| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[424] 8. аад̣̇ид̇д̇аж̇аад̇агаван̣н̣анаа
[424] 8. Ādittajātakavaṇṇanā
аад̣̇ид̇д̇асминд̇и ид̣̇ам̣ сад̇т̇аа ж̇зд̇аванз вихаранд̇о асад̣̇исад̣̇аанам̣ аараб̣бха гат̇зси. асад̣̇исад̣̇аанам̣ махааг̇овинд̣̇асуд̇д̇аван̣н̣анаад̇о (д̣̇ий. ни. адта. 2.296) вид̇т̇аарзд̇ваа гат̇зд̇аб̣б̣ам̣. д̇асса бана д̣̇иннад̣̇ивасад̇о д̣̇уд̇ияад̣̇ивасз д̇хаммасабхааяам̣ гат̇ам̣ самудтаабзсум̣ ‘‘аавусо, госаларааж̇аа вижинид̇ваава , бун̃н̃агкзд̇д̇ам̣ н̃ад̇ваа б̣уд̣̇д̇хаббамукасса арияасан̇гхасса асад̣̇исад̣̇аанам̣ ад̣̇аасий’’д̇и. сад̇т̇аа ааг̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчид̇ваа ‘‘имааяа наамаа’’д̇и вуд̇д̇з ‘‘анажчарияам̣, бхигкавз, ран̃н̃о вижинид̇ваа ануд̇д̇арз бун̃н̃агкзд̇д̇з д̣̇аанабад̇идтаабанам̣, бораан̣агабан̣д̣ид̇ааби вижинид̇ваава махаад̣̇аанам̣ ад̣̇ам̣суу’’д̇и вад̇ваа ад̇ийд̇ам̣ аахари.
Ādittasminti idaṃ satthā jetavane viharanto asadisadānaṃ ārabbha kathesi. Asadisadānaṃ mahāgovindasuttavaṇṇanāto (dī. ni. aṭṭha. 2.296) vitthāretvā kathetabbaṃ. Tassa pana dinnadivasato dutiyadivase dhammasabhāyaṃ kathaṃ samuṭṭhāpesuṃ ‘‘āvuso, kosalarājā vicinitvāva , puññakkhettaṃ ñatvā buddhappamukhassa ariyasaṅghassa asadisadānaṃ adāsī’’ti. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘anacchariyaṃ, bhikkhave, rañño vicinitvā anuttare puññakkhette dānapatiṭṭhāpanaṃ, porāṇakapaṇḍitāpi vicinitvāva mahādānaṃ adaṃsū’’ti vatvā atītaṃ āhari.
ад̇ийд̇з сивирадтз роруванаг̇арз рорувамахаарааж̇аа наама д̣̇аса рааж̇ад̇хаммз агобзд̇ваа жад̇уухи сан̇г̇ахавад̇т̇уухи ж̇анам̣ сан̇г̇ан̣ханд̇о махааж̇анасса маад̇аабид̇удтаанз тад̇ваа габан̣ад̣̇д̇хигаваниб̣б̣агаяаажагаад̣̇ийнам̣ махаад̣̇аанам̣ бавад̇д̇зси. д̇асса самуд̣̇д̣̇авиж̇аяаа наама аг̇г̇амахзсий ахоси бан̣д̣ид̇аа н̃аан̣асамбаннаа. со згад̣̇ивасам̣ д̣̇аанаг̇г̇ам̣ ологзнд̇о ‘‘маяхам̣ д̣̇аанам̣ д̣̇уссийлаа лоласад̇д̇аа бхун̃ж̇анд̇и, д̇ам̣ мам̣ на хаасзд̇и, ахам̣ ко бана сийлаванд̇аанам̣ аг̇г̇ад̣̇агкин̣зяяаанам̣ бажжзгаб̣уд̣̇д̇хаанам̣ д̣̇аад̇угаамо, д̇з жа химаванд̇абад̣̇зсз васанд̇и, го ну ко д̇з ниманд̇зд̇ваа аанзссад̇и, гам̣ бзсзссаамий’’д̇и жинд̇зд̇ваа д̇амад̇т̇ам̣ д̣̇звияаа аарожзси. ат̇а нам̣ саа ааха ‘‘махаарааж̇а, маа жинд̇аяид̇т̇а, амхаагам̣ д̣̇аад̇аб̣б̣ад̣̇аанаб̣алзна сийлаб̣алзна сажжаб̣алзна бубпаани бзсзд̇ваа бажжзгаб̣уд̣̇д̇хз ниманд̇зд̇ваа д̇зсам̣ ааг̇ад̇агаалз саб̣б̣абаригкаарасамбаннад̣̇аанам̣ д̣̇ассаамаа’’д̇и. рааж̇аа ‘‘саад̇хуу’’д̇и самбадижчид̇ваа ‘‘сагаланаг̇араваасино сийлам̣ самаад̣̇ияанд̇уу’’д̇и наг̇арз бхзрим̣ жараабзд̇ваа саяамби сабариж̇ано убосат̇ан̇г̇аани