| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૩. યમકસુત્તવણ્ણના
3. Yamakasuttavaṇṇanā
૮૫. દિટ્ઠિ એવ દિટ્ઠિગતં ‘‘ગૂથગતં મુત્તગત’’ન્તિ (મ॰ નિ॰ ૨.૧૧૯; અ॰ નિ॰ ૯.૧૧) યથા. દિટ્ઠિગતં નામ જાતં ખન્ધવિનિમુત્તસ્સ સત્તસ્સ ગહિતત્તા.
85. Diṭṭhi eva diṭṭhigataṃ ‘‘gūthagataṃ muttagata’’nti (ma. ni. 2.119; a. ni. 9.11) yathā. Diṭṭhigataṃ nāma jātaṃ khandhavinimuttassa sattassa gahitattā.
કુપિતેતિ દિટ્ઠિસઙ્ખાતરોગેન કુપિતે. પગ્ગય્હાતિ તેસં ભિક્ખૂનં સન્તિકે વિય થેરસ્સ સારિપુત્તસ્સ સમ્મુખા અત્તનો લદ્ધિં પગ્ગય્હ ‘‘એવં ખ્વાહ’’ન્તિ એવં નિચ્છયેન વત્તું અસક્કોન્તો.
Kupiteti diṭṭhisaṅkhātarogena kupite. Paggayhāti tesaṃ bhikkhūnaṃ santike viya therassa sāriputtassa sammukhā attano laddhiṃ paggayha ‘‘evaṃ khvāha’’nti evaṃ nicchayena vattuṃ asakkonto.
અનુયોગવત્તં નામ યેન યુત્તો, તસ્સ અત્તનો ગાહં નિજ્ઝાનક્ખન્તિયાવ યાથાવતો પવેદનં. થેરસ્સ અનુયોગે ભુમ્મન્તિ ‘‘તં કિં મઞ્ઞસિ, આવુસો યમકા’’તિઆદિના થેરેન કથિતપુચ્છાય ભુમ્મનિદ્દેસો. સચે તં આવુસોતિ ઇદન્તિ ‘‘સચે તં, આવુસો’’તિ એવમાદિકં ઇદં વચનં. એતન્તિ યમકત્થેરં. અઞ્ઞન્તિ અરહત્તં. વત્તબ્બાકારેન વદન્તો અત્થતો અરહત્તં બ્યાકરોન્તો નામ હોતીતિ અધિપ્પાયેન વદતિ.
Anuyogavattaṃ nāma yena yutto, tassa attano gāhaṃ nijjhānakkhantiyāva yāthāvato pavedanaṃ. Therassa anuyoge bhummanti ‘‘taṃ kiṃ maññasi, āvuso yamakā’’tiādinā therena kathitapucchāya bhummaniddeso. Sace taṃ āvusoti idanti ‘‘sace taṃ, āvuso’’ti evamādikaṃ idaṃ vacanaṃ. Etanti yamakattheraṃ. Aññanti arahattaṃ. Vattabbākārena vadanto atthato arahattaṃ byākaronto nāma hotīti adhippāyena vadati.
એતસ્સ પઠમમગ્ગસ્સાતિ એતસ્સ ઇદાનિયેવ તિપરિવટ્ટદેસનાવસાને તયા અધિગતસ્સ પઠમમગ્ગસ્સ . ચતૂહિ યોગેહીતિ અત્તતો પિયતો ઉદાસિનતો વેરિતોતિ ચતૂહિપિ ઉપ્પજ્જનઅનત્થયોગેહિ.
Etassa paṭhamamaggassāti etassa idāniyeva tiparivaṭṭadesanāvasāne tayā adhigatassa paṭhamamaggassa . Catūhi yogehīti attato piyato udāsinato veritoti catūhipi uppajjanaanatthayogehi.
ઉપેતીતિ તણ્હુપયદિટ્ઠુપયેહિ ઉપાદિયતિ તણ્હાદિટ્ઠિવત્થું પપ્પોતિ. ઉપાદિયતીતિ દળ્હગ્ગાહં ગણ્હાતિ. અધિતિટ્ઠતીતિ અભિનિવિસ્સ તિટ્ઠતિ. કિન્તિ? ‘‘અત્તા મે’’તિ. પચ્ચત્થિકા મે એતેતિ એતે રૂપવેદનાદયો પઞ્ચુપાદાનક્ખન્ધા મય્હં પચ્ચત્થિકા અનત્થાવહત્તાતિ વિપસ્સનાઞાણેન ઞત્વા. વિપસ્સનાય યોજેત્વાતિ વિપસ્સનાય ખન્ધે યોજેત્વા.
Upetīti taṇhupayadiṭṭhupayehi upādiyati taṇhādiṭṭhivatthuṃ pappoti. Upādiyatīti daḷhaggāhaṃ gaṇhāti. Adhitiṭṭhatīti abhinivissa tiṭṭhati. Kinti? ‘‘Attā me’’ti. Paccatthikā me eteti ete rūpavedanādayo pañcupādānakkhandhā mayhaṃ paccatthikā anatthāvahattāti vipassanāñāṇena ñatvā. Vipassanāya yojetvāti vipassanāya khandhe yojetvā.
યમકસુત્તવણ્ણના નિટ્ઠિતા.
Yamakasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૩. યમકસુત્તં • 3. Yamakasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૩. યમકસુત્તવણ્ણના • 3. Yamakasuttavaṇṇanā
