| Library / Tipiṭaka / തിപിടക • Tipiṭaka / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) |
൬. അബ്യാകതവഗ്ഗോ
6. Abyākatavaggo
൧. അബ്യാകതസുത്തവണ്ണനാ
1. Abyākatasuttavaṇṇanā
൫൪. ഛട്ഠവഗ്ഗസ്സ പഠമേ അബ്യാകതവത്ഥൂസൂതി ഏകംസാദിവസേന അകഥിതവത്ഥൂസു. തഥാഗതോതി സത്തോ. ദിട്ഠിഗതമേതന്തി മിച്ഛാദിട്ഠിമത്തകമേതം, ന തായ ദിട്ഠിയാ ഗഹിതസത്തോ നാമ അത്ഥി. പടിപദന്തി അരിയമഗ്ഗം. ന ഛമ്ഭതീതി ദിട്ഠിവസേന ന കമ്പതി. സേസപദേസുപി ഏസേവ നയോ. തണ്ഹാഗതന്തി ദിട്ഠിതണ്ഹാ. സഞ്ഞാഗതാദീസുപി ഏസേവ നയോ. ദിട്ഠിസഞ്ഞാ ഏവ ഹേത്ഥ സഞ്ഞാഗതം, ദിട്ഠിനിസ്സിതമാനോയേവ ദിട്ഠിമഞ്ഞിതമേവ വാ മഞ്ഞിതം, ദിട്ഠിപപഞ്ചോവ പപഞ്ചിതം, ദിട്ഠുപാദാനമേവ ഉപാദാനം, ദിട്ഠിയാ വിരൂപം പടിസരണഭാവോയേവ വിപ്പടിസാരോ നാമാതി വേദിതബ്ബോ. ഏത്ഥ ച ദിട്ഠിഗ്ഗഹണേന ദ്വാസട്ഠി ദിട്ഠിയോ, ദിട്ഠിനിരോധഗാമിനിപടിപദാഗഹണേന സോതാപത്തിമഗ്ഗോ ഗഹിതോതി.
54. Chaṭṭhavaggassa paṭhame abyākatavatthūsūti ekaṃsādivasena akathitavatthūsu. Tathāgatoti satto. Diṭṭhigatametanti micchādiṭṭhimattakametaṃ, na tāya diṭṭhiyā gahitasatto nāma atthi. Paṭipadanti ariyamaggaṃ. Na chambhatīti diṭṭhivasena na kampati. Sesapadesupi eseva nayo. Taṇhāgatanti diṭṭhitaṇhā. Saññāgatādīsupi eseva nayo. Diṭṭhisaññā eva hettha saññāgataṃ, diṭṭhinissitamānoyeva diṭṭhimaññitameva vā maññitaṃ, diṭṭhipapañcova papañcitaṃ, diṭṭhupādānameva upādānaṃ, diṭṭhiyā virūpaṃ paṭisaraṇabhāvoyeva vippaṭisāro nāmāti veditabbo. Ettha ca diṭṭhiggahaṇena dvāsaṭṭhi diṭṭhiyo, diṭṭhinirodhagāminipaṭipadāgahaṇena sotāpattimaggo gahitoti.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / അങ്ഗുത്തരനികായ • Aṅguttaranikāya / ൧. അബ്യാകതസുത്തം • 1. Abyākatasuttaṃ
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / അങ്ഗുത്തരനികായ (ടീകാ) • Aṅguttaranikāya (ṭīkā) / ൧-൨. അബ്യാകതസുത്താദിവണ്ണനാ • 1-2. Abyākatasuttādivaṇṇanā
