| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
3. விஜ்ஜாஸுத்தவண்ணனா
3. Vijjāsuttavaṇṇanā
40. ததியே புப்³ப³ங்க³மாதி ஸஹஜாதவஸேன, உபனிஸ்ஸயவஸேன சாதி த்³வீஹி ஆகாரேஹி புப்³ப³ங்க³மா புரஸ்ஸரா பதா⁴னகாரணங். ந ஹி அவிஜ்ஜாய வினா அகுஸலுப்பத்தி அத்தி². ஸமாபத்தியாதி ஸமாபஜ்ஜனாய ஸபா⁴வபடிலாபா⁴ய, பவத்தியாதி அத்தோ². தத்த² அகுஸலப்பவத்தியா ஆதீ³னவப்படிச்சா²த³னேன அயோனிஸோமனஸிகாரஸ்ஸ பச்சயபா⁴வேன அப்பஹீனபா⁴வேன ச அகுஸலத⁴ம்மானங் உபனிஸ்ஸயபா⁴வோ தி³ஸ்ஸதி.
40. Tatiye pubbaṅgamāti sahajātavasena, upanissayavasena cāti dvīhi ākārehi pubbaṅgamā purassarā padhānakāraṇaṃ. Na hi avijjāya vinā akusaluppatti atthi. Samāpattiyāti samāpajjanāya sabhāvapaṭilābhāya, pavattiyāti attho. Tattha akusalappavattiyā ādīnavappaṭicchādanena ayonisomanasikārassa paccayabhāvena appahīnabhāvena ca akusaladhammānaṃ upanissayabhāvo dissati.
ஏவங் ப்³யாதி⁴மரணாதி³து³க்க²ஸ்ஸ அதி⁴ட்டா²னபா⁴வதோ ஸப்³பா³பி க³தியோ இத⁴ து³க்³க³தியோ. அத² வா ராகா³தி³கிலேஸேஹி தூ³ஸிதா க³தியோ காயவசீசித்தானங் பவத்தியோதி து³க்³க³தியோ, காயவசீமனோது³ச்சரிதானி. அஸ்மிங் லோகேதி இத⁴ லோகே மனுஸ்ஸக³தியங் வா. பரம்ஹி சாதி ததோ அஞ்ஞாஸு க³தீஸு. அவிஜ்ஜாமூலிகா ஸப்³பா³தி தா ஸப்³பா³பி து³ச்சரிதஸ்ஸ விபத்தியோ வுத்தனயேன அவிஜ்ஜாபுப்³ப³ங்க³மத்தா அவிஜ்ஜாமூலிகா ஏவ. இச்சா²லோப⁴ஸமுஸ்ஸயாதி அஸம்பத்தவிஸயபரியேஸனலக்க²ணாய இச்சா²ய, ஸம்பத்தவிஸயலுப்³ப⁴னலக்க²ணேன லோபே⁴ன ச ஸமுஸ்ஸிதா உபசிதாதி இச்சா²லோப⁴ஸமுஸ்ஸயா.
Evaṃ byādhimaraṇādidukkhassa adhiṭṭhānabhāvato sabbāpi gatiyo idha duggatiyo. Atha vā rāgādikilesehi dūsitā gatiyo kāyavacīcittānaṃ pavattiyoti duggatiyo, kāyavacīmanoduccaritāni. Asmiṃ loketi idha loke manussagatiyaṃ vā. Paramhi cāti tato aññāsu gatīsu. Avijjāmūlikā sabbāti tā sabbāpi duccaritassa vipattiyo vuttanayena avijjāpubbaṅgamattā avijjāmūlikā eva. Icchālobhasamussayāti asampattavisayapariyesanalakkhaṇāya icchāya, sampattavisayalubbhanalakkhaṇena lobhena ca samussitā upacitāti icchālobhasamussayā.
