| Library / Tipiṭaka / திபிடக • Tipiṭaka / தே²ரீகா³தா²-அட்ட²கதா² • Therīgāthā-aṭṭhakathā |
4. அட்³ட⁴காஸிதே²ரீகா³தா²வண்ணனா
4. Aḍḍhakāsitherīgāthāvaṇṇanā
யாவ காஸிஜனபதோ³திஆதி³கா அட்³ட⁴காஸியா தே²ரியா கா³தா². அயங் கிர கஸ்ஸபஸ்ஸ த³ஸப³லஸ்ஸ காலே குலகே³ஹே நிப்³ப³த்தித்வா விஞ்ஞுதங் பத்வா பி⁴க்கு²னீனங் ஸந்திகங் க³ந்த்வா த⁴ம்மங் ஸுத்வா படிலத்³த⁴ஸத்³தா⁴ பப்³ப³ஜித்வா பி⁴க்கு²னிஸீலே டி²தங் அஞ்ஞதரங் படிஸம்பி⁴தா³ப்பத்தங் கீ²ணாஸவத்தே²ரிங் க³ணிகாவாதே³ன அக்கோஸித்வா, ததோ சுதா நிரயே பச்சித்வா இமஸ்மிங் பு³த்³து⁴ப்பாதே³ காஸிகரட்டே² உளாரவிப⁴வே ஸெட்டி²குலே நிப்³ப³த்தித்வா வுத்³தி⁴ப்பத்தா புப்³பே³ கதஸ்ஸ வசீது³ச்சரிதஸ்ஸ நிஸ்ஸந்தே³ன டா²னதோ பரிப⁴ட்டா² க³ணிகா அஹோஸி. நாமேன அட்³ட⁴காஸீ நாம. தஸ்ஸா பப்³ப³ஜ்ஜா ச தூ³தேன உபஸம்பதா³ ச க²ந்த⁴கே ஆக³தாயேவ. வுத்தஞ்ஹேதங் –
Yāva kāsijanapadotiādikā aḍḍhakāsiyā theriyā gāthā. Ayaṃ kira kassapassa dasabalassa kāle kulagehe nibbattitvā viññutaṃ patvā bhikkhunīnaṃ santikaṃ gantvā dhammaṃ sutvā paṭiladdhasaddhā pabbajitvā bhikkhunisīle ṭhitaṃ aññataraṃ paṭisambhidāppattaṃ khīṇāsavattheriṃ gaṇikāvādena akkositvā, tato cutā niraye paccitvā imasmiṃ buddhuppāde kāsikaraṭṭhe uḷāravibhave seṭṭhikule nibbattitvā vuddhippattā pubbe katassa vacīduccaritassa nissandena ṭhānato paribhaṭṭhā gaṇikā ahosi. Nāmena aḍḍhakāsī nāma. Tassā pabbajjā ca dūtena upasampadā ca khandhake āgatāyeva. Vuttañhetaṃ –
தேன கோ² பன ஸமயேன அட்³ட⁴காஸீ க³ணிகா பி⁴க்கு²னீஸு பப்³ப³ஜிதா ஹோதி. ஸா ச ஸாவத்தி²ங் க³ந்துகாமா ஹோதி ‘‘ப⁴க³வதோ ஸந்திகே உபஸம்பஜ்ஜிஸ்ஸாமீ’’தி. அஸ்ஸோஸுங் கோ² து⁴த்தா – ‘‘அட்³ட⁴காஸீ கிர க³ணிகா ஸாவத்தி²ங் க³ந்துகாமா’’தி. தே மக்³கே³ பரியுட்டி²ங்ஸு. அஸ்ஸோஸி கோ² அட்³ட⁴காஸீ க³ணிகா ‘‘து⁴த்தா கிர மக்³கே³ பரியுட்டி²தா’’தி. ப⁴க³வதோ ஸந்திகே தூ³தங் பாஹேஸி – ‘‘அஹஞ்ஹி உபஸம்பஜ்ஜிதுகாமா, கத²ங் நு கோ² மயா படிபஜ்ஜிதப்³ப³’’ந்தி? அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, தூ³தேனபி உபஸம்பாதே³து’’ந்தி (சூளவ॰ 430).
