| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
3. யஸோஜஸுத்தவண்ணனா
3. Yasojasuttavaṇṇanā
23. ததியே யஸோஜப்பமுகா²னீதி எத்த² யஸோஜோதி தஸ்ஸ தே²ரஸ்ஸ நாமங், தங் புப்³ப³ங்க³மங் கத்வா பப்³ப³ஜிதத்தா விசரணதோ ச தானி பஞ்ச பி⁴க்கு²ஸதானி ‘‘யஸோஜப்பமுகா²னீ’’தி வுத்தானி.
23. Tatiye yasojappamukhānīti ettha yasojoti tassa therassa nāmaṃ, taṃ pubbaṅgamaṃ katvā pabbajitattā vicaraṇato ca tāni pañca bhikkhusatāni ‘‘yasojappamukhānī’’ti vuttāni.
தேஸங் அயங் புப்³ப³யோகோ³ – அதீதே கிர கஸ்ஸபத³ஸப³லஸ்ஸ ஸாஸனே அஞ்ஞதரோ பி⁴க்கு² ஆரஞ்ஞகோ அரஞ்ஞே பிட்டி²பாஸாணே கதபண்ணகுடியங் விஹரதி. தஸ்மிஞ்ச ஸமயே பஞ்சஸதா சோரா கா³மகா⁴தகாதீ³னி கத்வா சோரிகாய ஜீவந்தா சோரகம்மங் கத்வா ஜனபத³மனுஸ்ஸேஹி அனுப³த்³தா⁴ பலாயமானா அரஞ்ஞங் பவிஸித்வா தத்த² கிஞ்சி க³ஹணங் வா படிஸரணங் வா அபஸ்ஸந்தா அவிதூ³ரே தங் பி⁴க்கு²ங் பாஸாணே நிஸின்னங் தி³ஸ்வா வந்தி³த்வா தங் பவத்திங் ஆசிக்கி²த்வா ‘‘அம்ஹாகங், ப⁴ந்தே, படிஸரணங் ஹோதா²’’தி யாசிங்ஸு. தே²ரோ ‘‘தும்ஹாகங் ஸீலஸதி³ஸங் படிஸரணங் நத்தி², ஸப்³பே³ பஞ்ச ஸீலானி ஸமாதி³யதா²’’தி ஆஹ. தே ‘‘ஸாதூ⁴’’தி ஸம்படிச்சி²த்வா ஸீலானி ஸமாதி³யிங்ஸு. தே²ரோ ‘‘தும்ஹே இதா³னி ஸீலேஸு பதிட்டி²தா, அத்தனோ ஜீவிதங் வினாஸயந்தேஸுபி மா மனங் பதோ³ஸயித்தா²’’தி ககசூபமவிதி⁴ங் (ம॰ நி॰ 1.222 ஆத³யோ) ஆசிக்கி². தே ‘‘ஸாதூ⁴’’தி ஸம்படிச்சி²ங்ஸு. அத² தே ஜானபதா³ தங் ஸம்பத்தா இதோ சிதோ ச க³வேஸந்தா தே சோரே தி³ஸ்வா ஸப்³பே³வ ஜீவிதா வோரோபேஸுங். தே தேஸு மனோபதோ³ஸமத்தம்பி அகத்வா அக்க²ண்ட³ஸீலா காலங் கத்வா காமாவசரதே³வேஸு நிப்³ப³த்திங்ஸு. தேஸு ஜெட்ட²சோரோ ஜெட்ட²தே³வபுத்தோ அஹோஸி, இதரே தஸ்ஸேவ பரிவாரா.
Tesaṃ ayaṃ pubbayogo – atīte kira kassapadasabalassa sāsane aññataro bhikkhu āraññako araññe piṭṭhipāsāṇe katapaṇṇakuṭiyaṃ viharati. Tasmiñca samaye pañcasatā corā gāmaghātakādīni katvā corikāya jīvantā corakammaṃ katvā janapadamanussehi anubaddhā palāyamānā araññaṃ pavisitvā tattha kiñci gahaṇaṃ vā paṭisaraṇaṃ vā apassantā avidūre taṃ bhikkhuṃ pāsāṇe nisinnaṃ disvā vanditvā taṃ pavattiṃ ācikkhitvā ‘‘amhākaṃ, bhante, paṭisaraṇaṃ hothā’’ti yāciṃsu. Thero ‘‘tumhākaṃ sīlasadisaṃ paṭisaraṇaṃ natthi, sabbe pañca sīlāni samādiyathā’’ti āha. Te ‘‘sādhū’’ti sampaṭicchitvā sīlāni samādiyiṃsu. Thero ‘‘tumhe idāni sīlesu patiṭṭhitā, attano jīvitaṃ vināsayantesupi mā manaṃ padosayitthā’’ti kakacūpamavidhiṃ (ma. ni. 1.222 ādayo) ācikkhi. Te ‘‘sādhū’’ti sampaṭicchiṃsu. Atha te jānapadā taṃ sampattā ito cito ca gavesantā te core disvā sabbeva jīvitā voropesuṃ. Te tesu manopadosamattampi akatvā akkhaṇḍasīlā kālaṃ katvā kāmāvacaradevesu nibbattiṃsu. Tesu jeṭṭhacoro jeṭṭhadevaputto ahosi, itare tasseva parivārā.
தே அபராபரங் ஸங்ஸரந்தா ஏகங் பு³த்³த⁴ந்தரங் தே³வலோகே கே²பெத்வா அம்ஹாகங் ப⁴க³வதோ காலே தே³வலோகதோ சவித்வா ஜெட்ட²தே³வபுத்தோ ஸாவத்தி²னக³ரத்³வாரே கேவட்டகா³மே பஞ்சஸதகுலகா³மஜெட்ட²கஸ்ஸ கேவட்டஸ்ஸ புத்தோ ஹுத்வா நிப்³ப³த்தி, யஸோஜோதிஸ்ஸ நாமங் அகங்ஸு. இதரேபி அவஸேஸகேவட்டானங் புத்தா ஹுத்வா நிப்³ப³த்திங்ஸு. தே புப்³ப³ஸன்னிவாஸேன ஸப்³பே³பி ஸஹாயகா ஹுத்வா ஸஹபங்ஸுகீளிதங் கீளந்தா அனுபுப்³பே³ன வயப்பத்தா அஹேஸுங், யஸோஜோ தேஸங் அக்³கோ³ அஹோஸி. தே ஸப்³பே³வ ஏகதோ ஹுத்வா ஜாலானி க³ஹெத்வா நதி³தளாகாதீ³ஸு மச்சே² ப³ந்த⁴ந்தா விசரந்தி.
Te aparāparaṃ saṃsarantā ekaṃ buddhantaraṃ devaloke khepetvā amhākaṃ bhagavato kāle devalokato cavitvā jeṭṭhadevaputto sāvatthinagaradvāre kevaṭṭagāme pañcasatakulagāmajeṭṭhakassa kevaṭṭassa putto hutvā nibbatti, yasojotissa nāmaṃ akaṃsu. Itarepi avasesakevaṭṭānaṃ puttā hutvā nibbattiṃsu. Te pubbasannivāsena sabbepi sahāyakā hutvā sahapaṃsukīḷitaṃ kīḷantā anupubbena vayappattā ahesuṃ, yasojo tesaṃ aggo ahosi. Te sabbeva ekato hutvā jālāni gahetvā naditaḷākādīsu macche bandhantā vicaranti.
