| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
அக்³கா³ஸனாதி³அனுஜானநங்
Aggāsanādianujānanaṃ
310. அத² கோ² ப⁴க³வா வேஸாலியங் யதா²பி⁴ரந்தங் விஹரித்வா யேன ஸாவத்தி² தேன சாரிகங் பக்காமி . தேன கோ² பன ஸமயேன ச²ப்³ப³க்³கி³யானங் பி⁴க்கூ²னங் அந்தேவாஸிகா பி⁴க்கூ² பு³த்³த⁴ப்பமுக²ஸ்ஸ ஸங்க⁴ஸ்ஸ புரதோ புரதோ க³ந்த்வா விஹாரே பரிக்³க³ண்ஹந்தி, ஸெய்யாயோ பரிக்³க³ண்ஹந்தி – இத³ங் அம்ஹாகங் உபஜ்ஜா²யானங் ப⁴விஸ்ஸதி, இத³ங் அம்ஹாகங் ஆசரியானங் ப⁴விஸ்ஸதி, இத³ங் அம்ஹாகங் ப⁴விஸ்ஸதீ’’தி.
310. Atha kho bhagavā vesāliyaṃ yathābhirantaṃ viharitvā yena sāvatthi tena cārikaṃ pakkāmi . Tena kho pana samayena chabbaggiyānaṃ bhikkhūnaṃ antevāsikā bhikkhū buddhappamukhassa saṅghassa purato purato gantvā vihāre pariggaṇhanti, seyyāyo pariggaṇhanti – idaṃ amhākaṃ upajjhāyānaṃ bhavissati, idaṃ amhākaṃ ācariyānaṃ bhavissati, idaṃ amhākaṃ bhavissatī’’ti.
அத² கோ² ஆயஸ்மா ஸாரிபுத்தோ பு³த்³த⁴ப்பமுக²ஸ்ஸ ஸங்க⁴ஸ்ஸ பிட்டி²தோ பிட்டி²தோ க³ந்த்வா விஹாரேஸு பரிக்³க³ஹிதேஸு, ஸெய்யாஸு பரிக்³க³ஹிதாஸு, ஸெய்யங் அலப⁴மானோ அஞ்ஞதரஸ்மிங் ருக்க²மூலே நிஸீதி³. அத² கோ² ப⁴க³வா ரத்தியா பச்சூஸஸமயங் பச்சுட்டா²ய உக்காஸி. ஆயஸ்மாபி ஸாரிபுத்தோ உக்காஸி. ‘‘கோ எத்தா²’’தி? ‘‘அஹங், ப⁴க³வா, ஸாரிபுத்தோ’’தி. ‘‘கிஸ்ஸ த்வங், ஸாரிபுத்தங், இத⁴ நிஸின்னோ’’தி? அத² கோ² ஆயஸ்மா ஸாரிபுத்தோ ப⁴க³வதோ ஏதமத்த²ங் ஆரோசேஸி. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே பி⁴க்கு²ஸங்க⁴ங் ஸன்னிபாதாபெத்வா பி⁴க்கூ² படிபுச்சி² – ‘‘ஸச்சங் கிர, பி⁴க்க²வே, ச²ப்³ப³க்³கி³யானங் பி⁴க்கூ²னங் அந்தேவாஸிகா பி⁴க்கூ² பு³த்³த⁴ப்பமுக²ஸ்ஸ ஸங்க⁴ஸ்ஸ புரதோ புரதோ க³ந்த்வா விஹாரே பரிக்³க³ண்ஹந்தி, ஸெய்யாயோ பரிக்³க³ண்ஹந்தி – இத³ங் அம்ஹாகங் உபஜ்ஜா²யானங் ப⁴விஸ்ஸதி, இத³ங் அம்ஹாகங் ஆசரியானங் ப⁴விஸ்ஸதி, இத³ங் அம்ஹாகங் ப⁴விஸ்ஸதீ’’தி? ‘‘ஸச்சங் ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… ‘‘கத²ஞ்ஹி நாம தே, பி⁴க்க²வே, மோக⁴புரிஸா பு³த்³த⁴ப்பமுக²ஸ்ஸ ஸங்க⁴ஸ்ஸ புரதோ புரதோ க³ந்த்வா விஹாரே பரிக்³க³ஹெஸ்ஸந்தி, ஸெய்யாயோ பரிக்³க³ஹெஸ்ஸந்தி – இத³ங் அம்ஹாகங் உபஜ்ஜா²யானங் ப⁴விஸ்ஸதி, இத³ங் அம்ஹாகங் ஆசரியானங் ப⁴விஸ்ஸதி, இத³ங் அம்ஹாகங் ப⁴விஸ்ஸதீதி! நேதங், பி⁴க்க²வே, அப்பஸன்னானங் வா பஸாதா³ய…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘கோ, பி⁴க்க²வே, அரஹதி அக்³கா³ஸனங் அக்³கோ³த³கங் அக்³க³பிண்ட³’’ந்தி?