ад̇хидтааяа махаад̣̇аанам̣ бавад̇д̇зд̇ваа суманабубпабун̣н̣ам̣ суван̣н̣асамуг̇г̇ам̣ г̇аахаабзд̇ваа баасаад̣̇аа оруяха рааж̇ан̇г̇ан̣з тад̇ваа бан̃жан̇г̇аани бат̇авияам̣ бад̇идтаабзд̇ваа баажийнад̣̇исаабхимуко ванд̣̇ид̇ваа ‘‘баажийнад̣̇исааяа араханд̇з ванд̣̇аами, сажз амхаагам̣ гожи г̇ун̣о ад̇т̇и, амхзсу анугамбам̣ гад̇ваа амхаагам̣ бхигкам̣ г̇ан̣хат̇аа’’д̇и вад̇ваа сад̇д̇а бубпамудтияо киби. баажийнад̣̇исааяа бажжзгаб̣уд̣̇д̇хаанам̣ абхаавзна бунад̣̇ивасз нааг̇амим̣су. д̣̇уд̇ияад̣̇ивасз д̣̇агкин̣ад̣̇исам̣ намасси, д̇ад̇оби нааг̇ад̇аа. д̇ад̇ияад̣̇ивасз бажчимад̣̇исам̣ намасси, д̇ад̇оби нааг̇ад̇аа. жад̇уд̇т̇ад̣̇ивасз уд̇д̇арад̣̇исам̣ намасси, намассид̇ваа жа бана ‘‘уд̇д̇арахимаванд̇абад̣̇зсаваасино бажжзгаб̣уд̣̇д̇хаа амхаагам̣ бхигкам̣ г̇ан̣ханд̇уу’’д̇и сад̇д̇а бубпамудтияо виссаж̇ж̇зси. бубпаани г̇анд̇ваа нанд̣̇амуулагабаб̣бхаарз бан̃жаннам̣ бажжзгаб̣уд̣̇д̇хасад̇аанам̣ убари бад̇им̣су.
Atīte siviraṭṭhe roruvanagare roruvamahārājā nāma dasa rājadhamme akopetvā catūhi saṅgahavatthūhi janaṃ saṅgaṇhanto mahājanassa mātāpituṭṭhāne ṭhatvā kapaṇaddhikavanibbakayācakādīnaṃ mahādānaṃ pavattesi. Tassa samuddavijayā nāma aggamahesī ahosi paṇḍitā ñāṇasampannā. So ekadivasaṃ dānaggaṃ olokento ‘‘mayhaṃ dānaṃ dussīlā lolasattā bhuñjanti, taṃ maṃ na hāseti, ahaṃ kho pana sīlavantānaṃ aggadakkhiṇeyyānaṃ paccekabuddhānaṃ dātukāmo, te ca himavantapadese vasanti, ko nu kho te nimantetvā ānessati, kaṃ pesessāmī’’ti cintetvā tamatthaṃ deviyā ārocesi. Atha naṃ sā āha ‘‘mahārāja, mā cintayittha, amhākaṃ dātabbadānabalena sīlabalena saccabalena pupphāni pesetvā paccekabuddhe nimantetvā tesaṃ āgatakāle sabbaparikkhārasampannadānaṃ dassāmā’’ti. Rājā ‘‘sādhū’’ti sampaṭicchitvā ‘‘sakalanagaravāsino sīlaṃ samādiyantū’’ti nagare bheriṃ carāpetvā sayampi saparijano uposathaṅgāni adhiṭṭhāya mahādānaṃ pavattetvā sumanapupphapuṇṇaṃ suvaṇṇasamuggaṃ gāhāpetvā pāsādā oruyha rājaṅgaṇe ṭhatvā pañcaṅgāni pathaviyaṃ patiṭṭhāpetvā pācīnadisābhimukho vanditvā ‘‘pācīnadisāya arahante vandāmi, sace amhākaṃ koci guṇo atthi, amhesu anukampaṃ katvā amhākaṃ bhikkhaṃ gaṇhathā’’ti vatvā satta pupphamuṭṭhiyo khipi. Pācīnadisāya paccekabuddhānaṃ abhāvena punadivase nāgamiṃsu. Dutiyadivase dakkhiṇadisaṃ namassi, tatopi nāgatā. Tatiyadivase pacchimadisaṃ namassi, tatopi nāgatā. Catutthadivase uttaradisaṃ namassi, namassitvā ca pana ‘‘uttarahimavantapadesavāsino paccekabuddhā amhākaṃ bhikkhaṃ gaṇhantū’’ti satta pupphamuṭṭhiyo vissajjesi. Pupphāni gantvā nandamūlakapabbhāre pañcannaṃ paccekabuddhasatānaṃ upari patiṃsu.
