுத்³த⁴த்தா, பி⁴க்க²வே, வத்த²ஸ்ஸா’’தி ஆஹ.
Durattavaṇṇamevassāti duṭṭhu rañjitavaṇṇameva assa. Aparisuddhavaṇṇamevassāti nīlavaṇṇopissa parisuddho na bhaveyya, sesavaṇṇopi. Tādisañhi vatthaṃ nīlakumbhiyā pakkhittampi sunīlaṃ na hoti, sesakumbhīsu pakkhittampi pītakādivaṇṇaṃ na hoti, milātanīla kuraṇḍa-kaṇikāra-bandhujīvaka-kaṇavīrapupphavaṇṇameva hoti. Taṃ kissa hetūti taṃ vatthaṃ kissa hetu kiṃ kāraṇā īdisaṃ hoti, tasmiṃ vā vatthe raṅgajātaṃ kissa hetu īdisaṃ durattavaṇṇaṃ aparisuddhavaṇṇaṃ hotīti? Yasmā panassa vatthassa saṃkiliṭṭhabhāvoyevettha kāraṇaṃ, na aññaṃ kiñci, tasmā ‘‘aparisuddhattā, bhikkhave, vatthassā’’ti āha.
ஏவமேவ கோ²தி உபமாஸம்படிபாத³னங். சித்தே ஸங்கிலிட்டே²தி சித்தம்ஹி ஸங்கிலிட்ட²ம்ஹி. கஸ்மா பன ப⁴க³வா ஸங்கிலிட்ட²வத்தே²ன ஓபம்மங் அகாஸீதி சே, வாயாமமஹப்ப²லத³ஸ்ஸனத்த²ங். யதா² ஹி ஆக³ந்துகேஹி மலேஹி ஸங்கிலிட்ட²ங் வத்த²ங் பகதியா பண்ட³ரத்தா புன தோ⁴வீயமானங் பண்ட³ரங் ஹோதி, ந தத்த² ஜாதிகாளகே விய ஏளகலோமே வாயாமோ நிப்ப²லோ ஹோதி, ஏவங் சித்தம்பி ஆக³ந்துகேஹி கிலேஸேஹி ஸங்கிலிட்ட²ங். பகதியா பன தங் ஸகலேபி படிஸந்தி⁴ப⁴வங்க³வாரே பண்ட³ரமேவ. யதா²ஹ – ‘‘பப⁴ஸ்ஸரமித³ங், பி⁴க்க²வே, சித்தங், தஞ்ச கோ² ஆக³ந்துகேஹி உபக்கிலேஸேஹி உபக்கிலிட்ட²’’ந்தி (அ॰ நி॰ 1.51). தங் விஸோதீ⁴யமானங் ஸக்கா பப⁴ஸ்ஸரதரங் காதுங், ந தத்த² வாயாமோ நிப்ப²லோதி ஏவங் வாயாமமஹப்ப²லத³ஸ்ஸனத்த²ங் ஸங்கிலிட்ட²வத்தே²ன ஓபம்மங் அகாஸீதி வேதி³தப்³போ³.
Evameva khoti upamāsampaṭipādanaṃ. Citte saṃkiliṭṭheti cittamhi saṃkiliṭṭhamhi. Kasmā pana bhagavā saṃkiliṭṭhavatthena opammaṃ akāsīti ce, vāyāmamahapphaladassanatthaṃ. Yathā hi āgantukehi malehi saṃkiliṭṭhaṃ vatthaṃ pakatiyā paṇḍarattā puna dhovīyamānaṃ paṇḍaraṃ hoti, na tattha jātikāḷake viya eḷakalome vāyāmo nipphalo hoti, evaṃ cittampi āgantukehi kilesehi saṃkiliṭṭhaṃ. Pakatiyā pana taṃ sakalepi paṭisandhibhavaṅgavāre paṇḍarameva. Yathāha – ‘‘pabhassaramidaṃ, bhikkhave, cittaṃ, tañca kho āgantukehi upakkilesehi upakkiliṭṭha’’nti (a. ni. 1.51). Taṃ visodhīyamānaṃ sakkā pabhassarataraṃ kātuṃ, na tattha vāyāmo nipphaloti evaṃ vāyāmamahapphaladassanatthaṃ saṃkiliṭṭhavatthena opammaṃ akāsīti veditabbo.
து³க்³க³தி பாடிகங்கா²தி ஈதி³ஸே சித்தே து³க்³க³தி பாடிகங்கி²தப்³பா³, து³க்³க³திங் ஏவ ஏஸ பாபுணிஸ்ஸதி , நாஞ்ஞந்தி ஏவங் து³க்³க³தி இச்சி²தப்³பா³, அவஸ்ஸங் பா⁴வீதி வுத்தங் ஹோதி. ஸா சாயங் து³க்³க³தி நாம படிபத்திது³க்³க³தி, க³திது³க்³க³தீதி து³விதா⁴ ஹோதி. படிபத்திது³க்³க³திபி அகா³ரியபடிபத்திது³க்³க³தி, அனகா³ரியபடிபத்திது³க்³க³தீதி து³விதா⁴ ஹோதி.
Duggati pāṭikaṅkhāti īdise citte duggati pāṭikaṅkhitabbā, duggatiṃ eva esa pāpuṇissati , nāññanti evaṃ duggati icchitabbā, avassaṃ bhāvīti vuttaṃ hoti. Sā cāyaṃ duggati nāma paṭipattiduggati, gatiduggatīti duvidhā hoti. Paṭipattiduggatipi agāriyapaṭipattiduggati, anagāriyapaṭipattiduggatīti duvidhā hoti.
அகா³ரியோ ஹி ஸங்கிலிட்ட²சித்தோ பாணம்பி ஹனதி, அதி³ன்னம்பி ஆதி³யதி, ஸகலேபி த³ஸ அகுஸலகம்மபதே² பூரேதி, அயமஸ்ஸ அகா³ரியபடிபத்திது³க்³க³தி. ஸோ தத்த² டி²தோ காயஸ்ஸ பே⁴தா³ நிரயம்பி க³ச்ச²தி, திரச்சா²னயோனிம்பி, பெத்திவிஸயம்பி க³ச்ச²தி, அயமஸ்ஸ க³திது³க்³க³தி.
Agāriyo hi saṃkiliṭṭhacitto pāṇampi hanati, adinnampi ādiyati, sakalepi dasa akusalakammapathe pūreti, ayamassa agāriyapaṭipattiduggati. So tattha ṭhito kāyassa bhedā nirayampi gacchati, tiracchānayonimpi, pettivisayampi gacchati, ayamassa gatiduggati.
அனகா³ரியோபி இமஸ்மிங் ஸாஸனே பப்³ப³ஜிதோ ஸங்கிலிட்ட²சித்தோ தூ³தெய்யபஹிணக³மனங் க³ச்ச²தி, வேஜ்ஜகம்மங் கரோதி, ஸங்க⁴பே⁴தா³ய சேதியபே⁴தா³ய பரக்கமதி, வேளுதா³னாதீ³ஹி ஜீவிகங் கப்பேதி, ஸகலம்பி அனாசாரங் அகோ³சரஞ்ச பரிபூரேதி, அயமஸ்ஸ அனகா³ரியபடிபத்திது³க்³க³தி.ஸோ தத்த² டி²தோ காயஸ்ஸ பே⁴தா³ நிரயம்பி க³ச்ச²தி, திரச்சா²னயோனிம்பி, பெத்திவிஸயம்பி க³ச்ச²தி ஸமணயக்கோ² நாம ஹோதி ஸமணபேதோ, ஆதி³த்தேஹி ஸங்கா⁴டிஆதீ³ஹி ஸம்பஜ்ஜலிதகாயோ அட்டஸ்ஸரங் கரொந்தோ விசரதி, அயமஸ்ஸ க³திது³க்³க³தி.
Anagāriyopi imasmiṃ sāsane pabbajito saṃkiliṭṭhacitto dūteyyapahiṇagamanaṃ gacchati, vejjakammaṃ karoti, saṅghabhedāya cetiyabhedāya parakkamati, veḷudānādīhi jīvikaṃ kappeti, sakalampi anācāraṃ agocarañca paripūreti, ayamassa anagāriyapaṭipattiduggati.So tattha ṭhito kāyassa bhedā nirayampi gacchati, tiracchānayonimpi, pettivisayampi gacchati samaṇayakkho nāma hoti samaṇapeto, ādittehi saṅghāṭiādīhi sampajjalitakāyo aṭṭassaraṃ karonto vicarati, ayamassa gatiduggati.
ஸெய்யதா²பீதி ஸுக்கபக்க²ங் த³ஸ்ஸேதுமாரத்³தோ⁴, தஸ்ஸத்தோ² கண்ஹபக்கே² வுத்தபச்சனீகேனேவ வேதி³தப்³போ³. எத்தா²பி ச ஸுக³தி நாம படிபத்திஸுக³தி க³திஸுக³தீதி து³விதா⁴ ஹோதி. படிபத்திஸுக³திபி அகா³ரியபடிபத்திஸுக³தி அனகா³ரியபடிபத்திஸுக³தீதி து³விதா⁴ ஹோதி. அகா³ரியோ ஹி பரிஸுத்³த⁴சித்தோ பாணாதிபாதாபி விரமதி, அதி³ன்னாதா³னாபி, ஸகலேபி த³ஸ குஸலகம்மபதே² பரிபூரேதி, அயமஸ்ஸ அகா³ரியபடிபத்திஸுக³தி. ஸோ தத்த² டி²தோ காயஸ்ஸ பே⁴தா³ மனுஸ்ஸமஹந்ததம்பி தே³வமஹந்ததம்பி உபபஜ்ஜதி, அயமஸ்ஸ க³திஸுக³தி.
Seyyathāpīti sukkapakkhaṃ dassetumāraddho, tassattho kaṇhapakkhe vuttapaccanīkeneva veditabbo. Etthāpi ca sugati nāma paṭipattisugati gatisugatīti duvidhā hoti. Paṭipattisugatipi agāriyapaṭipattisugati anagāriyapaṭipattisugatīti duvidhā hoti. Agāriyo hi parisuddhacitto pāṇātipātāpi viramati, adinnādānāpi, sakalepi dasa kusalakammapathe paripūreti, ayamassa agāriyapaṭipattisugati. So tattha ṭhito kāyassa bhedā manussamahantatampi devamahantatampi upapajjati, ayamassa gatisugati.
அனகா³ரியோபி இமஸ்மிங் ஸாஸனே பப்³ப³ஜித்வா பரிஸுத்³த⁴சித்தோ சதுபாரிஸுத்³தி⁴ஸீலங் ஸோதே⁴தி, தேரஸ து⁴தங்கா³னி ஸமாதி³யதி, அட்ட²திங்ஸாரம்மணேஸு அத்தனோ அனுகூலகம்மட்டா²னங் க³ஹெத்வா பந்தஸேனாஸனே படிஸேவமானோ கஸிணபரிகம்மங் கத்வா ஜா²னஸமாபத்தியோ நிப்³ப³த்தேதி, ஸோதாபத்திமக்³க³ங் பா⁴வேதி…பே॰… அனாகா³மிமக்³க³ங் பா⁴வேதி, அயமஸ்ஸ அனகா³ரியபடிபத்திஸுக³தி. ஸோ தத்த² டி²தோ காயஸ்ஸ பே⁴தா³ மனுஸ்ஸலோகே வா தீஸு மஹாகுலேஸு, ச²ஸு வா காமாவசரதே³வேஸு, த³ஸஸு வா ப்³ரஹ்மப⁴வனேஸு , பஞ்சஸு வா ஸுத்³தா⁴வாஸேஸு, சதூஸு வா ஆருப்பேஸு உபபஜ்ஜதி, அயமஸ்ஸ க³திஸுக³தீதி.
Anagāriyopi imasmiṃ sāsane pabbajitvā parisuddhacitto catupārisuddhisīlaṃ sodheti, terasa dhutaṅgāni samādiyati, aṭṭhatiṃsārammaṇesu attano anukūlakammaṭṭhānaṃ gahetvā pantasenāsane paṭisevamāno kasiṇaparikammaṃ katvā jhānasamāpattiyo nibbatteti, sotāpattimaggaṃ bhāveti…pe… anāgāmimaggaṃ bhāveti, ayamassa anagāriyapaṭipattisugati. So tattha ṭhito kāyassa bhedā manussaloke vā tīsu mahākulesu, chasu vā kāmāvacaradevesu, dasasu vā brahmabhavanesu , pañcasu vā suddhāvāsesu, catūsu vā āruppesu upapajjati, ayamassa gatisugatīti.
71. ஏவங் ஸங்கிலிட்டே² சித்தே து³க்³க³தி பாடிகங்கா², அஸங்கிலிட்டே² ச ஸுக³தீதி வத்வா இதா³னி யேஹி உபக்கிலேஸேஹி சித்தங் ஸங்கிலிட்ட²ங் ஹோதி, தே த³ஸ்ஸெந்தோ கதமே ச, பி⁴க்க²வே, சித்தஸ்ஸ உபக்கிலேஸா ? அபி⁴ஜ்ஜா² விஸமலோபோ⁴திஆதி³மாஹ.
