| Library / Tipiṭaka / д̇ибидага • Tipiṭaka / бан̃жабагаран̣а-адтагат̇аа • Pañcapakaraṇa-aṭṭhakathā |
3. ад̇хибад̇ибажжаяанид̣̇д̣̇зсаван̣н̣анаа
3. Adhipatipaccayaniddesavaṇṇanā
3. ад̇хибад̇ибажжаяанид̣̇д̣̇зсз чанд̣̇аад̇хибад̇ийд̇и чанд̣̇асан̇каад̇о ад̇хибад̇и. чанд̣̇ам̣ д̇хурам̣ гад̇ваа чанд̣̇ам̣ ж̇здтагам̣ гад̇ваа жид̇д̇уббад̇д̇игаалз уббаннасса гад̇д̇угамяад̇аачанд̣̇ассзд̇ам̣ наамам̣. сзсзсуби зсзва наяо. гасмаа бана яат̇аа хзд̇убажжаяанид̣̇д̣̇зсз хзд̇уу хзд̇усамбаяуд̇д̇агаана’’нд̇и вуд̇д̇ам̣, звамид̇ха ‘‘ад̇хибад̇ий ад̇хибад̇исамбаяуд̇д̇агаананд̇и авад̇ваа ‘‘чанд̣̇аад̇хибад̇и чанд̣̇асамбаяуд̇д̇агаана’’нд̇иаад̣̇инаа наязна д̣̇зсанаа гад̇аад̇и? згагкан̣з абхаавад̇о. буриманаяасмин̃хи д̣̇вз д̇аяо хзд̇уу згагкан̣зби хзд̇убажжаяо хонд̇и мууладтзна. убагаарагабхаавасса авиж̇аханад̇о. ад̇хибад̇и бана ж̇здтагадтзна убагаараго, на жа згагкан̣з б̣ахуу ж̇здтагаа наама хонд̇и. д̇асмаа згад̇о уббаннаанамби нзсам̣ згагкан̣з ад̇хибад̇ибажжаяабхааво над̇т̇и. д̇асса ад̇хибад̇ибажжаяабхаавасса згагкан̣з абхаавад̇о ид̇ха звам̣ д̣̇зсанаа гад̇аад̇и.
3. Adhipatipaccayaniddese chandādhipatīti chandasaṅkhāto adhipati. Chandaṃ dhuraṃ katvā chandaṃ jeṭṭhakaṃ katvā cittuppattikāle uppannassa kattukamyatāchandassetaṃ nāmaṃ. Sesesupi eseva nayo. Kasmā pana yathā hetupaccayaniddese hetū hetusampayuttakāna’’nti vuttaṃ, evamidha ‘‘adhipatī adhipatisampayuttakānanti avatvā ‘‘chandādhipati chandasampayuttakāna’’ntiādinā nayena desanā katāti? Ekakkhaṇe abhāvato. Purimanayasmiñhi dve tayo hetū ekakkhaṇepi hetupaccayo honti mūlaṭṭhena. Upakārakabhāvassa avijahanato. Adhipati pana jeṭṭhakaṭṭhena upakārako, na ca ekakkhaṇe bahū jeṭṭhakā nāma honti. Tasmā ekato uppannānampi nesaṃ ekakkhaṇe adhipatipaccayabhāvo natthi. Tassa adhipatipaccayabhāvassa ekakkhaṇe abhāvato idha evaṃ desanā katāti.