அதே²கதி³வஸங் அசிரவதியா நதி³யா ஜாலே கி²த்தே ஸுவண்ணவண்ணோ மச்சோ² அந்தோஜாலே பாவிஸி. தங் தி³ஸ்வா ஸப்³பே³பி கேவட்டா ‘‘அம்ஹாகங் புத்தா மச்சே² ப³ந்த⁴ந்தா ஸுவண்ணவண்ணங் மச்ச²ங் ப³ந்தி⁴ங்ஸூ’’தி ஹட்ட²துட்டா² அஹேஸுங். அத² தே பஞ்சஸதாபி ஸஹாயகா மச்ச²ங் நாவாய பக்கி²பித்வா நாவங் உக்கி²பித்வா ரஞ்ஞோ த³ஸ்ஸேஸுங். ராஜா தங் தி³ஸ்வா ‘‘ப⁴க³வா ஏதஸ்ஸ ஸுவண்ணவண்ணகாரணங் ஜானிஸ்ஸதீ’’தி மச்ச²ங் கா³ஹாபெத்வா ப⁴க³வதோ த³ஸ்ஸேஸி. ஸத்தா² ‘‘அயங் கஸ்ஸபஸம்மாஸம்பு³த்³த⁴ஸ்ஸ ஸாஸனே ஓஸக்கமானே பப்³ப³ஜித்வா மிச்சா² படிபஜ்ஜந்தோ ஸாஸனங் ஓஸக்காபெத்வா நிரயே நிப்³ப³த்தோ ஏகங் பு³த்³த⁴ந்தரங் நிரயே பச்சித்வா ததோ சுதோ அசிரவதியங் மச்சோ² ஹுத்வா நிப்³ப³த்தோ’’தி வத்வா தஸ்ஸ மாதுப⁴கி³னீனஞ்ச நிரயே நிப்³ப³த்தபா⁴வங், தஸ்ஸ பா⁴திகத்தே²ரஸ்ஸ பரினிப்³பு³தபா⁴வஞ்ச தேனேவ கதா²பெத்வா இமிஸ்ஸா அட்டு²ப்பத்தியா கபிலஸுத்தங் தே³ஸேஸி.
Athekadivasaṃ aciravatiyā nadiyā jāle khitte suvaṇṇavaṇṇo maccho antojāle pāvisi. Taṃ disvā sabbepi kevaṭṭā ‘‘amhākaṃ puttā macche bandhantā suvaṇṇavaṇṇaṃ macchaṃ bandhiṃsū’’ti haṭṭhatuṭṭhā ahesuṃ. Atha te pañcasatāpi sahāyakā macchaṃ nāvāya pakkhipitvā nāvaṃ ukkhipitvā rañño dassesuṃ. Rājā taṃ disvā ‘‘bhagavā etassa suvaṇṇavaṇṇakāraṇaṃ jānissatī’’ti macchaṃ gāhāpetvā bhagavato dassesi. Satthā ‘‘ayaṃ kassapasammāsambuddhassa sāsane osakkamāne pabbajitvā micchā paṭipajjanto sāsanaṃ osakkāpetvā niraye nibbatto ekaṃ buddhantaraṃ niraye paccitvā tato cuto aciravatiyaṃ maccho hutvā nibbatto’’ti vatvā tassa mātubhaginīnañca niraye nibbattabhāvaṃ, tassa bhātikattherassa parinibbutabhāvañca teneva kathāpetvā imissā aṭṭhuppattiyā kapilasuttaṃ desesi.
ஸத்து² தே³ஸனங் ஸுத்வா தே பஞ்சஸதா கேவட்டபுத்தா ஸங்வேக³ஜாதா ஹுத்வா ப⁴க³வதோ ஸந்திகே பப்³ப³ஜித்வா, உபஸம்பன்னா ஹுத்வா விவேகவாஸங் வஸந்தா ப⁴க³வந்தங் த³ஸ்ஸனாய ஆக³மங்ஸு. தேன வுத்தங் – ‘‘தேன கோ² பன ஸமயேன யஸோஜப்பமுகா²னி பஞ்சமத்தானி பி⁴க்கு²ஸதானீ’’திஆதி³.
Satthu desanaṃ sutvā te pañcasatā kevaṭṭaputtā saṃvegajātā hutvā bhagavato santike pabbajitvā, upasampannā hutvā vivekavāsaṃ vasantā bhagavantaṃ dassanāya āgamaṃsu. Tena vuttaṃ – ‘‘tena kho pana samayena yasojappamukhāni pañcamattāni bhikkhusatānī’’tiādi.
தத்த² தேதா⁴தி தே இத⁴. நேவாஸிகேஹீதி நிப³த்³த⁴வாஸங் வஸமானேஹி. படிஸம்மோத³மானாதி நேவாஸிகபி⁴க்கூ²ஹி ‘‘கச்சாவுஸோ, க²மனீய’’ந்திஆதி³னா படிஸந்தா²ரவஸேன ஸம்மோத³னாய கதாய ‘‘ஆமாவுஸோ, க²மனீய’’ந்திஆதி³னா , புன ஸம்மோத³மானா தேஹி ஸத்³தி⁴ங் ஸமப்பவத்தமோதா³. ஸேனாஸனானி பஞ்ஞாபயமானாதி ஆசரியுபஜ்ஜா²யானங் அத்தனோ ச பாபுணகானி ஸேனாஸனானி புச்சி²த்வா தேஹி நேவாஸிகேஹி தேஸங் ‘‘இத³ங் தும்ஹாகங் ஆசரியானங், இத³ங் தும்ஹாகங் உபஜ்ஜா²யானங், இத³ங் தும்ஹாகங் பாபுணாதீ’’தி ஸேனாஸனானி ஸங்விதா⁴பெத்வா அத்தனா ச தத்த² க³ந்த்வா, த்³வாரகவாடானி விவரித்வா, மஞ்சபீட²கடஸாரகாதீ³னி நீஹரித்வா பப்போ²டெத்வா யதா²டா²னங் ட²பனாதி³வஸேன பஞ்ஞாபெந்தா ச.
Tattha tedhāti te idha. Nevāsikehīti nibaddhavāsaṃ vasamānehi. Paṭisammodamānāti nevāsikabhikkhūhi ‘‘kaccāvuso, khamanīya’’ntiādinā paṭisanthāravasena sammodanāya katāya ‘‘āmāvuso, khamanīya’’ntiādinā , puna sammodamānā tehi saddhiṃ samappavattamodā. Senāsanāni paññāpayamānāti ācariyupajjhāyānaṃ attano ca pāpuṇakāni senāsanāni pucchitvā tehi nevāsikehi tesaṃ ‘‘idaṃ tumhākaṃ ācariyānaṃ, idaṃ tumhākaṃ upajjhāyānaṃ, idaṃ tumhākaṃ pāpuṇātī’’ti senāsanāni saṃvidhāpetvā attanā ca tattha gantvā, dvārakavāṭāni vivaritvā, mañcapīṭhakaṭasārakādīni nīharitvā papphoṭetvā yathāṭhānaṃ ṭhapanādivasena paññāpentā ca.