71. Evaṃ saṃkiliṭṭhe citte duggati pāṭikaṅkhā, asaṃkiliṭṭhe ca sugatīti vatvā idāni yehi upakkilesehi cittaṃ saṃkiliṭṭhaṃ hoti, te dassento katame ca, bhikkhave, cittassa upakkilesā? Abhijjhā visamalobhotiādimāha.
தத்த² ஸகப⁴ண்டே³ ச²ந்த³ராகோ³ அபி⁴ஜ்ஜா², பரப⁴ண்டே³ விஸமலோபோ⁴. அத² வா ஸகப⁴ண்டே³ வா பரப⁴ண்டே³ வா ஹோது, யுத்தபத்தட்டா²னே ச²ந்த³ராகோ³ அபி⁴ஜ்ஜா², அயுத்தாபத்தட்டா²னே விஸமலோபோ⁴. தே²ரோ பனாஹ ‘‘கிஸ்ஸ வினிப்³போ⁴க³ங் கரோத², யுத்தே வா அயுத்தே வா ஹோது, ‘ராகோ³ விஸமங் தோ³ஸோ விஸமங் மோஹோ விஸம’ந்தி (விப⁴॰ 924) வசனதோ ந கோசி லோபோ⁴ அவிஸமோ நாம, தஸ்மா லோபோ⁴யேவ அபி⁴ஜ்ஜா²யனட்டே²ன அபி⁴ஜ்ஜா², விஸமட்டே²ன விஸமங், ஏகத்த²மேதங் ப்³யஞ்ஜனமேவ நான’’ந்தி. ஸோ பனேஸ அபி⁴ஜ்ஜா²விஸமலோபோ⁴ உப்பஜ்ஜித்வா சித்தங் தூ³ஸேதி, ஓபா⁴ஸிதுங் ந தே³தி. தஸ்மா ‘‘சித்தஸ்ஸ உபக்கிலேஸோ’’தி வுச்சதி.
Tattha sakabhaṇḍe chandarāgo abhijjhā, parabhaṇḍe visamalobho. Atha vā sakabhaṇḍe vā parabhaṇḍe vā hotu, yuttapattaṭṭhāne chandarāgo abhijjhā, ayuttāpattaṭṭhāne visamalobho. Thero panāha ‘‘kissa vinibbhogaṃ karotha, yutte vā ayutte vā hotu, ‘rāgo visamaṃ doso visamaṃ moho visama’nti (vibha. 924) vacanato na koci lobho avisamo nāma, tasmā lobhoyeva abhijjhāyanaṭṭhena abhijjhā, visamaṭṭhena visamaṃ, ekatthametaṃ byañjanameva nāna’’nti. So panesa abhijjhāvisamalobho uppajjitvā cittaṃ dūseti, obhāsituṃ na deti. Tasmā ‘‘cittassa upakkileso’’ti vuccati.
யதா² சேஸ, ஏவங் நவவித⁴ஆகா⁴தவத்து²ஸம்ப⁴வோ ப்³யாபாதோ³. த³ஸவித⁴ஆகா⁴தவத்து²ஸம்ப⁴வோ கோதோ⁴. புனப்புனங் சித்தபரியோனந்த⁴னோ உபனாஹோ. அகா³ரியஸ்ஸ வா அனகா³ரியஸ்ஸ வா ஸுகதகரணவினாஸனோ மக்கோ². அகா³ரியோபி ஹி கேனசி அனுகம்பகேன த³லித்³தோ³ ஸமானோ உச்சே டா²னே ட²பிதோ, அபரேன ஸமயேன ‘‘கிங் தயா மய்ஹங் கத’’ந்தி தஸ்ஸ ஸுகதகரணங் வினாஸேதி. அனகா³ரியோபி ஸாமணேரகாலதோ பபு⁴தி ஆசரியேன வா உபஜ்ஜா²யேன வா சதூஹி பச்சயேஹி உத்³தே³ஸபரிபுச்சா²ஹி ச அனுக்³க³ஹெத்வா த⁴ம்மகதா²னயபகரணகோஸல்லாதீ³னி ஸிக்கா²பிதோ, அபரேன ஸமயேன ராஜராஜமஹாமத்தாதீ³ஹி ஸக்கதோ க³ருகதோ ஆசரியுபஜ்ஜா²யேஸு அசித்தீகதோ சரமானோ ‘‘அயங் அம்ஹேஹி த³ஹரகாலே ஏவங் அனுக்³க³ஹிதோ ஸங்வட்³டி⁴தோ ச, அத² பனிதா³னி நிஸ்ஸினேஹோ ஜாதோ’’தி வுச்சமானோ ‘‘கிங் மய்ஹங் தும்ஹேஹி கத’’ந்தி தேஸங் ஸுகதகரணங் வினாஸேதி, தஸ்ஸ ஸோ ஸுகதகரணவினாஸனோ மக்கோ² உப்பஜ்ஜித்வா சித்தங் தூ³ஸேதி, ஓபா⁴ஸிதுங் ந தே³தி. தஸ்மா ‘‘சித்தஸ்ஸ உபக்கிலேஸோ’’தி வுச்சதி.
Yathā cesa, evaṃ navavidhaāghātavatthusambhavo byāpādo. Dasavidhaāghātavatthusambhavo kodho. Punappunaṃ cittapariyonandhano upanāho. Agāriyassa vā anagāriyassa vā sukatakaraṇavināsano makkho. Agāriyopi hi kenaci anukampakena daliddo samāno ucce ṭhāne ṭhapito, aparena samayena ‘‘kiṃ tayā mayhaṃ kata’’nti tassa sukatakaraṇaṃ vināseti. Anagāriyopi sāmaṇerakālato pabhuti ācariyena vā upajjhāyena vā catūhi paccayehi uddesaparipucchāhi ca anuggahetvā dhammakathānayapakaraṇakosallādīni sikkhāpito, aparena samayena rājarājamahāmattādīhi sakkato garukato ācariyupajjhāyesu acittīkato caramāno ‘‘ayaṃ amhehi daharakāle evaṃ anuggahito saṃvaḍḍhito ca, atha panidāni nissineho jāto’’ti vuccamāno ‘‘kiṃ mayhaṃ tumhehi kata’’nti tesaṃ sukatakaraṇaṃ vināseti, tassa so sukatakaraṇavināsano makkho uppajjitvā cittaṃ dūseti, obhāsituṃ na deti. Tasmā ‘‘cittassa upakkileso’’ti vuccati.
யதா² சாயங், ஏவங் ப³ஹுஸ்ஸுதேபி புக்³க³லே அஜ்ஜொ²த்த²ரித்வா ‘‘ஈதி³ஸஸ்ஸ சேவ ப³ஹுஸ்ஸுதஸ்ஸ அனியதா க³தி, தவ வா மம வா கோ விஸேஸோ’’திஆதி³னா நயேன உப்பஜ்ஜமானோ யுக³க்³கா³ஹகா³ஹீ பளாஸோ. பரேஸங் ஸக்காராதீ³னி கீ²யனா இஸ்ஸா. அத்தனோ ஸம்பத்தியா பரேஹி ஸாதா⁴ரணபா⁴வங் அஸஹமானங் மச்ச²ரியங். வஞ்சனிகசரியபூ⁴தா மாயா. கேராடிகபா⁴வேன உப்பஜ்ஜமானங் ஸாடெ²ய்யங். கேராடிகோ ஹி ஆயதனமச்சோ² விய ஹோதி. ஆயதனமச்சோ² நாம கிர மச்சா²னங் நங்கு³ட்ட²ங் த³ஸ்ஸேதி ஸப்பானங் ஸீஸங் , ‘‘தும்ஹேஹி ஸதி³ஸோ அஹ’’ந்தி ஜானாபேதுங். ஏவமேவ கேராடிகோ புக்³க³லோ யங் யங் ஸுத்தந்திகங் வா ஆபி⁴த⁴ம்மிகங் வா உபஸங்கமதி, தங் தங் ஏவங் வத³தி ‘‘அஹங் தும்ஹாகங் ப³த்³த⁴சரோ, தும்ஹே மய்ஹங் அனுகம்பகா, நாஹங் தும்ஹே முஞ்சாமீ’’தி ‘‘ஏவமேதே ‘ஸகா³ரவோ அயங் அம்ஹேஸு ஸப்பதிஸ்ஸோ’தி மஞ்ஞிஸ்ஸந்தீ’’தி. தஸ்ஸேதங் கேராடிகபா⁴வேன உப்பஜ்ஜமானங் ஸாடெ²ய்யங் உப்பஜ்ஜித்வா சித்தங் தூ³ஸேதி, ஓபா⁴ஸிதுங் ந தே³தி. தஸ்மா ‘‘சித்தஸ்ஸ உபக்கிலேஸோ’’தி வுச்சதி.
Yathā cāyaṃ, evaṃ bahussutepi puggale ajjhottharitvā ‘‘īdisassa ceva bahussutassa aniyatā gati, tava vā mama vā ko viseso’’tiādinā nayena uppajjamāno yugaggāhagāhī paḷāso. Paresaṃ sakkārādīni khīyanā issā. Attano sampattiyā parehi sādhāraṇabhāvaṃ asahamānaṃ macchariyaṃ. Vañcanikacariyabhūtā māyā. Kerāṭikabhāvena uppajjamānaṃ sāṭheyyaṃ. Kerāṭiko hi āyatanamaccho viya hoti. Āyatanamaccho nāma kira macchānaṃ naṅguṭṭhaṃ dasseti sappānaṃ sīsaṃ , ‘‘tumhehi sadiso aha’’nti jānāpetuṃ. Evameva kerāṭiko puggalo yaṃ yaṃ suttantikaṃ vā ābhidhammikaṃ vā upasaṅkamati, taṃ taṃ evaṃ vadati ‘‘ahaṃ tumhākaṃ baddhacaro, tumhe mayhaṃ anukampakā, nāhaṃ tumhe muñcāmī’’ti ‘‘evamete ‘sagāravo ayaṃ amhesu sappatisso’ti maññissantī’’ti. Tassetaṃ kerāṭikabhāvena uppajjamānaṃ sāṭheyyaṃ uppajjitvā cittaṃ dūseti, obhāsituṃ na deti. Tasmā ‘‘cittassa upakkileso’’ti vuccati.
யதா² சேதங், ஏவங் வாதப⁴ரிதப⁴ஸ்தஸதி³ஸத²த்³த⁴பா⁴வபக்³க³ஹிதஸிரஅனிவாதவுத்திகாரகரணோ த²ம்போ⁴. தது³த்தரிகரணோ ஸாரம்போ⁴. ஸோ து³விதே⁴ன லப்³ப⁴தி அகுஸலவஸேன சேவ குஸலவஸேன ச. தத்த² அகா³ரியஸ்ஸ பரேன கதங் அலங்காராதி³ங் தி³ஸ்வா தத்³தி³கு³ணகரணேன உப்பஜ்ஜமானோ, அனகா³ரியஸ்ஸ ச யத்தகங் யத்தகங் பரோ பரியாபுணாதி வா கதே²தி வா, மானவஸேன தத்³தி³கு³ணதத்³தி³கு³ணகரணேன உப்பஜ்ஜமானோ அகுஸலோ. அகா³ரியஸ்ஸ பன பரங் ஏகங் ஸலாகப⁴த்தங் தெ³ந்தங் தி³ஸ்வா அத்தனா த்³வே வா தீணி வா தா³துகாமதாய உப்பஜ்ஜமானோ, அனகா³ரியஸ்ஸ ச பரேன ஏகனிகாயே க³ஹிதே மானங் அனிஸ்ஸாய கேவலங் தங் தி³ஸ்வா அத்தனா ஆலஸியங் அபி⁴பு⁴ய்ய த்³வே நிகாயே க³ஹேதுகாமதாய உப்பஜ்ஜமானோ குஸலோ. இத⁴ பன அகுஸலோ அதி⁴ப்பேதோ. அயஞ்ஹி உப்பஜ்ஜித்வா சித்தங் தூ³ஸேதி, ஓபா⁴ஸிதுங் ந தே³தி. தஸ்மா ‘‘சித்தஸ்ஸ உபக்கிலேஸோ’’தி வுச்சதி.
Yathā cetaṃ, evaṃ vātabharitabhastasadisathaddhabhāvapaggahitasiraanivātavuttikārakaraṇo thambho. Taduttarikaraṇo sārambho. So duvidhena labbhati akusalavasena ceva kusalavasena ca. Tattha agāriyassa parena kataṃ alaṅkārādiṃ disvā taddiguṇakaraṇena uppajjamāno, anagāriyassa ca yattakaṃ yattakaṃ paro pariyāpuṇāti vā katheti vā, mānavasena taddiguṇataddiguṇakaraṇena uppajjamāno akusalo. Agāriyassa pana paraṃ ekaṃ salākabhattaṃ dentaṃ disvā attanā dve vā tīṇi vā dātukāmatāya uppajjamāno, anagāriyassa ca parena ekanikāye gahite mānaṃ anissāya kevalaṃ taṃ disvā attanā ālasiyaṃ abhibhuyya dve nikāye gahetukāmatāya uppajjamāno kusalo. Idha pana akusalo adhippeto. Ayañhi uppajjitvā cittaṃ dūseti, obhāsituṃ na deti. Tasmā ‘‘cittassa upakkileso’’ti vuccati.
