| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೬. ಅಚ್ಛರಾಸುತ್ತವಣ್ಣನಾ
6. Accharāsuttavaṇṇanā
೪೬. ‘‘ಅಚ್ಛರಾಗಣಸಙ್ಘುಟ್ಠ’’ನ್ತಿ ಗಾಥಾ ದೇವಪುತ್ತೇನ ಯೇನಾಧಿಪ್ಪಾಯೇನ ಗಾಯಿತಾ, ಸೋ ಅನುಪುಬ್ಬಿಕಥಾಯ ವಿನಾ ನ ಪಞ್ಞಾಯತೀತಿ ತಂ ಆಗಮನತೋ ಪಟ್ಠಾಯ ಕಥೇನ್ತೋ ‘‘ಅಯಂ ಕಿರ ದೇವಪುತ್ತೋ’’ತಿಆದಿಮಾಹ। ತತ್ಥ ಸಾಸನೇತಿ ಇಮಸ್ಸೇವ ಸತ್ಥುಸಾಸನೇ। ಕಮ್ಮಾಕಮ್ಮನ್ತಿ ಕಮ್ಮವಿನಿಚ್ಛಯಂ। ಅತ್ಥಪುರೇಕ್ಖಾರತಾಯ ಅಪ್ಪಕಿಚ್ಚತಾಯ ಚ ಸಲ್ಲಹುಕವುತ್ತಿಕೋ। ಸಯನಸ್ಸ ಕೋಟ್ಠಾಸೋತಿ ದಿವಸಂ ಪುರಿಮಯಾಮಞ್ಚ ಭಾವನಾನುಯೋಗವಸೇನ ಕಿಲನ್ತಕಾಯಸ್ಸ ಸಮಸ್ಸಾಸನತ್ಥಂ ಸೇಯ್ಯಾಯ ಉಪಗಮನಭಾಗೋ ಅನುಞ್ಞಾತೋ।
46. ‘‘Accharāgaṇasaṅghuṭṭha’’nti gāthā devaputtena yenādhippāyena gāyitā, so anupubbikathāya vinā na paññāyatīti taṃ āgamanato paṭṭhāya kathento ‘‘ayaṃ kira devaputto’’tiādimāha. Tattha sāsaneti imasseva satthusāsane. Kammākammanti kammavinicchayaṃ. Atthapurekkhāratāya appakiccatāya ca sallahukavuttiko. Sayanassa koṭṭhāsoti divasaṃ purimayāmañca bhāvanānuyogavasena kilantakāyassa samassāsanatthaṃ seyyāya upagamanabhāgo anuññāto.
ಅಬ್ಭನ್ತರೇತಿ ಕುಚ್ಛಿಯಂ ಭತ್ತಸ್ಸ ಪರಿತ್ತತಾಯ ಸತ್ಥಕವಾತಾತಿ ತಿಕ್ಖಭಾವೇನ ಸತ್ಥಕಾ ವಿಯ ಕನ್ತನಕಾ ವಾತಾ। ಧುರಸ್ಮಿಂಯೇವಾತಿ ಕಿಲೇಸಮಾರೇನ ಯುದ್ಧೇ ಏವ। ವಿಮುತ್ತಾಯತನಸೀಸೇ ಠತ್ವಾ ಧಮ್ಮಂ ದೇಸೇನ್ತೋ ವಾ। ಉಪನಿಸ್ಸಯಮನ್ದತಾಯ ಅಪರಿಪಕ್ಕಞಾಣತಾಯ ಆಸವಕ್ಖಯಂ ಅಪ್ಪತ್ತೋ ಕಾಲಂ ಕತ್ವಾತಿ ಯೋಜನಾ। ಉಪರಿ ಠಿತನ್ತಿ ಪರಿಕ್ಖಾರಭಾವೇನ ದಿಬ್ಬದುಸ್ಸೂಪರಿ ಠಿತಂ। ತಥೇವ ಅಟ್ಠಾಸೀತಿ ತಾಹಿ ತಥಾ ವುತ್ತೇಪಿ ಯಥಾ ತತೋ ಪುಬ್ಬೇ, ತಥೇವ ಅಟ್ಠಾಸಿ। ಸುವಣ್ಣಪಟ್ಟನ್ತಿ ನಿಬ್ಬುದ್ಧೇ ಪಟಿಜಿನಿತ್ವಾ ಲದ್ಧಬ್ಬಸುವಣ್ಣಪಟ್ಟಂ। ವೀತಿಕ್ಕಮಸ್ಸ ಅಕತತ್ತಾ ಅಸಮ್ಭಿನ್ನೇನೇವ ಸೀಲೇನ। ಯಸ್ಮಾ ತಸ್ಮಿಂ ಸತ್ಥು ಸನ್ತಿಕಂ ಆಗಚ್ಛನ್ತೇ ತಾಪಿ ತೇನ ಸದ್ಧಿಂ ಆಗಮಂಸು ತಸ್ಮಾ ‘‘ಅಚ್ಛರಾಸಙ್ಘಪರಿವುತೋ’’ತಿ ವುತ್ತಂ।
