| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
(19) 4. ப்³ராஹ்மணவக்³கோ³
(19) 4. Brāhmaṇavaggo
1. யோதா⁴ஜீவஸுத்தங்
1. Yodhājīvasuttaṃ
181. ‘‘சதூஹி , பி⁴க்க²வே, அங்கே³ஹி ஸமன்னாக³தோ யோதா⁴ஜீவோ ராஜாரஹோ ஹோதி ராஜபொ⁴க்³கோ³, ரஞ்ஞோ அங்க³ந்தேவ ஸங்க²ங் க³ச்ச²தி. கதமேஹி சதூஹி? இத⁴, பி⁴க்க²வே, யோதா⁴ஜீவோ டா²னகுஸலோ ச ஹோதி, தூ³ரேபாதீ ச, அக்க²ணவேதீ⁴ ச, மஹதோ ச காயஸ்ஸ பதா³லேதா. இமேஹி கோ², பி⁴க்க²வே, சதூஹி அங்கே³ஹி ஸமன்னாக³தோ யோதா⁴ஜீவோ ராஜாரஹோ ஹோதி ராஜபொ⁴க்³கோ³, ரஞ்ஞோ அங்க³ந்தேவ ஸங்க²ங் க³ச்ச²தி. ஏவமேவங் கோ², பி⁴க்க²வே, சதூஹி த⁴ம்மேஹி ஸமன்னாக³தோ பி⁴க்கு² ஆஹுனெய்யோ ஹோதி பாஹுனெய்யோ த³க்கி²ணெய்யோ அஞ்ஜலிகரணீயோ அனுத்தரங் புஞ்ஞக்கெ²த்தங் லோகஸ்ஸ. கதமேஹி சதூஹி? இத⁴, பி⁴க்க²வே, பி⁴க்கு² டா²னகுஸலோ ச ஹோதி, தூ³ரேபாதீ ச, அக்க²ணவேதீ⁴ ச, மஹதோ ச காயஸ்ஸ பதா³லேதா.
181. ‘‘Catūhi , bhikkhave, aṅgehi samannāgato yodhājīvo rājāraho hoti rājabhoggo, rañño aṅganteva saṅkhaṃ gacchati. Katamehi catūhi? Idha, bhikkhave, yodhājīvo ṭhānakusalo ca hoti, dūrepātī ca, akkhaṇavedhī ca, mahato ca kāyassa padāletā. Imehi kho, bhikkhave, catūhi aṅgehi samannāgato yodhājīvo rājāraho hoti rājabhoggo, rañño aṅganteva saṅkhaṃ gacchati. Evamevaṃ kho, bhikkhave, catūhi dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassa. Katamehi catūhi? Idha, bhikkhave, bhikkhu ṭhānakusalo ca hoti, dūrepātī ca, akkhaṇavedhī ca, mahato ca kāyassa padāletā.
‘‘கத²ஞ்ச, பி⁴க்க²வே, பி⁴க்கு² டா²னகுஸலோ ஹோதி? இத⁴, பி⁴க்க²வே, பி⁴க்கு² ஸீலவா ஹோதி…பே॰… ஸமாதா³ய ஸிக்க²தி ஸிக்கா²பதே³ஸு. ஏவங் கோ², பி⁴க்க²வே, பி⁴க்கு² டா²னகுஸலோ ஹோதி.
‘‘Kathañca, bhikkhave, bhikkhu ṭhānakusalo hoti? Idha, bhikkhave, bhikkhu sīlavā hoti…pe… samādāya sikkhati sikkhāpadesu. Evaṃ kho, bhikkhave, bhikkhu ṭhānakusalo hoti.
