| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
4. வேபசித்திஸுத்தவண்ணனா
4. Vepacittisuttavaṇṇanā
250. ‘‘மஹானுபா⁴வதாய அஸுரானங் சித்தவேபனேன வேபசித்தீ’’தி வத³ந்தி. இஸீஹி பன அப⁴யங் யாசிதே ‘‘ப⁴யமேவ த³தா³மீ’’தி வத்வா தேஹி ‘‘அக்க²யங் ஹோது தே ப⁴ய’’ந்தி அபி⁴ஸபவஸேன வுத்தகாலதோ பட்டா²ய வேபனசித்ததாய ‘‘வேபசித்தீ’’தி வுச்சதி, யங் லோகியா ‘‘புலோமோ’’தி ச வத³ந்தி. நிபாதபதா³னிபி கானிசி அத்த²விஸேஸஜோதகானி ஹொந்தீதி ஆஹ ‘‘நிபாதமத்த’’ந்தி ஹேதுஅத்தா²தீ³னமெத்த² அஸம்ப⁴வதோ. தந்தி ஸக்கங் தே³வானமிந்த³ங். கண்டே² பஞ்சமேஹீதி கண்ட²ப³ந்த⁴னபஞ்சமேஹி, விப⁴த்திஅலோபேன நித்³தே³ஸோ. சித்தேனேவாதி ‘‘இமங் ப³ந்தா⁴மி, அயங் ப³ஜ்ஜ²தூ’’தி உப்பன்னசித்தேனேவ. ப³ஜ்ஜ²தி ப³த்³தோ⁴ ஹோதி, அயங் தே³வானுபா⁴வோ. முச்சதீதி எத்தா²பி ஏஸேவ நயோ. த³ஸஹீதி ‘‘சோரோஸீ’’திஆதி³னா இத⁴ வுத்தேஹி த³ஸஹி. தேனாஹ ‘‘இமேஹீ’’தி. நிப்³ப³த்தித்வா சிரகாலதங் உபாதா³ய கு²ங்ஸனவஸேன வத³தி ‘‘ஜரஸக்கா’’தி. ந தங் அக்கோஸங் மனஸி கரோதி தீ³க⁴ரத்தங் க²ந்திஸோரச்சேஸு நிருள்ஹஅஜ்ஜா²ஸயத்தா. மஹாபடிக்³க³ஹணந்தி மஹந்தங் உபஸமப்³யஞ்ஜனங். அஸ்ஸாதி வேபசித்தஸ்ஸ.
250. ‘‘Mahānubhāvatāya asurānaṃ cittavepanena vepacittī’’ti vadanti. Isīhi pana abhayaṃ yācite ‘‘bhayameva dadāmī’’ti vatvā tehi ‘‘akkhayaṃ hotu te bhaya’’nti abhisapavasena vuttakālato paṭṭhāya vepanacittatāya ‘‘vepacittī’’ti vuccati, yaṃ lokiyā ‘‘pulomo’’ti ca vadanti. Nipātapadānipi kānici atthavisesajotakāni hontīti āha ‘‘nipātamatta’’nti hetuatthādīnamettha asambhavato. Tanti sakkaṃ devānamindaṃ. Kaṇṭhe pañcamehīti kaṇṭhabandhanapañcamehi, vibhattialopena niddeso. Cittenevāti ‘‘imaṃ bandhāmi, ayaṃ bajjhatū’’ti uppannacitteneva. Bajjhati baddho hoti, ayaṃ devānubhāvo. Muccatīti etthāpi eseva nayo. Dasahīti ‘‘corosī’’tiādinā idha vuttehi dasahi. Tenāha ‘‘imehī’’ti. Nibbattitvā cirakālataṃ upādāya khuṃsanavasena vadati ‘‘jarasakkā’’ti. Na taṃ akkosaṃ manasi karoti dīgharattaṃ khantisoraccesu niruḷhaajjhāsayattā. Mahāpaṭiggahaṇanti mahantaṃ upasamabyañjanaṃ. Assāti vepacittassa.
படிஸங்யுஜேதி படிஸத்து ஹுத்வா ஸங்யுத்³த⁴ங் கரெய்ய. தேனாஹ ‘‘படிப்ப²ரெய்யா’’தி. உபஸமங்…பே॰… மஞ்ஞே உபஸமேனேவ பச்சத்தி²கஸ்ஸ நாயகபூ⁴தஸ்ஸ கோத⁴ஸ்ஸ படிஸேத⁴னதோ. தாதி³ஸே ஹி கோதோ⁴ படிகிரியங் அலப⁴ந்தோ அனுபாதா³னோ விய ஜாதவேதோ³ வூபஸம்மதி. யதா³-ஸத்³தோ³ ஹேதுஅத்தோ², ந காலத்தோ²தி ஆஹ ‘‘யஸ்மா தங் மஞ்ஞதீ’’தி. தாவதே³வ த்³வே கா³வோ யுஜ்ஜ²ந்தேதி தஸ்மிங்யேவ க²ணே த்³வீஸு கோ³ணேஸு யுஜ்ஜ²ந்தேஸு.
