| Library / Tipiṭaka / तिपिटक • Tipiṭaka / अपदानपाळि • Apadānapāḷi |
७. अभयत्थेरअपदानं
7. Abhayattheraapadānaṃ
१९५.
195.
‘‘पदुमुत्तरो नाम जिनो, सब्बधम्मेसु चक्खुमा।
‘‘Padumuttaro nāma jino, sabbadhammesu cakkhumā;
इतो सतसहस्सम्हि, कप्पे उप्पज्जि नायको॥
Ito satasahassamhi, kappe uppajji nāyako.
१९६.
196.
‘‘सरणगमने किञ्चि, निवेसेसि तथागतो।
‘‘Saraṇagamane kiñci, nivesesi tathāgato;
किञ्चि सीले निवेसेसि, दसकम्मपथुत्तमे॥
Kiñci sīle nivesesi, dasakammapathuttame.
१९७.
197.
‘‘देति कस्सचि सो वीरो, सामञ्ञफलमुत्तमं।
‘‘Deti kassaci so vīro, sāmaññaphalamuttamaṃ;
समापत्ती तथा अट्ठ, तिस्सो विज्जा पवच्छति॥
Samāpattī tathā aṭṭha, tisso vijjā pavacchati.
१९८.
198.
‘‘छळभिञ्ञासु योजेसि, किञ्चि सत्तं नरुत्तमो।
‘‘Chaḷabhiññāsu yojesi, kiñci sattaṃ naruttamo;
देति कस्सचि नाथो सो, चतस्सो पटिसम्भिदा॥
Deti kassaci nātho so, catasso paṭisambhidā.
१९९.
199.
खणेन उपगन्त्वान, विनेति नरसारथि॥
Khaṇena upagantvāna, vineti narasārathi.
२००.
200.
‘‘तदाहं हंसवतियं, अहोसिं ब्राह्मणत्रजो।
‘‘Tadāhaṃ haṃsavatiyaṃ, ahosiṃ brāhmaṇatrajo;
पारगू सब्बवेदानं, वेय्याकरणसम्मतो॥
Pāragū sabbavedānaṃ, veyyākaraṇasammato.
२०१.
201.
‘‘निरुत्तिया च कुसलो, निघण्डुम्हि विसारदो।
‘‘Niruttiyā ca kusalo, nighaṇḍumhi visārado;
पदको केटुभविदू, छन्दोविचितिकोविदो॥
Padako keṭubhavidū, chandovicitikovido.
२०२.
202.
‘‘जङ्घाविहारं विचरं, हंसाराममुपेच्चहं।
‘‘Jaṅghāvihāraṃ vicaraṃ, haṃsārāmamupeccahaṃ;
२०३.
203.
‘‘देसेन्तं विरजं धम्मं, पच्चनीकमती अहं।
‘‘Desentaṃ virajaṃ dhammaṃ, paccanīkamatī ahaṃ;
२०४.
204.
‘‘ब्याहतं पुनरुत्तं वा, अपत्थं वा निरत्थकं।
‘‘Byāhataṃ punaruttaṃ vā, apatthaṃ vā niratthakaṃ;
नाद्दसं तस्स मुनिनो, ततो पब्बजितो अहं॥
Nāddasaṃ tassa munino, tato pabbajito ahaṃ.
२०५.
205.
‘‘नचिरेनेव कालेन, सब्बसत्तविसारदो।
‘‘Nacireneva kālena, sabbasattavisārado;
निपुणो बुद्धवचने, अहोसिं गुणिसम्मतो॥
Nipuṇo buddhavacane, ahosiṃ guṇisammato.
२०६.
206.
‘‘तदा चतस्सो गाथायो, गन्थयित्वा सुब्यञ्जना।
‘‘Tadā catasso gāthāyo, ganthayitvā subyañjanā;
सन्थवित्वा तिलोकग्गं, देसयिस्सं दिने दिने॥
Santhavitvā tilokaggaṃ, desayissaṃ dine dine.
२०७.
207.
‘‘विरत्तोसि महावीरो, संसारे सभये वसं।
‘‘Virattosi mahāvīro, saṃsāre sabhaye vasaṃ;
करुणाय न निब्बायि, ततो कारुणिको मुनि॥
Karuṇāya na nibbāyi, tato kāruṇiko muni.
२०८.
208.
‘‘पुथुज्जनो वयो सन्तो, न किलेसवसो अहु।
‘‘Puthujjano vayo santo, na kilesavaso ahu;
सम्पजानो सतियुत्तो, तस्मा एसो अचिन्तियो॥
Sampajāno satiyutto, tasmā eso acintiyo.
२०९.
209.
‘‘दुब्बलानि किलेसानि, यस्सासयगतानि मे।
‘‘Dubbalāni kilesāni, yassāsayagatāni me;
ञाणग्गिपरिदड्ढानि, न खीयिंसु तमब्भुतं॥
Ñāṇaggiparidaḍḍhāni, na khīyiṃsu tamabbhutaṃ.