звам̣ сахаж̇аад̇аад̇хибад̇им̣ д̣̇ассзд̇ваа ид̣̇аани аарамман̣аад̇хибад̇им̣ д̣̇ассзд̇ум̣ яам̣ яам̣ д̇хаммам̣ г̇арум̣ гад̇ваад̇иаад̣̇и аарад̣̇д̇хам̣. д̇ад̇т̇а яам̣ яам̣ д̇хамманд̇и яам̣ яам̣ аарамман̣ад̇хаммам̣. г̇арум̣ гад̇ваад̇и г̇аругааражид̇д̇ийгааравасзна ваа ассаад̣̇авасзна ваа г̇арум̣ бхаарияам̣ лад̣̇д̇хаб̣б̣ам̣ авиж̇ахид̇аб̣б̣ам̣ анаван̃н̃аад̇ам̣ гад̇ваа. д̇з д̇з д̇хаммаад̇и д̇з д̇з г̇аругаад̇аб̣б̣ад̇хаммаа. д̇зсам̣ д̇зсанд̇и д̇зсам̣ д̇зсам̣ г̇аругаарагад̇хаммаанам̣. ад̇хибад̇ибажжаязнаад̇и аарамман̣аад̇хибад̇ибажжаязна бажжаяо ход̇ийд̇и аяам̣ д̇аавзд̇т̇а баал̣иван̣н̣анаа.
Evaṃ sahajātādhipatiṃ dassetvā idāni ārammaṇādhipatiṃ dassetuṃ yaṃ yaṃ dhammaṃ garuṃ katvātiādi āraddhaṃ. Tattha yaṃ yaṃ dhammanti yaṃ yaṃ ārammaṇadhammaṃ. Garuṃ katvāti garukāracittīkāravasena vā assādavasena vā garuṃ bhāriyaṃ laddhabbaṃ avijahitabbaṃ anavaññātaṃ katvā. Te te dhammāti te te garukātabbadhammā. Tesaṃ tesanti tesaṃ tesaṃ garukārakadhammānaṃ. Adhipatipaccayenāti ārammaṇādhipatipaccayena paccayo hotīti ayaṃ tāvettha pāḷivaṇṇanā.
аяам̣ бана ад̇хибад̇и наама сахаж̇аад̇аарамман̣авасзна д̣̇увид̇хо. д̇ад̇т̇а сахаж̇аад̇о чанд̣̇аад̣̇ивасзна жад̇уб̣б̣ид̇хо. д̇зсу згзго гаамааважараад̣̇ивасзна бхуумид̇о жад̇уб̣б̣ид̇хо. д̇ад̇т̇а гаамааважаро гусалаагусалагирияавасзна д̇ивид̇хо. агусалам̣ бад̇ваа банзд̇т̇а виймам̣саад̇хибад̇и на лаб̣бхад̇и. руубааруубааважаро гусалагирияавасзна д̣̇увид̇хо, абарияаабанно гусалавибаагавасзна д̣̇увид̇хо. аарамман̣аад̇хибад̇и бана ж̇аад̇ибхзд̣̇ад̇о гусалаагусалавибаагагирияаруубаниб̣б̣аанаанам̣ васзна чаб̣б̣ид̇ход̇и звамзд̇т̇а наанаббагаарабхзд̣̇ад̇о вин̃н̃аад̇аб̣б̣о винижчаяо.
Ayaṃ pana adhipati nāma sahajātārammaṇavasena duvidho. Tattha sahajāto chandādivasena catubbidho. Tesu ekeko kāmāvacarādivasena bhūmito catubbidho. Tattha kāmāvacaro kusalākusalakiriyavasena tividho. Akusalaṃ patvā panettha vīmaṃsādhipati na labbhati. Rūpārūpāvacaro kusalakiriyavasena duvidho, apariyāpanno kusalavipākavasena duvidho. Ārammaṇādhipati pana jātibhedato kusalākusalavipākakiriyarūpanibbānānaṃ vasena chabbidhoti evamettha nānappakārabhedato viññātabbo vinicchayo.