д̇з ааваж̇ж̇амаанаа ран̃н̃аа ад̇д̇ано ниманд̇ид̇абхаавам̣ н̃ад̇ваа бунад̣̇ивасз сад̇д̇а бажжзгаб̣уд̣̇д̇хз ааманд̇зд̇ваа ‘‘маарисаа, рааж̇аа во ниманд̇зд̇и, д̇асса сан̇г̇ахам̣ гарот̇аа’’д̇и вад̣̇им̣су. сад̇д̇а бажжзгаб̣уд̣̇д̇хаа аагаасзнааг̇анд̇ваа рааж̇ад̣̇ваарз од̇арим̣су. д̇з д̣̇исваа рааж̇аа соманассаж̇аад̇о ванд̣̇ид̇ваа баасаад̣̇ам̣ ааробзд̇ваа маханд̇ам̣ саггаарам̣ гад̇ваа д̣̇аанам̣ д̣̇ад̇ваа бхад̇д̇агижжабарияосаанз бунад̣̇ивасад̇т̇ааяа бунад̣̇ивасад̇т̇ааяаад̇и звам̣ ча д̣̇ивасз ниманд̇зд̇ваа сад̇д̇амз д̣̇ивасз саб̣б̣абаригкаарад̣̇аанам̣ саж̇ж̇зд̇ваа сад̇д̇арад̇анакажид̇аани ман̃жабийтаад̣̇ийни бан̃н̃абзд̇ваа д̇ижийвараад̣̇игз саб̣б̣асаман̣абарибхог̇з сад̇д̇аннам̣ бажжзгаб̣уд̣̇д̇хаанам̣ санд̇игз табзд̇ваа ‘‘маяам̣ имз баригкаарз д̇умхаагам̣ д̣̇змаа’’д̇и вад̇ваа д̇зсам̣ бхад̇д̇агижжабарияосаанз рааж̇аа жа д̣̇звий жа убхоби намассамаанаа адтам̣су. ат̇а нзсам̣ анумод̣̇анам̣ гаронд̇о сан̇гхад̇т̇зро д̣̇вз г̇аат̇аа абхааси –
Te āvajjamānā raññā attano nimantitabhāvaṃ ñatvā punadivase satta paccekabuddhe āmantetvā ‘‘mārisā, rājā vo nimanteti, tassa saṅgahaṃ karothā’’ti vadiṃsu. Satta paccekabuddhā ākāsenāgantvā rājadvāre otariṃsu. Te disvā rājā somanassajāto vanditvā pāsādaṃ āropetvā mahantaṃ sakkāraṃ katvā dānaṃ datvā bhattakiccapariyosāne punadivasatthāya punadivasatthāyāti evaṃ cha divase nimantetvā sattame divase sabbaparikkhāradānaṃ sajjetvā sattaratanakhacitāni mañcapīṭhādīni paññapetvā ticīvarādike sabbasamaṇaparibhoge sattannaṃ paccekabuddhānaṃ santike ṭhapetvā ‘‘mayaṃ ime parikkhāre tumhākaṃ demā’’ti vatvā tesaṃ bhattakiccapariyosāne rājā ca devī ca ubhopi namassamānā aṭṭhaṃsu. Atha nesaṃ anumodanaṃ karonto saṅghatthero dve gāthā abhāsi –
69.
69.
‘‘аад̣̇ид̇д̇асмим̣ аг̇аарасмим̣, яам̣ нийхарад̇и бхааж̇анам̣;
‘‘Ādittasmiṃ agārasmiṃ, yaṃ nīharati bhājanaṃ;
д̇ам̣ д̇асса ход̇и ад̇т̇ааяа, но жа яам̣ д̇ад̇т̇а д̣аяхад̇и.