யதா² சாயங், ஏவங் ஜாதிஆதீ³னி நிஸ்ஸாய சித்தஸ்ஸ உண்ணதிவஸேன பவத்தமானோ மானோ, அச்சுண்ணதிவஸேன அதிமானோ, மத³க்³க³ஹணாகாரோ மதோ³, காமகு³ணேஸு சித்தவொஸ்ஸக்³க³வஸேன உப்பஜ்ஜமானோ பமாதோ³ உப்பஜ்ஜித்வா சித்தங் தூ³ஸேதி, ஓபா⁴ஸிதுங் ந தே³தி. தஸ்மா ‘‘சித்தஸ்ஸ உபக்கிலேஸோ’’தி வுச்சதி.
Yathā cāyaṃ, evaṃ jātiādīni nissāya cittassa uṇṇativasena pavattamāno māno, accuṇṇativasena atimāno, madaggahaṇākāro mado, kāmaguṇesu cittavossaggavasena uppajjamāno pamādo uppajjitvā cittaṃ dūseti, obhāsituṃ na deti. Tasmā ‘‘cittassa upakkileso’’ti vuccati.
கஸ்மா பன ப⁴க³வா உபக்கிலேஸங் த³ஸ்ஸெந்தோ லோப⁴மாதி³ங் கத்வா த³ஸ்ஸேதீதி? தஸ்ஸ பட²முப்பத்திதோ. ஸப்³ப³ஸத்தானஞ்ஹி யத்த² கத்த²சி உபபன்னானங் அந்தமஸோ ஸுத்³தா⁴வாஸபூ⁴மியம்பி ஸப்³ப³பட²மங் ப⁴வனிகந்திவஸேன லோபோ⁴ உப்பஜ்ஜதி, ததோ அத்தனோ அத்தனோ அனுரூபபச்சயங் படிச்ச யதா²ஸம்ப⁴வங் இதரே, ந ச ஏதே ஸோளஸேவ சித்தஸ்ஸ உபக்கிலேஸா, ஏதேன பன நயேன ஸப்³பே³பி கிலேஸா க³ஹிதாயேவ ஹொந்தீதி வேதி³தப்³பா³.
Kasmā pana bhagavā upakkilesaṃ dassento lobhamādiṃ katvā dassetīti? Tassa paṭhamuppattito. Sabbasattānañhi yattha katthaci upapannānaṃ antamaso suddhāvāsabhūmiyampi sabbapaṭhamaṃ bhavanikantivasena lobho uppajjati, tato attano attano anurūpapaccayaṃ paṭicca yathāsambhavaṃ itare, na ca ete soḷaseva cittassa upakkilesā, etena pana nayena sabbepi kilesā gahitāyeva hontīti veditabbā.
72. எத்தாவதா ஸங்கிலேஸங் த³ஸ்ஸெத்வா இதா³னி வோதா³னங் த³ஸ்ஸெந்தோ ஸ கோ² ஸோ, பி⁴க்க²வேதிஆதி³மாஹ. தத்த² இதி விதி³த்வாதி ஏவங் ஜானித்வா. பஜஹதீதி ஸமுச்சே²த³ப்பஹானவஸேன அரியமக்³கே³ன பஜஹதி. தத்த² கிலேஸபடிபாடியா மக்³க³படிபாடியாதி த்³விதா⁴ பஹானங் வேதி³தப்³ப³ங். கிலேஸபடிபாடியா தாவ அபி⁴ஜ்ஜா²விஸமலோபோ⁴ த²ம்போ⁴ ஸாரம்போ⁴ மானோ அதிமானோ மதோ³தி இமே ச² கிலேஸா அரஹத்தமக்³கே³ன பஹீயந்தி. ப்³யாபாதோ³ கோதோ⁴ உபனாஹோ பமாதோ³தி இமே சத்தாரோ கிலேஸா அனாகா³மிமக்³கே³ன பஹீயந்தி. மக்கோ² பளாஸோ இஸ்ஸா மச்ச²ரியங் மாயா ஸாடெ²ய்யந்தி இமே ச² ஸோதாபத்திமக்³கே³ன பஹீயந்தீதி. மக்³க³படிபாடியா பன, ஸோதாபத்திமக்³கே³ன மக்கோ² பளாஸோ இஸ்ஸா மச்ச²ரியங் மாயா ஸாடெ²ய்யந்தி இமே ச² பஹீயந்தி. அனாகா³மிமக்³கே³ன ப்³யாபாதோ³ கோதோ⁴ உபனாஹோ பமாதோ³தி இமே சத்தாரோ. அரஹத்தமக்³கே³ன அபி⁴ஜ்ஜா²விஸமலோபோ⁴ த²ம்போ⁴ ஸாரம்போ⁴ மானோ அதிமானோ மதோ³தி இமே ச² பஹீயந்தீதி.
72. Ettāvatā saṃkilesaṃ dassetvā idāni vodānaṃ dassento sa kho so, bhikkhavetiādimāha. Tattha iti viditvāti evaṃ jānitvā. Pajahatīti samucchedappahānavasena ariyamaggena pajahati. Tattha kilesapaṭipāṭiyā maggapaṭipāṭiyāti dvidhā pahānaṃ veditabbaṃ. Kilesapaṭipāṭiyā tāva abhijjhāvisamalobho thambho sārambho māno atimāno madoti ime cha kilesā arahattamaggena pahīyanti. Byāpādo kodho upanāho pamādoti ime cattāro kilesā anāgāmimaggena pahīyanti. Makkho paḷāso issā macchariyaṃ māyā sāṭheyyanti ime cha sotāpattimaggena pahīyantīti. Maggapaṭipāṭiyā pana, sotāpattimaggena makkho paḷāso issā macchariyaṃ māyā sāṭheyyanti ime cha pahīyanti. Anāgāmimaggena byāpādo kodho upanāho pamādoti ime cattāro. Arahattamaggena abhijjhāvisamalobho thambho sārambho māno atimāno madoti ime cha pahīyantīti.
இமஸ்மிங் பன டா²னே இமே கிலேஸா ஸோதாபத்திமக்³க³வஜ்ஜா² வா ஹொந்து, ஸேஸமக்³க³வஜ்ஜா² வா, அத² கோ² அனாகா³மிமக்³கே³னேவ பஹானங் ஸந்தா⁴ய ‘‘அபி⁴ஜ்ஜா²விஸமலோப⁴ங் சித்தஸ்ஸ உபக்கிலேஸங் பஜஹதீ’’திஆதி³மாஹாதி வேதி³தப்³பா³. அயமெத்த² பவேணிமக்³கா³க³தோ ஸம்ப⁴வோ, ஸோ ச உபரி சதுத்த²மக்³க³ஸ்ஸேவ நித்³தி³ட்ட²த்தா யுஜ்ஜதி, ததியமக்³கே³ன பஹீனாவஸேஸானஞ்ஹி விஸமலோபா⁴தீ³னங் தேன பஹானங் ஹோதி, ஸேஸானங் இமினாவ. யேபி ஹி ஸோதாபத்திமக்³கே³ன பஹீயந்தி, தேபி தங்ஸமுட்டா²பகசித்தானங் அப்பஹீனத்தா அனாகா³மிமக்³கே³னேவ ஸுப்பஹீனா ஹொந்தீதி. கேசி பன பட²மமக்³கே³ன செத்த² பஹானங் வண்ணயந்தி, தங் புப்³பா³பரேன ந ஸந்தி⁴யதி. கேசி விக்க²ம்ப⁴னப்பஹானம்பி, தங் தேஸங் இச்சா²மத்தமேவ.
Imasmiṃ pana ṭhāne ime kilesā sotāpattimaggavajjhā vā hontu, sesamaggavajjhā vā, atha kho anāgāmimaggeneva pahānaṃ sandhāya ‘‘abhijjhāvisamalobhaṃ cittassa upakkilesaṃ pajahatī’’tiādimāhāti veditabbā. Ayamettha paveṇimaggāgato sambhavo, so ca upari catutthamaggasseva niddiṭṭhattā yujjati, tatiyamaggena pahīnāvasesānañhi visamalobhādīnaṃ tena pahānaṃ hoti, sesānaṃ imināva. Yepi hi sotāpattimaggena pahīyanti, tepi taṃsamuṭṭhāpakacittānaṃ appahīnattā anāgāmimaggeneva suppahīnā hontīti. Keci pana paṭhamamaggena cettha pahānaṃ vaṇṇayanti, taṃ pubbāparena na sandhiyati. Keci vikkhambhanappahānampi, taṃ tesaṃ icchāmattameva.
73. யதோ கோ², பி⁴க்க²வேதி எத்த² யதோதி யம்ஹி காலே. பஹீனோ ஹோதீதி அனாகா³மிமக்³க³க்க²ணே பஹானங் ஸந்தா⁴யேவாஹ.
73.Yatokho, bhikkhaveti ettha yatoti yamhi kāle. Pahīno hotīti anāgāmimaggakkhaṇe pahānaṃ sandhāyevāha.
74. ஸோ பு³த்³தே⁴ அவேச்சப்பஸாதே³னாதி ஏதங் ‘‘யதோ கோ², பி⁴க்க²வே, அபி⁴ஜ்ஜா²விஸமலோபோ⁴ பஹீனோ ஹோதி, ஸோ பு³த்³தே⁴ அவேச்சப்பஸாதே³ன ஸமன்னாக³தோ ஹோதீ’’தி ஏவங் ஏகமேகேன பதே³ன யோஜேதப்³ப³ங். இமஸ்ஸ ஹி பி⁴க்கு²னோ அனாகா³மிமக்³கே³ன லோகுத்தரப்பஸாதோ³ ஆக³தோ, அத²ஸ்ஸ அபரேன ஸமயேன பு³த்³த⁴கு³ணே த⁴ம்மகு³ணே ஸங்க⁴கு³ணே ச அனுஸ்ஸரதோ லோகியோ உப்பஜ்ஜதி, தமஸ்ஸ ஸப்³ப³ம்பி லோகியலோகுத்தரமிஸ்ஸகங் பஸாத³ங் த³ஸ்ஸெந்தோ ப⁴க³வா ‘‘பு³த்³தே⁴ அவேச்சப்பஸாதே³னா’’திஆதி³மாஹ.
74.So buddhe aveccappasādenāti etaṃ ‘‘yato kho, bhikkhave, abhijjhāvisamalobho pahīno hoti, so buddhe aveccappasādena samannāgato hotī’’ti evaṃ ekamekena padena yojetabbaṃ. Imassa hi bhikkhuno anāgāmimaggena lokuttarappasādo āgato, athassa aparena samayena buddhaguṇe dhammaguṇe saṅghaguṇe ca anussarato lokiyo uppajjati, tamassa sabbampi lokiyalokuttaramissakaṃ pasādaṃ dassento bhagavā ‘‘buddhe aveccappasādenā’’tiādimāha.
தத்த² அவேச்சப்பஸாதே³னாதி பு³த்³த⁴த⁴ம்மஸங்க⁴கு³ணானங் யாதா²வதோ ஞாதத்தா அசலேன அச்சுதேன பஸாதே³ன. இதா³னி யதா² தஸ்ஸ பி⁴க்கு²னோ அனுஸ்ஸரதோ ஸோ அவேச்சப்பஸாதோ³ உப்பன்னோ, தங் விதி⁴ங் த³ஸ்ஸெந்தோ ‘‘இதிபி ஸோ ப⁴க³வா’’திஆதி³னா நயேன தீணி அனுஸ்ஸதிட்டா²னானி வித்தா²ரேஸி. தேஸங் அத்த²வண்ணனா ஸப்³பா³காரேன விஸுத்³தி⁴மக்³கே³ அனுஸ்ஸதிகதா²யங் வுத்தா.
Tattha aveccappasādenāti buddhadhammasaṅghaguṇānaṃ yāthāvato ñātattā acalena accutena pasādena. Idāni yathā tassa bhikkhuno anussarato so aveccappasādo uppanno, taṃ vidhiṃ dassento ‘‘itipi so bhagavā’’tiādinā nayena tīṇi anussatiṭṭhānāni vitthāresi. Tesaṃ atthavaṇṇanā sabbākārena visuddhimagge anussatikathāyaṃ vuttā.
75. ஏவமஸ்ஸ லோகியலோகுத்தரமிஸ்ஸகங் பஸாத³ங் த³ஸ்ஸெத்வா இதா³னி கிலேஸப்பஹானங் அவேச்சப்பஸாத³ஸமன்னாக³தஞ்ச பச்சவெக்க²தோ உப்பஜ்ஜமானங் ஸோமனஸ்ஸாதி³ஆனிஸங்ஸங் த³ஸ்ஸெந்தோ யதோ²தி⁴ கோ² பனஸ்ஸாதிஆதி³மாஹ. அனாகா³மிஸ்ஸ ஹி பச்சந்தே வுட்டி²தங் சோருபத்³த³வங் வூபஸமெத்வா தங் பச்சவெக்க²தோ மஹானக³ரே வஸந்தஸ்ஸ ரஞ்ஞோ விய இமே சிமே ச மம கிலேஸா பஹீனாதி அத்தனோ கிலேஸப்பஹானங் பச்சவெக்க²தோ ப³லவஸோமனஸ்ஸங் உப்பஜ்ஜதி. தங் த³ஸ்ஸெந்தோ ப⁴க³வா ‘‘யதோ²தி⁴ கோ² பனஸ்ஸா’’திஆதி³மாஹ.
