| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
11. யவகலாபிஸுத்தவண்ணனா
11. Yavakalāpisuttavaṇṇanā
248. யவபுஞ்ஜோ ஸுபரிபக்கயவஸமுதா³யோ. காஜஹத்தா²தி த³ண்ட³ஹத்தா². போதெ²ய்யுந்தி யதா² யவஸங்கா²தங் த⁴ஞ்ஞங் வண்டதோ முச்சதி, ஏவங் போதெ²ய்யுங். யவே ஸாவெத்வாதி யவஸீஸதோ யவே போத²னேன மோசெத்வா விவேசெத்வா.
248.Yavapuñjo suparipakkayavasamudāyo. Kājahatthāti daṇḍahatthā. Potheyyunti yathā yavasaṅkhātaṃ dhaññaṃ vaṇṭato muccati, evaṃ potheyyuṃ. Yave sāvetvāti yavasīsato yave pothanena mocetvā vivecetvā.
சதுமஹாபதோ² விய ச² ஆயதனானி ஆரம்மணத³ண்ட³கேஹி ஹனநட்டா²னத்தா. யவகலாபீ விய ஸத்தோ தேஹி ஹஞ்ஞமானத்தா. ச² ப்³யாப⁴ங்கி³யோ விய ஸபா⁴வதோ ச²தா⁴பி பச்சேகங் இட்டா²னிட்ட²மஜ்ஜ²த்தவஸேன அட்டா²ரஸ ஆரம்மணானி யவகலாபட்டா²னியஸ்ஸ ஸத்தஸ்ஸ ஹனநதோ. ப⁴வபத்த²னாய அபராபருப்பத்திங் ஸந்தா⁴ய ‘‘ப⁴வபத்த²னா கிலேஸா’’தி ப³ஹுவசனநித்³தே³ஸோ. ப⁴வபத்த²னா ச தஸ்ஸ பச்சயபூ⁴தா கிலேஸா சாதி ப⁴வபத்த²னாகிலேஸாதி ஏவங் வா எத்த² அத்தோ² த³ட்ட²ப்³போ³. யஸ்மா ஸத்தானங் வட்டது³க்க²ங் நாம ஸப்³ப³ம்பி தங் ப⁴வபத்த²னாமூலகங், தஸ்மா வுத்தங் ‘‘ஏவங் ஸத்தா’’திஆதி³. ப⁴வபத்த²னகிலேஸாதி ச ப⁴வபத்த²னாமூலகங் கிலேஸங்.
Catumahāpatho viya cha āyatanāni ārammaṇadaṇḍakehi hananaṭṭhānattā. Yavakalāpī viya satto tehi haññamānattā. Cha byābhaṅgiyo viya sabhāvato chadhāpi paccekaṃ iṭṭhāniṭṭhamajjhattavasena aṭṭhārasa ārammaṇāni yavakalāpaṭṭhāniyassa sattassa hananato. Bhavapatthanāya aparāparuppattiṃ sandhāya ‘‘bhavapatthanā kilesā’’ti bahuvacananiddeso. Bhavapatthanā ca tassa paccayabhūtā kilesā cāti bhavapatthanākilesāti evaṃ vā ettha attho daṭṭhabbo. Yasmā sattānaṃ vaṭṭadukkhaṃ nāma sabbampi taṃ bhavapatthanāmūlakaṃ, tasmā vuttaṃ ‘‘evaṃ sattā’’tiādi. Bhavapatthanakilesāti ca bhavapatthanāmūlakaṃ kilesaṃ.
பு⁴ம்மந்தி ஸமீபத்தே² பு⁴ம்மங். தேனாஹ ‘‘ஸுத⁴ம்மாய த்³வாரே’’தி. ந கதந்தி து³க்கு²ப்பாத³னங் ந கதங். நவகூ³த²ஸூகரங் வியாதி நவகூ³த²ப⁴க்க²ஸூகரங் விய. சித்தேனேவாதி யோ ப³ஜ்ஜ²தி, தஸ்ஸ சித்தேனேவ . தஸ்மாதி யஸ்மா வேபசித்திப³ந்த⁴னஸ்ஸ ப³ந்த⁴னமுச்சனங் விய, தஸ்மா ‘‘வேபசித்திப³ந்த⁴ன’’ந்தி வுத்தங். ஞாணமொக்க²ங் ப³ந்த⁴னந்தி ஞாணேன முச்சனங் ப³ந்த⁴னங்.
