| Library / Tipiṭaka / ತಿಪಿಟಕ • Tipiṭaka / ಪಟಿಸಮ್ಭಿದಾಮಗ್ಗಪಾಳಿ • Paṭisambhidāmaggapāḷi |
೩. ಅಭಿಸಮಯಕಥಾ
3. Abhisamayakathā
೧೯. ಅಭಿಸಮಯೋತಿ । ಕೇನ ಅಭಿಸಮೇತಿ? ಚಿತ್ತೇನ ಅಭಿಸಮೇತಿ।
19.Abhisamayoti . Kena abhisameti? Cittena abhisameti.
ಹಞ್ಚಿ ಚಿತ್ತೇನ ಅಭಿಸಮೇತಿ, ತೇನ ಹಿ ಅಞ್ಞಾಣೀ ಅಭಿಸಮೇತಿ? ನ ಅಞ್ಞಾಣೀ ಅಭಿಸಮೇತಿ। ಞಾಣೇನ ಅಭಿಸಮೇತಿ।
Hañci cittena abhisameti, tena hi aññāṇī abhisameti? Na aññāṇī abhisameti. Ñāṇena abhisameti.
ಹಞ್ಚಿ ಞಾಣೇನ ಅಭಿಸಮೇತಿ, ತೇನ ಹಿ ಅಚಿತ್ತೇನ ಚ ಞಾಣೇನ ಚ ಅಚಿತ್ತಕೋ 1 ಅಭಿಸಮೇತಿ? ನ ಅಚಿತ್ತಕೋ ಅಭಿಸಮೇತಿ। ಚಿತ್ತೇನ ಚ ಞಾಣೇನ ಚ ಅಭಿಸಮೇತಿ।
Hañci ñāṇena abhisameti, tena hi acittena ca ñāṇena ca acittako 2 abhisameti? Na acittako abhisameti. Cittena ca ñāṇena ca abhisameti.
ಹಞ್ಚಿ ಚಿತ್ತೇನ ಚ ಞಾಣೇನ ಚ ಅಭಿಸಮೇತಿ, ತೇನ ಹಿ ಕಾಮಾವಚರಚಿತ್ತೇನ ಚ ಞಾಣೇನ ಚ ಅಭಿಸಮೇತಿ? ನ ಕಾಮಾವಚರಚಿತ್ತೇನ ಚ ಞಾಣೇನ ಚ ಅಭಿಸಮೇತಿ।
Hañci cittena ca ñāṇena ca abhisameti, tena hi kāmāvacaracittena ca ñāṇena ca abhisameti? Na kāmāvacaracittena ca ñāṇena ca abhisameti.
ತೇನ ಹಿ ರೂಪಾವಚರಚಿತ್ತೇನ ಚ ಞಾಣೇನ ಚ ಅಭಿಸಮೇತಿ? ನ ರೂಪಾವಚರಚಿತ್ತೇನ ಚ ಞಾಣೇನ ಚ ಅಭಿಸಮೇತಿ।
Tena hi rūpāvacaracittena ca ñāṇena ca abhisameti? Na rūpāvacaracittena ca ñāṇena ca abhisameti.
ತೇನ ಹಿ ಅರೂಪಾವಚರಚಿತ್ತೇನ ಚ ಞಾಣೇನ ಚ ಅಭಿಸಮೇತಿ? ನ ಅರೂಪಾವಚರಚಿತ್ತೇನ ಚ ಞಾಣೇನ ಚ ಅಭಿಸಮೇತಿ।
Tena hi arūpāvacaracittena ca ñāṇena ca abhisameti? Na arūpāvacaracittena ca ñāṇena ca abhisameti.
ತೇನ ಹಿ ಕಮ್ಮಸ್ಸಕತಚಿತ್ತೇನ ಚ ಞಾಣೇನ ಚ ಅಭಿಸಮೇತಿ? ನ ಕಮ್ಮಸ್ಸಕತಚಿತ್ತೇನ ಚ ಞಾಣೇನ ಚ ಅಭಿಸಮೇತಿ।
Tena hi kammassakatacittena ca ñāṇena ca abhisameti? Na kammassakatacittena ca ñāṇena ca abhisameti.
ತೇನ ಹಿ ಸಚ್ಚಾನುಲೋಮಿಕಚಿತ್ತೇನ ಚ ಞಾಣೇನ ಚ ಅಭಿಸಮೇತಿ? ನ ಸಚ್ಚಾನುಲೋಮಿಕಚಿತ್ತೇನ ಚ ಞಾಣೇನ ಚ ಅಭಿಸಮೇತಿ।
Tena hi saccānulomikacittena ca ñāṇena ca abhisameti? Na saccānulomikacittena ca ñāṇena ca abhisameti.