Paṭisaṃyujeti paṭisattu hutvā saṃyuddhaṃ kareyya. Tenāha ‘‘paṭipphareyyā’’ti. Upasamaṃ…pe… maññe upasameneva paccatthikassa nāyakabhūtassa kodhassa paṭisedhanato. Tādise hi kodho paṭikiriyaṃ alabhanto anupādāno viya jātavedo vūpasammati. Yadā-saddo hetuattho, na kālatthoti āha ‘‘yasmā taṃ maññatī’’ti. Tāvadeva dve gāvo yujjhanteti tasmiṃyeva khaṇe dvīsu goṇesu yujjhantesu.
க²ந்திதோ உத்தரிதரோ அஞ்ஞோ அத்தோ² ந விஜ்ஜதி அனந்தரேவ அஸ்ஸ விரோத⁴ங் அனத்த²ங் படிபா³ஹித்வா தி³ட்ட²த⁴ம்மிகஸ்ஸ சேவ ஸம்பராயிகஸ்ஸ ச ஸங்விதா⁴னதோ. தங் க²ந்திங் பரமங் ஆஹு ஸெட்ட²ப³லங் விரோத⁴பச்சயங் அபி⁴பு⁴ய்ய பவத்தனதோ. பா³லயோக³தோ பா³லோ, தஸ்ஸ ப³லங் பா³லப³லங், அஞ்ஞாணந்தி ஆஹ ‘‘பா³லப³லங் நாம அஞ்ஞாணப³ல’’ந்தி. தங் யஸ்ஸ ப³லந்தி தங் அஞ்ஞாணப³லங் யஸ்ஸ புக்³க³லஸ்ஸ ப³லங், அப³லமேவ தங் பஞ்ஞாப³லேன வித்³த⁴ங்ஸேதப்³ப³தோ. படிவத்தா ந விஜ்ஜதீதி த⁴ம்மட்ட²ங் படிப்ப²ரித்வா அபி⁴ப⁴வித்வா பவத்தா நத்தி². படிவசனமத்தங் பன கோசி வதெ³ய்யாபி, தங் அகாரணந்தி த³ஸ்ஸெந்தோ ‘‘படிப்ப²ரித்வா வா’’திஆதி³மாஹ. பா³லப³லந்தி ‘‘படிப்ப²ரித்வா’’தி வசனஸ்ஸ காரணவசனங். தஸ்ஸேவ புக்³க³லஸ்ஸ படிகுஜ்ஜ²னகஸ்ஸ. நானத்தாவிதக்கனதோ உபி⁴ன்னங் அத்த²ங். திகிச்ச²ந்தந்தி அனத்த²படிபா³ஹனமுகே²ன பண்டி³தகிச்சகரணேன படிஸேதெ⁴ந்தங். ‘‘பா³லோ அய’’ந்தி ஏவங் பஞ்ஞபேதுங் ஹேதுப²லானங் அனவபோ³த⁴தோ சதுஸச்சத⁴ம்மே அசே²காதி.
Khantito uttaritaro añño attho na vijjati anantareva assa virodhaṃ anatthaṃ paṭibāhitvā diṭṭhadhammikassa ceva samparāyikassa ca saṃvidhānato. Taṃ khantiṃ paramaṃ āhu seṭṭhabalaṃ virodhapaccayaṃ abhibhuyya pavattanato. Bālayogato bālo, tassa balaṃ bālabalaṃ, aññāṇanti āha ‘‘bālabalaṃ nāma aññāṇabala’’nti. Taṃ yassa balanti taṃ aññāṇabalaṃ yassa puggalassa balaṃ, abalameva taṃ paññābalena viddhaṃsetabbato. Paṭivattā na vijjatīti dhammaṭṭhaṃ paṭippharitvā abhibhavitvā pavattā natthi. Paṭivacanamattaṃ pana koci vadeyyāpi, taṃ akāraṇanti dassento ‘‘paṭippharitvā vā’’tiādimāha. Bālabalanti ‘‘paṭippharitvā’’ti vacanassa kāraṇavacanaṃ. Tasseva puggalassa paṭikujjhanakassa. Nānattāvitakkanato ubhinnaṃ atthaṃ. Tikicchantanti anatthapaṭibāhanamukhena paṇḍitakiccakaraṇena paṭisedhentaṃ. ‘‘Bālo aya’’nti evaṃ paññapetuṃ hetuphalānaṃ anavabodhato catusaccadhamme achekāti.
வேபசித்திஸுத்தவண்ணனா நிட்டி²தா.
Vepacittisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. வேபசித்திஸுத்தங் • 4. Vepacittisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. வேபசித்திஸுத்தவண்ணனா • 4. Vepacittisuttavaṇṇanā
