Library / Tipiṭaka / திபிடக • Tipiṭaka / நெத்திப்பகரண-டீகா • Nettippakaraṇa-ṭīkā |
14. அதி⁴ட்டா²னஹாரவிப⁴ங்க³வண்ணனா
14. Adhiṭṭhānahāravibhaṅgavaṇṇanā
46. தா⁴ரயிதப்³பா³தி உபதா⁴ரேதப்³பா³, உபலக்கி²தப்³பா³தி அத்தோ². வுத்தமேவ ‘‘ஸாமஞ்ஞவிஸேஸகப்பனாய வோஹாரபா⁴வேன அனவட்டா²னதோ’’திஆதி³னா (நெத்தி॰ அட்ட²॰ 14).
46.Dhārayitabbāti upadhāretabbā, upalakkhitabbāti attho. Vuttameva ‘‘sāmaññavisesakappanāya vohārabhāvena anavaṭṭhānato’’tiādinā (netti. aṭṭha. 14).
தங் தங் ப²லந்தி நிரயாதி³ங் தங் தங் ப²லங். அஞ்சிதாதி க³தா. யோனீதி ஏகஜாதி. ஸமானவஸேன மிஸ்ஸீப⁴வதி ஏதாயாதி ஹி யோனி, உபபத்தி. பேச்சாதி மரித்வா. உஸ்ஸன்னதாயாதி விதக்கப³ஹுலதாய. ‘‘உஸ்ஸன்னத்தா’’திபி வத³ந்தி. ஸஸ்ஸதாதீ³ஹி வா உஸ்ஸன்னத்தா. அஸுரஜாதியா நிப்³ப³த்தாபனகோ அஸுரஜாதினிப்³ப³த்தனகோ.
Taṃ taṃ phalanti nirayādiṃ taṃ taṃ phalaṃ. Añcitāti gatā. Yonīti ekajāti. Samānavasena missībhavati etāyāti hi yoni, upapatti. Peccāti maritvā. Ussannatāyāti vitakkabahulatāya. ‘‘Ussannattā’’tipi vadanti. Sassatādīhi vā ussannattā. Asurajātiyā nibbattāpanako asurajātinibbattanako.
ஸங்கா²தி பஞ்ஞா. பஞ்ஞாபதா⁴னா ச பா⁴வனாதி ஆஹ ‘‘படிஸங்கா²ய படிபக்க²பா⁴வனாயா’’தி.
Saṅkhāti paññā. Paññāpadhānā ca bhāvanāti āha ‘‘paṭisaṅkhāya paṭipakkhabhāvanāyā’’ti.
47. பத்த²டபா⁴வேன பத²வீ. ஸபா⁴வதா⁴ரணட்டே²ன, நிஸ்ஸத்தனிஜ்ஜீவட்டே²ன ச தா⁴து. ஆபீயதி, அப்பாயதீதி வா ஆபோ. தேஜனவஸேன திக்க²தாவஸேன, த³ஹனவஸேன வா தேஜோ. வாயனவஸேன வேக³க³மனவஸேன, ஸமுதீ³ரணவஸேன வா வாயோ. வீஸதி ஆகாராதி கேஸாத³யோ வீஸதி கொட்டா²ஸா, பகாரா வா. கக்க²ளலக்க²ணாதி⁴கதாய கேஸாதீ³ கக்க²ளலக்க²ணா வுத்தா.
47. Patthaṭabhāvena pathavī. Sabhāvadhāraṇaṭṭhena, nissattanijjīvaṭṭhena ca dhātu. Āpīyati, appāyatīti vā āpo. Tejanavasena tikkhatāvasena, dahanavasena vā tejo. Vāyanavasena vegagamanavasena, samudīraṇavasena vā vāyo. Vīsati ākārāti kesādayo vīsati koṭṭhāsā, pakārā vā. Kakkhaḷalakkhaṇādhikatāya kesādī kakkhaḷalakkhaṇā vuttā.