ತೇನ ಹಿ ಅತೀತಚಿತ್ತೇನ ಚ ಞಾಣೇನ ಚ ಅಭಿಸಮೇತಿ? ನ ಅತೀತಚಿತ್ತೇನ ಚ ಞಾಣೇನ ಚ ಅಭಿಸಮೇತಿ।
Tena hi atītacittena ca ñāṇena ca abhisameti? Na atītacittena ca ñāṇena ca abhisameti.
ತೇನ ಹಿ ಅನಾಗತಚಿತ್ತೇನ ಚ ಞಾಣೇನ ಚ ಅಭಿಸಮೇತಿ? ನ ಅನಾಗತಚಿತ್ತೇನ ಚ ಞಾಣೇನ ಚ ಅಭಿಸಮೇತಿ।
Tena hi anāgatacittena ca ñāṇena ca abhisameti? Na anāgatacittena ca ñāṇena ca abhisameti.
ತೇನ ಹಿ ಪಚ್ಚುಪ್ಪನ್ನಲೋಕಿಯಚಿತ್ತೇನ ಚ ಞಾಣೇನ ಚ ಅಭಿಸಮೇತಿ? ನ ಪಚ್ಚುಪ್ಪನ್ನಲೋಕಿಯಚಿತ್ತೇನ ಚ ಞಾಣೇನ ಚ ಅಭಿಸಮೇತಿ। ಲೋಕುತ್ತರಮಗ್ಗಕ್ಖಣೇ ಪಚ್ಚುಪ್ಪನ್ನಚಿತ್ತೇನ ಚ ಞಾಣೇನ ಚ ಅಭಿಸಮೇತಿ।
Tena hi paccuppannalokiyacittena ca ñāṇena ca abhisameti? Na paccuppannalokiyacittena ca ñāṇena ca abhisameti. Lokuttaramaggakkhaṇe paccuppannacittena ca ñāṇena ca abhisameti.
ಕಥಂ ಲೋಕುತ್ತರಮಗ್ಗಕ್ಖಣೇ ಪಚ್ಚುಪ್ಪನ್ನಚಿತ್ತೇನ ಚ ಞಾಣೇನ ಚ ಅಭಿಸಮೇತಿ? ಲೋಕುತ್ತರಮಗ್ಗಕ್ಖಣೇ ಉಪ್ಪಾದಾಧಿಪತೇಯ್ಯಂ ಚಿತ್ತಂ ಞಾಣಸ್ಸ ಹೇತು ಪಚ್ಚಯೋ ಚ। ತಂಸಮ್ಪಯುತ್ತಂ ನಿರೋಧಗೋಚರಂ ದಸ್ಸನಾಧಿಪತೇಯ್ಯಂ ಞಾಣಂ ಚಿತ್ತಸ್ಸ ಹೇತು ಪಚ್ಚಯೋ ಚ। ತಂಸಮ್ಪಯುತ್ತಂ ಞಾಣಂ ನಿರೋಧಗೋಚರಂ। ಏವಂ ಲೋಕುತ್ತರಮಗ್ಗಕ್ಖಣೇ ಪಚ್ಚುಪ್ಪನ್ನಚಿತ್ತೇನ ಚ ಞಾಣೇನ ಚ ಅಭಿಸಮೇತಿ।
Kathaṃ lokuttaramaggakkhaṇe paccuppannacittena ca ñāṇena ca abhisameti? Lokuttaramaggakkhaṇe uppādādhipateyyaṃ cittaṃ ñāṇassa hetu paccayo ca. Taṃsampayuttaṃ nirodhagocaraṃ dassanādhipateyyaṃ ñāṇaṃ cittassa hetu paccayo ca. Taṃsampayuttaṃ ñāṇaṃ nirodhagocaraṃ. Evaṃ lokuttaramaggakkhaṇe paccuppannacittena ca ñāṇena ca abhisameti.
