| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૬. અચ્છરાસઙ્ઘાતવગ્ગો
6. Accharāsaṅghātavaggo
૫૧. ‘‘પભસ્સરમિદં , ભિક્ખવે, ચિત્તં. તઞ્ચ ખો આગન્તુકેહિ ઉપક્કિલેસેહિ ઉપક્કિલિટ્ઠં. તં અસ્સુતવા પુથુજ્જનો યથાભૂતં નપ્પજાનાતિ. તસ્મા ‘અસ્સુતવતો પુથુજ્જનસ્સ ચિત્તભાવના નત્થી’તિ વદામી’’તિ. પઠમં.
51. ‘‘Pabhassaramidaṃ , bhikkhave, cittaṃ. Tañca kho āgantukehi upakkilesehi upakkiliṭṭhaṃ. Taṃ assutavā puthujjano yathābhūtaṃ nappajānāti. Tasmā ‘assutavato puthujjanassa cittabhāvanā natthī’ti vadāmī’’ti. Paṭhamaṃ.
૫૨. ‘‘પભસ્સરમિદં , ભિક્ખવે, ચિત્તં. તઞ્ચ ખો આગન્તુકેહિ ઉપક્કિલેસેહિ વિપ્પમુત્તં. તં સુતવા અરિયસાવકો યથાભૂતં પજાનાતિ. તસ્મા ‘સુતવતો અરિયસાવકસ્સ ચિત્તભાવના અત્થી’તિ વદામી’’તિ. દુતિયં.
52. ‘‘Pabhassaramidaṃ , bhikkhave, cittaṃ. Tañca kho āgantukehi upakkilesehi vippamuttaṃ. Taṃ sutavā ariyasāvako yathābhūtaṃ pajānāti. Tasmā ‘sutavato ariyasāvakassa cittabhāvanā atthī’ti vadāmī’’ti. Dutiyaṃ.
૫૩. ‘‘અચ્છરાસઙ્ઘાતમત્તમ્પિ ચે, ભિક્ખવે, ભિક્ખુ મેત્તાચિત્તં 1 આસેવતિ; અયં વુચ્ચતિ, ભિક્ખવે – ‘ભિક્ખુ અરિત્તજ્ઝાનો વિહરતિ સત્થુસાસનકરો ઓવાદપતિકરો, અમોઘં રટ્ઠપિણ્ડં ભુઞ્જતિ’. કો પન વાદો યે નં બહુલીકરોન્તી’’તિ! તતિયં.
53. ‘‘Accharāsaṅghātamattampi ce, bhikkhave, bhikkhu mettācittaṃ 2 āsevati; ayaṃ vuccati, bhikkhave – ‘bhikkhu arittajjhāno viharati satthusāsanakaro ovādapatikaro, amoghaṃ raṭṭhapiṇḍaṃ bhuñjati’. Ko pana vādo ye naṃ bahulīkarontī’’ti! Tatiyaṃ.
૫૪. ‘‘અચ્છરાસઙ્ઘાતમત્તમ્પિ ચે, ભિક્ખવે, ભિક્ખુ મેત્તાચિત્તં ભાવેતિ; અયં વુચ્ચતિ, ભિક્ખવે – ‘ભિક્ખુ અરિત્તજ્ઝાનો વિહરતિ સત્થુસાસનકરો ઓવાદપતિકરો, અમોઘં રટ્ઠપિણ્ડં ભુઞ્જતિ’. કો પન વાદો યે નં બહુલીકરોન્તી’’તિ! ચતુત્થં.
54. ‘‘Accharāsaṅghātamattampi ce, bhikkhave, bhikkhu mettācittaṃ bhāveti; ayaṃ vuccati, bhikkhave – ‘bhikkhu arittajjhāno viharati satthusāsanakaro ovādapatikaro, amoghaṃ raṭṭhapiṇḍaṃ bhuñjati’. Ko pana vādo ye naṃ bahulīkarontī’’ti! Catutthaṃ.
૫૫. ‘‘અચ્છરાસઙ્ઘાતમત્તમ્પિ ચે, ભિક્ખવે, ભિક્ખુ મેત્તાચિત્તં મનસિ કરોતિ; અયં વુચ્ચતિ, ભિક્ખવે – ‘ભિક્ખુ અરિત્તજ્ઝાનો વિહરતિ સત્થુસાસનકરો ઓવાદપતિકરો અમોઘં રટ્ઠપિણ્ડં ભુઞ્જતિ’. કો પન વાદો યે નં બહુલીકરોન્તી’’તિ! પઞ્ચમં.
55. ‘‘Accharāsaṅghātamattampi ce, bhikkhave, bhikkhu mettācittaṃ manasi karoti; ayaṃ vuccati, bhikkhave – ‘bhikkhu arittajjhāno viharati satthusāsanakaro ovādapatikaro amoghaṃ raṭṭhapiṇḍaṃ bhuñjati’. Ko pana vādo ye naṃ bahulīkarontī’’ti! Pañcamaṃ.