Bhummanti samīpatthe bhummaṃ. Tenāha ‘‘sudhammāya dvāre’’ti. Na katanti dukkhuppādanaṃ na kataṃ. Navagūthasūkaraṃ viyāti navagūthabhakkhasūkaraṃ viya. Cittenevāti yo bajjhati, tassa citteneva . Tasmāti yasmā vepacittibandhanassa bandhanamuccanaṃ viya, tasmā ‘‘vepacittibandhana’’nti vuttaṃ. Ñāṇamokkhaṃ bandhananti ñāṇena muccanaṃ bandhanaṃ.
மஞ்ஞமானோதி பரிகப்பிததண்ஹாவஸேன ‘‘ஏதங் மமா’’தி, தி³ட்டி²வஸேன ‘‘ஏஸோ மே அத்தா’’தி, மானவஸேன ‘‘ஏஸோஹமஸ்மீ’’தி மஞ்ஞந்தோ. க²ந்த⁴வினிமுத்தஸ்ஸ மஞ்ஞமானவத்து²னோ அபா⁴வா ‘‘க²ந்தே⁴ மஞ்ஞந்தோ’’தி வுத்தங். ஏதந்தி ‘‘மாரஸ்ஸா’’தி ஏதங் ஸாமிவசனங். கிலேஸமாரேன ப³த்³தோ⁴தி கிலேஸமாரேன தேனேவ கிலேஸப³ந்த⁴னேன ப³த்³தோ⁴. முத்தோதி எத்தா²பி ஏஸேவ நயோ.
Maññamānoti parikappitataṇhāvasena ‘‘etaṃ mamā’’ti, diṭṭhivasena ‘‘eso me attā’’ti, mānavasena ‘‘esohamasmī’’ti maññanto. Khandhavinimuttassa maññamānavatthuno abhāvā ‘‘khandhe maññanto’’ti vuttaṃ. Etanti ‘‘mārassā’’ti etaṃ sāmivacanaṃ. Kilesamārena baddhoti kilesamārena teneva kilesabandhanena baddho. Muttoti etthāpi eseva nayo.
தண்ஹாமஞ்ஞனாய ஸதி தி³ட்டி²மானமஞ்ஞனானங் பஸங்கோ³ ஏவ நத்தீ²தி யதா² ‘‘அஸ்மீ’’தி பதே³ன தி³ட்டி²மானமஞ்ஞனா வுத்தா ஹொந்தி, ஏவங் தண்ஹாமஞ்ஞிதாபீதி வுத்தங் ‘‘அஸ்மீதி பதே³ன தண்ஹாமஞ்ஞிதங் வுத்த’’ந்தி. அயமஹமஸ்மீதி பதே³ன தி³ட்டி²மஞ்ஞிதந்தி ஏதரஹி லப்³ப⁴மானதி³ட்டி²வத்து²வஸேனேவ. ப⁴விஸ்ஸந்தி அனாக³ததி³ட்டி²வத்து²பரிகப்பனவஸேனேவ தி³ட்டி²மஞ்ஞிதங். யேபு⁴ய்யேன ஹி அனாக³தாலிங்க³னா ஸஸ்ஸததி³ட்டி². உச்சே²த³வஸேன தி³ட்டி²மஞ்ஞிதமேவாதி ஆனெத்வா ஸம்ப³ந்தோ⁴. ரூபீதிஆதீ³னி பதா³னி. ஸஸ்ஸதஸ்ஸேவாதி ஸஸ்ஸதகா³ஹஸ்ஸேவ பபே⁴த³தீ³பனானி. யஸ்மா மஞ்ஞிதங் ஆபா³த⁴வஸேன ரோகோ³, அந்தோதோ³ஸவஸேன க³ண்டோ³, அங்க³னிகந்தவஸேன ஸல்லங், தஸ்மா இமேஹி தண்ஹாதீ³ஹி கிலேஸேஹி பாகடசலனவஸேன இஞ்ஜந்தி சேவ, அபாகடஸஞ்சலனவஸேன ப²ந்த³ந்தி ச. பபஞ்சிதங் ஸங்ஸாரே சிராயனங் த³ட்ட²ப்³ப³ங், க²ந்த⁴ஸந்தானஸ்ஸ வா வித்தா²ரணங். பமத்தாகாரப்பத்தா முச்ச²னாகாரப்பத்தா. தேஸந்தி தண்ஹாதி³ட்டி²கிலேஸானங். ஆகாரத³ஸ்ஸனத்த²ந்தி பவத்திஆகாரத³ஸ்ஸனத்த²ங்.
