| Library / Tipiṭaka / तिपिटक • Tipiṭaka / चूळवग्ग-अट्ठकथा • Cūḷavagga-aṭṭhakathā |
८. वत्तक्खन्धकं
8. Vattakkhandhakaṃ
आगन्तुकवत्तकथा
Āgantukavattakathā
३५७. वत्तक्खन्धके इदानि आरामं पविसिस्सामीति इमिना उपचारसीमसमीपं दस्सेति; तस्मा उपचारसीमं पत्वा उपाहनाओमुञ्चनादि सब्बं कातब्बं। गहेत्वाति उपाहनदण्डकेन गहेत्वा। पटिक्कमन्तीति सन्निपतन्ति। विस्सज्जेतब्बन्ति पत्थरितब्बं। गोचरो पुच्छितब्बोति ‘‘गोचरगामो आसन्ने उदाहु दूरे, कालस्सेव पिण्डाय चरितब्बं उदाहु दिवा’’ति एवं भिक्खाचारो पुच्छितब्बो। अगोचरो नाम मिच्छादिट्ठिकानं वा गामो परिच्छिन्नभिक्खो वा गामो; यत्थ एकस्स वा द्विन्नं वा भिक्खा दिय्यति, सोपि पुच्छितब्बो। पानीयं पुच्छितब्बन्ति ‘‘किं इमिस्सा पोक्खरणिया पानीयंयेव पिवन्ति, नहानादिपरिभोगम्पि करोन्ती’’ति एवं पानीयञ्चेव परिभोजनीयञ्च पुच्छितब्बं। केसुचि ठानेसु वाळमिगा वा अमनुस्सा वा होन्ति, तस्मा ‘‘कं कालं पविसितब्बं, कं कालं निक्खमितब्ब’’न्ति पुच्छितब्बं।
357. Vattakkhandhake idāni ārāmaṃ pavisissāmīti iminā upacārasīmasamīpaṃ dasseti; tasmā upacārasīmaṃ patvā upāhanāomuñcanādi sabbaṃ kātabbaṃ. Gahetvāti upāhanadaṇḍakena gahetvā. Paṭikkamantīti sannipatanti. Vissajjetabbanti pattharitabbaṃ. Gocaro pucchitabboti ‘‘gocaragāmo āsanne udāhu dūre, kālasseva piṇḍāya caritabbaṃ udāhu divā’’ti evaṃ bhikkhācāro pucchitabbo. Agocaro nāma micchādiṭṭhikānaṃ vā gāmo paricchinnabhikkho vā gāmo; yattha ekassa vā dvinnaṃ vā bhikkhā diyyati, sopi pucchitabbo. Pānīyaṃ pucchitabbanti ‘‘kiṃ imissā pokkharaṇiyā pānīyaṃyeva pivanti, nahānādiparibhogampi karontī’’ti evaṃ pānīyañceva paribhojanīyañca pucchitabbaṃ. Kesuci ṭhānesu vāḷamigā vā amanussā vā honti, tasmā ‘‘kaṃ kālaṃ pavisitabbaṃ, kaṃ kālaṃ nikkhamitabba’’nti pucchitabbaṃ.
बहि ठितेनाति बहि निक्खमन्तस्स अहिनो वा अमनुस्सस्स वा मग्गं दत्वा ठितेन निल्लोकेतब्बो। सचे उस्सहति सोधेतब्बोति यदि सक्कोति, सब्बो विहारो सोधेतब्बो। असक्कोन्तेन अत्तनो वसनोकासो जग्गितब्बो। सब्बं सोधेतुं सक्कोन्तस्स पन दस्सिते विहारसोधनवत्ते विनिच्छयो महाखन्धके वुत्तनयेनेव वेदितब्बो।
Bahi ṭhitenāti bahi nikkhamantassa ahino vā amanussassa vā maggaṃ datvā ṭhitena nilloketabbo. Sace ussahati sodhetabboti yadi sakkoti, sabbo vihāro sodhetabbo. Asakkontena attano vasanokāso jaggitabbo. Sabbaṃ sodhetuṃ sakkontassa pana dassite vihārasodhanavatte vinicchayo mahākhandhake vuttanayeneva veditabbo.
आगन्तुकवत्तकथा निट्ठिता।
Āgantukavattakathā niṭṭhitā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / चूळवग्गपाळि • Cūḷavaggapāḷi / १. आगन्तुकवत्तकथा • 1. Āgantukavattakathā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / आगन्तुकवत्तकथावण्णना • Āgantukavattakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / आगन्तुकवत्तकथावण्णना • Āgantukavattakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / आगन्तुकवत्तकथावण्णना • Āgantukavattakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / १. आगन्तुकवत्तकथा • 1. Āgantukavattakathā