75. Evamassa lokiyalokuttaramissakaṃ pasādaṃ dassetvā idāni kilesappahānaṃ aveccappasādasamannāgatañca paccavekkhato uppajjamānaṃ somanassādiānisaṃsaṃ dassento yathodhi kho panassātiādimāha. Anāgāmissa hi paccante vuṭṭhitaṃ corupaddavaṃ vūpasametvā taṃ paccavekkhato mahānagare vasantassa rañño viya ime cime ca mama kilesā pahīnāti attano kilesappahānaṃ paccavekkhato balavasomanassaṃ uppajjati. Taṃ dassento bhagavā ‘‘yathodhi kho panassā’’tiādimāha.
தஸ்ஸத்தோ² – ய்வாயங் அனாகா³மீ பி⁴க்கு² ஏவங் ‘‘பு³த்³தே⁴ அவேச்சப்பஸாதே³ன ஸமன்னாக³தோ ஹோதி…பே॰… த⁴ம்மே…பே॰… ஸங்கே⁴…பே॰… அனுத்தரங் புஞ்ஞக்கெ²த்தங் லோகஸ்ஸா’’தி, தஸ்ஸ யதோ²தி⁴ கோ² சத்தங் ஹோதி படினிஸ்ஸட்ட²ங், ஸகஸகஓதி⁴வஸேன சத்தமேவ ஹோதி, தங் தங் கிலேஸஜாதங் வந்தங் முத்தங் பஹீனங் படினிஸ்ஸட்ட²ங். ஸகஸகஓதி⁴வஸேனாதி த்³வே ஓதீ⁴ கிலேஸோதி⁴ ச மக்³கோ³தி⁴ ச. தத்த² கிலேஸோதி⁴வஸேனாபி யே கிலேஸா யங் மக்³க³வஜ்ஜா², தே அஞ்ஞமக்³க³வஜ்ஜே²ஹி அமிஸ்ஸா ஹுத்வா ஸகேனேவ ஓதி⁴னா பஹீனா. மக்³கோ³தி⁴வஸேனாபி யே கிலேஸா யேன மக்³கே³ன பஹாதப்³பா³, தேன தேயேவ பஹீனா ஹொந்தி. ஏவங் ஸகஸகஓதி⁴வஸேன தங் தங் கிலேஸஜாதங் சத்தமேவ ஹோதி படினிஸ்ஸட்ட²ங், தங் பச்சவெக்கி²த்வா ச லத்³த⁴ஸோமனஸ்ஸோ ததுத்தரிபி ஸோ ‘‘பு³த்³தே⁴ அவேச்சப்பஸாதே³ன ஸமன்னாக³தொம்ஹீ’’தி லப⁴தி அத்த²வேத³ந்தி ஸம்ப³ந்தோ⁴.
Tassattho – yvāyaṃ anāgāmī bhikkhu evaṃ ‘‘buddhe aveccappasādena samannāgato hoti…pe… dhamme…pe… saṅghe…pe… anuttaraṃ puññakkhettaṃ lokassā’’ti, tassa yathodhi kho cattaṃ hoti paṭinissaṭṭhaṃ, sakasakaodhivasena cattameva hoti, taṃ taṃ kilesajātaṃ vantaṃ muttaṃ pahīnaṃ paṭinissaṭṭhaṃ. Sakasakaodhivasenāti dve odhī kilesodhi ca maggodhi ca. Tattha kilesodhivasenāpi ye kilesā yaṃ maggavajjhā, te aññamaggavajjhehi amissā hutvā sakeneva odhinā pahīnā. Maggodhivasenāpi ye kilesā yena maggena pahātabbā, tena teyeva pahīnā honti. Evaṃ sakasakaodhivasena taṃ taṃ kilesajātaṃ cattameva hoti paṭinissaṭṭhaṃ, taṃ paccavekkhitvā ca laddhasomanasso tatuttaripi so ‘‘buddhe aveccappasādena samannāgatomhī’’ti labhati atthavedanti sambandho.
யதோதி⁴ கோ²திபி பாடோ². தஸ்ஸ வஸேன அயமத்தோ², அஸ்ஸ பி⁴க்கு²னோ யதோதி⁴ கோ² பன சத்தங் ஹோதி படினிஸ்ஸட்ட²ங். தத்த² யதோதி காரணவசனங், யஸ்மாதி வுத்தங் ஹோதி. ஓதீ⁴தி ஹெட்டா² தயோ மக்³கா³ வுச்சந்தி. கஸ்மா? தே ஹி ஓதி⁴ங் கத்வா கொட்டா²ஸங் கத்வா உபரிமக்³கே³ன பஹாதப்³ப³கிலேஸே ட²பெத்வா பஜஹந்தி, தஸ்மா ஓதீ⁴தி வுச்சந்தி. அரஹத்தமக்³கோ³ பன கிஞ்சி கிலேஸங் அனவஸேஸெத்வா பஜஹதி, தஸ்மா அனோதீ⁴தி வுச்சதி. இமஸ்ஸ ச பி⁴க்கு²னோ ஹெட்டா²மக்³க³த்தயேன சத்தங். தேன வுத்தங் ‘‘யதோதி⁴ கோ² பனஸ்ஸ சத்தங் ஹோதீ’’தி. தத்த² கோ² பனாதி நிபாதமத்தங். அயங் பன பிண்ட³த்தோ². யஸ்மா அஸ்ஸ ஓதி⁴ சத்தங் ஹோதி படினிஸ்ஸட்ட²ங், தஸ்மா தங் பச்சவெக்கி²த்வா ச லத்³த⁴ஸோமனஸ்ஸோ ததுத்தரிபி ஸோ ‘‘பு³த்³தே⁴ அவேச்சப்பஸாதே³ன ஸமன்னாக³தொம்ஹீ’’தி லப⁴தி அத்த²வேத³ந்தி யதா²பாளி நேதப்³ப³ங்.
Yatodhi khotipi pāṭho. Tassa vasena ayamattho, assa bhikkhuno yatodhi kho pana cattaṃ hoti paṭinissaṭṭhaṃ. Tattha yatoti kāraṇavacanaṃ, yasmāti vuttaṃ hoti. Odhīti heṭṭhā tayo maggā vuccanti. Kasmā? Te hi odhiṃ katvā koṭṭhāsaṃ katvā uparimaggena pahātabbakilese ṭhapetvā pajahanti, tasmā odhīti vuccanti. Arahattamaggo pana kiñci kilesaṃ anavasesetvā pajahati, tasmā anodhīti vuccati. Imassa ca bhikkhuno heṭṭhāmaggattayena cattaṃ. Tena vuttaṃ ‘‘yatodhi kho panassa cattaṃ hotī’’ti. Tattha kho panāti nipātamattaṃ. Ayaṃ pana piṇḍattho. Yasmā assa odhi cattaṃ hoti paṭinissaṭṭhaṃ, tasmā taṃ paccavekkhitvā ca laddhasomanasso tatuttaripi so ‘‘buddhe aveccappasādena samannāgatomhī’’ti labhati atthavedanti yathāpāḷi netabbaṃ.
தத்த² சத்தந்தி இத³ங் ஸகபா⁴வபரிச்சஜனவஸேன வுத்தங். வந்தந்தி இத³ங் பன அனாதி³யனபா⁴வத³ஸ்ஸனவஸேன. முத்தந்தி இத³ங் ஸந்ததிதோ வினிமோசனவஸேன. பஹீனந்தி இத³ங் முத்தஸ்ஸபி க்வசி அனவட்டா²னத³ஸ்ஸனவஸேன. படினிஸ்ஸட்ட²ந்தி இத³ங் புப்³பே³ ஆதி³ன்னபுப்³ப³ஸ்ஸ படினிஸ்ஸக்³க³த³ஸ்ஸனவஸேன படிமுக²ங் வா நிஸ்ஸட்ட²பா⁴வத³ஸ்ஸனவஸேன பா⁴வனாப³லேன அபி⁴பு⁴ய்ய நிஸ்ஸட்ட²பா⁴வத³ஸ்ஸனவஸேனாதி வுத்தங் ஹோதி. லப⁴தி அத்த²வேத³ங் லப⁴தி த⁴ம்மவேத³ந்தி எத்த² பு³த்³தா⁴தீ³ஸு அவேச்சப்பஸாதோ³யேவ அரணீயதோ அத்தோ², உபக³ந்தப்³ப³தோதி வுத்தங் ஹோதி. தா⁴ரணதோ த⁴ம்மோ, வினிபதிதுங் அப்பதா³னதோதி வுத்தங் ஹோதி. வேதோ³தி க³ந்தோ²பி ஞாணம்பி ஸோமனஸ்ஸம்பி. ‘‘திண்ணங் வேதா³னங் பாரகூ³’’திஆதீ³ஸு (தீ³॰ நி॰ 1.256) ஹி க³ந்தோ² ‘‘வேதோ³’’தி வுச்சதி. ‘‘யங் ப்³ராஹ்மணங் வேத³கு³மாபி⁴ஜஞ்ஞா, அகிஞ்சனங் காமபா⁴வே அஸத்த’’ந்திஆதீ³ஸு (ஸு॰ நி॰ 1065) ஞாணங். ‘‘யே வேத³ஜாதா விசரந்தி லோகே’’திஆதீ³ஸு ஸோமனஸ்ஸங். இத⁴ பன ஸோமனஸ்ஸஞ்ச ஸோமனஸ்ஸஸம்பயுத்தஞாணஞ்ச அதி⁴ப்பேதங், தஸ்மா ‘‘லப⁴தி அத்த²வேத³ங் லப⁴தி த⁴ம்மவேத³ந்தி அவேச்சப்பஸாதா³ரம்மணஸோமனஸ்ஸஞ்ச ஸோமனஸ்ஸமயஞாணஞ்ச லப⁴தீ’’தி ஏவமெத்த² அத்தோ² வேதி³தப்³போ³.
Tattha cattanti idaṃ sakabhāvapariccajanavasena vuttaṃ. Vantanti idaṃ pana anādiyanabhāvadassanavasena. Muttanti idaṃ santatito vinimocanavasena. Pahīnanti idaṃ muttassapi kvaci anavaṭṭhānadassanavasena. Paṭinissaṭṭhanti idaṃ pubbe ādinnapubbassa paṭinissaggadassanavasena paṭimukhaṃ vā nissaṭṭhabhāvadassanavasena bhāvanābalena abhibhuyya nissaṭṭhabhāvadassanavasenāti vuttaṃ hoti. Labhati atthavedaṃ labhati dhammavedanti ettha buddhādīsu aveccappasādoyeva araṇīyato attho, upagantabbatoti vuttaṃ hoti. Dhāraṇato dhammo, vinipatituṃ appadānatoti vuttaṃ hoti. Vedoti ganthopi ñāṇampi somanassampi. ‘‘Tiṇṇaṃ vedānaṃ pāragū’’tiādīsu (dī. ni. 1.256) hi gantho ‘‘vedo’’ti vuccati. ‘‘Yaṃ brāhmaṇaṃ vedagumābhijaññā, akiñcanaṃ kāmabhāve asatta’’ntiādīsu (su. ni. 1065) ñāṇaṃ. ‘‘Ye vedajātā vicaranti loke’’tiādīsu somanassaṃ. Idha pana somanassañca somanassasampayuttañāṇañca adhippetaṃ, tasmā ‘‘labhati atthavedaṃ labhati dhammavedanti aveccappasādārammaṇasomanassañca somanassamayañāṇañca labhatī’’ti evamettha attho veditabbo.
அத² வா அத்த²வேத³ந்தி அவேச்சப்பஸாத³ங் பச்சவெக்க²தோ உப்பன்னங் வுத்தப்பகாரமேவ வேத³ங். த⁴ம்மவேத³ந்தி அவேச்சப்பஸாத³ஸ்ஸ ஹேதுங் ஓதி⁴ஸோ கிலேஸப்பஹானங் பச்சவெக்க²தோ உப்பன்னங் வுத்தப்பகாரமேவ வேத³ந்தி ஏவம்பி எத்த² அத்தோ² வேதி³தப்³போ³. வுத்தஞ்ஹேதங் ‘‘ஹேதும்ஹி ஞாணங் த⁴ம்மபடிஸம்பி⁴தா³, ஹேதுப²லே ஞாணங் அத்த²படிஸம்பி⁴தா³’’தி (விப⁴॰ 718-719). த⁴ம்மூபஸங்ஹிதங் பாமோஜ்ஜந்தி தமேவ அத்த²ஞ்ச த⁴ம்மஞ்ச அத்த²த⁴ம்மானிஸங்ஸபூ⁴தங் வேத³ஞ்ச பச்சவெக்க²தோ உப்பன்னங் பாமோஜ்ஜங். தஞ்ஹி அனவஜ்ஜலக்க²ணேன பச்சவெக்க²ணாகாரப்பவத்தேன த⁴ம்மேன உபஸஞ்ஹிதந்தி வுச்சதி. பமுதி³தஸ்ஸ பீதி ஜாயதீதி இமினா பாமோஜ்ஜேன பமுதி³தஸ்ஸ நிராமிஸா பீதி ஜாயதி. பீதிமனஸ்ஸாதி தாய பீதியா பீணிதமனஸ்ஸ. காயோ பஸ்ஸம்ப⁴தீதி காயோபி பஸ்ஸத்³தோ⁴ ஹோதி வூபஸந்தத³ரதோ². பஸ்ஸத்³த⁴காயோ ஸுக²ந்தி ஏவங் வூபஸந்தகாயத³ரதோ² சேதஸிகங் ஸுக²ங் படிஸங்வேதே³தி. சித்தங் ஸமாதி⁴யதீதி சித்தங் ஸம்மா ஆதி⁴யதி அப்பிதங் விய அசலங் திட்ட²தி.
