| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
(14) 4. யோதா⁴ஜீவவக்³கோ³
(14) 4. Yodhājīvavaggo
1. யோதா⁴ஜீவஸுத்தங்
1. Yodhājīvasuttaṃ
134. ‘‘தீஹி , பி⁴க்க²வே, அங்கே³ஹி ஸமன்னாக³தோ யோதா⁴ஜீவோ ராஜாரஹோ ஹோதி ராஜபொ⁴க்³கோ³, ரஞ்ஞோ அங்க³ந்தேவ ஸங்க்²யங் க³ச்ச²தி. கதமேஹி தீஹி ? இத⁴, பி⁴க்க²வே, யோதா⁴ஜீவோ தூ³ரே பாதீ ச ஹோதி அக்க²ணவேதீ⁴ ச மஹதோ ச காயஸ்ஸ பதா³லேதா. இமேஹி, கோ², பி⁴க்க²வே, தீஹி அங்கே³ஹி ஸமன்னாக³தோ யோதா⁴ஜீவோ ராஜாரஹோ ஹோதி ராஜபொ⁴க்³கோ³, ரஞ்ஞோ அங்க³ந்தேவ ஸங்க்²யங் க³ச்ச²தி. ஏவமேவங் கோ², பி⁴க்க²வே, தீஹி அங்கே³ஹி ஸமன்னாக³தோ பி⁴க்கு² ஆஹுனெய்யோ ஹோதி…பே॰… அனுத்தரங் புஞ்ஞக்கெ²த்தங் லோகஸ்ஸ. கதமேஹி தீஹி? இத⁴, பி⁴க்க²வே, பி⁴க்கு² தூ³ரே பாதீ ச ஹோதி அக்க²ணவேதீ⁴ ச மஹதோ ச காயஸ்ஸ பதா³லேதா.
134. ‘‘Tīhi , bhikkhave, aṅgehi samannāgato yodhājīvo rājāraho hoti rājabhoggo, rañño aṅganteva saṅkhyaṃ gacchati. Katamehi tīhi ? Idha, bhikkhave, yodhājīvo dūre pātī ca hoti akkhaṇavedhī ca mahato ca kāyassa padāletā. Imehi, kho, bhikkhave, tīhi aṅgehi samannāgato yodhājīvo rājāraho hoti rājabhoggo, rañño aṅganteva saṅkhyaṃ gacchati. Evamevaṃ kho, bhikkhave, tīhi aṅgehi samannāgato bhikkhu āhuneyyo hoti…pe… anuttaraṃ puññakkhettaṃ lokassa. Katamehi tīhi? Idha, bhikkhave, bhikkhu dūre pātī ca hoti akkhaṇavedhī ca mahato ca kāyassa padāletā.
‘‘கத²ஞ்ச, பி⁴க்க²வே, பி⁴க்கு² தூ³ரே பாதீ ஹோதி? இத⁴, பி⁴க்க²வே, பி⁴க்கு² யங் கிஞ்சி ரூபங் அதீதானாக³தபச்சுப்பன்னங் அஜ்ஜ²த்தங் வா ப³ஹித்³தா⁴ வா ஓளாரிகங் வா ஸுகு²மங் வா ஹீனங் வா பணீதங் வா யங் தூ³ரே ஸந்திகே வா, ஸப்³ப³ங் ரூபங் – ‘நேதங் மம, நேஸோஹமஸ்மி, ந மேஸோ அத்தா’தி ஏவமேதங் யதா²பூ⁴தங் ஸம்மப்பஞ்ஞாய பஸ்ஸதி. யா காசி வேத³னா அதீதானாக³தபச்சுப்பன்னா அஜ்ஜ²த்தா வா ப³ஹித்³தா⁴ வா ஓளாரிகா வா ஸுகு²மா வா ஹீனா வா பணீதா வா யா தூ³ரே ஸந்திகே வா, ஸப்³ப³ங் வேத³னங் 1 – ‘நேதங் மம, நேஸோஹமஸ்ம்ஸ்ம்மி , ந மேஸோ அத்தா’தி ஏவமேதங் யதா²பூ⁴தங் ஸம்மப்பஞ்ஞாய பஸ்ஸதி. யா காசி ஸஞ்ஞா அதீதானாக³தபச்சுப்பன்னா அஜ்ஜ²த்தா வா ப³ஹித்³தா⁴ வா ஓளாரிகா வா ஸுகு²மா வா ஹீனா வா பணீதா வா யா தூ³ரே ஸந்திகே வா, ஸப்³ப³ங் ஸஞ்ஞங் 2 – ‘நேதங் மம, நேஸோஹமஸ்மி, ந மேஸோ அத்தா’தி ஏவமேதங் யதா²பூ⁴தங் ஸம்மப்பஞ்ஞாய பஸ்ஸதி. யே கேசி ஸங்கா²ரா அதீதானாக³தபச்சுப்பன்னா அஜ்ஜ²த்தா வா ப³ஹித்³தா⁴ வா ஓளாரிகா வா ஸுகு²மா வா ஹீனா வா பணீதா வா யே தூ³ரே ஸந்திகே வா, ஸப்³பே³ ஸங்கா²ரே – ‘நேதங் மம, நேஸோஹமஸ்மி, ந மேஸோ அத்தா’தி ஏவமேதங் யதா²பூ⁴தங் ஸம்மப்பஞ்ஞாய பஸ்ஸதி. யங் கிஞ்சி விஞ்ஞாணங் அதீதானாக³தபச்சுப்பன்னங் அஜ்ஜ²த்தங் வா ப³ஹித்³தா⁴ வா ஓளாரிகங் வா ஸுகு²மங் வா ஹீனங் வா பணீதங் வா யங் தூ³ரே ஸந்திகே வா, ஸப்³ப³ங் விஞ்ஞாணங் – ‘நேதங் மம, நேஸோஹமஸ்மி, ந மேஸோ அத்தா’தி ஏவமேதங் யதா²பூ⁴தங் ஸம்மப்பஞ்ஞாய பஸ்ஸதி. ஏவங் கோ², பி⁴க்க²வே, பி⁴க்கு² தூ³ரே பாதீ ஹோதி.
