| Library / Tipiṭaka / તિપિટક • Tipiṭaka / સંયુત્તનિકાય (અટ્ઠકથા) • Saṃyuttanikāya (aṭṭhakathā) |
૯. વનસંયુત્તં
9. Vanasaṃyuttaṃ
૧. વિવેકસુત્તવણ્ણના
1. Vivekasuttavaṇṇanā
૨૨૧. વનસંયુત્તસ્સ પઠમે કોસલેસુ વિહરતીતિ સત્થુ સન્તિકે કમ્મટ્ઠાનં ગહેત્વા તસ્સ જનપદસ્સ સુલભભિક્ખતાય તત્થ ગન્ત્વા વિહરતિ. સંવેજેતુકામાતિ વિવેકં પટિપજ્જાપેતુકામા. વિવેકકામોતિ તયો વિવેકે પત્થયન્તો. નિચ્છરતી બહિદ્ધાતિ બાહિરેસુ પુથુત્તારમ્મણેસુ ચરતિ. જનો જનસ્મિન્તિ ત્વં જનો અઞ્ઞસ્મિં જને છન્દરાગં વિનયસ્સુ. પજહાસીતિ પજહ. ભવાસીતિ ભવ. સતં તં સારયામસેતિ સતિમન્તં પણ્ડિતં તં મયમ્પિ સારયામ, સતં વા ધમ્મં મયં તં સારયામાતિ અત્થો. પાતાલરજોતિ અપ્પતિટ્ઠટ્ઠેન પાતાલસઙ્ખાતો કિલેસરજો. મા તં કામરજોતિ અયં કામરાગરજો તં મા અવહરિ, અપાયમેવ મા નેતૂતિ અત્થો. પંસુકુન્થિતોતિ પંસુમક્ખિતો. વિધુનન્તિ વિધુનન્તો. સિતં રજન્તિ સરીરલગ્ગં રજં. સંવેગમાપાદીતિ દેવતાપિ નામ મં એવં સારેતીતિ વિવેકમાપન્નો, ઉત્તમવીરિયં વા પગ્ગય્હ પરમવિવેકં મગ્ગમેવ પટિપન્નોતિ. પઠમં.
221. Vanasaṃyuttassa paṭhame kosalesu viharatīti satthu santike kammaṭṭhānaṃ gahetvā tassa janapadassa sulabhabhikkhatāya tattha gantvā viharati. Saṃvejetukāmāti vivekaṃ paṭipajjāpetukāmā. Vivekakāmoti tayo viveke patthayanto. Niccharatī bahiddhāti bāhiresu puthuttārammaṇesu carati. Jano janasminti tvaṃ jano aññasmiṃ jane chandarāgaṃ vinayassu. Pajahāsīti pajaha. Bhavāsīti bhava. Sataṃ taṃ sārayāmaseti satimantaṃ paṇḍitaṃ taṃ mayampi sārayāma, sataṃ vā dhammaṃ mayaṃ taṃ sārayāmāti attho. Pātālarajoti appatiṭṭhaṭṭhena pātālasaṅkhāto kilesarajo. Mā taṃ kāmarajoti ayaṃ kāmarāgarajo taṃ mā avahari, apāyameva mā netūti attho. Paṃsukunthitoti paṃsumakkhito. Vidhunanti vidhunanto. Sitaṃ rajanti sarīralaggaṃ rajaṃ. Saṃvegamāpādīti devatāpi nāma maṃ evaṃ sāretīti vivekamāpanno, uttamavīriyaṃ vā paggayha paramavivekaṃ maggameva paṭipannoti. Paṭhamaṃ.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૧. વિવેકસુત્તં • 1. Vivekasuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૧. વિવેકસુત્તવણ્ણના • 1. Vivekasuttavaṇṇanā
