| Library / Tipiṭaka / तिपिटक • Tipiṭaka / अपदानपाळि • Apadānapāḷi |
३-८. पिण्डोलभारद्वाजत्थेरअपदानं
3-8. Piṇḍolabhāradvājattheraapadānaṃ
६१३.
613.
‘‘पदुमुत्तरो नाम जिनो, सयम्भू अग्गपुग्गलो।
‘‘Padumuttaro nāma jino, sayambhū aggapuggalo;
पुरतो हिमवन्तस्स, चित्तकूटे वसी तदा॥
Purato himavantassa, cittakūṭe vasī tadā.
६१४.
614.
‘‘अभीतरूपो तत्थासिं, मिगराजा चतुक्कमो।
‘‘Abhītarūpo tatthāsiṃ, migarājā catukkamo;
तस्स सद्दं सुणित्वान, विक्खम्भन्ति बहुज्जना॥
Tassa saddaṃ suṇitvāna, vikkhambhanti bahujjanā.
६१५.
615.
‘‘सुफुल्लं पदुमं गय्ह, उपगच्छिं नरासभं।
‘‘Suphullaṃ padumaṃ gayha, upagacchiṃ narāsabhaṃ;
वुट्ठितस्स समाधिम्हा, बुद्धस्स अभिरोपयिं॥
Vuṭṭhitassa samādhimhā, buddhassa abhiropayiṃ.
६१६.
616.
‘‘चातुद्दिसं नमस्सित्वा, बुद्धसेट्ठं नरुत्तमं।
‘‘Cātuddisaṃ namassitvā, buddhaseṭṭhaṃ naruttamaṃ;
६१७.
617.
‘‘पदुमुत्तरो लोकविदू, आहुतीनं पटिग्गहो।
‘‘Padumuttaro lokavidū, āhutīnaṃ paṭiggaho;
सकासने निसीदित्वा, इमा गाथा अभासथ॥
Sakāsane nisīditvā, imā gāthā abhāsatha.
६१८.
618.
‘‘‘बुद्धस्स गिरमञ्ञाय, सब्बे देवा समागता।
‘‘‘Buddhassa giramaññāya, sabbe devā samāgatā;
आगतो वदतं सेट्ठो, धम्मं सोस्साम तं मयं॥
Āgato vadataṃ seṭṭho, dhammaṃ sossāma taṃ mayaṃ.
६१९.
619.
‘‘‘तेसं हासपरेतानं, पुरतो लोकनायको।
‘‘‘Tesaṃ hāsaparetānaṃ, purato lokanāyako;
६२०.
620.
‘‘येनिदं पदुमं दिन्नं, सीहनादो च नादितो।
‘‘Yenidaṃ padumaṃ dinnaṃ, sīhanādo ca nādito;
तमहं कित्तयिस्सामि, सुणाथ मम भासतो॥
Tamahaṃ kittayissāmi, suṇātha mama bhāsato.
६२१.
621.
‘‘‘इतो अट्ठमके कप्पे, चक्कवत्ती भविस्सति।
‘‘‘Ito aṭṭhamake kappe, cakkavattī bhavissati;
सत्तरतनसम्पन्नो चतुदीपम्हि इस्सरो॥
Sattaratanasampanno catudīpamhi issaro.
६२२.
622.
पदुमो नाम नामेन, चक्कवत्ती महब्बलो॥
Padumo nāma nāmena, cakkavattī mahabbalo.
६२३.
623.
‘‘कप्पसतसहस्सम्हि , ओक्काककुलसम्भवो।
‘‘Kappasatasahassamhi , okkākakulasambhavo;
गोतमो नाम गोत्तेन, सत्था लोके भविस्सति॥
Gotamo nāma gottena, satthā loke bhavissati.
६२४.
624.
‘पकासिते पावचने, ब्रह्मबन्धु भविस्सति।
‘Pakāsite pāvacane, brahmabandhu bhavissati;
ब्रह्मञ्ञा अभिनिक्खम्म, पब्बजिस्सति तावदे’॥
Brahmaññā abhinikkhamma, pabbajissati tāvade’.
६२५.
625.
‘‘पधानपहितत्तो सो, उपसन्तो निरूपधि।
‘‘Padhānapahitatto so, upasanto nirūpadhi;
सब्बासवे परिञ्ञाय, निब्बायिस्सतिनासवो॥
Sabbāsave pariññāya, nibbāyissatināsavo.
६२६.
626.
‘‘विजने पन्तसेय्यम्हि, वाळमिगसमाकुले।
‘‘Vijane pantaseyyamhi, vāḷamigasamākule;
सब्बासवे परिञ्ञाय, निब्बायिस्सतिनासवो॥
Sabbāsave pariññāya, nibbāyissatināsavo.
६२७.
627.
‘‘पटिसम्भिदा चतस्सो, विमोक्खापि च अट्ठिमे।
‘‘Paṭisambhidā catasso, vimokkhāpi ca aṭṭhime;
छळभिञ्ञा सच्छिकता, कतं बुद्धस्स सासनं’’॥
Chaḷabhiññā sacchikatā, kataṃ buddhassa sāsanaṃ’’.
इत्थं सुदं आयस्मा पिण्डोलभारद्वाजो थेरो इमा गाथायो अभासित्थाति।
Itthaṃ sudaṃ āyasmā piṇḍolabhāradvājo thero imā gāthāyo abhāsitthāti.
पिण्डोलभारद्वाजत्थेरस्सापदानं अट्ठमं।
Piṇḍolabhāradvājattherassāpadānaṃ aṭṭhamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / ३-८. पिण्डोलभारद्वाजत्थेरअपदानवण्णना • 3-8. Piṇḍolabhāradvājattheraapadānavaṇṇanā