Abbhantareti kucchiyaṃ bhattassa parittatāya satthakavātāti tikkhabhāvena satthakā viya kantanakā vātā. Dhurasmiṃyevāti kilesamārena yuddhe eva. Vimuttāyatanasīse ṭhatvā dhammaṃ desento vā. Upanissayamandatāya aparipakkañāṇatāya āsavakkhayaṃ appatto kālaṃ katvāti yojanā. Upari ṭhitanti parikkhārabhāvena dibbadussūpari ṭhitaṃ. Tatheva aṭṭhāsīti tāhi tathā vuttepi yathā tato pubbe, tatheva aṭṭhāsi. Suvaṇṇapaṭṭanti nibbuddhe paṭijinitvā laddhabbasuvaṇṇapaṭṭaṃ. Vītikkamassa akatattā asambhinneneva sīlena. Yasmā tasmiṃ satthu santikaṃ āgacchante tāpi tena saddhiṃ āgamaṃsu tasmā ‘‘accharāsaṅghaparivuto’’ti vuttaṃ.
ಸಙ್ಘೋಸಿತನ್ತಿ ಸಙ್ಗಮ್ಮ ಘೋಸಿತಂ, ತತ್ಥ ತತ್ಥ ಅಚ್ಛರಾನಂ ಗೀತಸದ್ದವಸೇನ ಘೋಸಿತಂ। ಪಿಸಾಚಗಣಂ ಕತ್ವಾ ವದತಿ ಅಚ್ಛನ್ದರಾಗತಾಯ। ನಿಯಾಮಚಿತ್ತತಾಯಾತಿ ಸಮ್ಮತ್ತನಿಯಾಮೇ ನಿನ್ನಚಿತ್ತತಾಯ। ಗರುಭಾವೇನಾತಿ ತಾಸಂ ವಸೇ ಅವತ್ತನತೋ ಗರುಟ್ಠಾನಭಾವೇನ। ಯಾತ್ರಾತಿ ನಿಬ್ಬಾನಂ ಪತಿ ಯಾತ್ರಾ। ತಂ ಪನ ವಟ್ಟತೋ ನಿಗ್ಗಮನಂ ಹೋತೀತಿ ಆಹ ‘‘ಕಥಂ ನಿಗ್ಗಮನಂ ಭವಿಸ್ಸತೀ’’ತಿ।
Saṅghositanti saṅgamma ghositaṃ, tattha tattha accharānaṃ gītasaddavasena ghositaṃ. Pisācagaṇaṃ katvā vadati acchandarāgatāya. Niyāmacittatāyāti sammattaniyāme ninnacittatāya. Garubhāvenāti tāsaṃ vase avattanato garuṭṭhānabhāvena. Yātrāti nibbānaṃ pati yātrā. Taṃ pana vaṭṭato niggamanaṃ hotīti āha ‘‘kathaṃ niggamanaṃ bhavissatī’’ti.