೨೦. ಕಿಂ ನು ಏತ್ತಕೋಯೇವ ಅಭಿಸಮಯೋತಿ? ನ ಹಿ। ಲೋಕುತ್ತರಮಗ್ಗಕ್ಖಣೇ ದಸ್ಸನಾಭಿಸಮಯೋ ಸಮ್ಮಾದಿಟ್ಠಿ, ಅಭಿನಿರೋಪನಾಭಿಸಮಯೋ ಸಮ್ಮಾಸಙ್ಕಪ್ಪೋ, ಪರಿಗ್ಗಹಾಭಿಸಮಯೋ ಸಮ್ಮಾವಾಚಾ, ಸಮುಟ್ಠಾನಾಭಿಸಮಯೋ ಸಮ್ಮಾಕಮ್ಮನ್ತೋ, ವೋದಾನಾಭಿಸಮಯೋ ಸಮ್ಮಾಆಜೀವೋ, ಪಗ್ಗಹಾಭಿಸಮಯೋ ಸಮ್ಮಾವಾಯಾಮೋ, ಉಪಟ್ಠಾನಾಭಿಸಮಯೋ ಸಮ್ಮಾಸತಿ, ಅವಿಕ್ಖೇಪಾಭಿಸಮಯೋ ಸಮ್ಮಾಸಮಾಧಿ; ಉಪಟ್ಠಾನಾಭಿಸಮಯೋ ಸತಿಸಮ್ಬೋಜ್ಝಙ್ಗೋ, ಪವಿಚಯಾಭಿಸಮಯೋ ಧಮ್ಮವಿಚಯಸಮ್ಬೋಜ್ಝಙ್ಗೋ, ಪಗ್ಗಹಾಭಿಸಮಯೋ ವೀರಿಯಸಮ್ಬೋಜ್ಝಙ್ಗೋ, ಫರಣಾಭಿಸಮಯೋ ಪೀತಿಸಮ್ಬೋಜ್ಝಙ್ಗೋ, ಉಪಸಮಾಭಿಸಮಯೋ ಪಸ್ಸದ್ಧಿಸಮ್ಬೋಜ್ಝಙ್ಗೋ, ಅವಿಕ್ಖೇಪಾಭಿಸಮಯೋ ಸಮಾಧಿಸಮ್ಬೋಜ್ಝಙ್ಗೋ, ಪಟಿಸಙ್ಖಾನಾಭಿಸಮಯೋ ಉಪೇಕ್ಖಾಸಮ್ಬೋಜ್ಝಙ್ಗೋ; ಅಸ್ಸದ್ಧಿಯೇ ಅಕಮ್ಪಿಯಾಭಿಸಮಯೋ ಸದ್ಧಾಬಲಂ, ಕೋಸಜ್ಜೇ ಅಕಮ್ಪಿಯಾಭಿಸಮಯೋ ವೀರಿಯಬಲಂ, ಪಮಾದೇ ಅಕಮ್ಪಿಯಾಭಿಸಮಯೋ ಸತಿಬಲಂ, ಉದ್ಧಚ್ಚೇ ಅಕಮ್ಪಿಯಾಭಿಸಮಯೋ ಸಮಾಧಿಬಲಂ, ಅವಿಜ್ಜಾಯ ಅಕಮ್ಪಿಯಾಭಿಸಮಯೋ ಪಞ್ಞಾಬಲಂ; ಅಧಿಮೋಕ್ಖಾಭಿಸಮಯೋ ಸದ್ಧಿನ್ದ್ರಿಯಂ, ಪಗ್ಗಹಾಭಿಸಮಯೋ ವೀರಿಯಿನ್ದ್ರಿಯಂ, ಉಪಟ್ಠಾನಾಭಿಸಮಯೋ ಸತಿನ್ದ್ರಿಯಂ, ಅವಿಕ್ಖೇಪಾಭಿಸಮಯೋ ಸಮಾಧಿನ್ದ್ರಿಯಂ, ದಸ್ಸನಾಭಿಸಮಯೋ ಪಞ್ಞಿನ್ದ್ರಿಯಂ। ಆಧಿಪತೇಯ್ಯಟ್ಠೇನ ಇನ್ದ್ರಿಯಾಭಿಸಮಯೋ, ಅಕಮ್ಪಿಯಟ್ಠೇನ ಬಲಾಭಿಸಮಯೋ, ನಿಯ್ಯಾನಟ್ಠೇನ ಬೋಜ್ಝಙ್ಗಾಭಿಸಮಯೋ, ಹೇತುಟ್ಠೇನ ಮಗ್ಗಾಭಿಸಮಯೋ, ಉಪಟ್ಠಾನಟ್ಠೇನ ಸತಿಪಟ್ಠಾನಾಭಿಸಮಯೋ, ಪದಹಟ್ಠೇನ ಸಮ್ಮಪ್ಪಧಾನಾಭಿಸಮಯೋ , ಇಜ್ಝನಟ್ಠೇನ ಇದ್ಧಿಪಾದಾಭಿಸಮಯೋ, ತಥಟ್ಠೇನ ಸಚ್ಚಾಭಿಸಮಯೋ, ಅವಿಕ್ಖೇಪಟ್ಠೇನ ಸಮಥಾಭಿಸಮಯೋ, ಅನುಪಸ್ಸನಟ್ಠೇನ ವಿಪಸ್ಸನಾಭಿಸಮಯೋ, ಏಕರಸಟ್ಠೇನ ಸಮಥವಿಪಸ್ಸನಾಭಿಸಮಯೋ, ಅನತಿವತ್ತನಟ್ಠೇನ ಯುಗನದ್ಧಾಭಿಸಮಯೋ, ಸಂವರಟ್ಠೇನ ಸೀಲವಿಸುದ್ಧಿಅಭಿಸಮಯೋ, ಅವಿಕ್ಖೇಪಟ್ಠೇನ ವಿಸುದ್ಧಿಅಭಿಸಮಯೋ, ದಸ್ಸನಟ್ಠೇನ ದಿಟ್ಠಿವಿಸುದ್ಧಿಅಭಿಸಮಯೋ, ಮುತ್ತಟ್ಠೇನ ವಿಮೋಕ್ಖಾಭಿಸಮಯೋ, ಪಟಿವೇಧಟ್ಠೇನ ವಿಜ್ಜಾಭಿಸಮಯೋ, ಪರಿಚ್ಚಾಗಟ್ಠೇನ ವಿಮುತ್ತಿಅಭಿಸಮಯೋ, ಸಮುಚ್ಛೇದಟ್ಠೇನ ಖಯೇ ಞಾಣಂ ಅಭಿಸಮಯೋ। ಛನ್ದೋ ಮೂಲಟ್ಠೇನ ಅಭಿಸಮಯೋ, ಮನಸಿಕಾರೋ ಸಮುಟ್ಠಾನಟ್ಠೇನ ಅಭಿಸಮಯೋ, ಫಸ್ಸೋ ಸಮೋಧಾನಟ್ಠೇನ ಅಭಿಸಮಯೋ, ವೇದನಾ ಸಮೋಸರಣಟ್ಠೇನ ಅಭಿಸಮಯೋ, ಸಮಾಧಿ ಪಮುಖಟ್ಠೇನ ಅಭಿಸಮಯೋ , ಸತಿ ಆಧಿಪತೇಯ್ಯಟ್ಠೇನ ಅಭಿಸಮಯೋ, ಪಞ್ಞಾ ತತುತ್ತರಟ್ಠೇನ ಅಭಿಸಮಯೋ, ವಿಮುತ್ತಿ ಸಾರಟ್ಠೇನ ಅಭಿಸಮಯೋ, ಅಮತೋಗಧಂ ನಿಬ್ಬಾನಂ ಪರಿಯೋಸಾನಟ್ಠೇನ ಅಭಿಸಮಯೋ।