Taṃ tassa hoti atthāya, no ca yaṃ tattha ḍayhati.
70.
70.
‘‘звамаад̣̇ийбид̇о лого, ж̇арааяа маран̣зна жа;
‘‘Evamādīpito loko, jarāya maraṇena ca;
нийхарзт̇зва д̣̇аанзна, д̣̇иннам̣ ход̇и сунийхад̇а’’нд̇и.
Nīharetheva dānena, dinnaṃ hoti sunīhata’’nti.
д̇ад̇т̇а аад̣̇ид̇д̇асминд̇и д̇ан̇кан̣з баж̇ж̇алид̇з. бхааж̇ананд̇и убагаран̣ам̣. но жа яам̣ д̇ад̇т̇а д̣аяхад̇ийд̇и яам̣ бана д̇ад̇т̇а д̣аяхад̇и, анд̇амасо д̇ин̣асант̇аароби, саб̣б̣ам̣ д̇асса анубагаран̣амзва ход̇и. ж̇арааяа маран̣зна жаад̇и д̣̇зсанаасийсамзд̇ам̣, ад̇т̇ад̇о банзса згаад̣̇асахи аг̇г̇ийхи аад̣̇ийбид̇о наама. нийхарзт̇зваад̇и д̇ад̇о згаад̣̇асад̇и аг̇г̇ийхи баж̇ж̇алид̇алогаа д̣̇асавид̇хад̣̇аанавад̇т̇убхзд̣̇ам̣ д̇ам̣ д̇ам̣ баригкаарад̣̇аанам̣ жзд̇анааяа ниггад̣дхзт̇зва. д̣̇иннам̣ ход̇ийд̇и аббам̣ ваа б̣ахум̣ ваа яам̣ д̣̇иннам̣, д̇ад̣̇зва сунийхад̇ам̣ наама ход̇ийд̇и.
Tattha ādittasminti taṅkhaṇe pajjalite. Bhājananti upakaraṇaṃ. No ca yaṃ tattha ḍayhatīti yaṃ pana tattha ḍayhati, antamaso tiṇasanthāropi, sabbaṃ tassa anupakaraṇameva hoti. Jarāya maraṇena cāti desanāsīsametaṃ, atthato panesa ekādasahi aggīhi ādīpito nāma. Nīharethevāti tato ekādasati aggīhi pajjalitalokā dasavidhadānavatthubhedaṃ taṃ taṃ parikkhāradānaṃ cetanāya nikkaḍḍhetheva. Dinnaṃ hotīti appaṃ vā bahuṃ vā yaṃ dinnaṃ, tadeva sunīhataṃ nāma hotīti.
звам̣ сан̇гхад̇т̇зро анумод̣̇анам̣ гад̇ваа ‘‘аббамад̇д̇о хохи, махаарааж̇аа’’д̇и ран̃н̃о оваад̣̇ам̣ д̣̇ад̇ваа аагаасз уббад̇ид̇ваа баасаад̣̇аган̣н̣игам̣ д̣̇вид̇хаа гад̇ваа г̇анд̇ваа нанд̣̇амуулагабаб̣бхаарзязва од̇ари. д̇асса д̣̇иннабаригкаароби д̇знзва сад̣̇д̇хим̣ уббад̇ид̇ваа нанд̣̇амуулагабаб̣бхаарзязва од̇ари. ран̃н̃о жа д̣̇звияаа жа сагаласарийрам̣ бийд̇ияаа бун̣н̣ам̣ ахоси. звам̣ д̇асмим̣ г̇ад̇з авасзсааби –
Evaṃ saṅghatthero anumodanaṃ katvā ‘‘appamatto hohi, mahārājā’’ti rañño ovādaṃ datvā ākāse uppatitvā pāsādakaṇṇikaṃ dvidhā katvā gantvā nandamūlakapabbhāreyeva otari. Tassa dinnaparikkhāropi teneva saddhiṃ uppatitvā nandamūlakapabbhāreyeva otari. Rañño ca deviyā ca sakalasarīraṃ pītiyā puṇṇaṃ ahosi. Evaṃ tasmiṃ gate avasesāpi –
71.
71.