பத்தசீவரானி படிஸாமயமானாதி, ‘‘ப⁴ந்தே, இமங் மே பத்தங் ட²பேத², இத³ங் சீவரங், இத³ங் தா²லகங், இத³ங் உத³கதும்ப³ங், இத³ங் மே கத்தரயட்டி²’’ந்தி ஏவங் ஸமணபரிக்கா²ரங் ஸங்கோ³பயமானா. உச்சாஸத்³தா³ மஹாஸத்³தா³தி உத்³த⁴ங் க³தட்டே²ன உச்சோ ஸத்³தோ³ யேஸந்தே உச்சாஸத்³தா³ அகாரஸ்ஸ ஆகாரங் கத்வா. ஸமந்ததோ பத்த²டட்டே²ன மஹந்தோ ஸத்³தோ³ யேஸந்தே மஹாஸத்³தா³. கேவட்டா மஞ்ஞே மச்ச²விலோபேதி கேவட்டா விய மச்ச²விலும்பனே. யதா² நாம கேவட்டா உத³கே வட்டனதோ மச்ச²க்³க³ஹணத்த²ங் பவத்தனதோ ‘‘கேவட்டா’’தி லத்³த⁴னாமா மச்ச²ப³ந்தா⁴ மச்ச²க்³க³ஹணத்த²ங் ஜலே ஜாலங் பக்கி²பித்வா ‘‘பவிட்டோ² ந பவிட்டோ², க³ஹிதோ ந க³ஹிதோ’’திஆதி³னா உச்சாஸத்³த³மஹாஸத்³தா³ ஹொந்தி. யதா² ச தே மச்ச²பச்சி²ஆதீ³னி ட²பிதட்டா²னே மஹாஜனே க³ந்த்வா ‘‘மய்ஹங் ஏகங் மச்ச²ங் தே³த², மய்ஹங் ஏகங் மச்ச²பா²லங் தே³த², அமுகஸ்ஸ தி³ன்னோ மஹந்தோ, மய்ஹங் கு²த்³த³கோ’’திஆதீ³னி வத்வா விலும்பமானே தேஸங் படிஸேத⁴னாதி³வஸேன உச்சாஸத்³த³மஹாஸத்³தா³ ச ஹொந்தி, ஏவமேதே பி⁴க்கூ²தி த³ஸ்ஸேதி. தேதேதி தே ஏதே. கிங்னூதி கிஸ்ஸ நு, கிமத்த²ங் நூதி அத்தோ². தேமேதி தே இமே. பணாமேமீதி நீஹராமி. வோதி தும்ஹே. ந வோ மம ஸந்திகே வத்த²ப்³ப³ந்தி தும்ஹேஹி மய்ஹங் ஸந்திகே ந வஸிதப்³ப³ங். யே தும்ஹே மாதி³ஸஸ்ஸ பு³த்³த⁴ஸ்ஸ வஸனட்டா²னங் ஆக³ந்த்வா ஏவங் மஹாஸத்³த³ங் கரோத², அத்தனோ த⁴ம்மதாய வஸந்தா கிங் நாம ஸாருப்பங் கரிஸ்ஸத², தும்ஹாதி³ஸானங் மம ஸந்திகே வஸனகிச்சங் நத்தீ²தி தீ³பேதி. ஏவங் பணாமிதேஸு ச ப⁴க³வதா தேஸு ஏகபி⁴க்கு²பி ‘‘ப⁴க³வா தும்ஹே மஹாஸத்³த³மத்தகேன அம்ஹே பணாமேதா²’’தி வா அஞ்ஞங் வா கிஞ்சி படிவசனங் அவத்வா பு³த்³த⁴கா³ரவேன ஸப்³பே³ ப⁴க³வதோ வசனங் ஸம்படிச்ச²ந்தா ‘‘ஏவங், ப⁴ந்தே’’தி வத்வா நிக்க²மிங்ஸு. ஏவங் பன தேஸங் அஹோஸி ‘‘மயங் ஸத்தா²ரங் பஸ்ஸிஸ்ஸாம, த⁴ம்மங் ஸொஸ்ஸாம, ஸத்து² ஸந்திகே வஸிஸ்ஸாமாதி ஆக³தா, ஏவரூபஸ்ஸ பன க³ருனோ ஸத்து² ஸந்திகங் ஆக³ந்த்வா மஹாஸத்³த³ங் கரிம்ஹா, அம்ஹாகமேவ தோ³ஸோயங், பணாமிதம்ஹா ததோ, ந லத்³த⁴ங் ஸத்து² ஸந்திகே வத்து²ங், ஸமந்தபாஸாதி³கங் ஸுவண்ணவண்ணங் ஸரீரங் ஓலோகேதுங், மது⁴ரஸ்ஸரேன தே³ஸிதங் த⁴ம்மங் ஸோது’’ந்தி. தே ப³லவதோ³மனஸ்ஸஜாதா ஹுத்வா பக்கமிங்ஸு.
Pattacīvarāni paṭisāmayamānāti, ‘‘bhante, imaṃ me pattaṃ ṭhapetha, idaṃ cīvaraṃ, idaṃ thālakaṃ, idaṃ udakatumbaṃ, idaṃ me kattarayaṭṭhi’’nti evaṃ samaṇaparikkhāraṃ saṃgopayamānā. Uccāsaddā mahāsaddāti uddhaṃ gataṭṭhena ucco saddo yesante uccāsaddā akārassa ākāraṃ katvā. Samantato patthaṭaṭṭhena mahanto saddo yesante mahāsaddā. Kevaṭṭā maññe macchavilopeti kevaṭṭā viya macchavilumpane. Yathā nāma kevaṭṭā udake vaṭṭanato macchaggahaṇatthaṃ pavattanato ‘‘kevaṭṭā’’ti laddhanāmā macchabandhā macchaggahaṇatthaṃ jale jālaṃ pakkhipitvā ‘‘paviṭṭho na paviṭṭho, gahito na gahito’’tiādinā uccāsaddamahāsaddā honti. Yathā ca te macchapacchiādīni ṭhapitaṭṭhāne mahājane gantvā ‘‘mayhaṃ ekaṃ macchaṃ detha, mayhaṃ ekaṃ macchaphālaṃ detha, amukassa dinno mahanto, mayhaṃ khuddako’’tiādīni vatvā vilumpamāne tesaṃ paṭisedhanādivasena uccāsaddamahāsaddā ca honti, evamete bhikkhūti dasseti. Teteti te ete. Kiṃnūti kissa nu, kimatthaṃ nūti attho. Temeti te ime. Paṇāmemīti nīharāmi. Voti tumhe. Na vo mama santike vatthabbanti tumhehi mayhaṃ santike na vasitabbaṃ. Ye tumhe mādisassa buddhassa vasanaṭṭhānaṃ āgantvā evaṃ mahāsaddaṃ karotha, attano dhammatāya vasantā kiṃ nāma sāruppaṃ karissatha, tumhādisānaṃ mama santike vasanakiccaṃ natthīti dīpeti. Evaṃ paṇāmitesu ca bhagavatā tesu ekabhikkhupi ‘‘bhagavā tumhe mahāsaddamattakena amhe paṇāmethā’’ti vā aññaṃ vā kiñci paṭivacanaṃ avatvā buddhagāravena sabbe bhagavato vacanaṃ sampaṭicchantā ‘‘evaṃ, bhante’’ti vatvā nikkhamiṃsu. Evaṃ pana tesaṃ ahosi ‘‘mayaṃ satthāraṃ passissāma, dhammaṃ sossāma, satthu santike vasissāmāti āgatā, evarūpassa pana garuno satthu santikaṃ āgantvā mahāsaddaṃ karimhā, amhākameva dosoyaṃ, paṇāmitamhā tato, na laddhaṃ satthu santike vatthuṃ, samantapāsādikaṃ suvaṇṇavaṇṇaṃ sarīraṃ oloketuṃ, madhurassarena desitaṃ dhammaṃ sotu’’nti. Te balavadomanassajātā hutvā pakkamiṃsu.
ஸங்ஸாமெத்வாதி ஸுகு³த்தங் கத்வா. வஜ்ஜீதி ஏவங்னாமகோ ஜனபதோ³, வஜ்ஜீ நாம ஜானபதி³னோ ராஜகுமாரா, தேஸங் நிவாஸோ ஏகோபி ஜனபதோ³ ருள்ஹீவஸேன ‘‘வஜ்ஜீ’’த்வேவ வுச்சதி. தேன வுத்தங் ‘‘வஜ்ஜீஸூ’’தி. வக்³கு³முதா³தி ஏவங்னாம லோகஸ்ஸ புஞ்ஞஸம்மதா ஏகா நதீ³. ‘‘வக்³க³முதா³’’திபி பாடோ². அத்த²காமேனாதி கிஞ்சி பயோஜனங் அனபெக்கி²த்வா அத்த²மேவ இச்ச²ந்தேன. ஹிதேஸினாதி அத்த²ங் இச்ச²ந்தேன, ‘‘கிந்தி மே ஸாவகா வட்டது³க்கா² பரிமுச்செய்யு’’ந்தி தஸ்ஸ அத்த²ஸங்கா²தஸ்ஸ அத்த²ஸ்ஸ வா ஹேதுபூ⁴தஸ்ஸ ஹிதஸ்ஸ ஏஸனஸீலேன. ததோ ஏவ அத்தனோ ஸரீரகே²த³ங் அக³ணெத்வா தூ³ரேபி வேனெய்யஸந்திகங் க³ந்த்வா அனுகம்பனதோ அனுகம்பகேன. தமேவ அனுகம்பங் உபாதா³ய மயங் பணாமிதா, ந அத்தனோ வெய்யாவச்சாதி³பச்சாஸீஸாய. யஸ்மா த⁴ம்மக³ருனோ பு³த்³தா⁴ ப⁴க³வந்தோ ஸம்மாபடிபத்தியாவ பூஜேதப்³பா³, யே உச்சாஸத்³த³கரணமத்தேபி பணாமெந்தி, தஸ்மா ஹந்த³ மயங், ஆவுஸோ, ததா² விஹாரங் கப்பேம ஸப்³ப³த்த² ஸதிஸம்பஜஞ்ஞயோகே³ன அபண்ணகப்படிபத³ங் பூரெந்தா யதா²க³ஹிதகம்மட்டா²னங் மத்த²கங் பாபெந்தா சதுஇரியாபத²விஹாரங் கப்பேம விஹராம. யதா² நோ விஹரதந்தி யதா² அம்ஹேஸு விஹரந்தேஸு, ப⁴க³வா அத்தமனோ அஸ்ஸ, ஸம்மாபடிபத்தியா பூஜாய ஆராதி⁴தோ ப⁴வெய்யாதி அத்தோ².