Tena kho pana samayena aḍḍhakāsī gaṇikā bhikkhunīsu pabbajitā hoti. Sā ca sāvatthiṃ gantukāmā hoti ‘‘bhagavato santike upasampajjissāmī’’ti. Assosuṃ kho dhuttā – ‘‘aḍḍhakāsī kira gaṇikā sāvatthiṃ gantukāmā’’ti. Te magge pariyuṭṭhiṃsu. Assosi kho aḍḍhakāsī gaṇikā ‘‘dhuttā kira magge pariyuṭṭhitā’’ti. Bhagavato santike dūtaṃ pāhesi – ‘‘ahañhi upasampajjitukāmā, kathaṃ nu kho mayā paṭipajjitabba’’nti? Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, dūtenapi upasampādetu’’nti (cūḷava. 430).
ஏவங் லத்³தூ⁴பஸம்பதா³ பன விபஸ்ஸனாய கம்மங் கரொந்தீ ந சிரஸ்ஸேவ ஸஹ படிஸம்பி⁴தா³ஹி அரஹத்தங் பாபுணி. தேன வுத்தங் அபதா³னே (அப॰ தே²ரீ 2.4.168-183) –
Evaṃ laddhūpasampadā pana vipassanāya kammaṃ karontī na cirasseva saha paṭisambhidāhi arahattaṃ pāpuṇi. Tena vuttaṃ apadāne (apa. therī 2.4.168-183) –
‘‘இமம்ஹி ப⁴த்³த³கே கப்பே, ப்³ரஹ்மப³ந்து⁴ மஹாயஸோ;
‘‘Imamhi bhaddake kappe, brahmabandhu mahāyaso;
கஸ்ஸபோ நாம கொ³த்தேன, உப்பஜ்ஜி வத³தங் வரோ.
Kassapo nāma gottena, uppajji vadataṃ varo.
‘‘ததா³ஹங் பப்³ப³ஜித்வான, தஸ்ஸ பு³த்³த⁴ஸ்ஸ ஸாஸனே;
‘‘Tadāhaṃ pabbajitvāna, tassa buddhassa sāsane;
ஸங்வுதா பாதிமொக்க²ம்ஹி, இந்த்³ரியேஸு ச பஞ்சஸு.
Saṃvutā pātimokkhamhi, indriyesu ca pañcasu.
‘‘மத்தஞ்ஞுனீ ச அஸனே, யுத்தா ஜாக³ரியேபி ச;
‘‘Mattaññunī ca asane, yuttā jāgariyepi ca;
வஸந்தீ யுத்தயோகா³ஹங், பி⁴க்கு²னிங் விக³தாஸவங்.
Vasantī yuttayogāhaṃ, bhikkhuniṃ vigatāsavaṃ.
‘‘அக்கோஸிங் து³ட்ட²சித்தாஹங், க³ணிகேதி ப⁴ணிங் ததா³;
‘‘Akkosiṃ duṭṭhacittāhaṃ, gaṇiketi bhaṇiṃ tadā;
தேன பாபேன கம்மேன, நிரயம்ஹி அபச்சிஸங்.
Tena pāpena kammena, nirayamhi apaccisaṃ.
‘‘தேன கம்மாவஸேஸேன, அஜாயிங் க³ணிகாகுலே;
‘‘Tena kammāvasesena, ajāyiṃ gaṇikākule;
ப³ஹுஸோவ பராதீ⁴னா, பச்சி²மாய ச ஜாதியங்.
Bahusova parādhīnā, pacchimāya ca jātiyaṃ.