‘‘яо д̇хаммалад̣̇д̇хасса д̣̇ад̣̇аад̇и д̣̇аанам̣, удтаанавийрияаад̇хиг̇ад̇асса ж̇анд̇у;
‘‘Yo dhammaladdhassa dadāti dānaṃ, uṭṭhānavīriyādhigatassa jantu;
ад̇иггамма со взд̇аран̣им̣ яамасса, д̣̇иб̣б̣аани таанаани убзд̇и мажжо.
Atikkamma so vetaraṇiṃ yamassa, dibbāni ṭhānāni upeti macco.
72.
72.
‘‘д̣̇аанан̃жа яуд̣̇д̇хан̃жа самаанамааху, аббааби санд̇аа б̣ахугз ж̇инанд̇и;
‘‘Dānañca yuddhañca samānamāhu, appāpi santā bahuke jinanti;
аббамби жз сад̣̇д̣̇ахаано д̣̇ад̣̇аад̇и, д̇знзва со ход̇и сукий барад̇т̇а.
Appampi ce saddahāno dadāti, teneva so hoti sukhī parattha.
73.
73.
‘‘вижзяяа д̣̇аанам̣ суг̇ад̇аббасад̇т̇ам̣, яз д̣̇агкин̣зяяаа ид̇ха ж̇ийвалогз;
‘‘Viceyya dānaṃ sugatappasatthaṃ, ye dakkhiṇeyyā idha jīvaloke;
зд̇зсу д̣̇иннаани махабпалаани, б̣ийж̇аани вуд̇д̇аани яат̇аа сукзд̇д̇з.
Etesu dinnāni mahapphalāni, bījāni vuttāni yathā sukhette.
74.
74.
‘‘яо баан̣абхууд̇аани ахзтаяам̣ жарам̣, баруубаваад̣̇аа на гарод̇и баабам̣;
‘‘Yo pāṇabhūtāni aheṭhayaṃ caraṃ, parūpavādā na karoti pāpaṃ;
бхийрум̣ басам̣санд̇и на д̇ад̇т̇а суурам̣, бхаяаа хи санд̇о на гаронд̇и баабам̣.
Bhīruṃ pasaṃsanti na tattha sūraṃ, bhayā hi santo na karonti pāpaṃ.
75.
75.
‘‘хийнзна б̣рахмажариязна, кад̇д̇ияз убабаж̇ж̇ад̇и;
‘‘Hīnena brahmacariyena, khattiye upapajjati;
маж̇жхимзна жа д̣̇звад̇д̇ам̣, уд̇д̇амзна висуж̇жхад̇и.
Majjhimena ca devattaṃ, uttamena visujjhati.
76.
76.
‘‘ад̣̇д̇хаа хи д̣̇аанам̣ б̣ахуд̇хаа басад̇т̇ам̣, д̣̇аанаа жа ко д̇хаммабад̣̇ам̣ва сзяяо;
‘‘Addhā hi dānaṃ bahudhā pasatthaṃ, dānā ca kho dhammapadaṃva seyyo;
буб̣б̣зва хи буб̣б̣ад̇арзва санд̇о, ниб̣б̣аанамзваж̇жхаг̇амум̣ сабан̃н̃аа’’д̇и. –
Pubbeva hi pubbatareva santo, nibbānamevajjhagamuṃ sapaññā’’ti. –
звамзгзгааяа г̇аат̇ааяа анумод̣̇анам̣ гад̇ваа д̇ат̇зва аг̇амим̣су сад̣̇д̇хим̣ баригкаарзхи.
Evamekekāya gāthāya anumodanaṃ katvā tatheva agamiṃsu saddhiṃ parikkhārehi.
д̇ад̇т̇а д̇хаммалад̣̇д̇хассаад̇и кийн̣аасавам̣ аад̣̇им̣ гад̇ваа яаава сугкавибассагаяог̇ааважаро буг̇г̇ало д̇хаммасса лад̣̇д̇хад̇д̇аа д̇хаммалад̣̇д̇хо наама. свзва удтаанавийриязна д̇асса д̇хаммасса ад̇хиг̇ад̇ад̇д̇аа удтаанавийрияаад̇хиг̇ад̇о наама. д̇асса буг̇г̇аласса яо ж̇анд̇у д̣̇ад̣̇аад̇и д̣̇аананд̇и ад̇т̇о, д̇хаммзна лад̣̇д̇хасса удтаанасан̇каад̇зна вийриязна ад̇хиг̇ад̇асса д̣̇зяяад̇хаммасса аг̇г̇ам̣ г̇ахзд̇ваа яо ж̇анд̇у сийлаванд̇зсу д̣̇аанам̣ д̣̇ад̣̇аад̇ийд̇иби ад̇т̇о. убаяог̇ад̇т̇з ваа саамиважанам̣ гад̇ваабзд̇т̇а ад̇т̇о взд̣̇ид̇аб̣б̣о. взд̇аран̣инд̇и д̣̇зсанаасийсамзд̇ам̣, адта махаанираяз сол̣аса жа уссад̣̇з ад̇иггамид̇ваад̇и ад̇т̇о. д̣̇иб̣б̣аани таанаани убзд̇ийд̇и д̣̇звалогз уббаж̇ж̇ад̇и.