Taṇhāmaññanāya sati diṭṭhimānamaññanānaṃ pasaṅgo eva natthīti yathā ‘‘asmī’’ti padena diṭṭhimānamaññanā vuttā honti, evaṃ taṇhāmaññitāpīti vuttaṃ ‘‘asmīti padena taṇhāmaññitaṃ vutta’’nti. Ayamahamasmīti padena diṭṭhimaññitanti etarahi labbhamānadiṭṭhivatthuvaseneva. Bhavissanti anāgatadiṭṭhivatthuparikappanavaseneva diṭṭhimaññitaṃ. Yebhuyyena hi anāgatāliṅganā sassatadiṭṭhi. Ucchedavasena diṭṭhimaññitamevāti ānetvā sambandho. Rūpītiādīni padāni. Sassatassevāti sassatagāhasseva pabhedadīpanāni. Yasmā maññitaṃ ābādhavasena rogo, antodosavasena gaṇḍo, aṅganikantavasena sallaṃ, tasmā imehi taṇhādīhi kilesehi pākaṭacalanavasena iñjanti ceva, apākaṭasañcalanavasena phandanti ca. Papañcitaṃ saṃsāre cirāyanaṃ daṭṭhabbaṃ, khandhasantānassa vā vitthāraṇaṃ. Pamattākārappattā mucchanākārappattā. Tesanti taṇhādiṭṭhikilesānaṃ. Ākāradassanatthanti pavattiākāradassanatthaṃ.
மானோ நாம ‘‘ஸெய்யோஹமஸ்மீ’’திஆதி³னா மஜ்ஜனாகாரப்பவத்தி. தண்ஹாய ஸம்பயுத்தமானவஸேனாதி கஸ்மா வுத்தங்? நனு ஸப்³போ³ மானோ தண்ஹாஸம்பயுத்தோ? ஸதி ஹி ப்³யபி⁴சாரே விஸேஸனங் இச்சி²தப்³ப³ந்தி. ஸச்சமேதங், தண்ஹா பன அத்தி² மானஸ்ஸ பச்சயபூ⁴தா, அத்தி² மானஸ்ஸ அப்பச்சயபூ⁴தா, யதோ மானோ அனியதோ வுச்சதி. ததா² ஹி பட்டா²னே ‘‘ஸங்யோஜனங் த⁴ம்மங் படிச்ச ஸங்யோஜனோ த⁴ம்மோ உப்பஜ்ஜதி ஹேதுபச்சயா’’தி எத்த² ஸங்யோஜனானி ஸங்யோஜனேஹி யதா²லாப⁴ங் யோஜெத்வா த³ஸ்ஸிதயோஜனாய ‘‘காமராக³ஸங்யோஜனங் படிச்ச மானஸங்யோஜனங் அவிஜ்ஜாஸங்யோஜன’’ந்தி வத்வா ‘‘காமராக³ஸங்யோஜனங் படிச்ச அவிஜ்ஜாஸங்யோஜன’’ந்தி, ‘‘மானஸங்யோஜனங் படிச்ச ப⁴வராக³ஸங்யோஜனங் அவிஜ்ஜாஸங்யோஜன’’ந்தி ச வத்வா ‘‘ப⁴வராக³ஸங்யோஜனங் படிச்ச அவிஜ்ஜாஸங்யோஜன’’ந்தி வுத்தங். எத்த² ச காமராக³ப⁴வராக³ஸங்யோஜனேஹி மானஸ்ஸ அனியதபா⁴வோ பகாஸிதோ. தத்த² யா தண்ஹா ப³லவதீ, தங் ஸந்தா⁴ய இத³ங் வுத்தங் ‘‘தண்ஹாய ஸம்பயுத்தமானவஸேனா’’தி. ப³லவதண்ஹாஸம்பயுத்தோ ஹி மானோ ஸயம்பி ப³லவா ஹுத்வா அஸ்மீதி ஸவிஸேஸங் மஜ்ஜனவஸேன பவத்ததீதி.