‘‘காஸீஸு ஸெட்டி²குலஜா, ப்³ரஹ்மசாரீப³லேனஹங்;
‘‘Kāsīsu seṭṭhikulajā, brahmacārībalenahaṃ;
அச்ச²ரா விய தே³வேஸு, அஹோஸிங் ரூபஸம்பதா³.
Accharā viya devesu, ahosiṃ rūpasampadā.
‘‘தி³ஸ்வான த³ஸ்ஸனீயங் மங், கி³ரிப்³ப³ஜபுருத்தமே;
‘‘Disvāna dassanīyaṃ maṃ, giribbajapuruttame;
க³ணிகத்தே நிவேஸேஸுங், அக்கோஸனப³லேன மே.
Gaṇikatte nivesesuṃ, akkosanabalena me.
‘‘ஸாஹங் ஸுத்வான ஸத்³த⁴ம்மங், பு³த்³த⁴ஸெட்டே²ன தே³ஸிதங்;
‘‘Sāhaṃ sutvāna saddhammaṃ, buddhaseṭṭhena desitaṃ;
புப்³ப³வாஸனஸம்பன்னா, பப்³ப³ஜிங் அனகா³ரியங்.
Pubbavāsanasampannā, pabbajiṃ anagāriyaṃ.
‘‘ததூ³பஸம்பத³த்தா²ய, க³ச்ச²ந்தீ ஜினஸந்திகங்;
‘‘Tadūpasampadatthāya, gacchantī jinasantikaṃ;
மக்³கே³ து⁴த்தே டி²தே ஸுத்வா, லபி⁴ங் தூ³தோபஸம்பத³ங்.
Magge dhutte ṭhite sutvā, labhiṃ dūtopasampadaṃ.
‘‘ஸப்³ப³கம்மங் பரிக்கீ²ணங், புஞ்ஞங் பாபங் ததே²வ ச;
‘‘Sabbakammaṃ parikkhīṇaṃ, puññaṃ pāpaṃ tatheva ca;
ஸப்³ப³ஸங்ஸாரமுத்திண்ணா , க³ணிகத்தஞ்ச கே²பிதங்.
Sabbasaṃsāramuttiṇṇā , gaṇikattañca khepitaṃ.
‘‘இத்³தீ⁴ஸு ச வஸீ ஹோமி, தி³ப்³பா³ய ஸோததா⁴துயா;
‘‘Iddhīsu ca vasī homi, dibbāya sotadhātuyā;
சேதோபரியஞாணஸ்ஸ, வஸீ ஹோமி மஹாமுனே.
Cetopariyañāṇassa, vasī homi mahāmune.
‘‘புப்³பே³னிவாஸங் ஜானாமி, தி³ப்³ப³சக்கு² விஸோதி⁴தங்;
‘‘Pubbenivāsaṃ jānāmi, dibbacakkhu visodhitaṃ;
ஸப்³பா³ஸவபரிக்கீ²ணா, நத்தி² தா³னி புனப்³ப⁴வோ.
Sabbāsavaparikkhīṇā, natthi dāni punabbhavo.
‘‘அத்த²த⁴ம்மனிருத்தீஸு, படிபா⁴னே ததே²வ ச;
‘‘Atthadhammaniruttīsu, paṭibhāne tatheva ca;
ஞாணங் மம மஹாவீர, உப்பன்னங் தவ ஸந்திகே.
Ñāṇaṃ mama mahāvīra, uppannaṃ tava santike.
‘‘கிலேஸா ஜா²பிதா மய்ஹங்…பே॰… கதங் பு³த்³த⁴ஸ்ஸ ஸாஸன’’ந்தி. (அப॰ தே²ரீ 2.4.168-183);
‘‘Kilesā jhāpitā mayhaṃ…pe… kataṃ buddhassa sāsana’’nti. (apa. therī 2.4.168-183);
அரஹத்தங் பன பத்வா உதா³னவஸேன –
Arahattaṃ pana patvā udānavasena –
25.
25.