२१०.
210.
तथापि लोकाचरियो, लोको तस्सानुवत्तको॥
Tathāpi lokācariyo, loko tassānuvattako.
२११.
211.
‘‘एवमादीहि सम्बुद्धं, कित्तयं धम्मदेसनं।
‘‘Evamādīhi sambuddhaṃ, kittayaṃ dhammadesanaṃ;
यावजीवं करित्वान, गतो सग्गं ततो चुतो॥
Yāvajīvaṃ karitvāna, gato saggaṃ tato cuto.
२१२.
212.
‘‘सतसहस्सितो कप्पे, यं बुद्धमभिकित्तयिं।
‘‘Satasahassito kappe, yaṃ buddhamabhikittayiṃ;
दुग्गतिं नाभिजानामि, कित्तनाय इदं फलं॥
Duggatiṃ nābhijānāmi, kittanāya idaṃ phalaṃ.
२१३.
213.
चक्कवत्ती महारज्जं, बहुसोनुभविं अहं॥
Cakkavattī mahārajjaṃ, bahusonubhaviṃ ahaṃ.
२१४.
214.
‘‘दुवे भवे पजायामि, देवत्ते अथ मानुसे।
‘‘Duve bhave pajāyāmi, devatte atha mānuse;
अञ्ञं गतिं न जानामि, कित्तनाय इदं फलं॥
Aññaṃ gatiṃ na jānāmi, kittanāya idaṃ phalaṃ.
२१५.
215.
‘‘दुवे कुले पजायामि, खत्तिये अथ ब्राह्मणे।
‘‘Duve kule pajāyāmi, khattiye atha brāhmaṇe;
नीचे कुले न जायामि, कित्तनाय इदं फलं॥
Nīce kule na jāyāmi, kittanāya idaṃ phalaṃ.
२१६.
216.
‘‘पच्छिमे च भवे दानि, गिरिब्बजपुरुत्तमे।
‘‘Pacchime ca bhave dāni, giribbajapuruttame;
रञ्ञोहं बिम्बिसारस्स, पुत्तो नामेन चाभयो॥
Raññohaṃ bimbisārassa, putto nāmena cābhayo.
२१७.
217.
‘‘पापमित्तवसं गन्त्वा, निगण्ठेन विमोहितो।
‘‘Pāpamittavasaṃ gantvā, nigaṇṭhena vimohito;
पेसितो नाटपुत्तेन, बुद्धसेट्ठमुपेच्चहं॥
Pesito nāṭaputtena, buddhaseṭṭhamupeccahaṃ.
२१८.
218.
‘‘पुच्छित्वा निपुणं पञ्हं, सुत्वा ब्याकरणुत्तमं।
‘‘Pucchitvā nipuṇaṃ pañhaṃ, sutvā byākaraṇuttamaṃ;
पब्बजित्वान नचिरं, अरहत्तमपापुणिं॥
Pabbajitvāna naciraṃ, arahattamapāpuṇiṃ.
२१९.
219.
‘‘कित्तयित्वा जिनवरं, कित्तितो होमि सब्बदा।
‘‘Kittayitvā jinavaraṃ, kittito homi sabbadā;
सुगन्धदेहवदनो, आसिं सुखसमप्पितो॥
Sugandhadehavadano, āsiṃ sukhasamappito.
२२०.
220.
‘‘तिक्खहासलहुपञ्ञो, महापञ्ञो तथेवहं।
‘‘Tikkhahāsalahupañño, mahāpañño tathevahaṃ;
विचित्तपटिभानो च, तस्स कम्मस्स वाहसा॥
Vicittapaṭibhāno ca, tassa kammassa vāhasā.
२२१.
221.
‘‘अभित्थवित्वा पदुमुत्तराहं, पसन्नचित्तो असमं सयम्भुं।
‘‘Abhitthavitvā padumuttarāhaṃ, pasannacitto asamaṃ sayambhuṃ;
न गच्छि कप्पानि अपायभूमिं, सतं सहस्सानि बलेन तस्स॥
Na gacchi kappāni apāyabhūmiṃ, sataṃ sahassāni balena tassa.
२२२.
222.
‘‘किलेसा झापिता मय्हं…पे॰… विहरामि अनासवो॥
‘‘Kilesā jhāpitā mayhaṃ…pe… viharāmi anāsavo.
२२३.
223.
‘‘स्वागतं वत मे आसि…पे॰… कतं बुद्धस्स सासनं॥
‘‘Svāgataṃ vata me āsi…pe… kataṃ buddhassa sāsanaṃ.
२२४.
224.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा अभयो थेरो इमा गाथायो
Itthaṃ sudaṃ āyasmā abhayo thero imā gāthāyo
अभासित्थाति।
Abhāsitthāti.
अभयत्थेरस्सापदानं सत्तमं।
Abhayattherassāpadānaṃ sattamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / ७. अभयत्थेरअपदानवण्णना • 7. Abhayattheraapadānavaṇṇanā
