| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૪. વુટ્ઠિસુત્તવણ્ણના
4. Vuṭṭhisuttavaṇṇanā
૭૪. ઉપ્પતન્તાનન્તિ પથવિં ભિન્દિત્વા ઉટ્ઠહન્તાનં. ‘‘સેટ્ઠ’’ન્તિ વુચ્ચમાનત્તા ‘‘સત્તવિધ’’ન્તિ વુત્તં, ઇતરેસં વા તદનુલોમતો. ખેમો હોતિ દુબ્ભિક્ખુપદ્દવાભાવતો. તેનાહ ‘‘સુભિક્ખો’’તિ. નિપતન્તાનન્તિ અધોમુખં પવત્તન્તાનં. પવજમાનાનન્તિ વજનસીલાનં. તે પન યસ્મા જઙ્ગમા નામ હોન્તિ, ન રુક્ખાદયો વિય થાવરા, તસ્મા આહ ‘‘જઙ્ગમાન’’ન્તિ. ગાવોતિ ધેનુયો. તેન મહિંસાદિકાનમ્પિ સઙ્ગહો દટ્ઠબ્બો. વદન્તાનન્તિ ઉપ્પન્નં અત્થં વદન્તાનં.
74.Uppatantānanti pathaviṃ bhinditvā uṭṭhahantānaṃ. ‘‘Seṭṭha’’nti vuccamānattā ‘‘sattavidha’’nti vuttaṃ, itaresaṃ vā tadanulomato. Khemo hoti dubbhikkhupaddavābhāvato. Tenāha ‘‘subhikkho’’ti. Nipatantānanti adhomukhaṃ pavattantānaṃ. Pavajamānānanti vajanasīlānaṃ. Te pana yasmā jaṅgamā nāma honti, na rukkhādayo viya thāvarā, tasmā āha ‘‘jaṅgamāna’’nti. Gāvoti dhenuyo. Tena mahiṃsādikānampi saṅgaho daṭṭhabbo. Vadantānanti uppannaṃ atthaṃ vadantānaṃ.
અત્તનો ખન્તિયાતિ અત્તનો ખન્તિયા રુચિયા ગહિતભાવેન. ઇતરા દેવતા તસ્સા વિસ્સજ્જને અપરિતુસ્સમાના આહ. યાવ પધંસીતિ ગુણધંસી સત્થુદેસનાય લદ્ધબ્બગુણનાસનતો. પગબ્બાતિ પાગબ્બિયેન સમન્નાગતા, યથા વચીપાગબ્બિયેન અખરા, તથા વાચાય ભવિતબ્બં. મુખરાતિ મુખખરા. દસબલં પુચ્છિ સણ્હં સુખુમં રતનત્તયસંહિતં અત્થં સોતુકામા. અસ્સા દેવતાય વિસ્સજ્જેન્તો અજ્ઝાસયાનુરૂપં. ઉપ્પતમાનાતિ ઉપ્પતન્તી સમુગ્ઘાટેતિ ઓધિસો. વટ્ટમૂલકમહાઅવિજ્જાતિ તસ્સા આદીનવદસ્સનત્થં ભૂતકથનવિસેસનં. ઓસીદન્તાનન્તિ પટિપક્ખવસેન અધો સીદન્તાનં, ઉસ્સાદયમાનાનન્તિ અત્થો. પુઞ્ઞક્ખેત્તભૂતોતિ ઇદં ‘‘પદસા ચરમાનાન’’ન્તિ પદસ્સ અત્થવિવરણવસેન ભૂતકથનવિસેસનં. યાદિસો પુત્તો વા હોતૂતિ ઇદં પુરિમપદે દેવતાય પુત્તગહણસ્સ કતત્તા વુત્તં.
Attanokhantiyāti attano khantiyā ruciyā gahitabhāvena. Itarā devatā tassā vissajjane aparitussamānā āha. Yāva padhaṃsīti guṇadhaṃsī satthudesanāya laddhabbaguṇanāsanato. Pagabbāti pāgabbiyena samannāgatā, yathā vacīpāgabbiyena akharā, tathā vācāya bhavitabbaṃ. Mukharāti mukhakharā. Dasabalaṃ pucchi saṇhaṃ sukhumaṃ ratanattayasaṃhitaṃ atthaṃ sotukāmā. Assā devatāya vissajjento ajjhāsayānurūpaṃ. Uppatamānāti uppatantī samugghāṭeti odhiso. Vaṭṭamūlakamahāavijjāti tassā ādīnavadassanatthaṃ bhūtakathanavisesanaṃ. Osīdantānanti paṭipakkhavasena adho sīdantānaṃ, ussādayamānānanti attho. Puññakkhettabhūtoti idaṃ ‘‘padasā caramānāna’’nti padassa atthavivaraṇavasena bhūtakathanavisesanaṃ. Yādiso putto vā hotūti idaṃ purimapade devatāya puttagahaṇassa katattā vuttaṃ.
વુટ્ઠિસુત્તવણ્ણના નિટ્ઠિતા.
Vuṭṭhisuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૪. વુટ્ઠિસુત્તં • 4. Vuṭṭhisuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૪. વુટ્ઠિસુત્તવણ્ણના • 4. Vuṭṭhisuttavaṇṇanā