பாடியேக்கோ பத²வீதா⁴துகொட்டா²ஸோதி பத²வீகொட்டா²ஸமத்தோ, அத்தஸுஞ்ஞத⁴ம்மமத்தோதி அத்தோ². ஸந்தப்பதீதி எத்த² ஸரீரபகதிமதிக்கமித்வா உண்ஹபா⁴வோ ஸந்தாபோ, ஸரீரத³ஹனவஸேன பவத்தோ மஹாதா³ஹோ, அயமேதேஸங் விஸேஸோ. யேன ச ஜீரீயதீதி ஏகாஹிகாதி³ஜராரோகே³ன ஜரீயதீதி ச அத்தோ² யுஜ்ஜதி. ‘‘ஸதவாரங் தாபெத்வா தாபெத்வா உத³கே பக்கி²பித்வா உத்³த⁴டஸப்பி ஸததோ⁴தஸப்பீ’’தி வத³ந்தி. ரஸருதி⁴ரமங்ஸமேத³ன்ஹாருஅட்டி²அட்டி²மிஞ்ஜா ரஸாத³யோ. கேசி ந்ஹாருங் அபனெத்வா ஸுக்கங் ஸத்தமங் தா⁴துங் வத³ந்தி. விவேகந்தி விஸுங்பா⁴வங், விஸதி³ஸபா⁴வந்தி அத்தோ². வத்து²ஸங்கா²தோ ஹி ஆஹாரோ பரிணாமங் க³ச்ச²ந்தோ பாணப⁴க்க²க³ஹணிபத³னிய முத்தகரீஸபா⁴வேஹி விய அத்தனாபி விஸதி³ஸரஸஸங்கா²தங் விஸுங்பா⁴வங் நிப்³ப³த்தெந்தோ தப்³பா⁴வங் க³ச்ச²தீதி வுச்சதி, ததா² ரஸாத³யோபி ருதி⁴ராதி³கொட்டா²ஸங். தேனாஹ ‘‘ரஸாதி³பா⁴வேன விவேகங் க³ச்ச²தீ’’தி.
Pāṭiyekko pathavīdhātukoṭṭhāsoti pathavīkoṭṭhāsamatto, attasuññadhammamattoti attho. Santappatīti ettha sarīrapakatimatikkamitvā uṇhabhāvo santāpo, sarīradahanavasena pavatto mahādāho, ayametesaṃ viseso. Yena ca jīrīyatīti ekāhikādijarārogena jarīyatīti ca attho yujjati. ‘‘Satavāraṃ tāpetvā tāpetvā udake pakkhipitvā uddhaṭasappi satadhotasappī’’ti vadanti. Rasarudhiramaṃsamedanhāruaṭṭhiaṭṭhimiñjā rasādayo. Keci nhāruṃ apanetvā sukkaṃ sattamaṃ dhātuṃ vadanti. Vivekanti visuṃbhāvaṃ, visadisabhāvanti attho. Vatthusaṅkhāto hi āhāro pariṇāmaṃ gacchanto pāṇabhakkhagahaṇipadaniya muttakarīsabhāvehi viya attanāpi visadisarasasaṅkhātaṃ visuṃbhāvaṃ nibbattento tabbhāvaṃ gacchatīti vuccati, tathā rasādayopi rudhirādikoṭṭhāsaṃ. Tenāha ‘‘rasādibhāvena vivekaṃ gacchatī’’ti.
ஸபா⁴வலக்க²ணதோதி அஸுசிபா⁴வேன லக்கி²தப்³ப³தோ.
Sabhāvalakkhaṇatoti asucibhāvena lakkhitabbato.
48. யாதா²வஸரஸலக்க²ணந்தி ரஸிதப்³போ³தி ரஸோ, படிவிஜ்ஜி²தப்³போ³ ஸபா⁴வோ, அத்தனோ ரஸோ ஸரஸோ, யாதா²வோ ஸரஸோ, யாதா²வஸரஸோ யாதா²வஸரஸோ ஏவ லக்கி²தப்³ப³த்தா லக்க²ணந்தி யாதா²வஸரஸலக்க²ணங். அத² வா யாதா²வஸரஸலக்க²ணந்தி அவிபரீதங் அத்தனோ பவத்திஸங்கா²தங் கிச்சஞ்சேவ பீளனஸங்கா²தங் லக்க²ணஞ்ச. ‘‘இத³ங் கிச்சங், இத³ங் லக்க²ண’’ந்தி அவிஜ்ஜாஹேது ஞாதுங் ந ஸக்கோதி, தப்³பி³ஸயஞாணுப்பத்திங் நிவாரெந்தீ சா²தெ³த்வா பரியோனந்தி⁴த்வா திட்ட²தீதி வுத்தா. தேன வுத்தங் ‘‘ஜானிதுங் படிவிஜ்ஜி²துங் ந தே³தீ’’தி. தயித³மஸ்ஸா கிச்சந்தி கிச்சதோ கதி²தா. கதி²தாதி ச வுத்தா, யதோ ச அவிஜ்ஜா அஸம்படிவேத⁴ரஸாதி வுச்சதி. ஜாயதி எத்தா²தி ஜாதி, உப்பத்திட்டா²னங். யதி³பி நிரோத⁴மக்³கே³ அவிஜ்ஜா ஆரம்மணங் ந கரோதி, தே பன ஜானிதுகாமஸ்ஸ தப்படிச்சா²த³னவஸேன அனிரோத⁴மக்³கே³ஸு நிரோத⁴மக்³க³க்³க³ஹணஸ்ஸ காரணபா⁴வேன பவத்தமானா தத்த² உப்பஜ்ஜதீதி வுச்சதி, தேஸம்பி அவிஜ்ஜாய உப்பத்திட்டா²னதா ஹோதி, இதரேஸங் ஆரம்மணபா⁴வேன சாதி.