20.Kiṃnu ettakoyeva abhisamayoti? Na hi.Lokuttaramaggakkhaṇe dassanābhisamayo sammādiṭṭhi, abhiniropanābhisamayo sammāsaṅkappo, pariggahābhisamayo sammāvācā, samuṭṭhānābhisamayo sammākammanto, vodānābhisamayo sammāājīvo, paggahābhisamayo sammāvāyāmo, upaṭṭhānābhisamayo sammāsati, avikkhepābhisamayo sammāsamādhi; upaṭṭhānābhisamayo satisambojjhaṅgo, pavicayābhisamayo dhammavicayasambojjhaṅgo, paggahābhisamayo vīriyasambojjhaṅgo, pharaṇābhisamayo pītisambojjhaṅgo, upasamābhisamayo passaddhisambojjhaṅgo, avikkhepābhisamayo samādhisambojjhaṅgo, paṭisaṅkhānābhisamayo upekkhāsambojjhaṅgo; assaddhiye akampiyābhisamayo saddhābalaṃ, kosajje akampiyābhisamayo vīriyabalaṃ, pamāde akampiyābhisamayo satibalaṃ, uddhacce akampiyābhisamayo samādhibalaṃ, avijjāya akampiyābhisamayo paññābalaṃ; adhimokkhābhisamayo saddhindriyaṃ, paggahābhisamayo vīriyindriyaṃ, upaṭṭhānābhisamayo satindriyaṃ, avikkhepābhisamayo samādhindriyaṃ, dassanābhisamayo paññindriyaṃ. Ādhipateyyaṭṭhena indriyābhisamayo, akampiyaṭṭhena balābhisamayo, niyyānaṭṭhena bojjhaṅgābhisamayo, hetuṭṭhena maggābhisamayo, upaṭṭhānaṭṭhena satipaṭṭhānābhisamayo, padahaṭṭhena sammappadhānābhisamayo , ijjhanaṭṭhena iddhipādābhisamayo, tathaṭṭhena saccābhisamayo, avikkhepaṭṭhena samathābhisamayo, anupassanaṭṭhena vipassanābhisamayo, ekarasaṭṭhena samathavipassanābhisamayo, anativattanaṭṭhena yuganaddhābhisamayo, saṃvaraṭṭhena sīlavisuddhiabhisamayo, avikkhepaṭṭhena visuddhiabhisamayo, dassanaṭṭhena diṭṭhivisuddhiabhisamayo, muttaṭṭhena vimokkhābhisamayo, paṭivedhaṭṭhena vijjābhisamayo, pariccāgaṭṭhena vimuttiabhisamayo, samucchedaṭṭhena khaye ñāṇaṃ abhisamayo. Chando mūlaṭṭhena abhisamayo, manasikāro samuṭṭhānaṭṭhena abhisamayo, phasso samodhānaṭṭhena abhisamayo, vedanā samosaraṇaṭṭhena abhisamayo, samādhi pamukhaṭṭhena abhisamayo , sati ādhipateyyaṭṭhena abhisamayo, paññā tatuttaraṭṭhena abhisamayo, vimutti sāraṭṭhena abhisamayo, amatogadhaṃ nibbānaṃ pariyosānaṭṭhena abhisamayo.