‘‘கத²ஞ்ச, பி⁴க்க²வே, பி⁴க்கு² தூ³ரேபாதீ ஹோதி? இத⁴, பி⁴க்க²வே , பி⁴க்கு² யங் கிஞ்சி ரூபங் அதீதானாக³தபச்சுப்பன்னங் அஜ்ஜ²த்தங் வா ப³ஹித்³தா⁴ வா ஓளாரிகங் வா ஸுகு²மங் வா ஹீனங் வா பணீதங் வா யங் தூ³ரே ஸந்திகே வா, ஸப்³ப³ங் ரூபங் ‘நேதங் மம, நேஸோஹமஸ்மி, ந மேஸோ அத்தா’தி ஏவமேதங் யதா²பூ⁴தங் ஸம்மப்பஞ்ஞாய பஸ்ஸதி. யா காசி வேத³னா…பே॰… யா காசி ஸஞ்ஞா… யே கேசி ஸங்கா²ரா… யங் கிஞ்சி விஞ்ஞாணங் அதீதானாக³தபச்சுப்பன்னங் அஜ்ஜ²த்தங் வா ப³ஹித்³தா⁴ வா ஓளாரிகங் வா ஸுகு²மங் வா ஹீனங் வா பணீதங் வா யங் தூ³ரே ஸந்திகே வா , ஸப்³ப³ங் விஞ்ஞாணங் ‘நேதங் மம, நேஸோஹமஸ்மி, ந மேஸோ அத்தா’தி ஏவமேதங் யதா²பூ⁴தங் ஸம்மப்பஞ்ஞாய பஸ்ஸதி. ஏவங் கோ², பி⁴க்க²வே, பி⁴க்கு² தூ³ரேபாதீ ஹோதி.
‘‘Kathañca, bhikkhave, bhikkhu dūrepātī hoti? Idha, bhikkhave , bhikkhu yaṃ kiñci rūpaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā, sabbaṃ rūpaṃ ‘netaṃ mama, nesohamasmi, na meso attā’ti evametaṃ yathābhūtaṃ sammappaññāya passati. Yā kāci vedanā…pe… yā kāci saññā… ye keci saṅkhārā… yaṃ kiñci viññāṇaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā , sabbaṃ viññāṇaṃ ‘netaṃ mama, nesohamasmi, na meso attā’ti evametaṃ yathābhūtaṃ sammappaññāya passati. Evaṃ kho, bhikkhave, bhikkhu dūrepātī hoti.
‘‘கத²ஞ்ச , பி⁴க்க²வே, பி⁴க்கு² அக்க²ணவேதீ⁴ ஹோதி? இத⁴, பி⁴க்க²வே, பி⁴க்கு² ‘இத³ங் து³க்க²’ந்தி யதா²பூ⁴தங் பஜானாதி…பே॰… ‘அயங் து³க்க²னிரோத⁴கா³மினீ படிபதா³’தி யதா²பூ⁴தங் பஜானாதி. ஏவங் கோ², பி⁴க்க²வே, பி⁴க்கு² அக்க²ணவேதீ⁴ ஹோதி.
‘‘Kathañca , bhikkhave, bhikkhu akkhaṇavedhī hoti? Idha, bhikkhave, bhikkhu ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti. Evaṃ kho, bhikkhave, bhikkhu akkhaṇavedhī hoti.
‘‘கத²ஞ்ச, பி⁴க்க²வே, பி⁴க்கு² மஹதோ காயஸ்ஸ பதா³லேதா ஹோதி? இத⁴, பி⁴க்க²வே, பி⁴க்கு² மஹந்தங் அவிஜ்ஜாக்க²ந்த⁴ங் பதா³லேதா. ஏவங் கோ², பி⁴க்க²வே, பி⁴க்கு² மஹதோ காயஸ்ஸ பதா³லேதா ஹோதி. இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ பி⁴க்கு² ஆஹுனெய்யோ ஹோதி…பே॰… அனுத்தரங் புஞ்ஞக்கெ²த்தங் லோகஸ்ஸா’’தி. பட²மங்.
‘‘Kathañca, bhikkhave, bhikkhu mahato kāyassa padāletā hoti? Idha, bhikkhave, bhikkhu mahantaṃ avijjākkhandhaṃ padāletā. Evaṃ kho, bhikkhave, bhikkhu mahato kāyassa padāletā hoti. Imehi kho, bhikkhave, catūhi dhammehi samannāgato bhikkhu āhuneyyo hoti…pe… anuttaraṃ puññakkhettaṃ lokassā’’ti. Paṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. யோதா⁴ஜீவஸுத்தவண்ணனா • 1. Yodhājīvasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-3. யோதா⁴ஜீவஸுத்தாதி³வண்ணனா • 1-3. Yodhājīvasuttādivaṇṇanā