Saṃsāmetvāti suguttaṃ katvā. Vajjīti evaṃnāmako janapado, vajjī nāma jānapadino rājakumārā, tesaṃ nivāso ekopi janapado ruḷhīvasena ‘‘vajjī’’tveva vuccati. Tena vuttaṃ ‘‘vajjīsū’’ti. Vaggumudāti evaṃnāma lokassa puññasammatā ekā nadī. ‘‘Vaggamudā’’tipi pāṭho. Atthakāmenāti kiñci payojanaṃ anapekkhitvā atthameva icchantena. Hitesināti atthaṃ icchantena, ‘‘kinti me sāvakā vaṭṭadukkhā parimucceyyu’’nti tassa atthasaṅkhātassa atthassa vā hetubhūtassa hitassa esanasīlena. Tato eva attano sarīrakhedaṃ agaṇetvā dūrepi veneyyasantikaṃ gantvā anukampanato anukampakena. Tameva anukampaṃ upādāya mayaṃ paṇāmitā, na attano veyyāvaccādipaccāsīsāya. Yasmā dhammagaruno buddhā bhagavanto sammāpaṭipattiyāva pūjetabbā, ye uccāsaddakaraṇamattepi paṇāmenti, tasmā handa mayaṃ, āvuso, tathā vihāraṃ kappema sabbattha satisampajaññayogena apaṇṇakappaṭipadaṃ pūrentā yathāgahitakammaṭṭhānaṃ matthakaṃ pāpentā catuiriyāpathavihāraṃ kappema viharāma. Yathā no viharatanti yathā amhesu viharantesu, bhagavā attamano assa, sammāpaṭipattiyā pūjāya ārādhito bhaveyyāti attho.
தேனேவந்தரவஸ்ஸேனாதி தஸ்மிங்யேவ அந்தரவஸ்ஸே மஹாபவாரணங் அனதிக்கமித்வாவ. ஸப்³பே³வ திஸ்ஸோ விஜ்ஜா ஸச்சா²கங்ஸூதி ஸப்³பே³யேவ தே பஞ்சஸதா பி⁴க்கூ² புப்³பே³னிவாஸானுஸ்ஸதிஞாணங் தி³ப்³ப³சக்கு²ஞாணங் ஆஸவக்க²யஞாணந்தி இமா திஸ்ஸோ புப்³பே³னிவுத்த²க்க²ந்த⁴ப்படிச்சா²த³கமோஹக்க²ந்தா⁴தீ³னங் வினிவிஜ்ஜ²னட்டே²ன விஜ்ஜா அத்தபச்சக்கா² அகங்ஸு. லோகியாபி⁴ஞ்ஞாஸு இமாயேவ த்³வே அபி⁴ஞ்ஞா ஆஸவக்க²யஞாணஸ்ஸ ப³ஹூபகாரா, ந ததா² தி³ப்³ப³ஸோதசேதோபரியஇத்³தி⁴வித⁴ஞாணானீதி த³ஸ்ஸனத்த²ங் விஜ்ஜத்தயமேவெத்த² தேஸங் பி⁴க்கூ²னங் அதி⁴க³மத³ஸ்ஸனவஸேன உத்³த⁴டங். ததா² ஹி வேரஞ்ஜஸுத்தே (அ॰ நி॰ 8.11) ப⁴க³வா வேரஞ்ஜப்³ராஹ்மணஸ்ஸ அத்தனோ அதி⁴க³மங் த³ஸ்ஸெந்தோ விஜ்ஜத்தயமேவ தே³ஸேஸி, ந தி³ப்³ப³ஸோதஞாணாதீ³னங் அபா⁴வதோ. ஏவங் தேஸம்பி பி⁴க்கூ²னங் விஜ்ஜமானானிபி தி³ப்³ப³ஸோதஞாணாதீ³னி ந உத்³த⁴டானி. ச²ளபி⁴ஞ்ஞா ஹி தே பி⁴க்கூ². ஏவஞ்ச கத்வா ‘‘வக்³கு³முதா³ய நதி³யா தீரே அந்தரஹிதா மஹாவனே கூடாகா³ரஸாலாயங் ப⁴க³வதோ ஸம்முகே² பாதுரஹேஸு’’ந்தி தேஸங் பி⁴க்கூ²னங் இத்³தி⁴வளஞ்ஜனங் வக்க²தி.
Tenevantaravassenāti tasmiṃyeva antaravasse mahāpavāraṇaṃ anatikkamitvāva. Sabbeva tisso vijjā sacchākaṃsūti sabbeyeva te pañcasatā bhikkhū pubbenivāsānussatiñāṇaṃ dibbacakkhuñāṇaṃ āsavakkhayañāṇanti imā tisso pubbenivutthakkhandhappaṭicchādakamohakkhandhādīnaṃ vinivijjhanaṭṭhena vijjā attapaccakkhā akaṃsu. Lokiyābhiññāsu imāyeva dve abhiññā āsavakkhayañāṇassa bahūpakārā, na tathā dibbasotacetopariyaiddhividhañāṇānīti dassanatthaṃ vijjattayamevettha tesaṃ bhikkhūnaṃ adhigamadassanavasena uddhaṭaṃ. Tathā hi verañjasutte (a. ni. 8.11) bhagavā verañjabrāhmaṇassa attano adhigamaṃ dassento vijjattayameva desesi, na dibbasotañāṇādīnaṃ abhāvato. Evaṃ tesampi bhikkhūnaṃ vijjamānānipi dibbasotañāṇādīni na uddhaṭāni. Chaḷabhiññā hi te bhikkhū. Evañca katvā ‘‘vaggumudāya nadiyā tīre antarahitā mahāvane kūṭāgārasālāyaṃ bhagavato sammukhe pāturahesu’’nti tesaṃ bhikkhūnaṃ iddhivaḷañjanaṃ vakkhati.
யதா²பி⁴ரந்தந்தி யதா²பி⁴ரதிங் யதா²ஜ்ஜா²ஸயங். பு³த்³தா⁴னஞ்ஹி ஏகஸ்மிங் டா²னே வஸந்தானங் சா²யூத³கவிபத்திங் வா அபா²ஸுகஸேனாஸனங் வா மனுஸ்ஸானங் அஸ்ஸத்³தா⁴தி³பா⁴வங் வா ஆக³ம்ம அனபி⁴ரதி நாம நத்தி², தேஸங் ஸம்பத்தியா ‘‘பா²ஸுங் விஹராமா’’தி சிரவிஹாரோபி நத்தி². யத்த² பன ப⁴க³வதி விஹரந்தே மனுஸ்ஸா ஸரணேஸு வா பதிட்ட²ஹந்தி, ஸீலானி வா ஸமாதி³யந்தி பப்³ப³ஜந்தி, ஸோதாபத்திமக்³கா³தீ³னி வா பாபுணந்தி, ஸத்தா² தாஸு ஸம்பத்தீஸு தேஸங் பதிட்டா²பனத்த²ங் வஸதி, தத³பா⁴வே பக்கமதி. ததா³ ஹி ஸாவத்தி²யங் கத்தப்³ப³பு³த்³த⁴கிச்சங் நாஹோஸி. தேன வுத்தங் – ‘‘அத² கோ² ப⁴க³வா ஸாவத்தி²யங் யதா²பி⁴ரந்தங் விஹரித்வா யேன வேஸாலீ தேன சாரிகங் பக்காமீ’’தி.
