| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
10. வேக²னஸஸுத்தவண்ணனா
10. Vekhanasasuttavaṇṇanā
278. ஏவங் மே ஸுதந்தி வேக²னஸஸுத்தங். தத்த² வேக²னஸோதி அயங் கிர ஸகுலுதா³யிஸ்ஸ ஆசரியோ, ஸோ ‘‘ஸகுலுதா³யீ பரிப்³பா³ஜகோ பரமவண்ணபஞ்ஹே பராஜிதோ’’தி ஸுத்வா ‘‘மயா ஸோ ஸாது⁴கங் உக்³க³ஹாபிதோ, தேனாபி ஸாது⁴கங் உக்³க³ஹிதங், கத²ங் நு கோ² பராஜிதோ, ஹந்தா³ஹங் ஸயங் க³ந்த்வா ஸமணங் கோ³தமங் பரமவண்ணபஞ்ஹங் புச்சி²த்வா ஜானிஸ்ஸாமீ’’தி ராஜக³ஹதோ பஞ்சசத்தாலீஸயோஜனங் ஸாவத்தி²ங் க³ந்த்வா யேன ப⁴க³வா, தேனுபஸங்கமி, உபஸங்கமித்வா பன டி²தகோவ ப⁴க³வதோ ஸந்திகே உதா³னங் உதா³னேஸி. தத்த² புரிமஸதி³ஸங் வுத்தனயேனேவ வேதி³தப்³ப³ங்.
278.Evaṃme sutanti vekhanasasuttaṃ. Tattha vekhanasoti ayaṃ kira sakuludāyissa ācariyo, so ‘‘sakuludāyī paribbājako paramavaṇṇapañhe parājito’’ti sutvā ‘‘mayā so sādhukaṃ uggahāpito, tenāpi sādhukaṃ uggahitaṃ, kathaṃ nu kho parājito, handāhaṃ sayaṃ gantvā samaṇaṃ gotamaṃ paramavaṇṇapañhaṃ pucchitvā jānissāmī’’ti rājagahato pañcacattālīsayojanaṃ sāvatthiṃ gantvā yena bhagavā, tenupasaṅkami, upasaṅkamitvā pana ṭhitakova bhagavato santike udānaṃ udānesi. Tattha purimasadisaṃ vuttanayeneva veditabbaṃ.
280. பஞ்ச கோ² இமேதி கஸ்மா ஆரபி⁴? அகா³ரியோபி ஏகச்சோ காமக³ருகோ காமாதி⁴முத்தோ ஹோதி, ஏகச்சோ நெக்க²ம்மக³ருகோ நெக்க²ம்மாதி⁴முத்தோ ஹோதி. பப்³ப³ஜிதோபி ச ஏகச்சோ காமக³ருகோ காமாதி⁴முத்தோ ஹோதி, ஏகச்சோ நெக்க²ம்மக³ருகோ நெக்க²ம்மாதி⁴முத்தோ ஹோதி. அயங் பன காமக³ருகோ காமாதி⁴முத்தோ ஹோதி. ஸோ இமாய கதா²ய கதி²யமானாய அத்தனோ காமாதி⁴முத்தத்தங் ஸல்லக்கெ²ஸ்ஸதி, ஏவமஸ்ஸாயங் தே³ஸனா ஸப்பாயா ப⁴விஸ்ஸதீதி இமங் தே³ஸனங் ஆரபி⁴. காமக்³க³ஸுக²ந்தி நிப்³பா³னங் அதி⁴ப்பேதங்.
280.Pañca kho imeti kasmā ārabhi? Agāriyopi ekacco kāmagaruko kāmādhimutto hoti, ekacco nekkhammagaruko nekkhammādhimutto hoti. Pabbajitopi ca ekacco kāmagaruko kāmādhimutto hoti, ekacco nekkhammagaruko nekkhammādhimutto hoti. Ayaṃ pana kāmagaruko kāmādhimutto hoti. So imāya kathāya kathiyamānāya attano kāmādhimuttattaṃ sallakkhessati, evamassāyaṃ desanā sappāyā bhavissatīti imaṃ desanaṃ ārabhi. Kāmaggasukhanti nibbānaṃ adhippetaṃ.