Tattha dhammaladdhassāti khīṇāsavaṃ ādiṃ katvā yāva sukkhavipassakayogāvacaro puggalo dhammassa laddhattā dhammaladdho nāma. Sveva uṭṭhānavīriyena tassa dhammassa adhigatattā uṭṭhānavīriyādhigato nāma. Tassa puggalassa yo jantu dadāti dānanti attho, dhammena laddhassa uṭṭhānasaṅkhātena vīriyena adhigatassa deyyadhammassa aggaṃ gahetvā yo jantu sīlavantesu dānaṃ dadātītipi attho. Upayogatthe vā sāmivacanaṃ katvāpettha attho veditabbo. Vetaraṇinti desanāsīsametaṃ, aṭṭha mahāniraye soḷasa ca ussade atikkamitvāti attho. Dibbāni ṭhānāni upetīti devaloke uppajjati.
самаанамаахууд̇и сад̣̇исам̣ вад̣̇анд̇и. каяабхийругасса хи д̣̇аанам̣ над̇т̇и, бхаяабхийругасса яуд̣̇д̇хам̣ над̇т̇и. ж̇ийвид̇з аалаяам̣ виж̇ахид̇ваа яуж̇ж̇анд̇ова яуж̇жхид̇ум̣ саггод̇и, бхог̇зсу аалаяам̣ виж̇ахид̇ваа д̣̇ааяаго д̣̇аад̇ум̣ саггод̇и, д̇знзва д̇ам̣ убхаяам̣ ‘‘самаана’’нд̇и вад̣̇анд̇и. аббааби санд̇аад̇и т̇огааби самаанаа барижжад̇д̇аж̇ийвид̇аа б̣ахугз ж̇инанд̇и, звамзва аббааби мун̃жажзд̇анаа б̣ахумби мажчзражид̇д̇ам̣ лобхаад̣̇им̣ ваа гилзсаг̇аханам̣ ж̇инаад̇и. аббамби жзд̇и т̇огамби жз д̣̇зяяад̇хаммам̣ гамман̃жа палан̃жа сад̣̇д̣̇аханд̇о д̣̇зд̇и. д̇знзва сод̇и д̇зна барид̇д̇ад̣̇зяяад̇хаммавад̇т̇угзна барид̇д̇агзнааби жааг̇зна со барад̇т̇а сукий ход̇и, махаарааж̇аад̇и.
Samānamāhūti sadisaṃ vadanti. Khayabhīrukassa hi dānaṃ natthi, bhayabhīrukassa yuddhaṃ natthi. Jīvite ālayaṃ vijahitvā yujjantova yujjhituṃ sakkoti, bhogesu ālayaṃ vijahitvā dāyako dātuṃ sakkoti, teneva taṃ ubhayaṃ ‘‘samāna’’nti vadanti. Appāpi santāti thokāpi samānā pariccattajīvitā bahuke jinanti, evameva appāpi muñcacetanā bahumpi maccheracittaṃ lobhādiṃ vā kilesagahanaṃ jināti. Appampi ceti thokampi ce deyyadhammaṃ kammañca phalañca saddahanto deti. Teneva soti tena parittadeyyadhammavatthukena parittakenāpi cāgena so parattha sukhī hoti, mahārājāti.