Yathābhirantanti yathābhiratiṃ yathājjhāsayaṃ. Buddhānañhi ekasmiṃ ṭhāne vasantānaṃ chāyūdakavipattiṃ vā aphāsukasenāsanaṃ vā manussānaṃ assaddhādibhāvaṃ vā āgamma anabhirati nāma natthi, tesaṃ sampattiyā ‘‘phāsuṃ viharāmā’’ti ciravihāropi natthi. Yattha pana bhagavati viharante manussā saraṇesu vā patiṭṭhahanti, sīlāni vā samādiyanti pabbajanti, sotāpattimaggādīni vā pāpuṇanti, satthā tāsu sampattīsu tesaṃ patiṭṭhāpanatthaṃ vasati, tadabhāve pakkamati. Tadā hi sāvatthiyaṃ kattabbabuddhakiccaṃ nāhosi. Tena vuttaṃ – ‘‘atha kho bhagavā sāvatthiyaṃ yathābhirantaṃ viharitvā yena vesālī tena cārikaṃ pakkāmī’’ti.
சாரிகங் சரமானோதி அத்³தா⁴னக³மனங் க³ச்ச²ந்தோ. சாரிகா ச நாமேஸா ப⁴க³வதோ து³விதா⁴ துரிதசாரிகா அதுரிதசாரிகாதி. தத்த² தூ³ரேபி போ³த⁴னெய்யபுக்³க³லங் தி³ஸ்வா தஸ்ஸ போ³த⁴னத்த²ங் ஸஹஸா க³மனங் துரிதசாரிகா நாம, ஸா மஹாகஸ்ஸபபச்சுக்³க³மனாதீ³ஸு த³ட்ட²ப்³பா³. யா பன கா³மனிக³மராஜதா⁴னீபடிபாடியா தே³வஸிகங் யோஜனத்³த⁴யோஜனவஸேன பிண்ட³பாதசரியாதீ³ஹி லோகங் அனுக்³க³ண்ஹந்தோ க³ச்ச²தி, அயங் அதுரிதசாரிகா நாம, அயமேவ இதா⁴தி⁴ப்பேதா. தத³வஸரீதி தேன அவஸரி, தங் வா அவஸரி, தத்த² அவஸரி , பாவிஸீதி அத்தோ².
Cārikaṃ caramānoti addhānagamanaṃ gacchanto. Cārikā ca nāmesā bhagavato duvidhā turitacārikā aturitacārikāti. Tattha dūrepi bodhaneyyapuggalaṃ disvā tassa bodhanatthaṃ sahasā gamanaṃ turitacārikā nāma, sā mahākassapapaccuggamanādīsu daṭṭhabbā. Yā pana gāmanigamarājadhānīpaṭipāṭiyā devasikaṃ yojanaddhayojanavasena piṇḍapātacariyādīhi lokaṃ anuggaṇhanto gacchati, ayaṃ aturitacārikā nāma, ayameva idhādhippetā. Tadavasarīti tena avasari, taṃ vā avasari, tattha avasari , pāvisīti attho.
தத்ராதி தஸ்ஸங். ஸுத³ந்தி நிபாதமத்தங். வேஸாலியந்தி திக்க²த்துங் விஸாலீபூ⁴தத்தா ‘‘வேஸாலீ’’தி லத்³த⁴னாமே லிச்ச²விராஜூனங் நக³ரே. மஹாவனேதி மஹாவனங் நாம ஸயங்ஜாதங் அரோபிமங் ஸபரிச்சே²த³ங் மஹந்தங் வனங். கபிலவத்து²ஸாமந்தா பன மஹாவனங் ஹிமவந்தேன ஸஹ ஏகாப³த்³த⁴ங் அபரிச்சே²த³ங் ஹுத்வா மஹாஸமுத்³த³ங் ஆஹச்ச டி²தங். இத³ங் தாதி³ஸங் ந ஹோதி, ஸபரிச்சே²த³ங் மஹந்தங் வனந்தி மஹாவனங். கூடாகா³ரஸாலாயந்தி தஸ்மிங் மஹாவனே ப⁴க³வந்தங் உத்³தி³ஸ்ஸ கதே ஆராமே கூடாகா³ரங் அந்தோ கத்வா ஹங்ஸவட்டகச்ச²ன்னேன கதா ஸப்³பா³காரஸம்பன்னா பு³த்³த⁴ஸ்ஸ ப⁴க³வதோ க³ந்த⁴குடி கூடாகா³ரஸாலா நாம , தஸ்ஸங் கூடாகா³ரஸாலாயங். வக்³கு³முதா³தீரியானந்தி வக்³கு³முதா³தீரவாஸீனங். சேதஸா சேதோ பரிச்ச மனஸி கரித்வாதி அத்தனோ சித்தேன தேஸங் சித்தங் பரிச்சி²ஜ்ஜ மனஸி கரித்வா, சேதோபரியஞாணேன வா ஸப்³ப³ஞ்ஞுதஞ்ஞாணேன வா தேஹி அதி⁴க³தவிஸேஸங் ஜானித்வாதி அத்தோ².
Tatrāti tassaṃ. Sudanti nipātamattaṃ. Vesāliyanti tikkhattuṃ visālībhūtattā ‘‘vesālī’’ti laddhanāme licchavirājūnaṃ nagare. Mahāvaneti mahāvanaṃ nāma sayaṃjātaṃ aropimaṃ saparicchedaṃ mahantaṃ vanaṃ. Kapilavatthusāmantā pana mahāvanaṃ himavantena saha ekābaddhaṃ aparicchedaṃ hutvā mahāsamuddaṃ āhacca ṭhitaṃ. Idaṃ tādisaṃ na hoti, saparicchedaṃ mahantaṃ vananti mahāvanaṃ. Kūṭāgārasālāyanti tasmiṃ mahāvane bhagavantaṃ uddissa kate ārāme kūṭāgāraṃ anto katvā haṃsavaṭṭakacchannena katā sabbākārasampannā buddhassa bhagavato gandhakuṭi kūṭāgārasālā nāma , tassaṃ kūṭāgārasālāyaṃ. Vaggumudātīriyānanti vaggumudātīravāsīnaṃ. Cetasā ceto paricca manasi karitvāti attano cittena tesaṃ cittaṃ paricchijja manasi karitvā, cetopariyañāṇena vā sabbaññutaññāṇena vā tehi adhigatavisesaṃ jānitvāti attho.