48.Yāthāvasarasalakkhaṇanti rasitabboti raso, paṭivijjhitabbo sabhāvo, attano raso saraso, yāthāvo saraso, yāthāvasaraso yāthāvasaraso eva lakkhitabbattā lakkhaṇanti yāthāvasarasalakkhaṇaṃ. Atha vā yāthāvasarasalakkhaṇanti aviparītaṃ attano pavattisaṅkhātaṃ kiccañceva pīḷanasaṅkhātaṃ lakkhaṇañca. ‘‘Idaṃ kiccaṃ, idaṃ lakkhaṇa’’nti avijjāhetu ñātuṃ na sakkoti, tabbisayañāṇuppattiṃ nivārentī chādetvā pariyonandhitvā tiṭṭhatīti vuttā. Tena vuttaṃ ‘‘jānituṃ paṭivijjhituṃ na detī’’ti. Tayidamassā kiccanti kiccato kathitā. Kathitāti ca vuttā, yato ca avijjā asampaṭivedharasāti vuccati. Jāyati etthāti jāti, uppattiṭṭhānaṃ. Yadipi nirodhamagge avijjā ārammaṇaṃ na karoti, te pana jānitukāmassa tappaṭicchādanavasena anirodhamaggesu nirodhamaggaggahaṇassa kāraṇabhāvena pavattamānā tattha uppajjatīti vuccati, tesampi avijjāya uppattiṭṭhānatā hoti, itaresaṃ ārammaṇabhāvena cāti.
அத்தா²னத்த²ந்தி ஹிதாஹிதங். ஸம்மோஹவினோத³னியங் பன ‘‘அத்த²த்த²’’ந்தி (விப⁴॰ அட்ட²॰ 226) வுத்தங், தத்த² அத்தோ² ஏவ அத்த²த்தோ²தி அத்த²ஸ்ஸ அவிபரீததாத³ஸ்ஸனத்த²ங் து³தியேன அத்த²ஸத்³தே³ன விஸேஸனங். ந ஹி ஞாணங் அனத்தே² ‘‘அத்தோ²’’தி க³ண்ஹாதீதி. காரணாகாரணந்தி எத்தா²பி ஏவங் த³ட்ட²ப்³ப³ங். அத்த²த்த²ந்தி வா ஆமேடி³தவசனங் ஸப்³பே³ஸங் அத்தா²னங் பாகடகரணபா⁴வப்பகாஸனத்த²ங், ப²லங் ப²லந்தி அத்தோ², ஹிதபரியாயேபி ஏஸேவ நயோ. ந்தி அத்தா²னத்தா²தி³கங். ஆகாரந்தி அத்தா²தி³காரணமேவ.
Atthānatthanti hitāhitaṃ. Sammohavinodaniyaṃ pana ‘‘atthattha’’nti (vibha. aṭṭha. 226) vuttaṃ, tattha attho eva atthatthoti atthassa aviparītatādassanatthaṃ dutiyena atthasaddena visesanaṃ. Na hi ñāṇaṃ anatthe ‘‘attho’’ti gaṇhātīti. Kāraṇākāraṇanti etthāpi evaṃ daṭṭhabbaṃ. Atthatthanti vā āmeḍitavacanaṃ sabbesaṃ atthānaṃ pākaṭakaraṇabhāvappakāsanatthaṃ, phalaṃ phalanti attho, hitapariyāyepi eseva nayo. Nti atthānatthādikaṃ. Ākāranti atthādikāraṇameva.
படிவித்³த⁴ஸ்ஸ புன அவெக்க²னா பச்சவெக்க²ணா. து³சிந்திதசிந்திதாதி³லக்க²ணஸ்ஸ பா³லஸ்ஸ பா⁴வோ பா³ல்யங். ஸம்பஜானாதீதி ஸமங் பகாரேஹி ஜானாதி. ப³லவமோஹோ பமோஹோ. ஸமந்ததோ மோஹனங் ஸம்மோஹோ. து³க்³க³திகா³மிகம்மஸ்ஸ விஸேஸபச்சயத்தா அவிந்தி³யங். விந்த³தீதி லப⁴தி. அனவஜ்ஜத⁴ம்மானங் விஜ்ஜா விய விஸேஸபச்சயோ ந ஹோதீதி விந்தி³யங் ந விந்த³தி. அயங் அவிஜ்ஜாய வேமத்ததாதி அயங் ‘‘து³க்கே² அஞ்ஞாண’’ந்திஆதி³னா கிச்சஜாதிலக்க²ணேஹி வுத்தோ அவிஜ்ஜாய அவிஸேஸோ. விஜ்ஜாதிஆதீ³னங் வுத்தனயானஸாரேன அத்தோ² வேதி³தப்³போ³.