Atha vā atthavedanti aveccappasādaṃ paccavekkhato uppannaṃ vuttappakārameva vedaṃ. Dhammavedanti aveccappasādassa hetuṃ odhiso kilesappahānaṃ paccavekkhato uppannaṃ vuttappakārameva vedanti evampi ettha attho veditabbo. Vuttañhetaṃ ‘‘hetumhi ñāṇaṃ dhammapaṭisambhidā, hetuphale ñāṇaṃ atthapaṭisambhidā’’ti (vibha. 718-719). Dhammūpasaṃhitaṃ pāmojjanti tameva atthañca dhammañca atthadhammānisaṃsabhūtaṃ vedañca paccavekkhato uppannaṃ pāmojjaṃ. Tañhi anavajjalakkhaṇena paccavekkhaṇākārappavattena dhammena upasañhitanti vuccati. Pamuditassa pīti jāyatīti iminā pāmojjena pamuditassa nirāmisā pīti jāyati. Pītimanassāti tāya pītiyā pīṇitamanassa. Kāyo passambhatīti kāyopi passaddho hoti vūpasantadaratho. Passaddhakāyo sukhanti evaṃ vūpasantakāyadaratho cetasikaṃ sukhaṃ paṭisaṃvedeti. Cittaṃ samādhiyatīti cittaṃ sammā ādhiyati appitaṃ viya acalaṃ tiṭṭhati.
76. ஏவமஸ்ஸ கிலேஸப்பஹானங் அவேச்சப்பஸாத³ஸமன்னாக³தங் பச்சவெக்க²தோ உப்பஜ்ஜமானங் ஸோமனஸ்ஸாதி³ஆனிஸங்ஸங் த³ஸ்ஸெத்வா இதா³னி ‘‘யதோ²தி⁴ கோ² பன மே’’தி வாரேன தஸ்ஸ பச்சவெக்க²ணாய பவத்தாகாரங் பகாஸெத்வா தஸ்ஸேவ அனாகா³மிமக்³கா³னுபா⁴வஸூசகங் ப²லங் த³ஸ்ஸெந்தோ ஸ கோ² ஸோ, பி⁴க்க²வேதிஆதி³மாஹ.
76. Evamassa kilesappahānaṃ aveccappasādasamannāgataṃ paccavekkhato uppajjamānaṃ somanassādiānisaṃsaṃ dassetvā idāni ‘‘yathodhi kho pana me’’ti vārena tassa paccavekkhaṇāya pavattākāraṃ pakāsetvā tasseva anāgāmimaggānubhāvasūcakaṃ phalaṃ dassento sa kho so, bhikkhavetiādimāha.
தத்த² ஏவங்ஸீலோதி தஸ்ஸ அனாகா³மிமக்³க³ஸம்பயுத்தங் ஸீலக்க²ந்த⁴ங் த³ஸ்ஸேதி. ஏவங்த⁴ம்மோ ஏவங்பஞ்ஞோதி தங்ஸம்பயுத்தமேவ ஸமாதி⁴க்க²ந்த⁴ங் பஞ்ஞாக்க²ந்த⁴ஞ்ச த³ஸ்ஸேதி. ஸாலீனந்தி லோஹிதஸாலிக³ந்த⁴ஸாலிஆதீ³னங் அனேகரூபானங். பிண்ட³பாதந்தி ஓத³னங். விசிதகாளகந்தி அபனீதகாளகங். நேவஸ்ஸ தங் ஹோதி அந்தராயாயாதி தஸ்ஸ ஏவங்வித⁴ஸ்ஸ பி⁴க்கு²னோ தங் வுத்தப்பகாரபிண்ட³பாதபோ⁴ஜனங் மக்³க³ஸ்ஸ வா ப²லஸ்ஸ வா நேவ அந்தராயாய ஹோதி, படிலத்³த⁴கு³ணஸ்ஸ ஹி தங் கிமந்தராயங் கரிஸ்ஸதி? யோபிஸ்ஸ அப்படிலத்³தோ⁴ சதுத்த²மக்³கோ³ ச ப²லங் ச தப்படிலாபா⁴ய விபஸ்ஸனங் ஆரப⁴தோபி நேவஸ்ஸ தங் ஹோதி அந்தராயாய, அந்தராயங் காதுங் அஸமத்த²மேவ ஹோதி. கஸ்மா? வுத்தப்பகாரஸீலத⁴ம்மபஞ்ஞாஸங்க³ஹேன மக்³கே³ன விஸுத்³த⁴சித்தத்தா.
Tattha evaṃsīloti tassa anāgāmimaggasampayuttaṃ sīlakkhandhaṃ dasseti. Evaṃdhammo evaṃpaññoti taṃsampayuttameva samādhikkhandhaṃ paññākkhandhañca dasseti. Sālīnanti lohitasāligandhasāliādīnaṃ anekarūpānaṃ. Piṇḍapātanti odanaṃ. Vicitakāḷakanti apanītakāḷakaṃ. Nevassa taṃ hoti antarāyāyāti tassa evaṃvidhassa bhikkhuno taṃ vuttappakārapiṇḍapātabhojanaṃ maggassa vā phalassa vā neva antarāyāya hoti, paṭiladdhaguṇassa hi taṃ kimantarāyaṃ karissati? Yopissa appaṭiladdho catutthamaggo ca phalaṃ ca tappaṭilābhāya vipassanaṃ ārabhatopi nevassa taṃ hoti antarāyāya, antarāyaṃ kātuṃ asamatthameva hoti. Kasmā? Vuttappakārasīladhammapaññāsaṅgahena maggena visuddhacittattā.
யஸ்மா செத்த² ஏததே³வ காரணங், தஸ்மா தத³னுரூபங் உபமங் த³ஸ்ஸெந்தோ ஸெய்யதா²பீதிஆதி³மாஹ.
Yasmā cettha etadeva kāraṇaṃ, tasmā tadanurūpaṃ upamaṃ dassento seyyathāpītiādimāha.
தத்த² அச்ச²ந்தி விப்பஸன்னங். பரிஸுத்³த⁴ங் மலவிக³மேன. பரியோதா³தங் பப⁴ஸ்ஸரதாய. உக்காமுக²ந்தி ஸுவண்ணகாரானங் மூஸாமுக²ங். ஸுவண்ணகாரானங் மூஸா ஹி இத⁴ உக்கா, அஞ்ஞத்த² பன தீ³பிகாத³யோபி வுச்சந்தி. ‘‘உக்காஸு தா⁴ரீயமானாஸூ’’தி (தீ³॰ நி॰ 1.159) ஹி ஆக³தட்டா²னே தீ³பிகா ‘‘உக்கா’’தி வுச்சதி. ‘‘உக்கங் ப³ந்தெ⁴ய்ய, உக்கங் ப³ந்தி⁴த்வா உக்காமுக²ங் ஆலிம்பெய்யா’’தி (ம॰ நி॰ 3.360) ஆக³தட்டா²னே அங்கா³ரகபல்லங். ‘‘கம்மாரானங் யதா² உக்கா, அந்தோ ஜா²யதி நோ ப³ஹீ’’தி (ஜா॰ 2.22.649) ஆக³தட்டா²னே கம்மாருத்³த⁴னங். ‘‘ஏவங்விபாகோ உக்காபாதோ ப⁴விஸ்ஸதீ’’தி (தீ³॰ நி॰ 1.24) ஆக³தட்டா²னே வாதவேகோ³ ‘‘உக்கா’’தி வுச்சதி. இமஸ்மிங் பன டா²னே அஞ்ஞேஸு ச ஏவரூபேஸு ‘‘ஸண்டா³ஸேன ஜாதரூபங் க³ஹெத்வா உக்காமுகே² பக்கி²பதீ’’தி ஆக³தட்டா²னேஸு ஸுவண்ணகாரானங் மூஸா ‘‘உக்கா’’தி வேதி³தப்³பா³.
Tattha acchanti vippasannaṃ. Parisuddhaṃ malavigamena. Pariyodātaṃ pabhassaratāya. Ukkāmukhanti suvaṇṇakārānaṃ mūsāmukhaṃ. Suvaṇṇakārānaṃ mūsā hi idha ukkā, aññattha pana dīpikādayopi vuccanti. ‘‘Ukkāsu dhārīyamānāsū’’ti (dī. ni. 1.159) hi āgataṭṭhāne dīpikā ‘‘ukkā’’ti vuccati. ‘‘Ukkaṃ bandheyya, ukkaṃ bandhitvā ukkāmukhaṃ ālimpeyyā’’ti (ma. ni. 3.360) āgataṭṭhāne aṅgārakapallaṃ. ‘‘Kammārānaṃ yathā ukkā, anto jhāyati no bahī’’ti (jā. 2.22.649) āgataṭṭhāne kammāruddhanaṃ. ‘‘Evaṃvipāko ukkāpāto bhavissatī’’ti (dī. ni. 1.24) āgataṭṭhāne vātavego ‘‘ukkā’’ti vuccati. Imasmiṃ pana ṭhāne aññesu ca evarūpesu ‘‘saṇḍāsena jātarūpaṃ gahetvā ukkāmukhe pakkhipatī’’ti āgataṭṭhānesu suvaṇṇakārānaṃ mūsā ‘‘ukkā’’ti veditabbā.
தத்ராயங் உபமாஸங்ஸந்த³னா – ஸங்கிலிட்ட²வத்த²ங் விய ஹி ஸங்கிலிட்ட²ஜாதரூபங் விய ச இமஸ்ஸ பி⁴க்கு²னோ புது²ஜ்ஜனகாலே காமராகா³தி³மலானுக³தங் சித்தங் த³ட்ட²ப்³ப³ங். அச்சோ²த³கங் விய உக்காமுக²ங் விய ச அனாகா³மிமக்³கோ³. தங் உத³கங் உக்காமுக²ஞ்ச ஆக³ம்ம வத்த²ஸுவண்ணானங் பரிஸுத்³த⁴தா விய தஸ்ஸ பி⁴க்கு²னோ வுத்தப்பகாரஸீலத⁴ம்மபஞ்ஞாஸங்க³ஹங் அனாகா³மிமக்³க³ங் ஆக³ம்ம விஸுத்³த⁴சித்ததாதி.
Tatrāyaṃ upamāsaṃsandanā – saṃkiliṭṭhavatthaṃ viya hi saṃkiliṭṭhajātarūpaṃ viya ca imassa bhikkhuno puthujjanakāle kāmarāgādimalānugataṃ cittaṃ daṭṭhabbaṃ. Acchodakaṃ viya ukkāmukhaṃ viya ca anāgāmimaggo. Taṃ udakaṃ ukkāmukhañca āgamma vatthasuvaṇṇānaṃ parisuddhatā viya tassa bhikkhuno vuttappakārasīladhammapaññāsaṅgahaṃ anāgāmimaggaṃ āgamma visuddhacittatāti.
77. ஸோ மெத்தாஸஹக³தேன சேதஸாதி யதா²னுஸந்தி⁴வஸேன தே³ஸனா ஆக³தா. தயோ ஹி அனுஸந்தீ⁴ புச்சா²னுஸந்தி⁴ அஜ்ஜா²ஸயானுஸந்தி⁴ யதா²னுஸந்தீ⁴தி. தத்த² ‘‘ஏவங் வுத்தே அஞ்ஞதரோ பி⁴க்கு² ப⁴க³வந்தங் ஏதத³வோச ‘ஸியா நு கோ², ப⁴ந்தே, ப³ஹித்³தா⁴ அஸதி பரிதஸ்ஸனா’தி? ‘ஸியா பி⁴க்கூ²’தி ப⁴க³வா அவோசா’’தி (ம॰ நி॰ 1.242). ஏவங் புச்ச²ந்தானங் விஸ்ஸஜ்ஜிதஸுத்தவஸேன புச்சா²னுஸந்தி⁴ வேதி³தப்³போ³. ‘‘ஸியா கோ² பன தே ப்³ராஹ்மண ஏவமஸ்ஸ, அஜ்ஜாபி நூன ஸமணோ கோ³தமோ அவீதராகோ³’’தி (ம॰ நி॰ 1.55) ஏவங் பரேஸங் அஜ்ஜா²ஸயங் விதி³த்வா வுத்தஸ்ஸ ஸுத்தஸ்ஸ வஸேன அஜ்ஜா²ஸயானுஸந்தி⁴ வேதி³தப்³போ³. யேன பன த⁴ம்மேன ஆதி³ம்ஹி தே³ஸனா உட்டி²தா, தஸ்ஸ த⁴ம்மஸ்ஸ அனுரூபத⁴ம்மவஸேன வா படிபக்க²வஸேன வா யேஸு ஸுத்தேஸு உபரி தே³ஸனா ஆக³ச்ச²தி, தேஸங் வஸேன யதா²னுஸந்தி⁴ வேதி³தப்³போ³ . ஸெய்யதி²த³ங், ஆகங்கெ²ய்யஸுத்தே ஹெட்டா² ஸீலேன தே³ஸனா உட்டி²தா, உபரி ச² அபி⁴ஞ்ஞா ஆக³தா. ககசூபமே ஹெட்டா² அக்க²ந்தியா உட்டி²தா, உபரி ககசூபமோவாதோ³ ஆக³தோ. அலக³த்³தே³ ஹெட்டா² தி³ட்டி²பரிதீ³பனேன உட்டி²தா, உபரி திபரிவட்டஸுஞ்ஞதாபகாஸனா ஆக³தா, சூளஅஸ்ஸபுரே ஹெட்டா² கிலேஸபரிதீ³பனேன உட்டி²தா, உபரி ப்³ரஹ்மவிஹாரா ஆக³தா. கோஸம்பி³யஸுத்தே ஹெட்டா² ப⁴ண்ட³னேன உட்டி²தா, உபரி ஸாரணீயத⁴ம்மா ஆக³தா. இமஸ்மிம்பி வத்த²ஸுத்தே ஹெட்டா² கிலேஸபரிதீ³பனேன உட்டி²தா, உபரி ப்³ரஹ்மவிஹாரா ஆக³தா. தேன வுத்தங் ‘‘யதா²னுஸந்தி⁴வஸேன தே³ஸனா ஆக³தா’’தி. ப்³ரஹ்மவிஹாரேஸு பன அனுபத³வண்ணனா ச பா⁴வனானயோ ச ஸப்³போ³ ஸப்³பா³காரேன விஸுத்³தி⁴மக்³கே³ வுத்தோ.
