| Library / Tipiṭaka / തിപിടക • Tipiṭaka / കഥാവത്ഥുപാളി • Kathāvatthupāḷi |
൧൪. ചുദ്ദസമവഗ്ഗോ
14. Cuddasamavaggo
(൧൪൩) ൮. അബ്യാകതകഥാ
(143) 8. Abyākatakathā
൭൦൬. ദിട്ഠിഗതം അബ്യാകതന്തി? ആമന്താ. വിപാകാബ്യാകതം കിരിയാബ്യാകതം രൂപം നിബ്ബാനം ചക്ഖായതനം…പേ॰… ഫോട്ഠബ്ബായതനന്തി? ന ഹേവം വത്തബ്ബേ…പേ॰… ദിട്ഠിഗതം അബ്യാകതന്തി? ആമന്താ. ദിട്ഠിഗതസമ്പയുത്തോ ഫസ്സോ അബ്യാകതോതി? ന ഹേവം വത്തബ്ബേ…പേ॰… ദിട്ഠിഗതം അബ്യാകതന്തി? ആമന്താ. ദിട്ഠിഗതസമ്പയുത്താ വേദനാ…പേ॰… സഞ്ഞാ…പേ॰… ചേതനാ…പേ॰… ചിത്തം അബ്യാകതന്തി? ന ഹേവം വത്തബ്ബേ…പേ॰….
706. Diṭṭhigataṃ abyākatanti? Āmantā. Vipākābyākataṃ kiriyābyākataṃ rūpaṃ nibbānaṃ cakkhāyatanaṃ…pe… phoṭṭhabbāyatananti? Na hevaṃ vattabbe…pe… diṭṭhigataṃ abyākatanti? Āmantā. Diṭṭhigatasampayutto phasso abyākatoti? Na hevaṃ vattabbe…pe… diṭṭhigataṃ abyākatanti? Āmantā. Diṭṭhigatasampayuttā vedanā…pe… saññā…pe… cetanā…pe… cittaṃ abyākatanti? Na hevaṃ vattabbe…pe….
ദിട്ഠിഗതസമ്പയുത്തോ ഫസ്സോ അകുസലോതി? ആമന്താ. ദിട്ഠിഗതം അകുസലന്തി? ന ഹേവം വത്തബ്ബേ…പേ॰… ദിട്ഠിഗതസമ്പയുത്താ വേദനാ സഞ്ഞാ ചേതനാ ചിത്തം അകുസലന്തി? ആമന്താ. ദിട്ഠിഗതം അകുസലന്തി? ന ഹേവം വത്തബ്ബേ…പേ॰….
Diṭṭhigatasampayutto phasso akusaloti? Āmantā. Diṭṭhigataṃ akusalanti? Na hevaṃ vattabbe…pe… diṭṭhigatasampayuttā vedanā saññā cetanā cittaṃ akusalanti? Āmantā. Diṭṭhigataṃ akusalanti? Na hevaṃ vattabbe…pe….
൭൦൭. ദിട്ഠിഗതം അബ്യാകതന്തി? ആമന്താ. അഫലം അവിപാകന്തി? ന ഹേവം വത്തബ്ബേ…പേ॰… നനു സഫലം സവിപാകന്തി? ആമന്താ. ഹഞ്ചി സഫലം സവിപാകം, നോ ച വത രേ വത്തബ്ബേ – ‘‘ദിട്ഠിഗതം അബ്യാകത’’ന്തി.
707. Diṭṭhigataṃ abyākatanti? Āmantā. Aphalaṃ avipākanti? Na hevaṃ vattabbe…pe… nanu saphalaṃ savipākanti? Āmantā. Hañci saphalaṃ savipākaṃ, no ca vata re vattabbe – ‘‘diṭṭhigataṃ abyākata’’nti.
ദിട്ഠിഗതം അബ്യാകതന്തി? ആമന്താ. നനു മിച്ഛാദിട്ഠിപരമാനി വജ്ജാനി 1 വുത്താനി ഭഗവതാതി? ആമന്താ. ഹഞ്ചി മിച്ഛാദിട്ഠിപരമാനി വജ്ജാനി വുത്താനി ഭഗവതാ, നോ ച വത രേ വത്തബ്ബേ – ‘‘ദിട്ഠിഗതം അബ്യാകത’’ന്തി.
Diṭṭhigataṃ abyākatanti? Āmantā. Nanu micchādiṭṭhiparamāni vajjāni 2 vuttāni bhagavatāti? Āmantā. Hañci micchādiṭṭhiparamāni vajjāni vuttāni bhagavatā, no ca vata re vattabbe – ‘‘diṭṭhigataṃ abyākata’’nti.
ദിട്ഠിഗതം അബ്യാകതന്തി? ആമന്താ. നനു വുത്തം ഭഗവതാ – ‘‘മിച്ഛാദിട്ഠിസ്സ ഖോ അഹം, പുണ്ണ, ദ്വിന്നം ഗതീനം അഞ്ഞതരം ഗതിം വദാമി – നിരയം വാ തിരച്ഛാനയോനിം വാ’’തി 9! അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘ദിട്ഠിഗതം അബ്യാകത’’ന്തി.
Diṭṭhigataṃ abyākatanti? Āmantā. Nanu vuttaṃ bhagavatā – ‘‘micchādiṭṭhissa kho ahaṃ, puṇṇa, dvinnaṃ gatīnaṃ aññataraṃ gatiṃ vadāmi – nirayaṃ vā tiracchānayoniṃ vā’’ti 10! Attheva suttantoti? Āmantā. Tena hi na vattabbaṃ – ‘‘diṭṭhigataṃ abyākata’’nti.
