| Library / Tipiṭaka / તિપિટક • Tipiṭaka / સંયુત્તનિકાય (અટ્ઠકથા) • Saṃyuttanikāya (aṭṭhakathā) |
૧૦. વેપુલ્લપબ્બતસુત્તવણ્ણના
10. Vepullapabbatasuttavaṇṇanā
૧૪૩. દસમે ભૂતપુબ્બન્તિ અતીતકાલે એકં અપદાનં આહરિત્વા દસ્સેતિ. સમઞ્ઞા ઉદપાદીતિ પઞ્ઞત્તિ અહોસિ. ચતૂહેન આરોહન્તીતિ ઇદં થામમજ્ઝિમે સન્ધાય વુત્તં. અગ્ગન્તિ ઉત્તમં. ભદ્દયુગન્તિ સુન્દરયુગલં. તીહેન આરોહન્તીતિ એત્તાવતા કિર દ્વિન્નં બુદ્ધાનં અન્તરે યોજનં પથવી ઉસ્સન્ના, સો પબ્બતો તિયોજનુબ્બેધો જાતો.
143. Dasame bhūtapubbanti atītakāle ekaṃ apadānaṃ āharitvā dasseti. Samaññā udapādīti paññatti ahosi. Catūhena ārohantīti idaṃ thāmamajjhime sandhāya vuttaṃ. Agganti uttamaṃ. Bhaddayuganti sundarayugalaṃ. Tīhena ārohantīti ettāvatā kira dvinnaṃ buddhānaṃ antare yojanaṃ pathavī ussannā, so pabbato tiyojanubbedho jāto.
અપ્પં વા ભિય્યોતિ વસ્સસતતો ઉત્તરિં અપ્પં દસ વા વીસં વા વસ્સાનિ. પુન વસ્સસતમેવ જીવનકો નામ નત્થિ, ઉત્તમકોટિયા પન સટ્ઠિ વા અસીતિ વા વસ્સાનિ જીવન્તિ. વસ્સસતં પન અપ્પત્વા પઞ્ચવસ્સદસવસ્સાદિકાલે મીયમાનાવ બહુકા. એત્થ ચ કકુસન્ધો ભગવા ચત્તાલીસવસ્સસહસ્સાયુકકાલે, કોણાગમનો તિંસવસ્સસહસ્સાયુકકાલે નિબ્બત્તોતિ ઇદં અનુપુબ્બેન પરિહીનસદિસં કતં, ન પન એવં પરિહીનં, વડ્ઢિત્વા વડ્ઢિત્વા પરિહીનન્તિ વેદિતબ્બં. કથં? કકુસન્ધો તાવ ભગવા ઇમસ્મિંયેવ કપ્પે ચત્તાલીસવસ્સસહસ્સાયુકકાલે નિબ્બત્તો આયુપ્પમાણં પઞ્ચ કોટ્ઠાસે કત્વા ચત્તારો ઠત્વા પઞ્ચમે વિજ્જમાનેયેવ પરિનિબ્બુતો. તં આયુ પરિહાયમાનં દસવસ્સકાલં પત્વા પુન વડ્ઢમાનં અસઙ્ખેય્યં હુત્વા તતો પરિહાયમાનં તિંસવસ્સસહસ્સાયુકકાલે ઠિતં, તદા કોણાગમનો નિબ્બત્તો. તસ્મિમ્પિ તથેવ પરિનિબ્બુતે તં આયુ દસવસ્સકાલં પત્વા પુન વડ્ઢમાનં અસઙ્ખેય્યં હુત્વા પરિહાયિત્વા વીસવસ્સસહસ્સકાલે ઠિતં, તદા કસ્સપો ભગવા નિબ્બત્તો. તસ્મિમ્પિ તથેવ પરિનિબ્બુતે તં આયુ દસવસ્સકાલં પત્વા પુન વડ્ઢમાનં અસઙ્ખેય્યં હુત્વા પરિહાયિત્વા વસ્સસતકાલં પત્તં, અથ અમ્હાકં સમ્માસમ્બુદ્ધો નિબ્બત્તો. એવં અનુપુબ્બેન પરિહાયિત્વા વડ્ઢિત્વા વડ્ઢિત્વા પરિહીનન્તિ વેદિતબ્બં. તત્થ ચ યં આયુપરિમાણેસુ મન્દેસુ બુદ્ધા નિબ્બત્તન્તિ, તેસમ્પિ તદેવ આયુપરિમાણં હોતીતિ. દસમં.
Appaṃ vā bhiyyoti vassasatato uttariṃ appaṃ dasa vā vīsaṃ vā vassāni. Puna vassasatameva jīvanako nāma natthi, uttamakoṭiyā pana saṭṭhi vā asīti vā vassāni jīvanti. Vassasataṃ pana appatvā pañcavassadasavassādikāle mīyamānāva bahukā. Ettha ca kakusandho bhagavā cattālīsavassasahassāyukakāle, koṇāgamano tiṃsavassasahassāyukakāle nibbattoti idaṃ anupubbena parihīnasadisaṃ kataṃ, na pana evaṃ parihīnaṃ, vaḍḍhitvā vaḍḍhitvā parihīnanti veditabbaṃ. Kathaṃ? Kakusandho tāva bhagavā imasmiṃyeva kappe cattālīsavassasahassāyukakāle nibbatto āyuppamāṇaṃ pañca koṭṭhāse katvā cattāro ṭhatvā pañcame vijjamāneyeva parinibbuto. Taṃ āyu parihāyamānaṃ dasavassakālaṃ patvā puna vaḍḍhamānaṃ asaṅkheyyaṃ hutvā tato parihāyamānaṃ tiṃsavassasahassāyukakāle ṭhitaṃ, tadā koṇāgamano nibbatto. Tasmimpi tatheva parinibbute taṃ āyu dasavassakālaṃ patvā puna vaḍḍhamānaṃ asaṅkheyyaṃ hutvā parihāyitvā vīsavassasahassakāle ṭhitaṃ, tadā kassapo bhagavā nibbatto. Tasmimpi tatheva parinibbute taṃ āyu dasavassakālaṃ patvā puna vaḍḍhamānaṃ asaṅkheyyaṃ hutvā parihāyitvā vassasatakālaṃ pattaṃ, atha amhākaṃ sammāsambuddho nibbatto. Evaṃ anupubbena parihāyitvā vaḍḍhitvā vaḍḍhitvā parihīnanti veditabbaṃ. Tattha ca yaṃ āyuparimāṇesu mandesu buddhā nibbattanti, tesampi tadeva āyuparimāṇaṃ hotīti. Dasamaṃ.
દુતિયો વગ્ગો.
Dutiyo vaggo.
અનમતગ્ગસંયુત્તવણ્ણના નિટ્ઠિતા.
Anamataggasaṃyuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૧૦. વેપુલ્લપબ્બતસુત્તં • 10. Vepullapabbatasuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૧૦. વેપુલ્લપબ્બતસુત્તવણ્ણના • 10. Vepullapabbatasuttavaṇṇanā