૫૬. ‘‘યે કેચિ, ભિક્ખવે, ધમ્મા અકુસલા અકુસલભાગિયા અકુસલપક્ખિકા, સબ્બે તે મનોપુબ્બઙ્ગમા. મનો તેસં ધમ્માનં પઠમં ઉપ્પજ્જતિ, અન્વદેવ અકુસલા ધમ્મા’’તિ. છટ્ઠં.
56. ‘‘Ye keci, bhikkhave, dhammā akusalā akusalabhāgiyā akusalapakkhikā, sabbe te manopubbaṅgamā. Mano tesaṃ dhammānaṃ paṭhamaṃ uppajjati, anvadeva akusalā dhammā’’ti. Chaṭṭhaṃ.
૫૭. ‘‘યે કેચિ, ભિક્ખવે, ધમ્મા કુસલા કુસલભાગિયા કુસલપક્ખિકા, સબ્બે તે મનોપુબ્બઙ્ગમા. મનો તેસં ધમ્માનં પઠમં ઉપ્પજ્જતિ, અન્વદેવ કુસલા ધમ્મા’’તિ. સત્તમં.
57. ‘‘Ye keci, bhikkhave, dhammā kusalā kusalabhāgiyā kusalapakkhikā, sabbe te manopubbaṅgamā. Mano tesaṃ dhammānaṃ paṭhamaṃ uppajjati, anvadeva kusalā dhammā’’ti. Sattamaṃ.
૫૮. ‘‘નાહં, ભિક્ખવે, અઞ્ઞં એકધમ્મમ્પિ સમનુપસ્સામિ યેન અનુપ્પન્ના વા અકુસલા ધમ્મા ઉપ્પજ્જન્તિ ઉપ્પન્ના વા કુસલા ધમ્મા પરિહાયન્તિ યથયિદં, ભિક્ખવે, પમાદો. પમત્તસ્સ, ભિક્ખવે, અનુપ્પન્ના ચેવ અકુસલા ધમ્મા ઉપ્પજ્જન્તિ ઉપ્પન્ના ચ કુસલા ધમ્મા પરિહાયન્તી’’તિ. અટ્ઠમં.
58. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā akusalā dhammā uppajjanti uppannā vā kusalā dhammā parihāyanti yathayidaṃ, bhikkhave, pamādo. Pamattassa, bhikkhave, anuppannā ceva akusalā dhammā uppajjanti uppannā ca kusalā dhammā parihāyantī’’ti. Aṭṭhamaṃ.
૫૯. ‘‘નાહં, ભિક્ખવે, અઞ્ઞં એકધમ્મમ્પિ સમનુપસ્સામિ યેન અનુપ્પન્ના વા કુસલા ધમ્મા ઉપ્પજ્જન્તિ ઉપ્પન્ના વા અકુસલા ધમ્મા પરિહાયન્તિ યથયિદં, ભિક્ખવે, અપ્પમાદો. અપ્પમત્તસ્સ, ભિક્ખવે, અનુપ્પન્ના ચેવ કુસલા ધમ્મા ઉપ્પજ્જન્તિ ઉપ્પન્ના ચ અકુસલા ધમ્મા પરિહાયન્તી’’તિ. નવમં.
59. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā kusalā dhammā uppajjanti uppannā vā akusalā dhammā parihāyanti yathayidaṃ, bhikkhave, appamādo. Appamattassa, bhikkhave, anuppannā ceva kusalā dhammā uppajjanti uppannā ca akusalā dhammā parihāyantī’’ti. Navamaṃ.
૬૦. ‘‘નાહં, ભિક્ખવે, અઞ્ઞં એકધમ્મમ્પિ સમનુપસ્સામિ યેન અનુપ્પન્ના વા અકુસલા ધમ્મા ઉપ્પજ્જન્તિ ઉપ્પન્ના વા કુસલા ધમ્મા પરિહાયન્તિ યથયિદં, ભિક્ખવે, કોસજ્જં. કુસીતસ્સ, ભિક્ખવે, અનુપ્પન્ના ચેવ અકુસલા ધમ્મા ઉપ્પજ્જન્તિ ઉપ્પન્ના ચ કુસલા ધમ્મા પરિહાયન્તી’’તિ. દસમં.
60. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā akusalā dhammā uppajjanti uppannā vā kusalā dhammā parihāyanti yathayidaṃ, bhikkhave, kosajjaṃ. Kusītassa, bhikkhave, anuppannā ceva akusalā dhammā uppajjanti uppannā ca kusalā dhammā parihāyantī’’ti. Dasamaṃ.
અચ્છરાસઙ્ઘાતવગ્ગો છટ્ઠો.
Accharāsaṅghātavaggo chaṭṭho.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૬. અચ્છરાસઙ્ઘાતવગ્ગવણ્ણના • 6. Accharāsaṅghātavaggavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૬. અચ્છરાસઙ્ઘાતવગ્ગવણ્ણના • 6. Accharāsaṅghātavaggavaṇṇanā
