| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೪. ಅಚ್ಚಯಸುತ್ತವಣ್ಣನಾ
4. Accayasuttavaṇṇanā
೨೭೦. ಸಮ್ಪಯೋಜೇಸುನ್ತಿ ಅಞ್ಞಮಞ್ಞಂ ವಾಚಸಿಕಂ ಫರುಸಂ ಪಯೋಜೇಸುಂ। ತೇನಾಹ ‘‘ಕಲಹಂ ಅಕಂಸೂ’’ತಿ, ವಿವಾದಂ ಅಕಂಸೂತಿ ಅತ್ಥೋ। ಅತಿಕ್ಕಮ್ಮವಚನನ್ತಿ ವಚೀಸಂವರಂ ಅತಿಕ್ಕಮಿತ್ವಾ ವಚನಂ। ಯಸ್ಮಾ ಅಚ್ಚಯೇ ದೇಸಿಯಮಾನೇ ತಂ ಖೀಣಯತಿ ಅಞ್ಞಮಞ್ಞಸ್ಸ ಖಮಮಾನಸ್ಸ ಖಮನಂ ಪಟಿಗ್ಗಣ್ಹತೋ, ತಸ್ಮಾ ವುತ್ತಂ ‘‘ನಪ್ಪಟಿಗಣ್ಹಾತೀತಿ ನ ಖಮತೀ’’ತಿ। ತುಮ್ಹಾಕಂ ವಸೇ ವತ್ತತು, ವಿಸೇವಿತಂ ಅಕತ್ವಾ ಯಥಾಕಾಮಕರಣೀಯೋ ಹೋತು। ಮಿತ್ತಧಮ್ಮೋ ಇಧ ಉತ್ತರಪದಲೋಪೇನ ‘‘ಮಿತ್ತೋ’’ತಿ ವುತ್ತೋತಿ ಆಹ ‘‘ಮಿತ್ತಧಮ್ಮೇ’’ತಿ। ಕರಣವಚನನ್ತಿ ‘‘ಮಿತ್ತೇಹೀ’’ತಿ ಕರಣವಚನಂ ಭುಮ್ಮತ್ಥೇ। ತೇನಾಹ ‘‘ಮಿತ್ತೇಸೂ’’ತಿ। ಯಥಾ ನಿಬ್ಬತ್ತಸಭಾವಸ್ಸ ಭಾವತೋ ಅಞ್ಞಥತ್ತಂ ಜರಾ, ಏವಂ ಮಿತ್ತಭಾವತೋ ವುತ್ತವಿಪರಿಯಾಯೋ ಅಮಿತ್ತಧಮ್ಮೋ ಜರಾಪರಿಯಾಯೇನ ವುತ್ತೋ। ಅಗಾರಯ್ಹಂ ಅನವಜ್ಜಂ ಸಬ್ಬಸೋ ಪಹೀನಕಿಲೇಸಂ। ತೇನಾಹ ‘‘ಖೀಣಾಸವಪುಗ್ಗಲ’’ನ್ತಿ।
270.Sampayojesunti aññamaññaṃ vācasikaṃ pharusaṃ payojesuṃ. Tenāha ‘‘kalahaṃ akaṃsū’’ti, vivādaṃ akaṃsūti attho. Atikkammavacananti vacīsaṃvaraṃ atikkamitvā vacanaṃ. Yasmā accaye desiyamāne taṃ khīṇayati aññamaññassa khamamānassa khamanaṃ paṭiggaṇhato, tasmā vuttaṃ ‘‘nappaṭigaṇhātīti na khamatī’’ti. Tumhākaṃ vase vattatu, visevitaṃ akatvā yathākāmakaraṇīyo hotu. Mittadhammo idha uttarapadalopena ‘‘mitto’’ti vuttoti āha ‘‘mittadhamme’’ti. Karaṇavacananti ‘‘mittehī’’ti karaṇavacanaṃ bhummatthe. Tenāha ‘‘mittesū’’ti. Yathā nibbattasabhāvassa bhāvato aññathattaṃ jarā, evaṃ mittabhāvato vuttavipariyāyo amittadhammo jarāpariyāyena vutto. Agārayhaṃ anavajjaṃ sabbaso pahīnakilesaṃ. Tenāha ‘‘khīṇāsavapuggala’’nti.
ಅಚ್ಚಯಸುತ್ತವಣ್ಣನಾ ನಿಟ್ಠಿತಾ।
Accayasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೪. ಅಚ್ಚಯಸುತ್ತಂ • 4. Accayasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೪. ಅಚ್ಚಯಸುತ್ತವಣ್ಣನಾ • 4. Accayasuttavaṇṇanā