281. பாபிதோ ப⁴விஸ்ஸதீதி அஜானநபா⁴வங் பாபிதோ ப⁴விஸ்ஸதி. நாமகங்யேவ ஸம்பஜ்ஜதீதி நிரத்த²கவசனமத்தமேவ ஸம்பஜ்ஜதி. திட்ட²து புப்³ப³ந்தோ திட்ட²து அபரந்தோதி யஸ்மா துய்ஹங் அதீதகதா²ய அனுச்ச²விகங் புப்³பே³னிவாஸஞாணங் நத்தி², அனாக³தகதா²ய அனுச்ச²விகங் தி³ப்³ப³சக்கு²ஞாணங் நத்தி², தஸ்மா உப⁴யம்பேதங் திட்ட²தூதி ஆஹ. ஸுத்தப³ந்த⁴னேஹீதி ஸுத்தமயப³ந்த⁴னேஹி. தஸ்ஸ ஹி ஆரக்க²த்தா²ய ஹத்த²பாதே³ஸு சேவ கீ³வாய ச ஸுத்தகானி ப³ந்த⁴ந்தி. தானி ஸந்தா⁴யேதங் வுத்தங். மஹல்லககாலே பனஸ்ஸ தானி ஸயங் வா பூதீனி ஹுத்வா முஞ்சந்தி, சி²ந்தி³த்வா வா ஹரந்தி.
281.Pāpitobhavissatīti ajānanabhāvaṃ pāpito bhavissati. Nāmakaṃyeva sampajjatīti niratthakavacanamattameva sampajjati. Tiṭṭhatu pubbanto tiṭṭhatu aparantoti yasmā tuyhaṃ atītakathāya anucchavikaṃ pubbenivāsañāṇaṃ natthi, anāgatakathāya anucchavikaṃ dibbacakkhuñāṇaṃ natthi, tasmā ubhayampetaṃ tiṭṭhatūti āha. Suttabandhanehīti suttamayabandhanehi. Tassa hi ārakkhatthāya hatthapādesu ceva gīvāya ca suttakāni bandhanti. Tāni sandhāyetaṃ vuttaṃ. Mahallakakāle panassa tāni sayaṃ vā pūtīni hutvā muñcanti, chinditvā vā haranti.
ஏவமேவ கோ²தி இமினா இத³ங் த³ஸ்ஸேதி – த³ஹரஸ்ஸ குமாரஸ்ஸ ஸுத்தப³ந்த⁴னானங் அஜானநகாலோ விய அவிஜ்ஜாய புரிமாய கோடியா அஜானநங், ந ஹி ஸக்கா அவிஜ்ஜாய புரிமகோடி ஞாதுங், மோசனகாலே ஜானநஸதி³ஸங் பன அரஹத்தமக்³கே³ன அவிஜ்ஜாப³ந்த⁴னஸ்ஸ பமொக்கோ² ஜாதோதி ஜானநங். ஸேஸங் ஸப்³ப³த்த² உத்தானமேவாதி.
Evamevakhoti iminā idaṃ dasseti – daharassa kumārassa suttabandhanānaṃ ajānanakālo viya avijjāya purimāya koṭiyā ajānanaṃ, na hi sakkā avijjāya purimakoṭi ñātuṃ, mocanakāle jānanasadisaṃ pana arahattamaggena avijjābandhanassa pamokkho jātoti jānanaṃ. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
வேக²னஸஸுத்தவண்ணனா நிட்டி²தா.
Vekhanasasuttavaṇṇanā niṭṭhitā.
ததியவக்³க³வண்ணனா நிட்டி²தா.
Tatiyavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 10. வேக²னஸஸுத்தங் • 10. Vekhanasasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 10. வேக²னஸஸுத்தவண்ணனா • 10. Vekhanasasuttavaṇṇanā