೨೧. ಕಿಂ ನು ಏತ್ತಕೋಯೇವ ಅಭಿಸಮಯೋತಿ? ನ ಹಿ। ಸೋತಾಪತ್ತಿಮಗ್ಗಕ್ಖಣೇ ದಸ್ಸನಾಭಿಸಮಯೋ ಸಮ್ಮಾದಿಟ್ಠಿ…ಪೇ॰… ಅಮತೋಗಧಂ ನಿಬ್ಬಾನಂ ಪರಿಯೋಸಾನಟ್ಠೇನ ಅಭಿಸಮಯೋ।
21. Kiṃ nu ettakoyeva abhisamayoti? Na hi. Sotāpattimaggakkhaṇe dassanābhisamayo sammādiṭṭhi…pe… amatogadhaṃ nibbānaṃ pariyosānaṭṭhena abhisamayo.
ಕಿಂ ನು ಏತ್ತಕೋಯೇವ ಅಭಿಸಮಯೋತಿ? ನ ಹಿ। ಸೋತಾಪತ್ತಿಫಲಕ್ಖಣೇ ದಸ್ಸನಾಭಿಸಮಯೋ ಸಮ್ಮಾದಿಟ್ಠಿ…ಪೇ॰… ಪಟಿಪ್ಪಸ್ಸದ್ಧಟ್ಠೇನ ಅನುಪ್ಪಾದೇ ಞಾಣಂ ಅಭಿಸಮಯೋ। ಛನ್ದೋ ಮೂಲಟ್ಠೇನ ಅಭಿಸಮಯೋ…ಪೇ॰… ಅಮತೋಗಧಂ ೫ ನಿಬ್ಬಾನಂ ಪರಿಯೋಸಾನಟ್ಠೇನ ಅಭಿಸಮಯೋ।
Kiṃ nu ettakoyeva abhisamayoti? Na hi. Sotāpattiphalakkhaṇe dassanābhisamayo sammādiṭṭhi…pe… paṭippassaddhaṭṭhena anuppāde ñāṇaṃ abhisamayo. Chando mūlaṭṭhena abhisamayo…pe… amatogadhaṃ 5 nibbānaṃ pariyosānaṭṭhena abhisamayo.
ಕಿಂ ನು ಏತ್ತಕೋಯೇವ ಅಭಿಸಮಯೋತಿ?
Kiṃ nu ettakoyeva abhisamayoti?
ನ ಹಿ। ಸಕದಾಗಾಮಿಮಗ್ಗಕ್ಖಣೇ…ಪೇ॰… ಸಕದಾಗಾಮಿಫಲಕ್ಖಣೇ… ಅನಾಗಾಮಿಮಗ್ಗಕ್ಖಣೇ… ಅನಾಗಾಮಿಫಲಕ್ಖಣೇ… ಅರಹತ್ತಮಗ್ಗಕ್ಖಣೇ…ಪೇ॰… ಅರಹತ್ತಫಲಕ್ಖಣೇ ದಸ್ಸನಾಭಿಸಮಯೋ ಸಮ್ಮಾದಿಟ್ಠಿ, ಅಭಿನಿರೋಪನಾಭಿಸಮಯೋ ಸಮ್ಮಾಸಙ್ಕಪ್ಪೋ…ಪೇ॰… ಪಟಿಪ್ಪಸ್ಸದ್ಧಟ್ಠೇನ ಅನುಪ್ಪಾದೇ ಞಾಣಂ ಅಭಿಸಮಯೋ। ಛನ್ದೋ ಮೂಲಟ್ಠೇನ ಅಭಿಸಮಯೋ…ಪೇ॰… ಅಮತೋಗಧಂ ನಿಬ್ಬಾನಂ ಪರಿಯೋಸಾನಟ್ಠೇನ ಅಭಿಸಮಯೋ।
Na hi. Sakadāgāmimaggakkhaṇe…pe… sakadāgāmiphalakkhaṇe… anāgāmimaggakkhaṇe… anāgāmiphalakkhaṇe… arahattamaggakkhaṇe…pe… arahattaphalakkhaṇe dassanābhisamayo sammādiṭṭhi, abhiniropanābhisamayo sammāsaṅkappo…pe… paṭippassaddhaṭṭhena anuppāde ñāṇaṃ abhisamayo. Chando mūlaṭṭhena abhisamayo…pe… amatogadhaṃ nibbānaṃ pariyosānaṭṭhena abhisamayo.
