| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. யமகஸுத்தவண்ணனா
3. Yamakasuttavaṇṇanā
85. தி³ட்டி² ஏவ தி³ட்டி²க³தங் ‘‘கூ³த²க³தங் முத்தக³த’’ந்தி (ம॰ நி॰ 2.119; அ॰ நி॰ 9.11) யதா². தி³ட்டி²க³தங் நாம ஜாதங் க²ந்த⁴வினிமுத்தஸ்ஸ ஸத்தஸ்ஸ க³ஹிதத்தா.
85. Diṭṭhi eva diṭṭhigataṃ ‘‘gūthagataṃ muttagata’’nti (ma. ni. 2.119; a. ni. 9.11) yathā. Diṭṭhigataṃ nāma jātaṃ khandhavinimuttassa sattassa gahitattā.
குபிதேதி தி³ட்டி²ஸங்கா²தரோகே³ன குபிதே. பக்³க³ய்ஹாதி தேஸங் பி⁴க்கூ²னங் ஸந்திகே விய தே²ரஸ்ஸ ஸாரிபுத்தஸ்ஸ ஸம்முகா² அத்தனோ லத்³தி⁴ங் பக்³க³ய்ஹ ‘‘ஏவங் க்²வாஹ’’ந்தி ஏவங் நிச்ச²யேன வத்துங் அஸக்கொந்தோ.
Kupiteti diṭṭhisaṅkhātarogena kupite. Paggayhāti tesaṃ bhikkhūnaṃ santike viya therassa sāriputtassa sammukhā attano laddhiṃ paggayha ‘‘evaṃ khvāha’’nti evaṃ nicchayena vattuṃ asakkonto.
அனுயோக³வத்தங் நாம யேன யுத்தோ, தஸ்ஸ அத்தனோ கா³ஹங் நிஜ்ஜா²னக்க²ந்தியாவ யாதா²வதோ பவேத³னங். தே²ரஸ்ஸ அனுயோகே³ பு⁴ம்மந்தி ‘‘தங் கிங் மஞ்ஞஸி, ஆவுஸோ யமகா’’திஆதி³னா தே²ரேன கதி²தபுச்சா²ய பு⁴ம்மனித்³தே³ஸோ. ஸசே தங் ஆவுஸோதி இத³ந்தி ‘‘ஸசே தங், ஆவுஸோ’’தி ஏவமாதி³கங் இத³ங் வசனங். ஏதந்தி யமகத்தே²ரங். அஞ்ஞந்தி அரஹத்தங். வத்தப்³பா³காரேன வத³ந்தோ அத்த²தோ அரஹத்தங் ப்³யாகரொந்தோ நாம ஹோதீதி அதி⁴ப்பாயேன வத³தி.
Anuyogavattaṃ nāma yena yutto, tassa attano gāhaṃ nijjhānakkhantiyāva yāthāvato pavedanaṃ. Therassa anuyoge bhummanti ‘‘taṃ kiṃ maññasi, āvuso yamakā’’tiādinā therena kathitapucchāya bhummaniddeso. Sace taṃ āvusoti idanti ‘‘sace taṃ, āvuso’’ti evamādikaṃ idaṃ vacanaṃ. Etanti yamakattheraṃ. Aññanti arahattaṃ. Vattabbākārena vadanto atthato arahattaṃ byākaronto nāma hotīti adhippāyena vadati.
ஏதஸ்ஸ பட²மமக்³க³ஸ்ஸாதி ஏதஸ்ஸ இதா³னியேவ திபரிவட்டதே³ஸனாவஸானே தயா அதி⁴க³தஸ்ஸ பட²மமக்³க³ஸ்ஸ . சதூஹி யோகே³ஹீதி அத்ததோ பியதோ உதா³ஸினதோ வேரிதோதி சதூஹிபி உப்பஜ்ஜனஅனத்த²யோகே³ஹி.
Etassa paṭhamamaggassāti etassa idāniyeva tiparivaṭṭadesanāvasāne tayā adhigatassa paṭhamamaggassa . Catūhi yogehīti attato piyato udāsinato veritoti catūhipi uppajjanaanatthayogehi.
உபேதீதி தண்ஹுபயதி³ட்டு²பயேஹி உபாதி³யதி தண்ஹாதி³ட்டி²வத்து²ங் பப்போதி. உபாதி³யதீதி த³ள்ஹக்³கா³ஹங் க³ண்ஹாதி. அதி⁴திட்ட²தீதி அபி⁴னிவிஸ்ஸ திட்ட²தி. கிந்தி? ‘‘அத்தா மே’’தி. பச்சத்தி²கா மே ஏதேதி ஏதே ரூபவேத³னாத³யோ பஞ்சுபாதா³னக்க²ந்தா⁴ மய்ஹங் பச்சத்தி²கா அனத்தா²வஹத்தாதி விபஸ்ஸனாஞாணேன ஞத்வா. விபஸ்ஸனாய யோஜெத்வாதி விபஸ்ஸனாய க²ந்தே⁴ யோஜெத்வா.
Upetīti taṇhupayadiṭṭhupayehi upādiyati taṇhādiṭṭhivatthuṃ pappoti. Upādiyatīti daḷhaggāhaṃ gaṇhāti. Adhitiṭṭhatīti abhinivissa tiṭṭhati. Kinti? ‘‘Attā me’’ti. Paccatthikā me eteti ete rūpavedanādayo pañcupādānakkhandhā mayhaṃ paccatthikā anatthāvahattāti vipassanāñāṇena ñatvā. Vipassanāya yojetvāti vipassanāya khandhe yojetvā.
யமகஸுத்தவண்ணனா நிட்டி²தா.
Yamakasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. யமகஸுத்தங் • 3. Yamakasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. யமகஸுத்தவண்ணனா • 3. Yamakasuttavaṇṇanā