77.So mettāsahagatena cetasāti yathānusandhivasena desanā āgatā. Tayo hi anusandhī pucchānusandhi ajjhāsayānusandhi yathānusandhīti. Tattha ‘‘evaṃ vutte aññataro bhikkhu bhagavantaṃ etadavoca ‘siyā nu kho, bhante, bahiddhā asati paritassanā’ti? ‘Siyā bhikkhū’ti bhagavā avocā’’ti (ma. ni. 1.242). Evaṃ pucchantānaṃ vissajjitasuttavasena pucchānusandhi veditabbo. ‘‘Siyā kho pana te brāhmaṇa evamassa, ajjāpi nūna samaṇo gotamo avītarāgo’’ti (ma. ni. 1.55) evaṃ paresaṃ ajjhāsayaṃ viditvā vuttassa suttassa vasena ajjhāsayānusandhi veditabbo. Yena pana dhammena ādimhi desanā uṭṭhitā, tassa dhammassa anurūpadhammavasena vā paṭipakkhavasena vā yesu suttesu upari desanā āgacchati, tesaṃ vasena yathānusandhi veditabbo . Seyyathidaṃ, ākaṅkheyyasutte heṭṭhā sīlena desanā uṭṭhitā, upari cha abhiññā āgatā. Kakacūpame heṭṭhā akkhantiyā uṭṭhitā, upari kakacūpamovādo āgato. Alagadde heṭṭhā diṭṭhiparidīpanena uṭṭhitā, upari tiparivaṭṭasuññatāpakāsanā āgatā, cūḷaassapure heṭṭhā kilesaparidīpanena uṭṭhitā, upari brahmavihārā āgatā. Kosambiyasutte heṭṭhā bhaṇḍanena uṭṭhitā, upari sāraṇīyadhammā āgatā. Imasmimpi vatthasutte heṭṭhā kilesaparidīpanena uṭṭhitā, upari brahmavihārā āgatā. Tena vuttaṃ ‘‘yathānusandhivasena desanā āgatā’’ti. Brahmavihāresu pana anupadavaṇṇanā ca bhāvanānayo ca sabbo sabbākārena visuddhimagge vutto.
78. ஏவங் ப⁴க³வா அபி⁴ஜ்ஜா²தீ³னங் உபக்கிலேஸானங் படிபக்க²பூ⁴தங் ஸப்³ப³ஸோ ச காமராக³ப்³யாபாத³ப்பஹானேன விஹதபச்சத்தி²கத்தா லத்³த⁴பத³ட்டா²னங் தஸ்ஸ அனாகா³மினோ ப்³ரஹ்மவிஹாரபா⁴வனங் த³ஸ்ஸெத்வா இதா³னிஸ்ஸ அரஹத்தாய விபஸ்ஸனங் த³ஸ்ஸெத்வா அரஹத்தப்பத்திங் த³ஸ்ஸேதுங் ஸோ அத்தி² இத³ந்திஆதி³மாஹ.
78. Evaṃ bhagavā abhijjhādīnaṃ upakkilesānaṃ paṭipakkhabhūtaṃ sabbaso ca kāmarāgabyāpādappahānena vihatapaccatthikattā laddhapadaṭṭhānaṃ tassa anāgāmino brahmavihārabhāvanaṃ dassetvā idānissa arahattāya vipassanaṃ dassetvā arahattappattiṃ dassetuṃ so atthi idantiādimāha.
தஸ்ஸத்தோ² – ஸோ அனாகா³மீ ஏவங் பா⁴விதப்³ரஹ்மவிஹாரோ ஏதேஸங் ப்³ரஹ்மவிஹாரானங் யதோ குதோசி வுட்டா²ய தே ஏவ ப்³ரஹ்மவிஹாரத⁴ம்மே நாமவஸேன தேஸங் நிஸ்ஸயங் ஹத³யவத்து²ங் வத்து²னிஸ்ஸயானி பூ⁴தானீதி இமினா நயேன பூ⁴துபாதா³யத⁴ம்மே ரூபவஸேன ச வவத்த²பெத்வா அத்தி² இத³ந்தி பஜானாதி, எத்தாவதானேன து³க்க²ஸச்சவவத்தா²னங் கதங் ஹோதி. ததோ தஸ்ஸ து³க்க²ஸ்ஸ ஸமுத³யங் படிவிஜ்ஜ²ந்தோ அத்தி² ஹீனந்தி பஜானாதி, எத்தாவதானேன ஸமுத³யஸச்சவவத்தா²னங் கதங் ஹோதி. ததோ தஸ்ஸ பஹானுபாயங் விசினந்தோ அத்தி² பணீதந்தி பஜானாதி, எத்தாவதானேன மக்³க³ஸச்சவவத்தா²னங் கதங் ஹோதி. ததோ தேன மக்³கே³ன அதி⁴க³ந்தப்³ப³ட்டா²னங் விசினந்தோ அத்தி² உத்தரி இமஸ்ஸ ஸஞ்ஞாக³தஸ்ஸ நிஸ்ஸரணந்தி பஜானாதி, இமஸ்ஸ மயா அதி⁴க³தஸ்ஸ ப்³ரஹ்மவிஹாரஸஞ்ஞாக³தஸ்ஸ உத்தரி நிஸ்ஸரணங் நிப்³பா³னங் அத்தீ²தி ஏவங் பஜானாதீதி அதி⁴ப்பாயோ, எத்தாவதானேன நிரோத⁴ஸச்சவவத்தா²னங் கதங் ஹோதி. தஸ்ஸ ஏவங் ஜானதோ ஏவங் பஸ்ஸதோதி தஸ்ஸ விபஸ்ஸனாபஞ்ஞாய ஏவங் சதூஹி ஆகாரேஹி சத்தாரி ஸச்சானி ஜானதோ, மக்³க³பஞ்ஞாய ஏவங் பஸ்ஸதோ, ப⁴யபே⁴ரவே வுத்தனயேனேவ காமாஸவாபி சித்தங் விமுச்சதி…பே॰… இத்த²த்தாயாதி பஜானாதீதி.
Tassattho – so anāgāmī evaṃ bhāvitabrahmavihāro etesaṃ brahmavihārānaṃ yato kutoci vuṭṭhāya te eva brahmavihāradhamme nāmavasena tesaṃ nissayaṃ hadayavatthuṃ vatthunissayāni bhūtānīti iminā nayena bhūtupādāyadhamme rūpavasena ca vavatthapetvā atthi idanti pajānāti, ettāvatānena dukkhasaccavavatthānaṃ kataṃ hoti. Tato tassa dukkhassa samudayaṃ paṭivijjhanto atthi hīnanti pajānāti, ettāvatānena samudayasaccavavatthānaṃ kataṃ hoti. Tato tassa pahānupāyaṃ vicinanto atthi paṇītanti pajānāti, ettāvatānena maggasaccavavatthānaṃ kataṃ hoti. Tato tena maggena adhigantabbaṭṭhānaṃ vicinanto atthi uttari imassa saññāgatassa nissaraṇanti pajānāti, imassa mayā adhigatassa brahmavihārasaññāgatassa uttari nissaraṇaṃ nibbānaṃ atthīti evaṃ pajānātīti adhippāyo, ettāvatānena nirodhasaccavavatthānaṃ kataṃ hoti. Tassa evaṃ jānato evaṃ passatoti tassa vipassanāpaññāya evaṃ catūhi ākārehi cattāri saccāni jānato, maggapaññāya evaṃ passato, bhayabherave vuttanayeneva kāmāsavāpi cittaṃ vimuccati…pe… itthattāyāti pajānātīti.
ஏவங் யாவ அரஹத்தா தே³ஸனங் பாபெத்வா இதா³னி யஸ்மா தஸ்ஸங் பரிஸதி ந்ஹானஸுத்³தி⁴கோ ப்³ராஹ்மணோ நிஸின்னோ, ஸோ ஏவங் ந்ஹானஸுத்³தி⁴யா வண்ணங் வுச்சமானங் ஸுத்வா பப்³ப³ஜித்வா அரஹத்தங் பாபுணிஸ்ஸதீதி ப⁴க³வதா விதி³தோ, தஸ்மா தஸ்ஸ சோத³னத்தா²ய ‘‘அயங் வுச்சதி, பி⁴க்க²வே, பி⁴க்கு² ஸினாதோ அந்தரேன ஸினானேனா’’தி இமங் பாடியேக்கங் அனுஸந்தி⁴மாஹ. தத்த² அந்தரேன ஸினானேனாதி அப்³ப⁴ந்தரேன கிலேஸவுட்டா²னஸினானேன.
Evaṃ yāva arahattā desanaṃ pāpetvā idāni yasmā tassaṃ parisati nhānasuddhiko brāhmaṇo nisinno, so evaṃ nhānasuddhiyā vaṇṇaṃ vuccamānaṃ sutvā pabbajitvā arahattaṃ pāpuṇissatīti bhagavatā vidito, tasmā tassa codanatthāya ‘‘ayaṃ vuccati, bhikkhave, bhikkhu sināto antarena sinānenā’’ti imaṃ pāṭiyekkaṃ anusandhimāha. Tattha antarena sinānenāti abbhantarena kilesavuṭṭhānasinānena.
79. ஸுந்த³ரிகபா⁴ரத்³வாஜோதி பா⁴ரத்³வாஜோ நாம ஸோ ப்³ராஹ்மணோ அத்தனோ கொ³த்தவஸேன, ஸுந்த³ரிகாய பன நதி³யா ஸினாதஸ்ஸ பாபப்பஹானங் ஹோதீதி அயமஸ்ஸ தி³ட்டி², தஸ்மா ‘‘ஸுந்த³ரிகபா⁴ரத்³வாஜோ’’தி வுச்சதி. ஸோ தங் ப⁴க³வதோ வசனங் ஸுத்வா சிந்தேஸி ‘‘மயங் ஸினானஸுத்³தி⁴ங் வண்ணேம, ஸமணோபி கோ³தமோ ததே²வ வண்ணேதி, ஸமானச்ச²ந்தோ³ தா³னி ஏஸ அம்ஹேஹீ’’தி. அத² ப⁴க³வந்தங் பா³ஹுகங் நதி³ங் க³ந்த்வா தங் தத்த² பாபங் பவாஹெத்வா ஆக³தங் விய மஞ்ஞமானோ ஆஹ ‘‘க³ச்ச²தி பன ப⁴வங் கோ³தமோ பா³ஹுகங் நதி³ங் ஸினாயிது’’ந்தி? ப⁴க³வா தஸ்ஸ க³ச்சா²மீதி வா ந க³ச்சா²மீதி வா அவத்வாயேவ ப்³ராஹ்மணஸ்ஸ தி³ட்டி²ஸமுக்³கா⁴தங் கத்துகாமோ ‘‘கிங் ப்³ராஹ்மண பா³ஹுகாய நதி³யா , கிங் பா³ஹுகா நதீ³ கரிஸ்ஸதீ’’தி ஆஹ. தஸ்ஸத்தோ² கிங் பயோஜனங் பா³ஹுகாய, கிங் ஸா கரிஸ்ஸதி? அஸமத்தா² ஸா கஸ்ஸசி அத்தா²ய, கிங் தத்த² க³மிஸ்ஸாமீதி?
79.Sundarikabhāradvājoti bhāradvājo nāma so brāhmaṇo attano gottavasena, sundarikāya pana nadiyā sinātassa pāpappahānaṃ hotīti ayamassa diṭṭhi, tasmā ‘‘sundarikabhāradvājo’’ti vuccati. So taṃ bhagavato vacanaṃ sutvā cintesi ‘‘mayaṃ sinānasuddhiṃ vaṇṇema, samaṇopi gotamo tatheva vaṇṇeti, samānacchando dāni esa amhehī’’ti. Atha bhagavantaṃ bāhukaṃ nadiṃ gantvā taṃ tattha pāpaṃ pavāhetvā āgataṃ viya maññamāno āha ‘‘gacchati pana bhavaṃ gotamo bāhukaṃ nadiṃ sināyitu’’nti? Bhagavā tassa gacchāmīti vā na gacchāmīti vā avatvāyeva brāhmaṇassa diṭṭhisamugghātaṃ kattukāmo ‘‘kiṃ brāhmaṇa bāhukāya nadiyā , kiṃ bāhukā nadī karissatī’’ti āha. Tassattho kiṃ payojanaṃ bāhukāya, kiṃ sā karissati? Asamatthā sā kassaci atthāya, kiṃ tattha gamissāmīti?