вижзяяа д̣̇аананд̇и д̣̇агкин̣ан̃жа д̣̇агкин̣зяяан̃жа вижинид̇ваа д̣̇иннад̣̇аанам̣. д̇ад̇т̇а яам̣ ваа д̇ам̣ ваа ад̣̇ад̇ваа аг̇г̇ам̣ бан̣ийд̇ам̣ д̣̇зяяад̇хаммам̣ вижинид̇ваа д̣̇ад̣̇анд̇о д̣̇агкин̣ам̣ вижинаад̇и наама, язсам̣ д̇зсам̣ ваа ад̣̇ад̇ваа сийлаад̣̇иг̇ун̣асамбаннз вижинид̇ваа д̇зсам̣ д̣̇ад̣̇анд̇о д̣̇агкин̣зяяам̣ вижинаад̇и наама. суг̇ад̇аббасад̇т̇анд̇и зваруубам̣ д̣̇аанам̣ б̣уд̣̇д̇хзхи басад̇т̇ам̣. д̇ад̇т̇а д̣̇агкин̣зяяавижинанам̣ д̣̇ассзд̇ум̣ ‘‘яз д̣̇агкин̣зяяаа’’д̇иаад̣̇и вуд̇д̇ам̣. д̇ад̇т̇а д̣̇агкин̣зяяаад̇и д̣̇агкин̣ааяа анужчавигаа б̣уд̣̇д̇хаад̣̇аяо.
Viceyya dānanti dakkhiṇañca dakkhiṇeyyañca vicinitvā dinnadānaṃ. Tattha yaṃ vā taṃ vā adatvā aggaṃ paṇītaṃ deyyadhammaṃ vicinitvā dadanto dakkhiṇaṃ vicināti nāma, yesaṃ tesaṃ vā adatvā sīlādiguṇasampanne vicinitvā tesaṃ dadanto dakkhiṇeyyaṃ vicināti nāma. Sugatappasatthanti evarūpaṃ dānaṃ buddhehi pasatthaṃ. Tattha dakkhiṇeyyavicinanaṃ dassetuṃ ‘‘ye dakkhiṇeyyā’’tiādi vuttaṃ. Tattha dakkhiṇeyyāti dakkhiṇāya anucchavikā buddhādayo.
баан̣абхууд̇аанийд̇и баан̣асан̇каад̇аани бхууд̇аани. ахзтаяам̣ жаранд̇и гаарун̃н̃зна авихзтаяанд̇о жарамаано. баруубаваад̣̇аад̇и баруубаваад̣̇абхаязна баабам̣ на гарод̇и. бхийрунд̇и убаваад̣̇абхийругам̣. на д̇ад̇т̇а сууранд̇и яо бана аяонисоманасигаарзна д̇асмим̣ убаваад̣̇з сууро ход̇и, д̇ам̣ бан̣д̣ид̇аа наббасам̣санд̇и. бхаяаа хийд̇и убаваад̣̇абхаязна хи бан̣д̣ид̇аа баабам̣ на гаронд̇и.
Pāṇabhūtānīti pāṇasaṅkhātāni bhūtāni. Aheṭhayaṃ caranti kāruññena aviheṭhayanto caramāno. Parūpavādāti parūpavādabhayena pāpaṃ na karoti. Bhīrunti upavādabhīrukaṃ. Na tattha sūranti yo pana ayonisomanasikārena tasmiṃ upavāde sūro hoti, taṃ paṇḍitā nappasaṃsanti. Bhayā hīti upavādabhayena hi paṇḍitā pāpaṃ na karonti.
хийнзна б̣рахмажариязнаад̇и б̣аахирад̇ид̇т̇ааяад̇анз д̇аава мзт̇унавирад̇исийламад̇д̇агам̣ хийнам̣ б̣рахмажарияам̣ наама, д̇зна кад̇д̇ияагулз уббаж̇ж̇ад̇и. жхаанасса убажаарамад̇д̇ам̣ маж̇жхимам̣, д̇зна д̣̇звалогз уббаж̇ж̇ад̇и. адта самаабад̇д̇ияо уд̇д̇амам̣, д̇зна б̣рахмалогз уббаж̇ж̇анд̇о висуж̇жхад̇и наама. саасанз бана сийлаванд̇ассзва згам̣ д̣̇званигааяам̣ бан̣ид̇хааяа б̣рахмажарияам̣ хийнам̣ наама, барисуд̣̇д̇хасийлассзва самаабад̇д̇иниб̣б̣ад̇д̇анам̣ маж̇жхимам̣ наама, барисуд̣̇д̇хасийлз тад̇ваа вибассанам̣ вад̣дхзд̇ваа арахад̇д̇уббад̇д̇и уд̇д̇амам̣ наама.