звам̣ бхиннз банзд̇т̇а сахаж̇аад̇аад̇хибад̇имхи д̇аава гаамааважарагусалагирияасан̇каад̇о ад̇хибад̇и д̣̇ухзд̇угад̇ихзд̇угзсу жид̇д̇уббаад̣̇зсу чанд̣̇аад̣̇ийнам̣ ан̃н̃ад̇арам̣ ж̇здтагам̣ гад̇ваа уббад̇д̇игаалз ад̇д̇анаа самбаяуд̇д̇ад̇хаммаанан̃жзва жид̇д̇асамудтаанаруубасса жа ад̇хибад̇ибажжаяо ход̇и. руубааважарагусалагирияасан̇каад̇зби зсзва наяо. аяам̣ бана зганд̇знзва лаб̣бхад̇и. на хи д̇з д̇хаммаа сахаж̇аад̇аад̇хибад̇им̣ винаа уббаж̇ж̇анд̇и. аруубааважарагусалагирияасан̇каад̇о бана бан̃жавогаарз руубааважараад̇хибад̇исад̣̇исова жад̇увогаарз бана самбаяуд̇д̇ад̇хаммаанан̃н̃зва ад̇хибад̇ибажжаяо ход̇и. д̇ат̇аа д̇ад̇т̇уббанно саб̣б̣оби гаамааважараад̇хибад̇и. абарияаабанно гусалад̇оби вибаагад̇оби бан̃жавогаарз зганд̇знзва самбаяуд̇д̇ад̇хаммаанан̃жзва жид̇д̇асамудтаанаруубаанан̃жа ад̇хибад̇ибажжаяо ход̇и, жад̇увогаарз аруубад̇хаммаанан̃н̃зва. агусало гаамабхавз мижчад̇д̇анияад̇ажид̇д̇зсу зганд̇знзва самбаяуд̇д̇агаанан̃жзва жид̇д̇асамудтаанаруубаанан̃жа ад̇хибад̇ибажжаяо ход̇и. анияад̇о гаамабхаваруубабхавзсу ад̇д̇ано ад̇хибад̇игаалз д̇зсан̃н̃зва. аруубабхавз аруубад̇хаммаанан̃н̃зва ад̇хибад̇ибажжаяо ход̇и. аяам̣ д̇аава сахаж̇аад̇аад̇хибад̇имхи наяо.
Evaṃ bhinne panettha sahajātādhipatimhi tāva kāmāvacarakusalakiriyasaṅkhāto adhipati duhetukatihetukesu cittuppādesu chandādīnaṃ aññataraṃ jeṭṭhakaṃ katvā uppattikāle attanā sampayuttadhammānañceva cittasamuṭṭhānarūpassa ca adhipatipaccayo hoti. Rūpāvacarakusalakiriyasaṅkhātepi eseva nayo. Ayaṃ pana ekanteneva labbhati. Na hi te dhammā sahajātādhipatiṃ vinā uppajjanti. Arūpāvacarakusalakiriyasaṅkhāto pana pañcavokāre rūpāvacaraadhipatisadisova catuvokāre pana sampayuttadhammānaññeva adhipatipaccayo hoti. Tathā tatthuppanno sabbopi kāmāvacarādhipati. Apariyāpanno kusalatopi vipākatopi pañcavokāre ekanteneva sampayuttadhammānañceva cittasamuṭṭhānarūpānañca adhipatipaccayo hoti, catuvokāre arūpadhammānaññeva. Akusalo kāmabhave micchattaniyatacittesu ekanteneva sampayuttakānañceva cittasamuṭṭhānarūpānañca adhipatipaccayo hoti. Aniyato kāmabhavarūpabhavesu attano adhipatikāle tesaññeva. Arūpabhave arūpadhammānaññeva adhipatipaccayo hoti. Ayaṃ tāva sahajātādhipatimhi nayo.