யதோதி யஸ்மா அவிஜ்ஜாஹேது அவிஜ்ஜாய நிவுதோ ஹுத்வா. பாபிச்சோ²தி அவிஜ்ஜாய படிச்சா²தி³தத்தா பாபிச்ச²தாய ஆதீ³னவே அபஸ்ஸந்தோ அஸந்தகு³ணஸம்பா⁴வனவஸேன கோஹஞ்ஞாதீ³னி கரொந்தோ பாபிச்சோ², லோபே⁴னேவ அத்ரிச்ச²தாபி க³ஹிதாதி த³ட்ட²ப்³பா³. அனாத³ரோதி லோகாதி⁴பதினோ ஒத்தப்பஸ்ஸ அபா⁴வேன ஸப்³ரஹ்மசாரீஸு ஆத³ரரஹிதோ. ததோதி தஸ்மா அவிஜ்ஜாபாபிச்ச²தாஅஹிரிகானொத்தப்பஹேது . பஸவதீதி காயது³ச்சரிதாதி³பே⁴த³ங் பாபங் உபசினதி. அபாயங் தேன க³ச்ச²தீதி தேன ததா² பஸுதேன பாபேன நிரயாதி³பே⁴த³ங் அபாயங் க³ச்ச²தி உபபஜ்ஜதி.
Yatoti yasmā avijjāhetu avijjāya nivuto hutvā. Pāpicchoti avijjāya paṭicchāditattā pāpicchatāya ādīnave apassanto asantaguṇasambhāvanavasena kohaññādīni karonto pāpiccho, lobheneva atricchatāpi gahitāti daṭṭhabbā. Anādaroti lokādhipatino ottappassa abhāvena sabrahmacārīsu ādararahito. Tatoti tasmā avijjāpāpicchatāahirikānottappahetu . Pasavatīti kāyaduccaritādibhedaṃ pāpaṃ upacinati. Apāyaṃ tena gacchatīti tena tathā pasutena pāpena nirayādibhedaṃ apāyaṃ gacchati upapajjati.
தஸ்மாதி யஸ்மா ஏதே ஏவங் ஸப்³ப³து³ச்சரிதமூலபூ⁴தா ஸப்³ப³து³க்³க³திபரிக்கிலேஸஹேதுபூ⁴தா ச அவிஜ்ஜாத³யோ, தஸ்மா இச்ச²ஞ்ச, லோப⁴ஞ்ச, அவிஜ்ஜஞ்ச, சஸத்³தே³ன அஹிரிகானொத்தப்பஞ்ச விராஜயங் ஸமுச்சே²த³வஸேன பஜஹங். கத²ங் விராஜேதீதி ஆஹ? விஜ்ஜங் உப்பாத³யந்தி, விபஸ்ஸனாபடிபாடியா ச, மக்³க³படிபாடியா ச, உஸ்ஸக்கித்வா அரஹத்தமக்³க³விஜ்ஜங் அத்தனோ ஸந்தானே உப்பாத³யந்தோ. ஸப்³பா³ து³க்³க³தியோதி ஸப்³பா³பி து³ச்சரிதஸங்கா²தா து³க்³க³தியோ, வட்டது³க்க²ஸ்ஸ வா அதி⁴ட்டா²னபா⁴வதோ து³க்கா², ஸப்³பா³ பஞ்சபி க³தியோ ஜஹே பஜஹெய்ய ஸமதிக்கமெய்ய. கிலேஸவட்டப்பஹானேனேவ ஹி கம்மவட்டங் விபாகவட்டஞ்ச பஹீனங் ஹோதீதி.
Tasmāti yasmā ete evaṃ sabbaduccaritamūlabhūtā sabbaduggatiparikkilesahetubhūtā ca avijjādayo, tasmā icchañca, lobhañca, avijjañca, casaddena ahirikānottappañca virājayaṃ samucchedavasena pajahaṃ. Kathaṃ virājetīti āha? Vijjaṃ uppādayanti, vipassanāpaṭipāṭiyā ca, maggapaṭipāṭiyā ca, ussakkitvā arahattamaggavijjaṃ attano santāne uppādayanto. Sabbā duggatiyoti sabbāpi duccaritasaṅkhātā duggatiyo, vaṭṭadukkhassa vā adhiṭṭhānabhāvato dukkhā, sabbā pañcapi gatiyo jahe pajaheyya samatikkameyya. Kilesavaṭṭappahāneneva hi kammavaṭṭaṃ vipākavaṭṭañca pahīnaṃ hotīti.
ததியஸுத்தவண்ணனா நிட்டி²தா.
Tatiyasuttavaṇṇanā niṭṭhitā.
பட²மபா⁴ணவாரவண்ணனா நிட்டி²தா.
Paṭhamabhāṇavāravaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 3. விஜ்ஜாஸுத்தங் • 3. Vijjāsuttaṃ