‘‘யாவ காஸிஜனபதோ³, ஸுங்கோ மே தத்தகோ அஹு;
‘‘Yāva kāsijanapado, suṅko me tattako ahu;
தங் கத்வா நேக³மோ அக்³க⁴ங், அட்³டே⁴னக்³க⁴ங் ட²பேஸி மங்.
Taṃ katvā negamo agghaṃ, aḍḍhenagghaṃ ṭhapesi maṃ.
26.
26.
‘‘அத² நிப்³பி³ந்த³ஹங் ரூபே, நிப்³பி³ந்த³ஞ்ச விரஜ்ஜஹங்;
‘‘Atha nibbindahaṃ rūpe, nibbindañca virajjahaṃ;
மா புன ஜாதிஸங்ஸாரங், ஸந்தா⁴வெய்யங் புனப்புனங்;
Mā puna jātisaṃsāraṃ, sandhāveyyaṃ punappunaṃ;
திஸ்ஸோ விஜ்ஜா ஸச்சி²கதா, கதங் பு³த்³த⁴ஸ்ஸ ஸாஸன’’ந்தி. –
Tisso vijjā sacchikatā, kataṃ buddhassa sāsana’’nti. –
இமா கா³தா² அபா⁴ஸி.
Imā gāthā abhāsi.
தத்த² யாவ காஸிஜனபதோ³, ஸுங்கோ மே தத்தகோ அஹூதி காஸீஸு ஜனபதே³ஸு ப⁴வோ ஸுங்கோ காஸிஜனபதோ³, ஸோ யாவ யத்தகோ, தத்தகோ மய்ஹங் ஸுங்கோ அஹு அஹோஸி. கித்தகோ பன ஸோதி? ஸஹஸ்ஸமத்தோ. காஸிரட்டே² கிர ததா³ ஸுங்கவஸேன ஏகதி³வஸங் ரஞ்ஞோ உப்பஜ்ஜனகஆயோ அஹோஸி ஸஹஸ்ஸமத்தோ, இமாயபி புரிஸானங் ஹத்த²தோ ஏகதி³வஸங் லத்³த⁴த⁴னங் தத்தகங். தேன வுத்தங் – ‘‘யாவ காஸிஜனபதோ³, ஸுங்கோ மே தத்தகோ அஹூ’’தி. ஸா பன காஸிஸுங்கபரிமாணதாய காஸீதி ஸமஞ்ஞங் லபி⁴. தத்த² யேபு⁴ய்யேன மனுஸ்ஸா ஸஹஸ்ஸங் தா³துங் அஸக்கொந்தா ததோ உபட்³ட⁴ங் த³த்வா தி³வஸபா⁴க³மேவ ரமித்வா க³ச்ச²ந்தி, தேஸங் வஸேனாயங் அட்³ட⁴காஸீதி பஞ்ஞாயித்த². தேன வுத்தங் – ‘‘தங் கத்வா நேக³மோ அக்³க⁴ங், அட்³டே⁴னக்³க⁴ங் ட²பேஸி ம’’ந்தி. தங் பஞ்சஸதமத்தங் த⁴னங் அக்³க⁴ங் கத்வா நேக³மோ நிக³மவாஸிஜனோ இத்தி²ரதனபா⁴வேன அனக்³க⁴ம்பி ஸமானங் அட்³டே⁴ன அக்³க⁴ங் நிமித்தங் அட்³ட⁴காஸீதி ஸமஞ்ஞாவஸேன மங் ட²பேஸி, ததா² மங் வோஹரீதி அத்தோ².