Paṭividdhassa puna avekkhanā paccavekkhaṇā. Ducintitacintitādilakkhaṇassa bālassa bhāvo bālyaṃ. Sampajānātīti samaṃ pakārehi jānāti. Balavamoho pamoho. Samantato mohanaṃ sammoho. Duggatigāmikammassa visesapaccayattā avindiyaṃ. Vindatīti labhati. Anavajjadhammānaṃ vijjā viya visesapaccayo na hotīti vindiyaṃ na vindati. Ayaṃ avijjāya vemattatāti ayaṃ ‘‘dukkhe aññāṇa’’ntiādinā kiccajātilakkhaṇehi vutto avijjāya aviseso. Vijjātiādīnaṃ vuttanayānasārena attho veditabbo.
பாஸாணஸக்க²ரவாலிகாவிரஹிதா பூ⁴மி ஸண்ஹாதி ‘‘ஸண்ஹட்டே²னா’’தி வுத்தங்.
Pāsāṇasakkharavālikāvirahitā bhūmi saṇhāti ‘‘saṇhaṭṭhenā’’ti vuttaṃ.
தத்தகமேவ காலந்தி பஞ்சகப்பஸதானி. விபூ⁴தங் ஸமத்திக்கந்தங் ரூபஸஞ்ஞாஸங்கா²தங் ரூபங் ஏதாயாதி விபூ⁴தரூபங், ஸமாபத்திந்தி பத³த்தோ². ந ஹி காசி அரூபஸமாபத்தி ரூபஸஞ்ஞாஸஹக³தா பவத்தீதி. நிரோத⁴ஸமாபத்தியங் வத்தப்³ப³மேவ நத்தி², தத்த² நேவஸஞ்ஞானாஸஞ்ஞாயதனஸமாபத்தியா விஸுங் க³ஹிதத்தா வுத்தங் ‘‘ஸேஸாருப்பஸமாபத்தியோ’’தி.
Tattakamevakālanti pañcakappasatāni. Vibhūtaṃ samattikkantaṃ rūpasaññāsaṅkhātaṃ rūpaṃ etāyāti vibhūtarūpaṃ, samāpattinti padattho. Na hi kāci arūpasamāpatti rūpasaññāsahagatā pavattīti. Nirodhasamāpattiyaṃ vattabbameva natthi, tattha nevasaññānāsaññāyatanasamāpattiyā visuṃ gahitattā vuttaṃ ‘‘sesāruppasamāpattiyo’’ti.
த³மத²ங் அனுபக³ச்ச²ந்தோ து³ட்ட²ஸ்ஸோ க²லுங்கஸ்ஸோ. உத்தரித³மதா²யாதி அரியமக்³க³த³மதா²ய.
Damathaṃ anupagacchanto duṭṭhasso khaluṅkasso. Uttaridamathāyāti ariyamaggadamathāya.
இதரோதி து³க்கா²படிபதோ³ கி²ப்பாபி⁴ஞ்ஞோ, ஸுகா²படிபதோ³ ச கி²ப்பாபி⁴ஞ்ஞோ. உப⁴யதோபா⁴கே³ஹீதி ரூபகாயனாமகாயபா⁴கே³ஹி. உப⁴யதோதி விக்க²ம்ப⁴னஸமுச்சே²த³விமுத்திவஸேன.
Itaroti dukkhāpaṭipado khippābhiñño, sukhāpaṭipado ca khippābhiñño. Ubhayatobhāgehīti rūpakāyanāmakāyabhāgehi. Ubhayatoti vikkhambhanasamucchedavimuttivasena.
அனேகோபீதி ஸபா⁴வேன அனேகோபி. ஏகஸத்³தா³பி⁴தெ⁴ய்யதாயாதி ஸாமஞ்ஞஸத்³தா³பி⁴தெ⁴ய்யதாய.
Anekopīti sabhāvena anekopi. Ekasaddābhidheyyatāyāti sāmaññasaddābhidheyyatāya.
அதி⁴ட்டா²னஹாரவிப⁴ங்க³வண்ணனா நிட்டி²தா.
Adhiṭṭhānahāravibhaṅgavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 14. அதி⁴ட்டா²னஹாரவிப⁴ங்கோ³ • 14. Adhiṭṭhānahāravibhaṅgo
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / நெத்திப்பகரண-அட்ட²கதா² • Nettippakaraṇa-aṭṭhakathā / 14. அதி⁴ட்டா²னஹாரவிப⁴ங்க³வண்ணனா • 14. Adhiṭṭhānahāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / 14. அதி⁴ட்டா²னஹாரவிப⁴ங்க³விபா⁴வனா • 14. Adhiṭṭhānahāravibhaṅgavibhāvanā