ಯ್ವಾಯಂ 3 ಕಿಲೇಸೇ ಪಜಹತಿ, ಅತೀತೇ ಕಿಲೇಸೇ ಪಜಹತಿ…ಪೇ॰… ಅನಾಗತೇ ಕಿಲೇಸೇ ಪಜಹತಿ, ಪಚ್ಚುಪ್ಪನ್ನೇ ಕಿಲೇಸೇ ಪಜಹತಿ, ಅತೀತೇ ಕಿಲೇಸೇ ಪಜಹತೀತಿ। ಹಞ್ಚಿ ಅತೀತೇ ಕಿಲೇಸೇ ಪಜಹತಿ, ತೇನ ಹಿ ಖೀಣಂ ಖೇಪೇತಿ, ನಿರುದ್ಧಂ ನಿರೋಧೇತಿ, ವಿಗತಂ ವಿಗಮೇತಿ, ಅತ್ಥಙ್ಗತಂ ಅತ್ಥಙ್ಗಮೇತಿ, ಅತೀತಂ ಯಂ ನ ಅತ್ಥಿ ತಂ ಪಜಹತೀತಿ? ನ ಅತೀತೇ ಕಿಲೇಸೇ ಪಜಹತೀತಿ। ಅನಾಗತೇ ಕಿಲೇಸೇ ಪಜಹತೀತಿ। ಹಞ್ಚಿ ಅನಾಗತೇ ಕಿಲೇಸೇ ಪಜಹತಿ, ತೇನ ಹಿ ಅಜಾತಂ ಪಜಹತಿ, ಅನಿಬ್ಬತ್ತಂ ಪಜಹತಿ, ಅನುಪ್ಪನ್ನಂ ಪಜಹತಿ, ಅಪಾತುಭೂತಂ ಪಜಹತಿ, ಅನಾಗತಂ ಯಂ ನ ಅತ್ಥಿ ತಂ ಪಜಹತೀತಿ? ನ ಅನಾಗತೇ ಕಿಲೇಸೇ ಪಜಹತೀತಿ। ಪಚ್ಚುಪ್ಪನ್ನೇ ಕಿಲೇಸೇ ಪಜಹತೀತಿ। ಹಞ್ಚಿ ಪಚ್ಚುಪ್ಪನ್ನೇ ಕಿಲೇಸೇ ಪಜಹತಿ, ತೇನ ಹಿ ರತ್ತೋ ರಾಗಂ ಪಜಹತಿ, ದುಟ್ಠೋ ದೋಸಂ ಪಜಹತಿ, ಮೂಳ್ಹೋ ಮೋಹಂ ಪಜಹತಿ, ವಿನಿಬದ್ಧೋ ಮಾನಂ ಪಜಹತಿ, ಪರಾಮಟ್ಠೋ ದಿಟ್ಠಿಂ ಪಜಹತಿ ,
Yvāyaṃ 4 kilese pajahati, atīte kilese pajahati…pe… anāgate kilese pajahati, paccuppanne kilese pajahati, atīte kilese pajahatīti. Hañci atīte kilese pajahati, tena hi khīṇaṃ khepeti, niruddhaṃ nirodheti, vigataṃ vigameti, atthaṅgataṃ atthaṅgameti, atītaṃ yaṃ na atthi taṃ pajahatīti? Na atīte kilese pajahatīti. Anāgate kilese pajahatīti. Hañci anāgate kilese pajahati, tena hi ajātaṃ pajahati, anibbattaṃ pajahati, anuppannaṃ pajahati, apātubhūtaṃ pajahati, anāgataṃ yaṃ na atthi taṃ pajahatīti? Na anāgate kilese pajahatīti. Paccuppanne kilese pajahatīti. Hañci paccuppanne kilese pajahati, tena hi ratto rāgaṃ pajahati, duṭṭho dosaṃ pajahati, mūḷho mohaṃ pajahati, vinibaddho mānaṃ pajahati, parāmaṭṭho diṭṭhiṃ pajahati ,
ವಿಕ್ಖೇಪಗತೋ ಉದ್ಧಚ್ಚಂ ಪಜಹತಿ, ಅನಿಟ್ಠಙ್ಗತೋ ವಿಚಿಕಿಚ್ಛಂ ಪಜಹತಿ, ಥಾಮಗತೋ ಅನುಸಯಂ ಪಜಹತಿ, ಕಣ್ಹಸುಕ್ಕಧಮ್ಮಾ ಯುಗನದ್ಧಾ ಸಮಮೇವ ವತ್ತನ್ತಿ, ಸಂಕಿಲೇಸಿಕಾ 5 ಮಗ್ಗಭಾವನಾ ಹೋತಿ?
