| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
4. வுட்டி²ஸுத்தவண்ணனா
4. Vuṭṭhisuttavaṇṇanā
74. உப்பதந்தானந்தி பத²விங் பி⁴ந்தி³த்வா உட்ட²ஹந்தானங். ‘‘ஸெட்ட²’’ந்தி வுச்சமானத்தா ‘‘ஸத்தவித⁴’’ந்தி வுத்தங், இதரேஸங் வா தத³னுலோமதோ. கே²மோ ஹோதி து³ப்³பி⁴க்கு²பத்³த³வாபா⁴வதோ. தேனாஹ ‘‘ஸுபி⁴க்கோ²’’தி. நிபதந்தானந்தி அதோ⁴முக²ங் பவத்தந்தானங். பவஜமானானந்தி வஜனஸீலானங். தே பன யஸ்மா ஜங்க³மா நாம ஹொந்தி, ந ருக்கா²த³யோ விய தா²வரா, தஸ்மா ஆஹ ‘‘ஜங்க³மான’’ந்தி. கா³வோதி தே⁴னுயோ. தேன மஹிங்ஸாதி³கானம்பி ஸங்க³ஹோ த³ட்ட²ப்³போ³. வத³ந்தானந்தி உப்பன்னங் அத்த²ங் வத³ந்தானங்.
74.Uppatantānanti pathaviṃ bhinditvā uṭṭhahantānaṃ. ‘‘Seṭṭha’’nti vuccamānattā ‘‘sattavidha’’nti vuttaṃ, itaresaṃ vā tadanulomato. Khemo hoti dubbhikkhupaddavābhāvato. Tenāha ‘‘subhikkho’’ti. Nipatantānanti adhomukhaṃ pavattantānaṃ. Pavajamānānanti vajanasīlānaṃ. Te pana yasmā jaṅgamā nāma honti, na rukkhādayo viya thāvarā, tasmā āha ‘‘jaṅgamāna’’nti. Gāvoti dhenuyo. Tena mahiṃsādikānampi saṅgaho daṭṭhabbo. Vadantānanti uppannaṃ atthaṃ vadantānaṃ.
அத்தனோ க²ந்தியாதி அத்தனோ க²ந்தியா ருசியா க³ஹிதபா⁴வேன. இதரா தே³வதா தஸ்ஸா விஸ்ஸஜ்ஜனே அபரிதுஸ்ஸமானா ஆஹ. யாவ பத⁴ங்ஸீதி கு³ணத⁴ங்ஸீ ஸத்து²தே³ஸனாய லத்³த⁴ப்³ப³கு³ணனாஸனதோ. பக³ப்³பா³தி பாக³ப்³பி³யேன ஸமன்னாக³தா, யதா² வசீபாக³ப்³பி³யேன அக²ரா, ததா² வாசாய ப⁴விதப்³ப³ங். முக²ராதி முக²க²ரா. த³ஸப³லங் புச்சி² ஸண்ஹங் ஸுகு²மங் ரதனத்தயஸங்ஹிதங் அத்த²ங் ஸோதுகாமா. அஸ்ஸா தே³வதாய விஸ்ஸஜ்ஜெந்தோ அஜ்ஜா²ஸயானுரூபங். உப்பதமானாதி உப்பதந்தீ ஸமுக்³கா⁴டேதி ஓதி⁴ஸோ. வட்டமூலகமஹாஅவிஜ்ஜாதி தஸ்ஸா ஆதீ³னவத³ஸ்ஸனத்த²ங் பூ⁴தகத²னவிஸேஸனங். ஓஸீத³ந்தானந்தி படிபக்க²வஸேன அதோ⁴ ஸீத³ந்தானங், உஸ்ஸாத³யமானானந்தி அத்தோ². புஞ்ஞக்கெ²த்தபூ⁴தோதி இத³ங் ‘‘பத³ஸா சரமானான’’ந்தி பத³ஸ்ஸ அத்த²விவரணவஸேன பூ⁴தகத²னவிஸேஸனங். யாதி³ஸோ புத்தோ வா ஹோதூதி இத³ங் புரிமபதே³ தே³வதாய புத்தக³ஹணஸ்ஸ கதத்தா வுத்தங்.
Attanokhantiyāti attano khantiyā ruciyā gahitabhāvena. Itarā devatā tassā vissajjane aparitussamānā āha. Yāva padhaṃsīti guṇadhaṃsī satthudesanāya laddhabbaguṇanāsanato. Pagabbāti pāgabbiyena samannāgatā, yathā vacīpāgabbiyena akharā, tathā vācāya bhavitabbaṃ. Mukharāti mukhakharā. Dasabalaṃ pucchi saṇhaṃ sukhumaṃ ratanattayasaṃhitaṃ atthaṃ sotukāmā. Assā devatāya vissajjento ajjhāsayānurūpaṃ. Uppatamānāti uppatantī samugghāṭeti odhiso. Vaṭṭamūlakamahāavijjāti tassā ādīnavadassanatthaṃ bhūtakathanavisesanaṃ. Osīdantānanti paṭipakkhavasena adho sīdantānaṃ, ussādayamānānanti attho. Puññakkhettabhūtoti idaṃ ‘‘padasā caramānāna’’nti padassa atthavivaraṇavasena bhūtakathanavisesanaṃ. Yādiso putto vā hotūti idaṃ purimapade devatāya puttagahaṇassa katattā vuttaṃ.
வுட்டி²ஸுத்தவண்ணனா நிட்டி²தா.
Vuṭṭhisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. வுட்டி²ஸுத்தங் • 4. Vuṭṭhisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. வுட்டி²ஸுத்தவண்ணனா • 4. Vuṭṭhisuttavaṇṇanā
