| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
4. யஸ்ஸங்தி³ஸங்ஸுத்தங்
4. Yassaṃdisaṃsuttaṃ
134. ‘‘பஞ்சஹி, பி⁴க்க²வே, அங்கே³ஹி ஸமன்னாக³தோ ராஜா க²த்தியோ முத்³தா⁴வஸித்தோ யஸ்ஸங் யஸ்ஸங் தி³ஸாயங் விஹரதி, ஸகஸ்மிங்யேவ விஜிதே விஹரதி.
134. ‘‘Pañcahi, bhikkhave, aṅgehi samannāgato rājā khattiyo muddhāvasitto yassaṃ yassaṃ disāyaṃ viharati, sakasmiṃyeva vijite viharati.
‘‘கதமேஹி பஞ்சஹி? இத⁴, பி⁴க்க²வே, ராஜா க²த்தியோ முத்³தா⁴வஸித்தோ உப⁴தோ ஸுஜாதோ ஹோதி மாதிதோ ச பிதிதோ ச, ஸங்ஸுத்³த⁴க³ஹணிகோ, யாவ ஸத்தமா பிதாமஹயுகா³ அக்கி²த்தோ அனுபக்குட்டோ² ஜாதிவாதே³ன; அட்³டோ⁴ ஹோதி மஹத்³த⁴னோ மஹாபோ⁴கோ³ பரிபுண்ணகோஸகொட்டா²கா³ரோ; ப³லவா கோ² பன ஹோதி சதுரங்கி³னியா ஸேனாய ஸமன்னாக³தோ அஸ்ஸவாய ஓவாத³படிகராய; பரிணாயகோ கோ² பனஸ்ஸ ஹோதி பண்டி³தோ வியத்தோ மேதா⁴வீ படிப³லோ அதீதானாக³தபச்சுப்பன்னே அத்தே² சிந்தேதுங்; தஸ்ஸிமே சத்தாரோ த⁴ம்மா யஸங் பரிபாசெந்தி. ஸோ இமினா யஸபஞ்சமேன 1 த⁴ம்மேன ஸமன்னாக³தோ யஸ்ஸங் யஸ்ஸங் தி³ஸாயங் விஹரதி, ஸகஸ்மிங்யேவ விஜிதே விஹரதி. தங் கிஸ்ஸ ஹேது? ஏவஞ்ஹேதங், பி⁴க்க²வே, ஹோதி விஜிதாவீனங்.
‘‘Katamehi pañcahi? Idha, bhikkhave, rājā khattiyo muddhāvasitto ubhato sujāto hoti mātito ca pitito ca, saṃsuddhagahaṇiko, yāva sattamā pitāmahayugā akkhitto anupakkuṭṭho jātivādena; aḍḍho hoti mahaddhano mahābhogo paripuṇṇakosakoṭṭhāgāro; balavā kho pana hoti caturaṅginiyā senāya samannāgato assavāya ovādapaṭikarāya; pariṇāyako kho panassa hoti paṇḍito viyatto medhāvī paṭibalo atītānāgatapaccuppanne atthe cintetuṃ; tassime cattāro dhammā yasaṃ paripācenti. So iminā yasapañcamena 2 dhammena samannāgato yassaṃ yassaṃ disāyaṃ viharati, sakasmiṃyeva vijite viharati. Taṃ kissa hetu? Evañhetaṃ, bhikkhave, hoti vijitāvīnaṃ.