ಅತಿಸಲ್ಲೇಖತೇವಾತಿ ಅತಿವಿಯ ಕಿಲೇಸಾನಂ ಸಲ್ಲೇಖಿತವುತ್ತಿಕೋ। ಅಕತಾಭಿನಿವೇಸಸ್ಸಾತಿ ಭಾವನಮನನುಯುತ್ತಸ್ಸ ಅನಾರದ್ಧವಿಪಸ್ಸಕಸ್ಸ। ಕಾರಕಸ್ಸಾತಿ ಸುಗತೋವಾದಕಾರಕಸ್ಸ ಸಮ್ಮಾಪಟಿಪಜ್ಜತೋ। ಸುಞ್ಞತಾವಿಪಸ್ಸನನ್ತಿ ಸುಞ್ಞತಾದೀಪನಂ ವಿಪಸ್ಸನಂ ದುಚ್ಚರಿತತಣ್ಹಾಯ ದೂರೀಕರಣೇನ ಏಕವಿಹಾರಿತಾಯ। ಏಕೋ ಮಗ್ಗೋ ಅಸ್ಸಾತಿ ಲೋಕುತ್ತರಮಗ್ಗೋ ಏವ ಅಸ್ಸ ಅನಾಗತೋ, ಪುಬ್ಬಭಾಗಮಗ್ಗೋ ಪನ ಕತಪರಿಚಯೋತಿ ಅತ್ಥೋ।
Atisallekhatevāti ativiya kilesānaṃ sallekhitavuttiko. Akatābhinivesassāti bhāvanamananuyuttassa anāraddhavipassakassa. Kārakassāti sugatovādakārakassa sammāpaṭipajjato. Suññatāvipassananti suññatādīpanaṃ vipassanaṃ duccaritataṇhāya dūrīkaraṇena ekavihāritāya. Eko maggo assāti lokuttaramaggo eva assa anāgato, pubbabhāgamaggo pana kataparicayoti attho.
ಕಾಯವಙ್ಕಾದೀನನ್ತಿ ಕಾಯದುಚ್ಚರಿತಾದೀನಂ ಅಭಾವತೋ ಸಮುಚ್ಛಿನ್ದನೇನ ಅನುಪಲಬ್ಭನತೋ। ನತ್ಥಿ ಏತ್ಥ ಭಯಂ, ಅಸ್ಮಿಂ ವಾ ಅಧಿಗತೇ ಪುಗ್ಗಲಸ್ಸ ನತ್ಥಿ ಭಯನ್ತಿ ಅಭಯಂ ನಾಮ। ಸಂಸಾರಕನ್ತಾರಂ ಅತಿಕ್ಕಮಿತ್ವಾ ನಿಬ್ಬಾನಸಙ್ಖಾತಂ ಖೇಮಂ ಅಮತಟ್ಠಾನಂ ಗಮನೇ ಸುಗತಸಾರಥಿನಾ ಸುಸಜ್ಜಿತಯಾನಭಾವತೋ ರಥೋ ಅಕೂಜನೋತಿ ಅಟ್ಠಙ್ಗಿಕೋ ಮಗ್ಗೋವ ಅಧಿಪ್ಪೇತೋ। ಧಮ್ಮತೋ ಅನಪೇತತಾಯ ಅಪರಾಪರುಪ್ಪತ್ತಿಯಾ ಚ ಧಮ್ಮಚಕ್ಕೇಹಿ।
Kāyavaṅkādīnanti kāyaduccaritādīnaṃ abhāvato samucchindanena anupalabbhanato. Natthi ettha bhayaṃ, asmiṃ vā adhigate puggalassa natthi bhayanti abhayaṃ nāma. Saṃsārakantāraṃ atikkamitvā nibbānasaṅkhātaṃ khemaṃ amataṭṭhānaṃ gamane sugatasārathinā susajjitayānabhāvato ratho akūjanoti aṭṭhaṅgiko maggova adhippeto. Dhammato anapetatāya aparāparuppattiyā ca dhammacakkehi.