Tattha yāva kāsijanapado, suṅko me tattako ahūti kāsīsu janapadesu bhavo suṅko kāsijanapado, so yāva yattako, tattako mayhaṃ suṅko ahu ahosi. Kittako pana soti? Sahassamatto. Kāsiraṭṭhe kira tadā suṅkavasena ekadivasaṃ rañño uppajjanakaāyo ahosi sahassamatto, imāyapi purisānaṃ hatthato ekadivasaṃ laddhadhanaṃ tattakaṃ. Tena vuttaṃ – ‘‘yāva kāsijanapado, suṅko me tattako ahū’’ti. Sā pana kāsisuṅkaparimāṇatāya kāsīti samaññaṃ labhi. Tattha yebhuyyena manussā sahassaṃ dātuṃ asakkontā tato upaḍḍhaṃ datvā divasabhāgameva ramitvā gacchanti, tesaṃ vasenāyaṃ aḍḍhakāsīti paññāyittha. Tena vuttaṃ – ‘‘taṃ katvā negamo agghaṃ, aḍḍhenagghaṃ ṭhapesi ma’’nti. Taṃ pañcasatamattaṃ dhanaṃ agghaṃ katvā negamo nigamavāsijano itthiratanabhāvena anagghampi samānaṃ aḍḍhena agghaṃ nimittaṃ aḍḍhakāsīti samaññāvasena maṃ ṭhapesi, tathā maṃ voharīti attho.
அத² நிப்³பி³ந்த³ஹங் ரூபேதி ஏவங் ரூபூபஜீவினீ ஹுத்வா டி²தா. அத² பச்சா² ஸாஸனங் நிஸ்ஸாய ரூபே அஹங் நிப்³பி³ந்தி³ங் ‘‘இதிபி ரூபங் அனிச்சங், இதிபித³ங் ரூபங் து³க்க²ங், அஸுப⁴’’ந்தி பஸ்ஸந்தீ தத்த² உக்கண்டி²ங். நிப்³பி³ந்த³ஞ்ச விரஜ்ஜஹந்தி நிப்³பி³ந்த³ந்தீ சாஹங் ததோ பரங் விராக³ங் ஆபஜ்ஜிங். நிப்³பி³ந்த³க்³க³ஹணேன செத்த² தருணவிபஸ்ஸனங் த³ஸ்ஸேதி, விராக³க்³க³ஹணேன ப³லவவிபஸ்ஸனங். ‘‘நிப்³பி³ந்த³ந்தோ விரஜ்ஜதி விராகா³ விமுச்சதீ’’தி ஹி வுத்தங். மா புன ஜாதிஸங்ஸாரங், ஸந்தா⁴வெய்யங் புனப்புனந்தி இமினா நிப்³பி³ந்த³னவிரஜ்ஜனாகாரே நித³ஸ்ஸேதி. திஸ்ஸோ விஜ்ஜாதிஆதி³னா தேஸங் மத்த²கப்பத்திங், தங் வுத்தனயமேவ.
Atha nibbindahaṃ rūpeti evaṃ rūpūpajīvinī hutvā ṭhitā. Atha pacchā sāsanaṃ nissāya rūpe ahaṃ nibbindiṃ ‘‘itipi rūpaṃ aniccaṃ, itipidaṃ rūpaṃ dukkhaṃ, asubha’’nti passantī tattha ukkaṇṭhiṃ. Nibbindañca virajjahanti nibbindantī cāhaṃ tato paraṃ virāgaṃ āpajjiṃ. Nibbindaggahaṇena cettha taruṇavipassanaṃ dasseti, virāgaggahaṇena balavavipassanaṃ. ‘‘Nibbindanto virajjati virāgā vimuccatī’’ti hi vuttaṃ. Mā puna jātisaṃsāraṃ, sandhāveyyaṃ punappunanti iminā nibbindanavirajjanākāre nidasseti. Tisso vijjātiādinā tesaṃ matthakappattiṃ, taṃ vuttanayameva.
அட்³ட⁴காஸிதே²ரீகா³தா²வண்ணனா நிட்டி²தா.
Aḍḍhakāsitherīgāthāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரீகா³தா²பாளி • Therīgāthāpāḷi / 4. அட்³ட⁴காஸிதே²ரீகா³தா² • 4. Aḍḍhakāsitherīgāthā