அத² ப்³ராஹ்மணோ தங் பஸங்ஸந்தோ லொக்க²ஸம்மதாதிஆதி³மாஹ. தத்த² லொக்க²ஸம்மதாதி லூக²பா⁴வஸம்மதா, லூக²பா⁴வந்தி சொக்க²பா⁴வங், விஸுத்³தி⁴பா⁴வங் தே³தீதி ஏவங் ஸம்மதாதி வுத்தங் ஹோதி. லொக்யஸம்மதாதிபி பாடோ². தஸ்ஸத்தோ², ஸெட்ட²ங் லோகங் க³மயதீதி ஏவங் ஸம்மதாதி. புஞ்ஞஸம்மதாதி புஞ்ஞந்தி ஸம்மதா. பவாஹேதீதி க³மயதி விஸோதே⁴தி. கா³தா²ஹி அஜ்ஜ²பா⁴ஸீதி கா³தா²ஹி அபா⁴ஸி. கா³தா² ச வுச்சமானா தத³த்த²தீ³பனத்த²மேவ வா கா³தா²ருசிகானங் வுச்சதி, விஸேஸத்த²தீ³பனத்த²ங் வா. இத⁴ பனேதா உப⁴யத்த²தீ³பனத்த²ங் வுத்தாதி வேதி³தப்³பா³.
Atha brāhmaṇo taṃ pasaṃsanto lokkhasammatātiādimāha. Tattha lokkhasammatāti lūkhabhāvasammatā, lūkhabhāvanti cokkhabhāvaṃ, visuddhibhāvaṃ detīti evaṃ sammatāti vuttaṃ hoti. Lokyasammatātipi pāṭho. Tassattho, seṭṭhaṃ lokaṃ gamayatīti evaṃ sammatāti. Puññasammatāti puññanti sammatā. Pavāhetīti gamayati visodheti. Gāthāhi ajjhabhāsīti gāthāhi abhāsi. Gāthā ca vuccamānā tadatthadīpanatthameva vā gāthārucikānaṃ vuccati, visesatthadīpanatthaṃ vā. Idha panetā ubhayatthadīpanatthaṃ vuttāti veditabbā.
பா³ஹுகந்தி இத³மேவ ஹி எத்த² வசனங் தத³த்த²தீ³பகங், ஸேஸானி விஸேஸத்த²தீ³பகானி. யதே²வ ஹி பா³ஹுகங், ஏவங் அதி⁴கக்காதீ³னிபி லோகோ க³ச்ச²தி ந்ஹானேன பாபங் பவாஹேதுங். தத்த² யே தேஸங் டா²னானங் ஆஸன்னா ஹொந்தி, தே தி³வஸஸ்ஸ திக்க²த்துங் ந்ஹாயந்தி. யே தூ³ரா, தே யதா²க்கமங் த்³விக்க²த்துங் ஸகிங் ஏகதி³வஸந்தரங், ஏவங் யாவ ஸங்வச்ச²ரந்தரங் ந்ஹாயந்தி. யே பன ஸப்³ப³தா²பி க³ந்துங் ந ஸக்கொந்தி, தே க⁴டேஹிபி ததோ உத³கங் ஆஹராபெத்வா ந்ஹாயந்தி. ஸப்³ப³ஞ்சேதங் நிரத்த²கங், தஸ்மா இமங் விஸேஸத்த²ங் தீ³பேதுங் அதி⁴கக்காதீ³னிபீதி ஆஹ.
Bāhukanti idameva hi ettha vacanaṃ tadatthadīpakaṃ, sesāni visesatthadīpakāni. Yatheva hi bāhukaṃ, evaṃ adhikakkādīnipi loko gacchati nhānena pāpaṃ pavāhetuṃ. Tattha ye tesaṃ ṭhānānaṃ āsannā honti, te divasassa tikkhattuṃ nhāyanti. Ye dūrā, te yathākkamaṃ dvikkhattuṃ sakiṃ ekadivasantaraṃ, evaṃ yāva saṃvaccharantaraṃ nhāyanti. Ye pana sabbathāpi gantuṃ na sakkonti, te ghaṭehipi tato udakaṃ āharāpetvā nhāyanti. Sabbañcetaṃ niratthakaṃ, tasmā imaṃ visesatthaṃ dīpetuṃ adhikakkādīnipīti āha.
தத்த² அதி⁴கக்கந்தி ந்ஹானஸம்பா⁴ரவஸேன லத்³த⁴வோஹாரங் ஏகங் தித்த²ங் வுச்சதி. க³யாதிபி மண்ட³லவாபிஸண்டா²னங் தித்த²மேவ வுச்சதி. பயாகா³தி ஏதம்பி க³ங்கா³ய ஏகங் தித்த²மேவ மஹாபனாத³ஸ்ஸ ரஞ்ஞோ க³ங்கா³யங் நிமுக்³க³பாஸாத³ஸ்ஸ ஸோபானஸம்முக²ட்டா²னங், பா³ஹுகா ஸுந்த³ரிகா ஸரஸ்ஸதீ பா³ஹுமதீதி இமா பன சதஸ்ஸோ நதி³யோ. பா³லோதி து³ப்பஞ்ஞோ. பக்க²ந்தோ³தி பவிஸந்தோ. ந ஸுஜ்ஜ²தீதி கிலேஸஸுத்³தி⁴ங் ந பாபுணாதி, கேவலங் ரஜோஜல்லமேவ பவாஹேதி.
Tattha adhikakkanti nhānasambhāravasena laddhavohāraṃ ekaṃ titthaṃ vuccati. Gayātipi maṇḍalavāpisaṇṭhānaṃ titthameva vuccati. Payāgāti etampi gaṅgāya ekaṃ titthameva mahāpanādassa rañño gaṅgāyaṃ nimuggapāsādassa sopānasammukhaṭṭhānaṃ, bāhukā sundarikā sarassatī bāhumatīti imā pana catasso nadiyo. Bāloti duppañño. Pakkhandoti pavisanto. Na sujjhatīti kilesasuddhiṃ na pāpuṇāti, kevalaṃ rajojallameva pavāheti.
கிங் ஸுந்த³ரிகா கரிஸ்ஸதீதி ஸுந்த³ரிகா கிலேஸவிஸோத⁴னே கிங் கரிஸ்ஸதி? ந கிஞ்சி காதுங் ஸமத்தா²தி அதி⁴ப்பாயோ. ஏஸ நயோ பயாக³பா³ஹுகாஸு. இமேஹி ச தீஹி பதே³ஹி வுத்தேஹி இதரானிபி சத்தாரி லக்க²ணாஹாரனயேன வுத்தானேவ ஹொந்தி, தஸ்மா யதே²வ ஸுந்த³ரிகா பயாகா³ பா³ஹுகா ந கிஞ்சி கரொந்தி, ததா² அதி⁴கக்காத³யோபீதி வேதி³தப்³பா³.
Kiṃ sundarikā karissatīti sundarikā kilesavisodhane kiṃ karissati? Na kiñci kātuṃ samatthāti adhippāyo. Esa nayo payāgabāhukāsu. Imehi ca tīhi padehi vuttehi itarānipi cattāri lakkhaṇāhāranayena vuttāneva honti, tasmā yatheva sundarikā payāgā bāhukā na kiñci karonti, tathā adhikakkādayopīti veditabbā.
வேரிந்தி பாணாதிபாதாதி³பஞ்சவேரஸமன்னாக³தங். கதகிப்³பி³ஸந்தி கதலுத்³த³கம்மங். ந ஹி நங் ஸோத⁴யேதி ஸுந்த³ரிகா வா பயாகா³ வா பா³ஹுகா வா ந ஸோத⁴யே, ந ஸோதே⁴தீதி வுத்தங் ஹோதி. பாபகம்மினந்தி பாபகேஹி வேரகிப்³பி³ஸகம்மேஹி யுத்தங், லாமககம்மே யுத்தங் வா வேரகிப்³பி³ஸபா⁴வங் அப்பத்தேஹி கு²த்³த³கேஹிபி பாபேஹி யுத்தந்தி வுத்தங் ஹோதி.
Verinti pāṇātipātādipañcaverasamannāgataṃ. Katakibbisanti kataluddakammaṃ. Na hi naṃ sodhayeti sundarikā vā payāgā vā bāhukā vā na sodhaye, na sodhetīti vuttaṃ hoti. Pāpakamminanti pāpakehi verakibbisakammehi yuttaṃ, lāmakakamme yuttaṃ vā verakibbisabhāvaṃ appattehi khuddakehipi pāpehi yuttanti vuttaṃ hoti.
ஸுத்³த⁴ஸ்ஸாதி நிக்கிலேஸஸ்ஸ. ஸதா³ ப²க்³கூ³தி நிச்சம்பி ப²க்³கு³னீனக்க²த்தமேவ. ப²க்³கு³னமாஸே கிர ‘‘உத்தரப²க்³கு³னதி³வஸே யோ ந்ஹாயதி, ஸோ ஸங்வச்ச²ரங் கதபாபங் ஸோதே⁴தீ’’தி ஏவங் தி³ட்டி²கோ ஸோ ப்³ராஹ்மணோ, தேனஸ்ஸ ப⁴க³வா தங் தி³ட்டி²ங் படிஹனந்தோ ஆஹ ‘‘ஸுத்³த⁴ஸ்ஸ வே ஸதா³ ப²க்³கூ³’’தி. நிக்கிலேஸஸ்ஸ நிச்சங் ப²க்³கு³னீனக்க²த்தங், இதரோ கிங் ஸுஜ்ஜ²தீதி? உபோஸதோ² ஸதா³தி ஸுத்³த⁴ஸ்ஸ ச சாதுத்³த³ஸபன்னரஸாதீ³ஸு உபோஸத²ங்கா³னி அஸமாதி³யதோபி நிச்சமேவ உபோஸதோ². ஸுத்³த⁴ஸ்ஸ ஸுசிகம்மஸ்ஸாதி நிக்கிலேஸதாய ஸுத்³த⁴ஸ்ஸ ஸுசீஹி ச காயகம்மாதீ³ஹி ஸமன்னாக³தஸ்ஸ. ஸதா³ ஸம்பஜ்ஜதே வதந்தி ஈதி³ஸஸ்ஸ ச குஸலூபஸஞ்ஹிதங் வதஸமாதா³னம்பி நிச்சங் ஸம்பன்னமேவ ஹோதீதி. இதே⁴வ ஸினாஹீதி இமஸ்மிங்யேவ மம ஸாஸனே ஸினாஹி. கிங் வுத்தங் ஹோதி? ‘‘ஸசே அஜ்ஜ²த்திககிலேஸமலப்பவாஹனங் இச்ச²ஸி, இதே⁴வ மம ஸாஸனே அட்ட²ங்கி³கமக்³க³ஸலிலேன ஸினாஹி, அஞ்ஞத்ர ஹி இத³ங் நத்தீ²’’தி.
Suddhassāti nikkilesassa. Sadā phaggūti niccampi phaggunīnakkhattameva. Phaggunamāse kira ‘‘uttaraphaggunadivase yo nhāyati, so saṃvaccharaṃ katapāpaṃ sodhetī’’ti evaṃ diṭṭhiko so brāhmaṇo, tenassa bhagavā taṃ diṭṭhiṃ paṭihananto āha ‘‘suddhassa ve sadā phaggū’’ti. Nikkilesassa niccaṃ phaggunīnakkhattaṃ, itaro kiṃ sujjhatīti? Uposatho sadāti suddhassa ca cātuddasapannarasādīsu uposathaṅgāni asamādiyatopi niccameva uposatho. Suddhassa sucikammassāti nikkilesatāya suddhassa sucīhi ca kāyakammādīhi samannāgatassa. Sadā sampajjate vatanti īdisassa ca kusalūpasañhitaṃ vatasamādānampi niccaṃ sampannameva hotīti. Idheva sināhīti imasmiṃyeva mama sāsane sināhi. Kiṃ vuttaṃ hoti? ‘‘Sace ajjhattikakilesamalappavāhanaṃ icchasi, idheva mama sāsane aṭṭhaṅgikamaggasalilena sināhi, aññatra hi idaṃ natthī’’ti.
இதா³னிஸ்ஸ ஸப்பாயதே³ஸனாவஸேன தீஸுபி த்³வாரேஸு ஸுத்³தி⁴ங் த³ஸ்ஸெந்தோ ஸப்³ப³பூ⁴தேஸு கரோஹி கே²மதந்திஆதி³மாஹ. தத்த² கே²மதந்தி அப⁴யங் ஹிதபா⁴வங், மெத்தந்தி வுத்தங் ஹோதி. ஏதேனஸ்ஸ மனொத்³வாரஸுத்³தி⁴ த³ஸ்ஸிதா ஹோதி.
