| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၃. အဘိနန္ဒမာနသုတ္တံ
3. Abhinandamānasuttaṃ
၆၅. သာဝတ္ထိနိဒာနံ။ အထ ခော အညတရော ဘိက္ခု။ပေ.။ ဧကမန္တံ နိသိန္နော ခော သော ဘိက္ခု ဘဂဝန္တံ ဧတဒဝောစ – ‘‘သာဓု မေ, ဘန္တေ, ဘဂဝာ သံခိတ္တေန။ပေ.။ ပဟိတတ္တော ဝိဟရေယ္ယ’’န္တိ။ ‘‘အဘိနန္ဒမာနော ခော, ဘိက္ခု, ဗဒ္ဓော မာရသ္သ; အနဘိနန္ဒမာနော မုတ္တော ပာပိမတော’’တိ။ ‘‘အညာတံ ဘဂဝာ, အညာတံ သုဂတာ’’တိ။
65. Sāvatthinidānaṃ. Atha kho aññataro bhikkhu…pe… ekamantaṃ nisinno kho so bhikkhu bhagavantaṃ etadavoca – ‘‘sādhu me, bhante, bhagavā saṃkhittena…pe… pahitatto vihareyya’’nti. ‘‘Abhinandamāno kho, bhikkhu, baddho mārassa; anabhinandamāno mutto pāpimato’’ti. ‘‘Aññātaṃ bhagavā, aññātaṃ sugatā’’ti.
‘‘ယထာ ကထံ ပန တ္ဝံ, ဘိက္ခု, မယာ သံခိတ္တေန ဘာသိတသ္သ ဝိတ္ထာရေန အတ္ထံ အာဇာနာသီ’’တိ? ‘‘ရူပံ ခော, ဘန္တေ, အဘိနန္ဒမာနော ဗဒ္ဓော မာရသ္သ; အနဘိနန္ဒမာနော မုတ္တော ပာပိမတော။ ဝေဒနံ။ သညံ။ သင္ခာရေ။ ဝိညာဏံ အဘိနန္ဒမာနော ဗဒ္ဓော မာရသ္သ; အနဘိနန္ဒမာနော မုတ္တော ပာပိမတော။ ဣမသ္သ ခ္ဝာဟံ, ဘန္တေ, ဘဂဝတာ သံခိတ္တေန ဘာသိတသ္သ ဧဝံ ဝိတ္ထာရေန အတ္ထံ အာဇာနာမီ’’တိ။
‘‘Yathā kathaṃ pana tvaṃ, bhikkhu, mayā saṃkhittena bhāsitassa vitthārena atthaṃ ājānāsī’’ti? ‘‘Rūpaṃ kho, bhante, abhinandamāno baddho mārassa; anabhinandamāno mutto pāpimato. Vedanaṃ… saññaṃ… saṅkhāre… viññāṇaṃ abhinandamāno baddho mārassa; anabhinandamāno mutto pāpimato. Imassa khvāhaṃ, bhante, bhagavatā saṃkhittena bhāsitassa evaṃ vitthārena atthaṃ ājānāmī’’ti.
‘‘သာဓု သာဓု, ဘိက္ခု! သာဓု ခော တ္ဝံ, ဘိက္ခု, မယာ သံခိတ္တေန ဘာသိတသ္သ ဝိတ္ထာရေန အတ္ထံ အာဇာနာသိ။ ရူပံ ခော, ဘိက္ခု, အဘိနန္ဒမာနော ဗဒ္ဓော မာရသ္သ; အနဘိနန္ဒမာနော မုတ္တော ပာပိမတော။ ဝေဒနံ။ သညံ။ သင္ခာရေ ။ ဝိညာဏံ အဘိနန္ဒမာနော ဗဒ္ဓော မာရသ္သ; အနဘိနန္ဒမာနော မုတ္တော ပာပိမတော။ ဣမသ္သ ခော, ဘိက္ခု, မယာ သံခိတ္တေန ဘာသိတသ္သ ဧဝံ ဝိတ္ထာရေန အတ္ထော ဒဋ္ဌဗ္ဗော’’တိ။ပေ.။ အညတရော စ ပန သော ဘိက္ခု အရဟတံ အဟောသီတိ။ တတိယံ။
‘‘Sādhu sādhu, bhikkhu! Sādhu kho tvaṃ, bhikkhu, mayā saṃkhittena bhāsitassa vitthārena atthaṃ ājānāsi. Rūpaṃ kho, bhikkhu, abhinandamāno baddho mārassa; anabhinandamāno mutto pāpimato. Vedanaṃ… saññaṃ… saṅkhāre … viññāṇaṃ abhinandamāno baddho mārassa; anabhinandamāno mutto pāpimato. Imassa kho, bhikkhu, mayā saṃkhittena bhāsitassa evaṃ vitthārena attho daṭṭhabbo’’ti…pe… aññataro ca pana so bhikkhu arahataṃ ahosīti. Tatiyaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၃. အဘိနန္ဒမာနသုတ္တဝဏ္ဏနာ • 3. Abhinandamānasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၂-၆. မညမာနသုတ္တာဒိဝဏ္ဏနာ • 2-6. Maññamānasuttādivaṇṇanā