Hīnena brahmacariyenāti bāhiratitthāyatane tāva methunaviratisīlamattakaṃ hīnaṃ brahmacariyaṃ nāma, tena khattiyakule uppajjati. Jhānassa upacāramattaṃ majjhimaṃ, tena devaloke uppajjati. Aṭṭha samāpattiyo uttamaṃ, tena brahmaloke uppajjanto visujjhati nāma. Sāsane pana sīlavantasseva ekaṃ devanikāyaṃ paṇidhāya brahmacariyaṃ hīnaṃ nāma, parisuddhasīlasseva samāpattinibbattanaṃ majjhimaṃ nāma, parisuddhasīle ṭhatvā vipassanaṃ vaḍḍhetvā arahattuppatti uttamaṃ nāma.
осаанаг̇аат̇ааяа аяамад̇т̇о – махаарааж̇а, гин̃жааби згам̣сзнзва д̣̇аанам̣ б̣ахуд̇хаа басад̇т̇ам̣ ван̣н̣ид̇ам̣, д̣̇аанад̇о бана самат̇авибассанаасан̇каад̇ам̣ ниб̣б̣аанасан̇каад̇ан̃жа д̇хаммагодтаасабхууд̇ам̣ д̇хаммабад̣̇амзва уд̇д̇арид̇арам̣. гим̣гааран̣аа? буб̣б̣зва хи имасмим̣ габбз гассабад̣̇асаб̣алаад̣̇аяо буб̣б̣ад̇арзва взссабхууд̣̇асаб̣алаад̣̇аяо санд̇о саббурисаа сабан̃н̃аа самат̇авибассанам̣ бхаавзд̇ваа ниб̣б̣аанамзва аж̇жхаг̇амум̣ ад̇хиг̇ад̇аад̇и.
Osānagāthāya ayamattho – mahārāja, kiñcāpi ekaṃseneva dānaṃ bahudhā pasatthaṃ vaṇṇitaṃ, dānato pana samathavipassanāsaṅkhātaṃ nibbānasaṅkhātañca dhammakoṭṭhāsabhūtaṃ dhammapadameva uttaritaraṃ. Kiṃkāraṇā? Pubbeva hi imasmiṃ kappe kassapadasabalādayo pubbatareva vessabhūdasabalādayo santo sappurisā sapaññā samathavipassanaṃ bhāvetvā nibbānameva ajjhagamuṃ adhigatāti.
звам̣ сад̇д̇а бажжзгаб̣уд̣̇д̇хаа анумод̣̇анааяа ран̃н̃о амад̇амахааниб̣б̣аанам̣ ван̣н̣зд̇ваа рааж̇аанам̣ аббамаад̣̇зна овад̣̇ид̇ваа вуд̇д̇анаязнзва ад̇д̇ано васанадтаанамзва г̇ад̇аа. рааж̇ааби сад̣̇д̇хим̣ аг̇г̇амахзсияаа д̣̇аанам̣ д̣̇ад̇ваа яааваж̇ийвам̣ тад̇ваа д̇ад̇о жавид̇ваа саг̇г̇абурам̣ буурзси.
Evaṃ satta paccekabuddhā anumodanāya rañño amatamahānibbānaṃ vaṇṇetvā rājānaṃ appamādena ovaditvā vuttanayeneva attano vasanaṭṭhānameva gatā. Rājāpi saddhiṃ aggamahesiyā dānaṃ datvā yāvajīvaṃ ṭhatvā tato cavitvā saggapuraṃ pūresi.
сад̇т̇аа имам̣ д̇хаммад̣̇зсанам̣ аахарид̇ваа ‘‘звам̣ буб̣б̣зби бан̣д̣ид̇аа вижзяяа д̣̇аанам̣ ад̣̇ам̣суу’’д̇и вад̇ваа ж̇аад̇агам̣ самод̇хаанзси – ‘‘д̇ад̣̇аа бажжзгаб̣уд̣̇д̇хаа бариниб̣б̣ааяим̣су, самуд̣̇д̣̇авиж̇аяаа раахуламаад̇аа ахоси, рорувамахаарааж̇аа бана ахамзва ахоси’’нд̇и.
Satthā imaṃ dhammadesanaṃ āharitvā ‘‘evaṃ pubbepi paṇḍitā viceyya dānaṃ adaṃsū’’ti vatvā jātakaṃ samodhānesi – ‘‘tadā paccekabuddhā parinibbāyiṃsu, samuddavijayā rāhulamātā ahosi, roruvamahārājā pana ahameva ahosi’’nti.
аад̣̇ид̇д̇аж̇аад̇агаван̣н̣анаа адтамаа.
Ādittajātakavaṇṇanā aṭṭhamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 424. аад̣̇ид̇д̇аж̇аад̇агам̣ • 424. Ādittajātakaṃ