Idānissa sappāyadesanāvasena tīsupi dvāresu suddhiṃ dassento sabbabhūtesu karohi khematantiādimāha. Tattha khematanti abhayaṃ hitabhāvaṃ, mettanti vuttaṃ hoti. Etenassa manodvārasuddhi dassitā hoti.
ஸசே முஸா ந ப⁴ணஸீதி ஏதேனஸ்ஸ வசீத்³வாரஸுத்³தி⁴. ஸசே பாணங் ந ஹிங்ஸஸி ஸசே அதி³ன்னங் நாதி³யஸீதி ஏதேஹி காயத்³வாரஸுத்³தி⁴. ஸத்³த³ஹானோ அமச்ச²ரீதி ஏதேஹி பன நங் ஏவங் பரிஸுத்³த⁴த்³வாரங் ஸத்³தா⁴ஸம்பதா³ய சாக³ஸம்பதா³ய ச நியோஜேஸி. கிங் காஹஸி க³யங் க³ந்த்வா, உத³பானோபி தே க³யாதி அயங் பன உபட்³ட⁴கா³தா², ஸசே ஸப்³ப³பூ⁴தேஸு கே²மதங் கரிஸ்ஸஸி, முஸா ந ப⁴ணிஸ்ஸஸி, பாணங் ந ஹனிஸ்ஸஸி, அதி³ன்னங் நாதி³யிஸ்ஸஸி, ஸத்³த⁴ஹானோ அமச்ச²ரீ ப⁴விஸ்ஸஸி, கிங் காஹஸி க³யங் க³ந்த்வா உத³பானோபி தே க³யா , க³யாயபி ஹி தே ந்ஹாயந்தஸ்ஸ உத³பானேபி இமாய ஏவ படிபத்தியா கிலேஸஸுத்³தி⁴, ஸரீரமலஸுத்³தி⁴ பன உப⁴யத்த² ஸமாதி ஏவங் யோஜேதப்³ப³ங். யஸ்மா ச லோகே க³யா ஸம்மததரா, தஸ்மா தஸ்ஸ ப⁴க³வா ‘‘க³ச்ச²தி பன ப⁴வங் கோ³தமோ பா³ஹுக’’ந்தி புட்டோ²பி ‘‘கிங் காஹஸி பா³ஹுகங் க³ந்த்வா’’தி அவத்வா ‘‘கிங் காஹஸி க³யங் க³ந்த்வா’’தி ஆஹாதி வேதி³தப்³போ³.
Sace musā na bhaṇasīti etenassa vacīdvārasuddhi. Sace pāṇaṃ na hiṃsasi sace adinnaṃ nādiyasīti etehi kāyadvārasuddhi. Saddahāno amaccharīti etehi pana naṃ evaṃ parisuddhadvāraṃ saddhāsampadāya cāgasampadāya ca niyojesi. Kiṃ kāhasi gayaṃ gantvā, udapānopi te gayāti ayaṃ pana upaḍḍhagāthā, sace sabbabhūtesu khemataṃ karissasi, musā na bhaṇissasi, pāṇaṃ na hanissasi, adinnaṃ nādiyissasi, saddhahāno amaccharī bhavissasi, kiṃ kāhasi gayaṃ gantvā udapānopi te gayā , gayāyapi hi te nhāyantassa udapānepi imāya eva paṭipattiyā kilesasuddhi, sarīramalasuddhi pana ubhayattha samāti evaṃ yojetabbaṃ. Yasmā ca loke gayā sammatatarā, tasmā tassa bhagavā ‘‘gacchati pana bhavaṃ gotamo bāhuka’’nti puṭṭhopi ‘‘kiṃ kāhasi bāhukaṃ gantvā’’ti avatvā ‘‘kiṃ kāhasi gayaṃ gantvā’’ti āhāti veditabbo.
80. ஏவங் வுத்தேதி ஏவமாதி³ ப⁴யபே⁴ரவே வுத்தத்தா பாகடமேவ. ஏகோ வூபகட்டோ²திஆதீ³ஸு பன ஏகோ காயவிவேகேன . வூபகட்டோ² சித்தவிவேகேன. அப்பமத்தோ கம்மட்டா²னே ஸதி அவிஜஹனேன. ஆதாபீ காயிகசேதஸிகவீரியஸங்கா²தேன ஆதாபேன. பஹிதத்தோ காயே ச ஜீவிதே ச அனபெக்க²தாய. விஹரந்தோ அஞ்ஞதரஇரியாபத²விஹாரேன. நசிரஸ்ஸேவாதி பப்³ப³ஜ்ஜங் உபாதா³ய வுச்சதி. குலபுத்தாதி து³விதா⁴ குலபுத்தா ஜாதிகுலபுத்தா ச ஆசாரகுலபுத்தா ச, அயங் பன உப⁴யதா²பி குலபுத்தோ. அகா³ரஸ்மாதி க⁴ரா. அகா³ரஸ்ஸ ஹிதங் அகா³ரியங், கஸிகோ³ரக்கா²தி³குடும்ப³போஸனகம்மங் வுச்சதி, நத்தி² எத்த² அகா³ரியந்தி அனகா³ரியங், பப்³ப³ஜ்ஜாயேதங் அதி⁴வசனங். பப்³ப³ஜந்தீதி உபக³ச்ச²ந்தி உபஸங்கமந்தி. தத³னுத்தரந்தி தங் அனுத்தரங். ப்³ரஹ்மசரியபரியோஸானந்தி மக்³க³ப்³ரஹ்மசரியஸ்ஸ பரியோஸானங், அரஹத்தப²லந்தி வுத்தங் ஹோதி. தஸ்ஸ ஹி அத்தா²ய குலபுத்தா பப்³ப³ஜந்தி. தி³ட்டே²வ த⁴ம்மேதி தஸ்மிங்யேவ அத்தபா⁴வே. ஸயங் அபி⁴ஞ்ஞா ஸச்சி²கத்வாதி அத்தனாயேவ பஞ்ஞாய பச்சக்க²ங் கத்வா, அபரப்பச்சயங் கத்வாதி அத்தோ². உபஸம்பஜ்ஜ விஹாஸீதி பாபுணித்வா ஸம்பாதெ³த்வா விஹாஸீதி, ஏவங் விஹரந்தோ ச கீ²ணா ஜாதி…பே॰… அப்³ப⁴ஞ்ஞாஸி. ஏதேனஸ்ஸ பச்சவெக்க²ணபூ⁴மிங் த³ஸ்ஸேதி.
80.Evaṃ vutteti evamādi bhayabherave vuttattā pākaṭameva. Eko vūpakaṭṭhotiādīsu pana eko kāyavivekena . Vūpakaṭṭho cittavivekena. Appamatto kammaṭṭhāne sati avijahanena. Ātāpī kāyikacetasikavīriyasaṅkhātena ātāpena. Pahitatto kāye ca jīvite ca anapekkhatāya. Viharanto aññatarairiyāpathavihārena. Nacirassevāti pabbajjaṃ upādāya vuccati. Kulaputtāti duvidhā kulaputtā jātikulaputtā ca ācārakulaputtā ca, ayaṃ pana ubhayathāpi kulaputto. Agārasmāti gharā. Agārassa hitaṃ agāriyaṃ, kasigorakkhādikuṭumbaposanakammaṃ vuccati, natthi ettha agāriyanti anagāriyaṃ, pabbajjāyetaṃ adhivacanaṃ. Pabbajantīti upagacchanti upasaṅkamanti. Tadanuttaranti taṃ anuttaraṃ. Brahmacariyapariyosānanti maggabrahmacariyassa pariyosānaṃ, arahattaphalanti vuttaṃ hoti. Tassa hi atthāya kulaputtā pabbajanti. Diṭṭheva dhammeti tasmiṃyeva attabhāve. Sayaṃ abhiññā sacchikatvāti attanāyeva paññāya paccakkhaṃ katvā, aparappaccayaṃ katvāti attho. Upasampajja vihāsīti pāpuṇitvā sampādetvā vihāsīti, evaṃ viharanto ca khīṇā jāti…pe… abbhaññāsi. Etenassa paccavekkhaṇabhūmiṃ dasseti.
கதமா பனஸ்ஸ ஜாதி கீ²ணா? கத²ஞ்ச நங் அப்³ப⁴ஞ்ஞாஸீதி? வுச்சதே, காமஞ்சேதங் ப⁴யபே⁴ரவேபி வுத்தங், ததா²பி நங் இத⁴ பட²மபுரிஸவஸேன யோஜனானயஸ்ஸ த³ஸ்ஸனத்த²ங் புன ஸங்கே²பதோ ப⁴ணாம. ந தாவஸ்ஸ அதீதா ஜாதி கீ²ணா, புப்³பே³வ கீ²ணத்தா. ந அனாக³தா, தத்த² வாயாமாபா⁴வதோ. ந பச்சுப்பன்னா, விஜ்ஜமானத்தா. மக்³க³ஸ்ஸ பன அபா⁴விதத்தா யா உப்பஜ்ஜெய்ய ஏகசதுபஞ்சவோகாரப⁴வேஸு ஏகசதுபஞ்சக்க²ந்த⁴ப்பபே⁴தா³ ஜாதி, ஸா மக்³க³ஸ்ஸ பா⁴விதத்தா அனுப்பாத³த⁴ம்மதங் ஆபஜ்ஜனேன கீ²ணா, தங் ஸோ மக்³க³பா⁴வனாய பஹீனகிலேஸே பச்சவெக்கி²த்வா கிலேஸாபா⁴வே விஜ்ஜமானம்பி கம்மங் ஆயதிங் அப்படிஸந்தி⁴கங் ஹோதீதி ஜானந்தோ ஜானாதி.
Katamā panassa jāti khīṇā? Kathañca naṃ abbhaññāsīti? Vuccate, kāmañcetaṃ bhayabheravepi vuttaṃ, tathāpi naṃ idha paṭhamapurisavasena yojanānayassa dassanatthaṃ puna saṅkhepato bhaṇāma. Na tāvassa atītā jāti khīṇā, pubbeva khīṇattā. Na anāgatā, tattha vāyāmābhāvato. Na paccuppannā, vijjamānattā. Maggassa pana abhāvitattā yā uppajjeyya ekacatupañcavokārabhavesu ekacatupañcakkhandhappabhedā jāti, sā maggassa bhāvitattā anuppādadhammataṃ āpajjanena khīṇā, taṃ so maggabhāvanāya pahīnakilese paccavekkhitvā kilesābhāve vijjamānampi kammaṃ āyatiṃ appaṭisandhikaṃ hotīti jānanto jānāti.
வுஸிதந்தி வுத்த²ங் பரிவுத்த²ங், கதங் சரிதங் நிட்டா²பிதந்தி அத்தோ². ப்³ரஹ்மசரியந்தி மக்³க³ப்³ரஹ்மசரியங். கதங் கரணீயந்தி சதூஸு ஸச்சேஸு சதூஹி மக்³கே³ஹி பரிஞ்ஞாபஹானஸச்சி²கிரியபா⁴வனாவஸேன ஸோளஸவித⁴ம்பி கிச்சங் நிட்டா²பிதந்தி அத்தோ². நாபரங் இத்த²த்தாயாதி இதா³னி புனஇத்த²பா⁴வாய ஏவங்ஸோளஸகிச்சபா⁴வாய, கிலேஸக்க²யாய வா மக்³க³பா⁴வனா நத்தீ²தி. அத² வா, இத்த²த்தாயாதி இத்த²பா⁴வதோ இமஸ்மா ஏவங்பகாரா இதா³னி வத்தமானக்க²ந்த⁴ஸந்தானா அபரங் க²ந்த⁴ஸந்தானங் நத்தி². இமே பன பஞ்சக்க²ந்தா⁴ பரிஞ்ஞாதா திட்ட²ந்தி, சி²ன்னமூலகோ ருக்கோ² வியாதி அப்³ப⁴ஞ்ஞாஸி. அஞ்ஞதரோதி ஏகோ. அரஹதந்தி அரஹந்தானங், ப⁴க³வதோ ஸாவகானங் அரஹதங் அப்³ப⁴ந்தரோ அஹோஸீதி.
Vusitanti vutthaṃ parivutthaṃ, kataṃ caritaṃ niṭṭhāpitanti attho. Brahmacariyanti maggabrahmacariyaṃ. Kataṃ karaṇīyanti catūsu saccesu catūhi maggehi pariññāpahānasacchikiriyabhāvanāvasena soḷasavidhampi kiccaṃ niṭṭhāpitanti attho. Nāparaṃ itthattāyāti idāni punaitthabhāvāya evaṃsoḷasakiccabhāvāya, kilesakkhayāya vā maggabhāvanā natthīti. Atha vā, itthattāyāti itthabhāvato imasmā evaṃpakārā idāni vattamānakkhandhasantānā aparaṃ khandhasantānaṃ natthi. Ime pana pañcakkhandhā pariññātā tiṭṭhanti, chinnamūlako rukkho viyāti abbhaññāsi. Aññataroti eko. Arahatanti arahantānaṃ, bhagavato sāvakānaṃ arahataṃ abbhantaro ahosīti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
வத்த²ஸுத்தவண்ணனா நிட்டி²தா.
Vatthasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 7. வத்த²ஸுத்தங் • 7. Vatthasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 7. வத்த²ஸுத்தவண்ணனா • 7. Vatthasuttavaṇṇanā