‘‘Kathañca, bhikkhave, bhikkhu dūre pātī hoti? Idha, bhikkhave, bhikkhu yaṃ kiñci rūpaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā, sabbaṃ rūpaṃ – ‘netaṃ mama, nesohamasmi, na meso attā’ti evametaṃ yathābhūtaṃ sammappaññāya passati. Yā kāci vedanā atītānāgatapaccuppannā ajjhattā vā bahiddhā vā oḷārikā vā sukhumā vā hīnā vā paṇītā vā yā dūre santike vā, sabbaṃ vedanaṃ 3 – ‘netaṃ mama, nesohamasmsmmi , na meso attā’ti evametaṃ yathābhūtaṃ sammappaññāya passati. Yā kāci saññā atītānāgatapaccuppannā ajjhattā vā bahiddhā vā oḷārikā vā sukhumā vā hīnā vā paṇītā vā yā dūre santike vā, sabbaṃ saññaṃ 4 – ‘netaṃ mama, nesohamasmi, na meso attā’ti evametaṃ yathābhūtaṃ sammappaññāya passati. Ye keci saṅkhārā atītānāgatapaccuppannā ajjhattā vā bahiddhā vā oḷārikā vā sukhumā vā hīnā vā paṇītā vā ye dūre santike vā, sabbe saṅkhāre – ‘netaṃ mama, nesohamasmi, na meso attā’ti evametaṃ yathābhūtaṃ sammappaññāya passati. Yaṃ kiñci viññāṇaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā, sabbaṃ viññāṇaṃ – ‘netaṃ mama, nesohamasmi, na meso attā’ti evametaṃ yathābhūtaṃ sammappaññāya passati. Evaṃ kho, bhikkhave, bhikkhu dūre pātī hoti.
‘‘கத²ஞ்ச, பி⁴க்க²வே, பி⁴க்கு² அக்க²ணவேதீ⁴ ஹோதி? இத⁴, பி⁴க்க²வே, பி⁴க்கு² ‘இத³ங் து³க்க²’ந்தி யதா²பூ⁴தங் பஜானாதி; ‘அயங் து³க்க²ஸமுத³யோ’தி யதா²பூ⁴தங் பஜானாதி; ‘அயங் து³க்க²னிரோதோ⁴’தி யதா²பூ⁴தங் பஜானாதி; ‘அயங் து³க்க²னிரோத⁴கா³மினீ படிபதா³’தி யதா²பூ⁴தங் பஜானாதி. ஏவங் கோ², பி⁴க்க²வே, பி⁴க்கு² அக்க²ணவேதீ⁴ ஹோதி.
‘‘Kathañca, bhikkhave, bhikkhu akkhaṇavedhī hoti? Idha, bhikkhave, bhikkhu ‘idaṃ dukkha’nti yathābhūtaṃ pajānāti; ‘ayaṃ dukkhasamudayo’ti yathābhūtaṃ pajānāti; ‘ayaṃ dukkhanirodho’ti yathābhūtaṃ pajānāti; ‘ayaṃ dukkhanirodhagāminī paṭipadā’ti yathābhūtaṃ pajānāti. Evaṃ kho, bhikkhave, bhikkhu akkhaṇavedhī hoti.
‘‘கத²ஞ்ச, பி⁴க்க²வே, பி⁴க்கு² மஹதோ காயஸ்ஸ பதா³லேதா ஹோதி? இத⁴, பி⁴க்க²வே, பி⁴க்கு² மஹந்தங் அவிஜ்ஜாக்க²ந்த⁴ங் பதா³லேதி. ஏவங் கோ², பி⁴க்க²வே, பி⁴க்கு² மஹதோ காயஸ்ஸ பதா³லேதா ஹோதி. இமேஹி கோ², பி⁴க்க²வே, தீஹி த⁴ம்மேஹி ஸமன்னாக³தோ பி⁴க்கு² ஆஹுனெய்யோ ஹோதி…பே॰… அனுத்தரங் புஞ்ஞக்கெ²த்தங் லோகஸ்ஸா’’தி. பட²மங்.
‘‘Kathañca, bhikkhave, bhikkhu mahato kāyassa padāletā hoti? Idha, bhikkhave, bhikkhu mahantaṃ avijjākkhandhaṃ padāleti. Evaṃ kho, bhikkhave, bhikkhu mahato kāyassa padāletā hoti. Imehi kho, bhikkhave, tīhi dhammehi samannāgato bhikkhu āhuneyyo hoti…pe… anuttaraṃ puññakkhettaṃ lokassā’’ti. Paṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. யோதா⁴ஜீவஸுத்தவண்ணனா • 1. Yodhājīvasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1. யோதா⁴ஜீவஸுத்தவண்ணனா • 1. Yodhājīvasuttavaṇṇanā