Māno nāma ‘‘seyyohamasmī’’tiādinā majjanākārappavatti. Taṇhāya sampayuttamānavasenāti kasmā vuttaṃ? Nanu sabbo māno taṇhāsampayutto? Sati hi byabhicāre visesanaṃ icchitabbanti. Saccametaṃ, taṇhā pana atthi mānassa paccayabhūtā, atthi mānassa appaccayabhūtā, yato māno aniyato vuccati. Tathā hi paṭṭhāne ‘‘saṃyojanaṃ dhammaṃ paṭicca saṃyojano dhammo uppajjati hetupaccayā’’ti ettha saṃyojanāni saṃyojanehi yathālābhaṃ yojetvā dassitayojanāya ‘‘kāmarāgasaṃyojanaṃ paṭicca mānasaṃyojanaṃ avijjāsaṃyojana’’nti vatvā ‘‘kāmarāgasaṃyojanaṃ paṭicca avijjāsaṃyojana’’nti, ‘‘mānasaṃyojanaṃ paṭicca bhavarāgasaṃyojanaṃ avijjāsaṃyojana’’nti ca vatvā ‘‘bhavarāgasaṃyojanaṃ paṭicca avijjāsaṃyojana’’nti vuttaṃ. Ettha ca kāmarāgabhavarāgasaṃyojanehi mānassa aniyatabhāvo pakāsito. Tattha yā taṇhā balavatī, taṃ sandhāya idaṃ vuttaṃ ‘‘taṇhāya sampayuttamānavasenā’’ti. Balavataṇhāsampayutto hi māno sayampi balavā hutvā asmīti savisesaṃ majjanavasena pavattatīti.
தி³ட்டி²வஸேனாதி மானமூலகதி³ட்டி²வஸேன. ‘‘ஸெய்யோஹமஸ்மீ’’திஆதி³னா ஹி ப³ஹுலமானுபேதஸ்ஸ புக்³க³லஸ்ஸ ரூபாதீ³ஸு ஏகங் உத்³தி³ஸ்ஸ அயமஹமஸ்மீதி தி³ட்டி²யா உப்பன்னாய மானஸ்ஸ அப்பஹீனத்தா மானோபி தத்த² தத்தே²வ உப்பஜ்ஜதி. இதி மானமூலகங் தி³ட்டி²ங் ஸந்தா⁴யாஹ ‘‘அயமஹமஸ்மீதி தி³ட்டி²வஸேன வுத்த’’ந்தி. சோத³கோ பன இமமத்த²ங் அஜானந்தோ அனுபலப்³ப⁴மானமேவ ஸம்பயோக³த்த²ங் க³ஹெத்வா ‘‘நனு சா’’திஆதி³னா சோதே³தி. இதரோ ‘‘ஆம நத்தீ²’’தி தமத்த²ங் ஸம்படிச்சி²த்வா ‘‘மானஸ்ஸ பனா’’திஆதி³னா பரிஹாரமாஹ. தஸ்ஸத்தோ² வுத்தோ ஏவ.
Diṭṭhivasenāti mānamūlakadiṭṭhivasena. ‘‘Seyyohamasmī’’tiādinā hi bahulamānupetassa puggalassa rūpādīsu ekaṃ uddissa ayamahamasmīti diṭṭhiyā uppannāya mānassa appahīnattā mānopi tattha tattheva uppajjati. Iti mānamūlakaṃ diṭṭhiṃ sandhāyāha ‘‘ayamahamasmīti diṭṭhivasena vutta’’nti. Codako pana imamatthaṃ ajānanto anupalabbhamānameva sampayogatthaṃ gahetvā ‘‘nanu cā’’tiādinā codeti. Itaro ‘‘āma natthī’’ti tamatthaṃ sampaṭicchitvā ‘‘mānassa panā’’tiādinā parihāramāha. Tassattho vutto eva.
யவகலாபிஸுத்தவண்ணனா நிட்டி²தா.
Yavakalāpisuttavaṇṇanā niṭṭhitā.
ஆஸீவிஸவக்³க³வண்ணனா நிட்டி²தா.
Āsīvisavaggavaṇṇanā niṭṭhitā.
சதுத்தோ² பண்ணாஸகோ.
Catuttho paṇṇāsako.
ஸளாயதனஸங்யுத்தவண்ணனா நிட்டி²தா.
Saḷāyatanasaṃyuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 11. யவகலாபிஸுத்தங் • 11. Yavakalāpisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 11. யவகலாபிஸுத்தவண்ணனா • 11. Yavakalāpisuttavaṇṇanā