ஆலோகஜாதா வியாதி ஸஞ்ஜாதாலோகா விய. இதரங் தஸ்ஸேவ வேவசனங், சந்த³ஸஹஸ்ஸஸூரியஸஹஸ்ஸேஹி ஓபா⁴ஸிதா வியாதி அத்தோ². யஸ்மா தே யஸோஜப்பமுகா² பஞ்சஸதா பி⁴க்கூ² ஸப்³ப³ஸோ அவிஜ்ஜந்த⁴காரவித⁴மனேன ஆலோகபூ⁴தா ஓபா⁴ஸபூ⁴தா ஹுத்வா விஹரந்தி, தஸ்மா ப⁴க³வா தேஹி டி²ததி³ஸாய ‘‘ஆலோகஜாதா விய மே, ஆனந்த³, ஏஸா தி³ஸா’’திஆதி³னா வண்ணப⁴ணனாபதே³ஸேன தே பி⁴க்கூ² பஸங்ஸதி. தேன வுத்தங் – ‘‘யஸ்ஸங் தி³ஸாயங் வக்³கு³முதா³தீரியா பி⁴க்கூ² விஹரந்தீ’’தி. அப்படிகூலாதி ந படிகூலா, மனாபா மனோஹராதி அத்தோ². யஸ்மிஞ்ஹி பதே³ஸே ஸீலாதி³கு³ணஸம்பன்னா மஹேஸினோ விஹரந்தி, தங் கிஞ்சாபி உக்கூலவிகூலவிஸமது³க்³கா³காரங், அத² கோ² மனுஞ்ஞங் ரமணீயமேவ. வுத்தஞ்ஹேதங் –
Ālokajātāviyāti sañjātālokā viya. Itaraṃ tasseva vevacanaṃ, candasahassasūriyasahassehi obhāsitā viyāti attho. Yasmā te yasojappamukhā pañcasatā bhikkhū sabbaso avijjandhakāravidhamanena ālokabhūtā obhāsabhūtā hutvā viharanti, tasmā bhagavā tehi ṭhitadisāya ‘‘ālokajātā viya me, ānanda, esā disā’’tiādinā vaṇṇabhaṇanāpadesena te bhikkhū pasaṃsati. Tena vuttaṃ – ‘‘yassaṃ disāyaṃ vaggumudātīriyā bhikkhū viharantī’’ti. Appaṭikūlāti na paṭikūlā, manāpā manoharāti attho. Yasmiñhi padese sīlādiguṇasampannā mahesino viharanti, taṃ kiñcāpi ukkūlavikūlavisamaduggākāraṃ, atha kho manuññaṃ ramaṇīyameva. Vuttañhetaṃ –
‘‘கா³மே வா யதி³ வாரஞ்ஞே, நின்னே வா யதி³ வா த²லே;
‘‘Gāme vā yadi vāraññe, ninne vā yadi vā thale;
யத்த² அரஹந்தோ விஹரந்தி, தங் பூ⁴மிராமணெய்யக’’ந்தி. (த⁴॰ ப॰ 98);
Yattha arahanto viharanti, taṃ bhūmirāmaṇeyyaka’’nti. (dha. pa. 98);
பஹிணெய்யாஸீதி பேஸெய்யாஸி. ஸத்தா² ஆயஸ்மந்தானங் த³ஸ்ஸனகாமோதி தேஸங் பி⁴க்கூ²னங் ஸந்திகே பஹேணாகாரத³ஸ்ஸனங். இதி ப⁴க³வா யத³த்த²ங் தே பி⁴க்கூ² பணாமேஸி, தமத்த²ங் மத்த²கப்பத்தங் தி³ஸ்வா ஆரத்³த⁴சித்தோ தேஸங் த³ஸ்ஸனகாமதங் தே²ரஸ்ஸ ஆரோசேஸி. ஏவங் கிரஸ்ஸ அஹோஸி ‘‘அஹங் இமே உச்சாஸத்³த³மஹாஸத்³த³கரணே பணாமெஸ்ஸாமி, அத² தே ப⁴த்³ரோ அஸ்ஸாஜானீயோ விய கஸாபி⁴கா⁴தேன, தேன சோதி³தா ஸங்வேக³ப்பத்தா மமாராத⁴னத்த²ங் அரஞ்ஞங் பவிஸித்வா க⁴டெந்தா வாயமந்தா கி²ப்பமேவ அரஹத்தங் ஸச்சி²கரிஸ்ஸந்தீ’’தி. இதா³னி தே அக்³க³ப²லப்பத்தே தி³ஸ்வா தாய அரஹத்தப்பத்தியா ஆராதி⁴தசித்தோ தேஸங் த³ஸ்ஸனகாமோ ஹுத்வா ஏவங் த⁴ம்மப⁴ண்டா³கா³ரிகங் ஆணாபேஸி.
Pahiṇeyyāsīti peseyyāsi. Satthā āyasmantānaṃ dassanakāmoti tesaṃ bhikkhūnaṃ santike paheṇākāradassanaṃ. Iti bhagavā yadatthaṃ te bhikkhū paṇāmesi, tamatthaṃ matthakappattaṃ disvā āraddhacitto tesaṃ dassanakāmataṃ therassa ārocesi. Evaṃ kirassa ahosi ‘‘ahaṃ ime uccāsaddamahāsaddakaraṇe paṇāmessāmi, atha te bhadro assājānīyo viya kasābhighātena, tena coditā saṃvegappattā mamārādhanatthaṃ araññaṃ pavisitvā ghaṭentā vāyamantā khippameva arahattaṃ sacchikarissantī’’ti. Idāni te aggaphalappatte disvā tāya arahattappattiyā ārādhitacitto tesaṃ dassanakāmo hutvā evaṃ dhammabhaṇḍāgārikaṃ āṇāpesi.
ஸோ பி⁴க்கூ²தி ஆனந்த³த்தே²ரேன ததா² ஆணத்தோ ச²ளபி⁴ஞ்ஞோ ஏகோ பி⁴க்கு². பமுகே²தி ஸம்முகே². ஆனேஞ்ஜஸமாதி⁴னாதி சதுத்த²ஜ்ஜா²னபாத³கேன அக்³க³ப²லஸமாதி⁴னா, ‘‘அரூபஜ்ஜா²னபாத³கேனா’’திபி வத³ந்தி. ‘‘ஆனேஞ்ஜேன ஸமாதி⁴னா’’திபி பாடோ². கஸ்மா பன ப⁴க³வா தேஸங் பி⁴க்கூ²னங் ஆக³மனங் ஜானந்தோ படிஸந்தா²ரங் அகத்வா ஸமாபத்திங்யேவ ஸமாபஜ்ஜி? தேஸங் அத்தனா ஸமாபன்னஸமாபத்திங் ஜானித்வா ஸமாபஜ்ஜனத்த²ங், தேஸங் புப்³பே³ பணாமிதானங் இதா³னி அத்தனா ஸமானஸம்போ⁴க³த³ஸ்ஸனத்த²ங், ஆனுபா⁴வதீ³பனத்த²ங், வினா வசீபே⁴தே³ன அஞ்ஞப்³யாகரணதீ³பனத்த²ஞ்ச. அபரே பனாஹு ‘‘புப்³பே³ பணாமிதானங் இதா³னி அத்தனோ ஸந்திகங் ஆக³தானங் அனுத்தரஸுகு²ப்பாத³னேன அனஞ்ஞஸாதா⁴ரணபடிஸந்தா²ரகரணத்த²’’ந்தி. தேபி ஆயஸ்மந்தோ ப⁴க³வதோ அஜ்ஜா²ஸயங் ஞத்வா தங்யேவ ஸமாபத்திங் ஸமாபஜ்ஜிங்ஸு. தேன வுத்தங் – ‘‘கதமேன நு கோ² ப⁴க³வா விஹாரேன ஏதரஹி விஹரதீ’’திஆதி³.
So bhikkhūti ānandattherena tathā āṇatto chaḷabhiñño eko bhikkhu. Pamukheti sammukhe. Āneñjasamādhināti catutthajjhānapādakena aggaphalasamādhinā, ‘‘arūpajjhānapādakenā’’tipi vadanti. ‘‘Āneñjena samādhinā’’tipi pāṭho. Kasmā pana bhagavā tesaṃ bhikkhūnaṃ āgamanaṃ jānanto paṭisanthāraṃ akatvā samāpattiṃyeva samāpajji? Tesaṃ attanā samāpannasamāpattiṃ jānitvā samāpajjanatthaṃ, tesaṃ pubbe paṇāmitānaṃ idāni attanā samānasambhogadassanatthaṃ, ānubhāvadīpanatthaṃ, vinā vacībhedena aññabyākaraṇadīpanatthañca. Apare panāhu ‘‘pubbe paṇāmitānaṃ idāni attano santikaṃ āgatānaṃ anuttarasukhuppādanena anaññasādhāraṇapaṭisanthārakaraṇattha’’nti. Tepi āyasmanto bhagavato ajjhāsayaṃ ñatvā taṃyeva samāpattiṃ samāpajjiṃsu. Tena vuttaṃ – ‘‘katamena nu kho bhagavā vihārena etarahi viharatī’’tiādi.
