| Library / Tipiṭaka / तिपिटक • Tipiṭaka / परिवार-अट्ठकथा • Parivāra-aṭṭhakathā |
अगतिअगन्तब्बवण्णना
Agatiagantabbavaṇṇanā
३७९. बहुजनअहिताय पटिपन्नो होतीति विनयधरेन हि एवं छन्दादिगतिया अधिकरणे विनिच्छिते तस्मिं विहारे सङ्घो द्विधा भिज्जति। ओवादूपजीविनियो भिक्खुनियोपि द्वे भागा होन्ति। उपासकापि उपासिकायोपि दारकापि दारिकायोपि तेसं आरक्खदेवतापि तथेव द्विधा भिज्जन्ति। ततो भुम्मदेवता आदिं कत्वा याव अकनिट्ठब्रह्मानो द्विधाव होन्ति। तेन वुत्तं – ‘‘बहुजनअहिताय पटिपन्नो होति…पे॰… दुक्खाय देवमनुस्सान’’न्ति।
379.Bahujanaahitāyapaṭipanno hotīti vinayadharena hi evaṃ chandādigatiyā adhikaraṇe vinicchite tasmiṃ vihāre saṅgho dvidhā bhijjati. Ovādūpajīviniyo bhikkhuniyopi dve bhāgā honti. Upāsakāpi upāsikāyopi dārakāpi dārikāyopi tesaṃ ārakkhadevatāpi tatheva dvidhā bhijjanti. Tato bhummadevatā ādiṃ katvā yāva akaniṭṭhabrahmāno dvidhāva honti. Tena vuttaṃ – ‘‘bahujanaahitāya paṭipanno hoti…pe… dukkhāya devamanussāna’’nti.
३८२. विसमनिस्सितोति विसमानि कायकम्मादीनि निस्सितो। गहननिस्सितोति मिच्छादिट्ठिअन्तग्गाहिकदिट्ठिसङ्खातं गहनं निस्सितो। बलवनिस्सितोति बलवन्ते अभिञ्ञाते भिक्खू निस्सितो।
382.Visamanissitoti visamāni kāyakammādīni nissito. Gahananissitoti micchādiṭṭhiantaggāhikadiṭṭhisaṅkhātaṃ gahanaṃ nissito. Balavanissitoti balavante abhiññāte bhikkhū nissito.
३९३. तस्स अवजानन्तोति तस्स वचनं अवजानन्तो। उपयोगत्थे वा सामिवचनं, तं अवजानन्तोति अत्थो।
393.Tassa avajānantoti tassa vacanaṃ avajānanto. Upayogatthe vā sāmivacanaṃ, taṃ avajānantoti attho.
३९४. यं अत्थायाति यदत्थाय। तं अत्थन्ति सो अत्थो। सेसं सब्बत्थ उत्तानमेवाति।
394.Yaṃ atthāyāti yadatthāya. Taṃ atthanti so attho. Sesaṃ sabbattha uttānamevāti.
महासङ्गामवण्णना निट्ठिता।
Mahāsaṅgāmavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / परिवारपाळि • Parivārapāḷi
२. अगतिअगन्तब्बो • 2. Agatiagantabbo
५. परपक्खादिअवजाननं • 5. Parapakkhādiavajānanaṃ
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / वोहरन्तेन जानितब्बादिवण्णना • Voharantena jānitabbādivaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / अगतिअगन्तब्बवण्णना • Agatiagantabbavaṇṇanā