аарамман̣аад̇хибад̇имхи бана гаамааважарагусало аарамман̣аад̇хибад̇и гаамааважарагусаласса лобхасахаг̇ад̇аагусалассаад̇и имзсам̣ д̣̇виннам̣ раасийнам̣ аарамман̣аад̇хибад̇ибажжаяо ход̇и. руубааважарааруубааважарзби гусалаарамман̣аад̇хибад̇имхи зсзва наяо. абарияаабаннагусало бана аарамман̣аад̇хибад̇и гаамааважарад̇о н̃аан̣асамбаяуд̇д̇агусаласса жзва н̃аан̣асамбаяуд̇д̇агирияасса жа аарамман̣аад̇хибад̇ибажжаяо ход̇и. агусало бана аарамман̣аад̇хибад̇и наама лобхасахаг̇ад̇ажид̇д̇уббаад̣̇о вужжад̇и. со лобхасахаг̇ад̇аагусалассзва аарамман̣аад̇хибад̇ибажжаяо ход̇и. гаамааважаро бана вибаагаарамман̣аад̇хибад̇и лобхасахаг̇ад̇аагусалассзва аарамман̣аад̇хибад̇ибажжаяо ход̇и. д̇ат̇аа руубааважарааруубааважаравибаагаарамман̣аад̇хибад̇и. логуд̇д̇аро бана вибаагаарамман̣аад̇хибад̇и гаамааважарад̇о н̃аан̣асамбаяуд̇д̇агусалагирияаанан̃н̃зва аарамман̣аад̇хибад̇ибажжаяо ход̇и. гаамааважараад̣̇ибхзд̣̇ад̇о бана д̇ивид̇хоби гирияаарамман̣аад̇хибад̇и лобхасахаг̇ад̇аагусалассзва аарамман̣аад̇хибад̇ибажжаяо ход̇и. жад̇усамудтаанигаруубасан̇каад̇о руубагканд̇хо аарамман̣аад̇хибад̇и лобхасахаг̇ад̇аагусалассзва аарамман̣аад̇хибад̇ибажжаяо ход̇и. ниб̣б̣аанам̣ гаамааважарад̇о н̃аан̣асамбаяуд̇д̇агусаласса н̃аан̣асамбаяуд̇д̇агирияасса логуд̇д̇арагусаласса логуд̇д̇аравибаагасса жаад̇и имзсам̣ жад̇уннам̣ раасийнам̣ аарамман̣аад̇хибад̇ибажжаяо ход̇ийд̇и звамзд̇т̇а бажжаяуббаннад̇оби вин̃н̃аад̇аб̣б̣о винижчаяод̇и.
Ārammaṇādhipatimhi pana kāmāvacarakusalo ārammaṇādhipati kāmāvacarakusalassa lobhasahagatākusalassāti imesaṃ dvinnaṃ rāsīnaṃ ārammaṇādhipatipaccayo hoti. Rūpāvacarārūpāvacarepi kusalārammaṇādhipatimhi eseva nayo. Apariyāpannakusalo pana ārammaṇādhipati kāmāvacarato ñāṇasampayuttakusalassa ceva ñāṇasampayuttakiriyassa ca ārammaṇādhipatipaccayo hoti. Akusalo pana ārammaṇādhipati nāma lobhasahagatacittuppādo vuccati. So lobhasahagatākusalasseva ārammaṇādhipatipaccayo hoti. Kāmāvacaro pana vipākārammaṇādhipati lobhasahagatākusalasseva ārammaṇādhipatipaccayo hoti. Tathā rūpāvacarārūpāvacaravipākārammaṇādhipati. Lokuttaro pana vipākārammaṇādhipati kāmāvacarato ñāṇasampayuttakusalakiriyānaññeva ārammaṇādhipatipaccayo hoti. Kāmāvacarādibhedato pana tividhopi kiriyārammaṇādhipati lobhasahagatākusalasseva ārammaṇādhipatipaccayo hoti. Catusamuṭṭhānikarūpasaṅkhāto rūpakkhandho ārammaṇādhipati lobhasahagatākusalasseva ārammaṇādhipatipaccayo hoti. Nibbānaṃ kāmāvacarato ñāṇasampayuttakusalassa ñāṇasampayuttakiriyassa lokuttarakusalassa lokuttaravipākassa cāti imesaṃ catunnaṃ rāsīnaṃ ārammaṇādhipatipaccayo hotīti evamettha paccayuppannatopi viññātabbo vinicchayoti.
ад̇хибад̇ибажжаяанид̣̇д̣̇зсаван̣н̣анаа.
Adhipatipaccayaniddesavaṇṇanā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / бадтаанабаал̣и • Paṭṭhānapāḷi / (2) бажжаяанид̣̇д̣̇зсо • (2) Paccayaniddeso