Vikkhepagato uddhaccaṃ pajahati, aniṭṭhaṅgato vicikicchaṃ pajahati, thāmagato anusayaṃ pajahati, kaṇhasukkadhammā yuganaddhā samameva vattanti, saṃkilesikā 6 maggabhāvanā hoti?
ನ ಹಿ ಅತೀತೇ ಕಿಲೇಸೇ ಪಜಹತಿ, ನ ಅನಾಗತೇ ಕಿಲೇಸೇ ಪಜಹತಿ, ನ ಪಚ್ಚುಪ್ಪನ್ನೇ ಕಿಲೇಸೇ ಪಜಹತೀತಿ। ಹಞ್ಚಿ ನ ಅತೀತೇ ಕಿಲೇಸೇ ಪಜಹತಿ, ನ ಅನಾಗತೇ…ಪೇ॰… ನ ಪಚ್ಚುಪ್ಪನ್ನೇ ಕಿಲೇಸೇ ಪಜಹತಿ, ತೇನ ಹಿ ನತ್ಥಿ ಮಗ್ಗಭಾವನಾ, ನತ್ಥಿ ಫಲಸಚ್ಛಿಕಿರಿಯಾ, ನತ್ಥಿ ಕಿಲೇಸಪ್ಪಹಾನಂ, ನತ್ಥಿ ಧಮ್ಮಾಭಿಸಮಯೋತಿ? ಅತ್ಥಿ ಮಗ್ಗಭಾವನಾ, ಅತ್ಥಿ ಫಲಸಚ್ಛಿಕಿರಿಯಾ, ಅತ್ಥಿ ಕಿಲೇಸಪ್ಪಹಾನಂ, ಅತ್ಥಿ ಧಮ್ಮಾಭಿಸಮಯೋ। ಯಥಾ ಕಥಂ ವಿಯ? ಸೇಯ್ಯಥಾಪಿ ತರುಣೋ ರುಕ್ಖೋ ಅಜಾತಫಲೋ। ತಮೇನಂ ಪುರಿಸೋ ಮೂಲಂ ಛಿನ್ದೇಯ್ಯ। ಯೇ ತಸ್ಸ ರುಕ್ಖಸ್ಸ ಅಜಾತಫಲಾ, ತೇ ಅಜಾತಾಯೇವ ನ ಜಾಯನ್ತಿ, ಅನಿಬ್ಬತ್ತಾಯೇವ ನ ನಿಬ್ಬತ್ತನ್ತಿ, ಅನುಪ್ಪನ್ನಾಯೇವ ನ ಉಪ್ಪಜ್ಜನ್ತಿ, ಅಪಾತುಭೂತಾಯೇವ ನ ಪಾತುಭವನ್ತಿ। ಏವಮೇವಂ ಉಪ್ಪಾದೋ ಹೇತು, ಉಪ್ಪಾದೋ ಪಚ್ಚಯೋ ಕಿಲೇಸಾನಂ ನಿಬ್ಬತ್ತಿಯಾತಿ। ಉಪ್ಪಾದೇ ಆದೀನವಂ ದಿಸ್ವಾ ಅನುಪ್ಪಾದೇ ಚಿತ್ತಂ ಪಕ್ಖನ್ದತಿ। ಅನುಪ್ಪಾದೇ ಚಿತ್ತಸ್ಸ ಪಕ್ಖನ್ದತ್ತಾ ಯೇ ಉಪ್ಪಾದಪಚ್ಚಯಾ ಕಿಲೇಸಾ ನಿಬ್ಬತ್ತೇಯ್ಯುಂ, ತೇ ಅಜಾತಾಯೇವ ನ ಜಾಯನ್ತಿ, ಅನಿಬ್ಬತ್ತಾಯೇವ ನ ನಿಬ್ಬತ್ತನ್ತಿ, ಅನುಪ್ಪನ್ನಾಯೇವ ನ ಉಪ್ಪಜ್ಜನ್ತಿ, ಅಪಾತುಭೂತಾಯೇವ ನ ಪಾತುಭವನ್ತಿ। ಏವಂ ಹೇತುನಿರೋಧಾ ದುಕ್ಖನಿರೋಧೋ। ಪವತ್ತಂ ಹೇತು, ನಿಮಿತ್ತಂ ಹೇತು, ಆಯೂಹನಾ ಹೇತು। ಆಯೂಹನಾ ಪಚ್ಚಯೋ ಕಿಲೇಸಾನಂ ನಿಬ್ಬತ್ತಿಯಾತಿ। ಆಯೂಹನೇ ಆದೀನವಂ ದಿಸ್ವಾ ಅನಾಯೂಹನೇ ಚಿತ್ತಂ ಪಕ್ಖನ್ದತಿ। ಅನಾಯೂಹನೇ ಚಿತ್ತಸ್ಸ ಪಕ್ಖನ್ದತ್ತಾ, ಯೇ ಆಯೂಹನಪಚ್ಚಯಾ ಕಿಲೇಸಾ ನಿಬ್ಬತ್ತೇಯ್ಯುಂ, ತೇ ಅಜಾತಾಯೇವ ನ ಜಾಯನ್ತಿ, ಅನಿಬ್ಬತ್ತಾಯೇವ ನ ನಿಬ್ಬತ್ತನ್ತಿ, ಅನುಪ್ಪನ್ನಾಯೇವ ನ ಉಪ್ಪಜ್ಜನ್ತಿ, ಅಪಾತುಭೂತಾಯೇವ ನ ಪಾತುಭವನ್ತಿ। ಏವಂ ಹೇತುನಿರೋಧಾ ದುಕ್ಖನಿರೋಧೋ। ಏವಂ ಅತ್ಥಿ ಮಗ್ಗಭಾವನಾ, ಅತ್ಥಿ ಫಲಸಚ್ಛಿಕಿರಿಯಾ, ಅತ್ಥಿ ಕಿಲೇಸಪ್ಪಹಾನಂ, ಅತ್ಥಿ ಧಮ್ಮಾಭಿಸಮಯೋತಿ।