எத்த² ச ரூபாவசரசதுத்த²ஜ்ஜா²னங் கோஸஜ்ஜாதீ³னங் பாரிபந்திகத⁴ம்மானங் ஸுவிதூ³ரபா⁴வதோ இத்³தி⁴யா மூலபூ⁴தேஹி அனோணமனாதீ³ஹி ஸோளஸஹி வோதா³னத⁴ம்மேஹி ஸமன்னாக³மனதோ ஆனேஞ்ஜப்பத்தங் ஸயங் அனிஞ்ஜனட்டே²ன ஆனேஞ்ஜந்தி வுச்சதி. வுத்தஞ்ஹேதங் –
Ettha ca rūpāvacaracatutthajjhānaṃ kosajjādīnaṃ pāripantikadhammānaṃ suvidūrabhāvato iddhiyā mūlabhūtehi anoṇamanādīhi soḷasahi vodānadhammehi samannāgamanato āneñjappattaṃ sayaṃ aniñjanaṭṭhena āneñjanti vuccati. Vuttañhetaṃ –
‘‘அனோணதங் சித்தங் கோஸஜ்ஜே ந இஞ்ஜதீதி ஆனேஞ்ஜங். அனுண்ணதங் சித்தங் உத்³த⁴ச்சே ந இஞ்ஜதீதி ஆனேஞ்ஜங். அனபி⁴ரதங் சித்தங் ராகே³ ந இஞ்ஜதீதி ஆனேஞ்ஜங். அனபனதங் சித்தங் ப்³யாபாதே³ ந இஞ்ஜதீதி ஆனேஞ்ஜங். அனிஸ்ஸிதங் சித்தங் தி³ட்டி²யா ந இஞ்ஜதீதி ஆனேஞ்ஜங். அப்படிப³த்³த⁴ங் சித்தங் ச²ந்த³ராகே³ ந இஞ்ஜதீதி ஆனேஞ்ஜங். விப்பமுத்தங் சித்தங் காமராகே³ ந இஞ்ஜதீதி ஆனேஞ்ஜங். விஸங்யுத்தங் சித்தங் கிலேஸே ந இஞ்ஜதீதி ஆனேஞ்ஜங். விமரியாதி³கதங் சித்தங் கிலேஸமரியாதா³ய ந இஞ்ஜதீதி ஆனேஞ்ஜங். ஏகத்தக³தங் சித்தங் நானத்தகிலேஸே ந இஞ்ஜதீதி ஆனேஞ்ஜங். ஸத்³தா⁴ய பரிக்³க³ஹிதங் சித்தங் அஸ்ஸத்³தி⁴யே ந இஞ்ஜதீதி ஆனேஞ்ஜங். வீரியேன பரிக்³க³ஹிதங் சித்தங் கோஸஜ்ஜே ந இஞ்ஜதீதி ஆனேஞ்ஜங். ஸதியா பரிக்³க³ஹிதங் சித்தங் பமாதே³ ந இஞ்ஜதீதி ஆனேஞ்ஜங். ஸமாதி⁴னா பரிக்³க³ஹிதங் சித்தங் உத்³த⁴ச்சே ந இஞ்ஜதீதி ஆனேஞ்ஜங். பஞ்ஞாய பரிக்³க³ஹிதங் சித்தங் அவிஜ்ஜாய ந இஞ்ஜதீதி ஆனேஞ்ஜங். ஓபா⁴ஸக³தங் சித்தங் அவிஜ்ஜந்த⁴காரே ந இஞ்ஜதீதி ஆனேஞ்ஜ’’ந்தி.
‘‘Anoṇataṃ cittaṃ kosajje na iñjatīti āneñjaṃ. Anuṇṇataṃ cittaṃ uddhacce na iñjatīti āneñjaṃ. Anabhirataṃ cittaṃ rāge na iñjatīti āneñjaṃ. Anapanataṃ cittaṃ byāpāde na iñjatīti āneñjaṃ. Anissitaṃ cittaṃ diṭṭhiyā na iñjatīti āneñjaṃ. Appaṭibaddhaṃ cittaṃ chandarāge na iñjatīti āneñjaṃ. Vippamuttaṃ cittaṃ kāmarāge na iñjatīti āneñjaṃ. Visaṃyuttaṃ cittaṃ kilese na iñjatīti āneñjaṃ. Vimariyādikataṃ cittaṃ kilesamariyādāya na iñjatīti āneñjaṃ. Ekattagataṃ cittaṃ nānattakilese na iñjatīti āneñjaṃ. Saddhāya pariggahitaṃ cittaṃ assaddhiye na iñjatīti āneñjaṃ. Vīriyena pariggahitaṃ cittaṃ kosajje na iñjatīti āneñjaṃ. Satiyā pariggahitaṃ cittaṃ pamāde na iñjatīti āneñjaṃ. Samādhinā pariggahitaṃ cittaṃ uddhacce na iñjatīti āneñjaṃ. Paññāya pariggahitaṃ cittaṃ avijjāya na iñjatīti āneñjaṃ. Obhāsagataṃ cittaṃ avijjandhakāre na iñjatīti āneñja’’nti.
ரூபாவசரசதுத்த²ஜ்ஜா²னமேவ ச ரூபவிராக³பா⁴வனாவஸேன பவத்திதங், ஆரம்மணவிபா⁴கே³ன சதுப்³பி³த⁴ங் அரூபாவசரஜ்ஜா²னந்தி ஏதேஸங் பஞ்சன்னங் ஜா²னானங் ஆனேஞ்ஜவோஹாரோ. தேஸங் யங் கிஞ்சி பாத³கங் கத்வா ஸமாபன்னா அரஹத்தப²லஸமாபத்தி ஆனேஞ்ஜஸமாதீ⁴தி போராணா.
Rūpāvacaracatutthajjhānameva ca rūpavirāgabhāvanāvasena pavattitaṃ, ārammaṇavibhāgena catubbidhaṃ arūpāvacarajjhānanti etesaṃ pañcannaṃ jhānānaṃ āneñjavohāro. Tesaṃ yaṃ kiñci pādakaṃ katvā samāpannā arahattaphalasamāpatti āneñjasamādhīti porāṇā.
அபி⁴க்கந்தாயாதி அதீதாய. நிக்க²ந்தேதி நிக்³க³தே, அபக³தேதி அத்தோ². துண்ஹீ அஹோஸீதி ப⁴க³வா அரியேன துண்ஹீபா⁴வேன துண்ஹீ அஹோஸி. உத்³த⁴ஸ்தே அருணேதி உக்³க³தே அருணே, அருணோ நாம புரத்தி²மதி³ஸாய ஸூரியோத³யதோ புரேதரமேவ உட்டி²தோபா⁴ஸோ. நந்தி³முகி²யாதி ரத்தியா அருணஸ்ஸ உக்³க³தத்தா ஏவ அருணப்பபா⁴ய ஸூரியாலோகூபஜீவினோ ஸத்தே நந்தா³பனமுகி²யா விய ரத்தியா ஜாதாய, விபா⁴யமானாயாதி அத்தோ².
Abhikkantāyāti atītāya. Nikkhanteti niggate, apagateti attho. Tuṇhī ahosīti bhagavā ariyena tuṇhībhāvena tuṇhī ahosi. Uddhaste aruṇeti uggate aruṇe, aruṇo nāma puratthimadisāya sūriyodayato puretarameva uṭṭhitobhāso. Nandimukhiyāti rattiyā aruṇassa uggatattā eva aruṇappabhāya sūriyālokūpajīvino satte nandāpanamukhiyā viya rattiyā jātāya, vibhāyamānāyāti attho.
தம்ஹா ஸமாதி⁴ம்ஹா வுட்ட²ஹித்வாதி யதா²பரிச்சே²த³ங் ததோ ஆனேஞ்ஜஸமாதி⁴தோ அரஹத்தப²லஸமாபத்திதோ உட்டா²ய. ஸசே கோ² த்வங், ஆனந்த³, ஜானெய்யாஸீதி ப⁴க³வா ‘‘இமே ச பி⁴க்கூ² எத்தகங் காலங் இமினா நாம ஸமாபத்திஸுகே²ன வீதினாமெந்தீ’’தி, ஆனந்த³, யதி³ த்வங் ஜானெய்யாஸி. எத்தகம்பி தே நப்படிபா⁴ஸெய்யாதி லோகியபடிஸம்மோத³னங் ஸந்தா⁴ய யதி³த³ங் தே ‘‘அபி⁴க்கந்தா, ப⁴ந்தே, ரத்தீ’’திஆதி³னா திக்க²த்துங் படிபா⁴னங் உபட்டி²தங், தயித³ங் எத்தகம்பி தே ந உபட்ட²ஹெய்ய. யஸ்மா ச கோ² த்வங், ஆனந்த³, ஸெக்கோ² அஸெக்க²ங் ஸமாபத்திவிஹாரங் ந ஜானாஸி, தஸ்மா மங் இமேஸங் பி⁴க்கூ²னங் லோகியபடிஸம்மோத³னங் காரேதுங் உஸ்ஸுக்கங் ஆபஜ்ஜி. அஹங் பன இமேஹி பி⁴க்கூ²ஹி ஸத்³தி⁴ங் லோகுத்தரபடிஸம்மோத³னேனேவ தியாமரத்திங் வீதினாமேஸிந்தி த³ஸ்ஸெந்தோ ப⁴க³வா ஆஹ – ‘‘அஹஞ்ச, ஆனந்த³, இமானி ச பஞ்ச பி⁴க்கு²ஸதானி ஸப்³பே³வ ஆனேஞ்ஜஸமாதி⁴னா நிஸீதி³ம்ஹா’’தி.
