8. வத்தக்க²ந்த⁴கவண்ணனா

ஆக³ந்துகவத்தகதா²வண்ணனா

357. ஏகஸ்மிங் கா³மே அஞ்ஞவிஹாரதோ ஆக³தோபி ஆக³ந்துகோவ. தத்த² கேசி ஏவங் வத³ந்தி ‘‘ஆவாஸிகோ கத்த²சி க³ந்த்வா ஸசே ஆக³தோ, ‘தேனாபி ஆக³ந்துகப⁴த்தங் பு⁴ஞ்ஜிதப்³ப³’ந்தி வுத்தத்தா தூ³ராக³மனங் வுத்தங் ஹோதி, ந கா³மே, தஸ்மா ந யுத்த’’ந்தி. தே வத்தப்³பா³ ‘‘ஆக³ந்துகப⁴த்தங் நாம க³ஹட்டே²ஹி ட²பிதங். யஸ்மிங் நிப³த்³த⁴ங், ததோ அஞ்ஞகா³மதோதி ஆபன்னங். ததா² விஹாராதி⁴காரத்தா அஞ்ஞவிஹாரதோ ஆக³தோபி ஆக³ந்துகோ வா’’தி ஆசரியானங் ஸன்னிட்டா²னங். பானீயங் புச்சி²தப்³ப³ங், பரிபோ⁴ஜனீயங் புச்சி²தப்³ப³ந்தி உத்³த⁴ரித்வா க⁴டஸராவாதி³க³தங் ஸந்தா⁴ய பட²மங், து³தியங் கூபதளாகாதி³க³தந்தி ஆசரியோ. து³தியவாரே அத்தனோ வஸனட்டா²னத்தா விஸுங் புச்சி²தப்³ப³மேவ, தஸ்மா வுத்தங் ஏதங் ‘‘பரிச்சி²ன்னபி⁴க்கோ² வா கா³மோ’’தி. ப³ஹூஸு பொத்த²கேஸு து³விதா⁴பி யுஜ்ஜதி.