ಓತ್ತಪ್ಪಮ್ಪಿ ಗಹಿತಮೇವ ಅವಿನಾಭಾವಾ। ಅಪಾಲಮ್ಬೋತಿ ಅವಸ್ಸಯೋ। ಪರಿವಾರೋತಿ ಪರಿಕ್ಖಾರೋ ಅಭಿಸಙ್ಖರಣತೋ। ಮಗ್ಗಸ್ಸ ಕರಣಟ್ಠಾನೇ ಧಮ್ಮೋ ತಪ್ಪರಿಯಾಪನ್ನಾ ಸಮ್ಮಾದಿಟ್ಠಿ। ಅನಿಚ್ಚಾದಿವಸೇನಾತಿ ಅನಿಚ್ಚಾನುಪಸ್ಸನಾದಿವಸೇನ। ಸೋಧಿತೇಸು ವಜ್ಝಮಾನೇಸು। ಭೂಮಿಲದ್ಧವಟ್ಟನ್ತಿ ಭೂಮಿಲದ್ಧಸಙ್ಖಾತಂ ವಟ್ಟಂ। ತತ್ಥ ವಿಪಸ್ಸನಾಯ ಪವತ್ತಿಟ್ಠಾನಭಾವತೋ ಪಞ್ಚಕ್ಖನ್ಧಾ ಭೂಮಿ ನಾಮ, ವಟ್ಟಮಯಕಮ್ಮಭಾವತೋ ತತ್ಥ ಉಪ್ಪಜ್ಜನಾರಹಂ ಕಿಲೇಸಜಾತಂ ಭೂಮಿಲದ್ಧವಟ್ಟಂ। ಪರಿಜಾನಮಾನಾತಿ ಪರಿಚ್ಛಿನ್ದನವಸೇನ ಸಮತಿಕ್ಕಮವಸೇನ ಜಾನಮಾನಾ ಪಟಿವಿಜ್ಝನ್ತೀ।
Ottappampi gahitameva avinābhāvā. Apālamboti avassayo. Parivāroti parikkhāro abhisaṅkharaṇato. Maggassa karaṇaṭṭhāne dhammo tappariyāpannā sammādiṭṭhi. Aniccādivasenāti aniccānupassanādivasena. Sodhitesu vajjhamānesu. Bhūmiladdhavaṭṭanti bhūmiladdhasaṅkhātaṃ vaṭṭaṃ. Tattha vipassanāya pavattiṭṭhānabhāvato pañcakkhandhā bhūmi nāma, vaṭṭamayakammabhāvato tattha uppajjanārahaṃ kilesajātaṃ bhūmiladdhavaṭṭaṃ. Parijānamānāti paricchindanavasena samatikkamavasena jānamānā paṭivijjhantī.
ಕಸ್ಮಾ ದೇವಪುತ್ತೋ ಸೋತಾಪತ್ತಿಫಲೇಯೇವ ಪತಿಟ್ಠಾಸಿ, ನನು ಚ ಸಾ ದೇಸನಾ ಭಗವತಾ ಚತುಮಗ್ಗಪ್ಪಧಾನಭಾವೇನ ಪವತ್ತಿತಾತಿ ಆಹ ‘‘ಯಥಾ ಹೀ’’ತಿಆದಿ।
Kasmā devaputto sotāpattiphaleyeva patiṭṭhāsi, nanu ca sā desanā bhagavatā catumaggappadhānabhāvena pavattitāti āha ‘‘yathā hī’’tiādi.
ಅಚ್ಛರಾಸುತ್ತವಣ್ಣನಾ ನಿಟ್ಠಿತಾ।
Accharāsuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೬. ಅಚ್ಛರಾಸುತ್ತಂ • 6. Accharāsuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೬. ಅಚ್ಛರಾಸುತ್ತವಣ್ಣನಾ • 6. Accharāsuttavaṇṇanā