൭൦൮. ന വത്തബ്ബം – ‘‘ദിട്ഠിഗതം അബ്യാകത’’ന്തി? ആമന്താ. നനു വുത്തം ഭഗവതാ – ‘‘‘സസ്സതോ ലോകോ’തി ഖോ, വച്ഛ, അബ്യാകതമേതം, ‘അസസ്സതോ ലോകോ’തി ഖോ, വച്ഛ, അബ്യാകതമേതം, ‘അന്തവാ ലോകോ’തി ഖോ, വച്ഛ, അബ്യാകതമേതം, ‘അനന്തവാ ലോകോ’തി ഖോ, വച്ഛ…പേ॰… ‘തം ജീവം തം സരീര’ന്തി ഖോ, വച്ഛ…പേ॰… ‘അഞ്ഞം ജീവം അഞ്ഞം സരീര’ന്തി ഖോ , വച്ഛ…പേ॰… ‘ഹോതി തഥാഗതോ പരം മരണാ’തി ഖോ, വച്ഛ…പേ॰… ‘ന ഹോതി തഥാഗതോ പരം മരണാ’തി ഖോ, വച്ഛ…പേ॰… ‘ഹോതി ച ന ച ഹോതി തഥാഗതോ പരം മരണാ’തി ഖോ, വച്ഛ…പേ॰… ‘നേവ ഹോതി ന ന ഹോതി തഥാഗതോ പരം മരണാ’തി ഖോ, വച്ഛ, അബ്യാകതമേത’’ന്തി 11! അത്ഥേവ സുത്തന്തോതി? ആമന്താ. തേന ഹി ദിട്ഠിഗതം അബ്യാകതന്തി.
708. Na vattabbaṃ – ‘‘diṭṭhigataṃ abyākata’’nti? Āmantā. Nanu vuttaṃ bhagavatā – ‘‘‘sassato loko’ti kho, vaccha, abyākatametaṃ, ‘asassato loko’ti kho, vaccha, abyākatametaṃ, ‘antavā loko’ti kho, vaccha, abyākatametaṃ, ‘anantavā loko’ti kho, vaccha…pe… ‘taṃ jīvaṃ taṃ sarīra’nti kho, vaccha…pe… ‘aññaṃ jīvaṃ aññaṃ sarīra’nti kho , vaccha…pe… ‘hoti tathāgato paraṃ maraṇā’ti kho, vaccha…pe… ‘na hoti tathāgato paraṃ maraṇā’ti kho, vaccha…pe… ‘hoti ca na ca hoti tathāgato paraṃ maraṇā’ti kho, vaccha…pe… ‘neva hoti na na hoti tathāgato paraṃ maraṇā’ti kho, vaccha, abyākatameta’’nti 12! Attheva suttantoti? Āmantā. Tena hi diṭṭhigataṃ abyākatanti.
ദിട്ഠിഗതം അബ്യാകതന്തി? ആമന്താ. നനു വുത്തം ഭഗവതാ – ‘‘മിച്ഛാദിട്ഠികസ്സ, ഭിക്ഖവേ, പുരിസപുഗ്ഗലസ്സ യഞ്ചേവ കായകമ്മം യഥാദിട്ഠിസമത്തം സമാദിന്നം, യഞ്ച വചീകമ്മം…പേ॰… യഞ്ച മനോകമ്മം, യാ ച ചേതനാ, യാ ച പത്ഥനാ, യോ ച പണിധി, യേ ച സങ്ഖാരാ, സബ്ബേ തേ ധമ്മാ അനിട്ഠായ അകന്തായ അമനാപായ അഹിതായ ദുക്ഖായ സംവത്തന്തീ’’തി 13! അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘ദിട്ഠിഗതം അബ്യാകത’’ന്തി.
Diṭṭhigataṃ abyākatanti? Āmantā. Nanu vuttaṃ bhagavatā – ‘‘micchādiṭṭhikassa, bhikkhave, purisapuggalassa yañceva kāyakammaṃ yathādiṭṭhisamattaṃ samādinnaṃ, yañca vacīkammaṃ…pe… yañca manokammaṃ, yā ca cetanā, yā ca patthanā, yo ca paṇidhi, ye ca saṅkhārā, sabbe te dhammā aniṭṭhāya akantāya amanāpāya ahitāya dukkhāya saṃvattantī’’ti 14! Attheva suttantoti? Āmantā. Tena hi na vattabbaṃ – ‘‘diṭṭhigataṃ abyākata’’nti.
അബ്യാകതകഥാ നിട്ഠിതാ.
Abyākatakathā niṭṭhitā.
Footnotes:
Related texts:
അട്ഠകഥാ • Aṭṭhakathā / അഭിധമ്മപിടക (അട്ഠകഥാ) • Abhidhammapiṭaka (aṭṭhakathā) / പഞ്ചപകരണ-അട്ഠകഥാ • Pañcapakaraṇa-aṭṭhakathā / ൮. അബ്യാകതകഥാവണ്ണനാ • 8. Abyākatakathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-മൂലടീകാ • Pañcapakaraṇa-mūlaṭīkā / ൮. അബ്യാകതകഥാവണ്ണനാ • 8. Abyākatakathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-അനുടീകാ • Pañcapakaraṇa-anuṭīkā / ൮. അബ്യാകതകഥാവണ്ണനാ • 8. Abyākatakathāvaṇṇanā