Na hi atīte kilese pajahati, na anāgate kilese pajahati, na paccuppanne kilese pajahatīti. Hañci na atīte kilese pajahati, na anāgate…pe… na paccuppanne kilese pajahati, tena hi natthi maggabhāvanā, natthi phalasacchikiriyā, natthi kilesappahānaṃ, natthi dhammābhisamayoti? Atthi maggabhāvanā, atthi phalasacchikiriyā, atthi kilesappahānaṃ, atthi dhammābhisamayo. Yathā kathaṃ viya? Seyyathāpi taruṇo rukkho ajātaphalo. Tamenaṃ puriso mūlaṃ chindeyya. Ye tassa rukkhassa ajātaphalā, te ajātāyeva na jāyanti, anibbattāyeva na nibbattanti, anuppannāyeva na uppajjanti, apātubhūtāyeva na pātubhavanti. Evamevaṃ uppādo hetu, uppādo paccayo kilesānaṃ nibbattiyāti. Uppāde ādīnavaṃ disvā anuppāde cittaṃ pakkhandati. Anuppāde cittassa pakkhandattā ye uppādapaccayā kilesā nibbatteyyuṃ, te ajātāyeva na jāyanti, anibbattāyeva na nibbattanti, anuppannāyeva na uppajjanti, apātubhūtāyeva na pātubhavanti. Evaṃ hetunirodhā dukkhanirodho. Pavattaṃ hetu, nimittaṃ hetu, āyūhanā hetu. Āyūhanā paccayo kilesānaṃ nibbattiyāti. Āyūhane ādīnavaṃ disvā anāyūhane cittaṃ pakkhandati. Anāyūhane cittassa pakkhandattā, ye āyūhanapaccayā kilesā nibbatteyyuṃ, te ajātāyeva na jāyanti, anibbattāyeva na nibbattanti, anuppannāyeva na uppajjanti, apātubhūtāyeva na pātubhavanti. Evaṃ hetunirodhā dukkhanirodho. Evaṃ atthi maggabhāvanā, atthi phalasacchikiriyā, atthi kilesappahānaṃ, atthi dhammābhisamayoti.
ಅಭಿಸಮಯಕಥಾ ನಿಟ್ಠಿತಾ।
Abhisamayakathā niṭṭhitā.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಪಟಿಸಮ್ಭಿದಾಮಗ್ಗ-ಅಟ್ಠಕಥಾ • Paṭisambhidāmagga-aṭṭhakathā / ಅಭಿಸಮಯಕಥಾವಣ್ಣನಾ • Abhisamayakathāvaṇṇanā