‘‘ஏவமேவங் கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² யஸ்ஸங் யஸ்ஸங் தி³ஸாயங் விஹரதி, விமுத்தசித்தோவ 3 விஹரதி. கதமேஹி பஞ்சஹி? இத⁴, பி⁴க்க²வே, பி⁴க்கு² ஸீலவா ஹோதி, பாதிமொக்க²ஸங்வரஸங்வுதோ விஹரதி ஆசாரகோ³சரஸம்பன்னோ அணுமத்தேஸு வஜ்ஜேஸு ப⁴யத³ஸ்ஸாவீ, ஸமாதா³ய ஸிக்க²தி ஸிக்கா²பதே³ஸு – ராஜாவ க²த்தியோ முத்³தா⁴வஸித்தோ ஜாதிஸம்பன்னோ; ப³ஹுஸ்ஸுதோ ஹோதி ஸுதத⁴ரோ ஸுதஸன்னிசயோ, யே தே த⁴ம்மா ஆதி³கல்யாணா மஜ்ஜே²கல்யாணா பரியோஸானகல்யாணா ஸாத்த²ங் ஸப்³யஞ்ஜனங் கேவலபரிபுண்ணங் பரிஸுத்³த⁴ங் ப்³ரஹ்மசரியங் அபி⁴வத³ந்தி, ததா²ரூபாஸ்ஸ த⁴ம்மா ப³ஹுஸ்ஸுதா ஹொந்தி தா⁴தா வசஸா பரிசிதா மனஸானுபெக்கி²தா தி³ட்டி²யா ஸுப்படிவித்³தா⁴ – ராஜாவ க²த்தியோ முத்³தா⁴வஸித்தோ அட்³டோ⁴ மஹத்³த⁴னோ மஹாபோ⁴கோ³ பரிபுண்ணகோஸகொட்டா²கா³ரோ; ஆரத்³த⁴வீரியோ விஹரதி அகுஸலானங் த⁴ம்மானங் பஹானாய குஸலானங் த⁴ம்மானங் உபஸம்பதா³ய தா²மவா த³ள்ஹபரக்கமோ அனிக்கி²த்தது⁴ரோ குஸலேஸு த⁴ம்மேஸு – ராஜாவ க²த்தியோ முத்³தா⁴வஸித்தோ ப³லஸம்பன்னோ; பஞ்ஞவா ஹோதி உத³யத்த²கா³மினியா பஞ்ஞாய ஸமன்னாக³தோ அரியாய நிப்³பே³தி⁴காய ஸம்மா து³க்க²க்க²யகா³மினியா – ராஜாவ க²த்தியோ முத்³தா⁴வஸித்தோ பரிணாயகஸம்பன்னோ; தஸ்ஸிமே சத்தாரோ த⁴ம்மா விமுத்திங் பரிபாசெந்தி . ஸோ இமினா விமுத்திபஞ்சமேன த⁴ம்மேன ஸமன்னாக³தோ யஸ்ஸங் யஸ்ஸங் தி³ஸாயங் விஹரதி விமுத்தசித்தோவ விஹரதி. தங் கிஸ்ஸ ஹேது? ஏவஞ்ஹேதங், பி⁴க்க²வே, ஹோதி விமுத்தசித்தான’’ந்தி. சதுத்த²ங்.
‘‘Evamevaṃ kho, bhikkhave, pañcahi dhammehi samannāgato bhikkhu yassaṃ yassaṃ disāyaṃ viharati, vimuttacittova 4 viharati. Katamehi pañcahi? Idha, bhikkhave, bhikkhu sīlavā hoti, pātimokkhasaṃvarasaṃvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu – rājāva khattiyo muddhāvasitto jātisampanno; bahussuto hoti sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā – rājāva khattiyo muddhāvasitto aḍḍho mahaddhano mahābhogo paripuṇṇakosakoṭṭhāgāro; āraddhavīriyo viharati akusalānaṃ dhammānaṃ pahānāya kusalānaṃ dhammānaṃ upasampadāya thāmavā daḷhaparakkamo anikkhittadhuro kusalesu dhammesu – rājāva khattiyo muddhāvasitto balasampanno; paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā – rājāva khattiyo muddhāvasitto pariṇāyakasampanno; tassime cattāro dhammā vimuttiṃ paripācenti . So iminā vimuttipañcamena dhammena samannāgato yassaṃ yassaṃ disāyaṃ viharati vimuttacittova viharati. Taṃ kissa hetu? Evañhetaṃ, bhikkhave, hoti vimuttacittāna’’nti. Catutthaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4. யஸ்ஸங்தி³ஸங்ஸுத்தவண்ணனா • 4. Yassaṃdisaṃsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 4. யஸ்ஸங்தி³ஸங்ஸுத்தவண்ணனா • 4. Yassaṃdisaṃsuttavaṇṇanā