Tamhā samādhimhā vuṭṭhahitvāti yathāparicchedaṃ tato āneñjasamādhito arahattaphalasamāpattito uṭṭhāya. Sace kho tvaṃ, ānanda, jāneyyāsīti bhagavā ‘‘ime ca bhikkhū ettakaṃ kālaṃ iminā nāma samāpattisukhena vītināmentī’’ti, ānanda, yadi tvaṃ jāneyyāsi. Ettakampi te nappaṭibhāseyyāti lokiyapaṭisammodanaṃ sandhāya yadidaṃ te ‘‘abhikkantā, bhante, rattī’’tiādinā tikkhattuṃ paṭibhānaṃ upaṭṭhitaṃ, tayidaṃ ettakampi te na upaṭṭhaheyya. Yasmā ca kho tvaṃ, ānanda, sekkho asekkhaṃ samāpattivihāraṃ na jānāsi, tasmā maṃ imesaṃ bhikkhūnaṃ lokiyapaṭisammodanaṃ kāretuṃ ussukkaṃ āpajji. Ahaṃ pana imehi bhikkhūhi saddhiṃ lokuttarapaṭisammodaneneva tiyāmarattiṃ vītināmesinti dassento bhagavā āha – ‘‘ahañca, ānanda, imāni ca pañca bhikkhusatāni sabbeva āneñjasamādhinā nisīdimhā’’ti.
ஏதமத்த²ங் விதி³த்வாதி ஏதங் தேஸங் பி⁴க்கூ²னங் அத்தனா ஸமங் ஆனேஞ்ஜஸமாதி⁴ஸமாபஜ்ஜனஸமத்த²தாஸங்கா²தங் வஸீபா⁴வத்த²ங் ஸப்³பா³காரதோ விதி³த்வா. இமங் உதா³னந்தி இமங் தேஸங் பி⁴க்கூ²னங் அனவஸேஸராகா³தி³ப்பஹானஸங்ஸித்³தி⁴தாதி³ஸபா⁴வதீ³பனங் உதா³னங் உதா³னேஸி.
Etamatthaṃ viditvāti etaṃ tesaṃ bhikkhūnaṃ attanā samaṃ āneñjasamādhisamāpajjanasamatthatāsaṅkhātaṃ vasībhāvatthaṃ sabbākārato viditvā. Imaṃ udānanti imaṃ tesaṃ bhikkhūnaṃ anavasesarāgādippahānasaṃsiddhitādisabhāvadīpanaṃ udānaṃ udānesi.
தத்த² யஸ்ஸ ஜிதோ காமகண்ட³கோதி குஸலபக்க²விஜ்ஜ²னட்டே²ன கண்ட³கபூ⁴தோ கிலேஸகாமோ யேன அரியபுக்³க³லேன அனவஸேஸங் ஜிதோ பஹீனோ, ஏதேனஸ்ஸ அனுனயாபா⁴வங் த³ஸ்ஸேதி. ‘‘கா³மகண்டகோ’’திபி பாடோ². தஸ்ஸத்தோ² – கா³மே கண்டகோ கண்டகட்டா²னியோ ஸகலோ வத்து²காமோ யஸ்ஸ ஜிதோதி. ஜயோ சஸ்ஸ தப்படிப³த்³த⁴ச²ந்த³ராக³ப்பஹானேனேவ வேதி³தப்³போ³, தேன தேஸங் அனாகா³மிமக்³கோ³ வுத்தோ ஹோதி . அக்கோஸோ ச ஜிதோதி ஸம்ப³ந்தோ⁴. வதோ⁴ ச ப³ந்த⁴னஞ்சாதி எத்தா²பி ஏஸேவ நயோ. தேஸு அக்கோஸஜயேன வசீது³ச்சரிதாபா⁴வோ, இதரேன காயது³ச்சரிதாபா⁴வோ த³ஸ்ஸிதோ. தேன தங்னிமித்தகஸ்ஸ ப்³யாபாத³ஸ்ஸ அனவஸேஸப்பஹானேன ததியமக்³கோ³ வுத்தோ ஹோதி. அத² வா அக்கோஸாதி³ஜயவசனேன ததியமக்³கோ³ வுத்தோ ஹோதி, அக்கோஸாதீ³னங் அச்சந்தக²மனங் தத்த² பகாஸிதங் ஹோதி, உப⁴யதா²பி நேஸங் விரோதா⁴பா⁴வங் த³ஸ்ஸேதி. பப்³ப³தோ விய ஸோ டி²தோ அனேஜோதி ஏஜா வுச்சதி சலனகிலேஸபரிபந்தோ², ஏஜாஹேதூனங் அவஸேஸகிலேஸானங் அபா⁴வேன அனேஜோ, அனேஜத்தாயேவ ஸப்³ப³கிலேஸேஹி பரவாத³வாதேஹி ச அகம்பனீயத்தா டி²தோ ஏகக்³க⁴னபப்³ப³தஸதி³ஸோ. ஸுக²து³க்கே²ஸு ந வேத⁴தி ஸ பி⁴க்கூ²தி ஸோ பி⁴ன்னகிலேஸோ பி⁴க்கு² ஸுக²து³க்க²னிமித்தங் ந கம்பதீதி ஹெட்டா² வுத்தனயேனேவ அத்தோ² வேதி³தப்³போ³. இதி ப⁴க³வா தேஸங் பஞ்சஸதானங் பி⁴க்கூ²னங் அரஹத்தாதி⁴க³மேன தாதி³பா⁴வப்பத்திங் ஏகஜ்ஜ²ங் கத்வா ஏகபுக்³க³லாதி⁴ட்டா²னங் உதா³னங் உதா³னேஸீதி.
Tattha yassa jito kāmakaṇḍakoti kusalapakkhavijjhanaṭṭhena kaṇḍakabhūto kilesakāmo yena ariyapuggalena anavasesaṃ jito pahīno, etenassa anunayābhāvaṃ dasseti. ‘‘Gāmakaṇṭako’’tipi pāṭho. Tassattho – gāme kaṇṭako kaṇṭakaṭṭhāniyo sakalo vatthukāmo yassa jitoti. Jayo cassa tappaṭibaddhachandarāgappahāneneva veditabbo, tena tesaṃ anāgāmimaggo vutto hoti . Akkoso ca jitoti sambandho. Vadho ca bandhanañcāti etthāpi eseva nayo. Tesu akkosajayena vacīduccaritābhāvo, itarena kāyaduccaritābhāvo dassito. Tena taṃnimittakassa byāpādassa anavasesappahānena tatiyamaggo vutto hoti. Atha vā akkosādijayavacanena tatiyamaggo vutto hoti, akkosādīnaṃ accantakhamanaṃ tattha pakāsitaṃ hoti, ubhayathāpi nesaṃ virodhābhāvaṃ dasseti. Pabbatoviya so ṭhito anejoti ejā vuccati calanakilesaparipantho, ejāhetūnaṃ avasesakilesānaṃ abhāvena anejo, anejattāyeva sabbakilesehi paravādavātehi ca akampanīyattā ṭhito ekagghanapabbatasadiso. Sukhadukkhesu na vedhati sa bhikkhūti so bhinnakileso bhikkhu sukhadukkhanimittaṃ na kampatīti heṭṭhā vuttanayeneva attho veditabbo. Iti bhagavā tesaṃ pañcasatānaṃ bhikkhūnaṃ arahattādhigamena tādibhāvappattiṃ ekajjhaṃ katvā ekapuggalādhiṭṭhānaṃ udānaṃ udānesīti.
ததியஸுத்தவண்ணனா நிட்டி²தா.
Tatiyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 3. யஸோஜஸுத்தங் • 3. Yasojasuttaṃ
