| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
2. அதி⁴வுத்திபத³ஸுத்தவண்ணனா
2. Adhivuttipadasuttavaṇṇanā
22. து³தியே யே தே த⁴ம்மாதி யே தே த³ஸப³லஞாணங் ஸப்³ப³ஞ்ஞுதஞ்ஞாணத⁴ம்மா. அதி⁴வுத்திபதா³னந்தி அதி⁴வசனபதா³னங், க²ந்தா⁴யதனதா⁴துத⁴ம்மானந்தி அத்தோ². அதி⁴வுத்தியோதி ஹி அதி⁴வசனானி வுச்சந்தி, தேஸங் யே பத³பூ⁴தா தே³ஸனாய பத³ட்டா²னத்தா. அதீதா பு³த்³தா⁴பி ஹி ஏதே த⁴ம்மே கத²யிங்ஸு, அனாக³தாபி ஏதேவ கத²யிஸ்ஸந்தி. தஸ்மா க²ந்தா⁴த³யோ அதி⁴வுத்திபதா³னி நாம. தேஸங் அதி⁴வுத்திபதா³னங். அத² வா பூ⁴தமத்த²ங் அபி⁴ப⁴வித்வா யதா²ஸபா⁴வதோ அக்³க³ஹெத்வா வத்தனதோ அதி⁴வுத்தியோதி தி³ட்டி²யோ வுச்சந்தி, அதி⁴வுத்தீனங் பதா³னி அதி⁴வுத்திபதா³னி, தி³ட்டி²தீ³பகானி வசனானீதி அத்தோ². தேஸங் அதி⁴வுத்திபதா³னங் தி³ட்டி²வோஹாரானங். அபி⁴ஞ்ஞா ஸச்சி²கிரியாயாதி ஜானித்வா பச்சக்க²கரணத்தா²ய. விஸாரதோ³தி ஞாணஸோமனஸ்ஸப்பத்தோ. தத்தா²தி தேஸு த⁴ம்மேஸு தேஸங் தேஸங் ததா² ததா² த⁴ம்மங் தே³ஸேதுந்தி தேஸங் தேஸங் தி³ட்டி²க³திகானங் வா இதரேஸங் வா ஆஸயங் ஞத்வா ததா² ததா² த⁴ம்மங் தே³ஸேதுங். ஹீனங் வா ஹீனந்தி ஞஸ்ஸதீதி ஹீனங் வா த⁴ம்மங் ‘‘ஹீனோ த⁴ம்மோ’’தி ஜானிஸ்ஸதி. ஞாதெய்யந்தி ஞாதப்³ப³ங். த³ட்டெ²ய்யந்தி த³ட்ட²ப்³ப³ங். ஸச்சி²கரெய்யந்தி ஸச்சி²காதப்³ப³ங். தத்த² தத்த² யதா²பூ⁴தஞாணந்தி தேஸு தேஸு த⁴ம்மேஸு யதா²ஸபா⁴வஞாணங். இமினா ஸப்³ப³ஞ்ஞுதஞ்ஞாணங் த³ஸ்ஸேதி. ஏவங் ஸப்³ப³ஞ்ஞுதஞ்ஞாணங் த³ஸ்ஸெத்வா புன த³ஸப³லஞாணங் த³ஸ்ஸெந்தோ த³ஸயிமானீதிஆதி³மாஹ. த³ஸப³லஞாணம்பி ஹி தத்த² தத்த² யதா²பூ⁴தஞாணமேவாதி.
22. Dutiye ye te dhammāti ye te dasabalañāṇaṃ sabbaññutaññāṇadhammā. Adhivuttipadānanti adhivacanapadānaṃ, khandhāyatanadhātudhammānanti attho. Adhivuttiyoti hi adhivacanāni vuccanti, tesaṃ ye padabhūtā desanāya padaṭṭhānattā. Atītā buddhāpi hi ete dhamme kathayiṃsu, anāgatāpi eteva kathayissanti. Tasmā khandhādayo adhivuttipadāni nāma. Tesaṃ adhivuttipadānaṃ. Atha vā bhūtamatthaṃ abhibhavitvā yathāsabhāvato aggahetvā vattanato adhivuttiyoti diṭṭhiyo vuccanti, adhivuttīnaṃ padāni adhivuttipadāni, diṭṭhidīpakāni vacanānīti attho. Tesaṃ adhivuttipadānaṃ diṭṭhivohārānaṃ. Abhiññā sacchikiriyāyāti jānitvā paccakkhakaraṇatthāya. Visāradoti ñāṇasomanassappatto. Tatthāti tesu dhammesu tesaṃ tesaṃ tathā tathā dhammaṃ desetunti tesaṃ tesaṃ diṭṭhigatikānaṃ vā itaresaṃ vā āsayaṃ ñatvā tathā tathā dhammaṃ desetuṃ. Hīnaṃ vā hīnanti ñassatīti hīnaṃ vā dhammaṃ ‘‘hīno dhammo’’ti jānissati. Ñāteyyanti ñātabbaṃ. Daṭṭheyyanti daṭṭhabbaṃ. Sacchikareyyanti sacchikātabbaṃ. Tatthatattha yathābhūtañāṇanti tesu tesu dhammesu yathāsabhāvañāṇaṃ. Iminā sabbaññutaññāṇaṃ dasseti. Evaṃ sabbaññutaññāṇaṃ dassetvā puna dasabalañāṇaṃ dassento dasayimānītiādimāha. Dasabalañāṇampi hi tattha tattha yathābhūtañāṇamevāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. அதி⁴வுத்திபத³ஸுத்தங் • 2. Adhivuttipadasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 2-4. அதி⁴வுத்திபத³ஸுத்தாதி³வண்ணனா • 2-4. Adhivuttipadasuttādivaṇṇanā