Atha kho āyasmā sāriputto buddhappamukhassa saṅghassa piṭṭhito piṭṭhito gantvā vihāresu pariggahitesu, seyyāsu pariggahitāsu, seyyaṃ alabhamāno aññatarasmiṃ rukkhamūle nisīdi. Atha kho bhagavā rattiyā paccūsasamayaṃ paccuṭṭhāya ukkāsi. Āyasmāpi sāriputto ukkāsi. ‘‘Ko etthā’’ti? ‘‘Ahaṃ, bhagavā, sāriputto’’ti. ‘‘Kissa tvaṃ, sāriputtaṃ, idha nisinno’’ti? Atha kho āyasmā sāriputto bhagavato etamatthaṃ ārocesi. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, chabbaggiyānaṃ bhikkhūnaṃ antevāsikā bhikkhū buddhappamukhassa saṅghassa purato purato gantvā vihāre pariggaṇhanti, seyyāyo pariggaṇhanti – idaṃ amhākaṃ upajjhāyānaṃ bhavissati, idaṃ amhākaṃ ācariyānaṃ bhavissati, idaṃ amhākaṃ bhavissatī’’ti? ‘‘Saccaṃ bhagavā’’ti. Vigarahi buddho bhagavā…pe… ‘‘kathañhi nāma te, bhikkhave, moghapurisā buddhappamukhassa saṅghassa purato purato gantvā vihāre pariggahessanti, seyyāyo pariggahessanti – idaṃ amhākaṃ upajjhāyānaṃ bhavissati, idaṃ amhākaṃ ācariyānaṃ bhavissati, idaṃ amhākaṃ bhavissatīti! Netaṃ, bhikkhave, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi – ‘‘ko, bhikkhave, arahati aggāsanaṃ aggodakaṃ aggapiṇḍa’’nti?
ஏகச்சே பி⁴க்கூ² ஏவமாஹங்ஸு – ‘‘யோ, ப⁴க³வா, க²த்தியகுலா பப்³ப³ஜிதோ ஸோ அரஹதி அக்³கா³ஸனங் அக்³கோ³த³கங் அக்³க³பிண்ட³’’ந்தி. ஏகச்சே பி⁴க்கூ² ஏவமாஹங்ஸு – ‘‘யோ, ப⁴க³வா, ப்³ராஹ்மணகுலா பப்³ப³ஜிதோ ஸோ அரஹதி அக்³கா³ஸனங் அக்³கோ³த³கங் அக்³க³பிண்ட³’’ந்தி. ஏகச்சே பி⁴க்கூ² ஏவமாஹங்ஸு – ‘‘யோ, ப⁴க³வா, க³ஹபதிகுலா பப்³ப³ஜிதோ ஸோ அரஹதி அக்³கா³ஸனங் அக்³கோ³த³கங் அக்³க³பிண்ட³’’ந்தி. ஏகச்சே பி⁴க்கூ² ஏவமாஹங்ஸு – ‘‘யோ, ப⁴க³வா, ஸுத்தந்திகோ ஸோ அரஹதி அக்³கா³ஸனங் அக்³கோ³த³கங் அக்³க³பிண்ட³’’ந்தி. ஏகச்சே பி⁴க்கூ² ஏவமாஹங்ஸு – ‘‘யோ, ப⁴க³வா, வினயத⁴ரோ ஸோ அரஹதி அக்³கா³ஸனங் அக்³கோ³த³கங் அக்³க³பிண்ட³’’ந்தி. ஏகச்சே பி⁴க்கூ² ஏவமாஹங்ஸு – ‘‘யோ, ப⁴க³வா, த⁴ம்மகதி²கோ ஸோ அரஹதி அக்³கா³ஸனங் அக்³கோ³த³கங் அக்³க³பிண்ட³’’ந்தி. ஏகச்சே பி⁴க்கூ² ஏவமாஹங்ஸு – ‘‘யோ, ப⁴க³வா, பட²மஸ்ஸ ஜா²னஸ்ஸ லாபீ⁴ ஸோ அரஹதி அக்³கா³ஸனங் அக்³கோ³த³கங் அக்³க³பிண்ட³’’ந்தி. ஏகச்சே பி⁴க்கூ² ஏவமாஹங்ஸு – ‘‘யோ, ப⁴க³வா, து³தியஸ்ஸ ஜா²னஸ்ஸ லாபீ⁴ ஸோ அரஹதி அக்³கா³ஸனங் அக்³கோ³த³கங் அக்³க³பிண்ட³’’ந்தி. ஏகச்சே பி⁴க்கூ² ஏவமாஹங்ஸு – ‘‘யோ, ப⁴க³வா, ததியஸ்ஸ ஜா²னஸ்ஸ லாபீ⁴ ஸோ அரஹதி அக்³கா³ஸனங் அக்³கோ³த³கங் அக்³க³பிண்ட³’’ந்தி. ஏகச்சே பி⁴க்கூ² ஏவமாஹங்ஸு – ‘‘யோ, ப⁴க³வா, சதுத்த²ஸ்ஸ ஜா²னஸ்ஸ லாபீ⁴ ஸோ அரஹதி அக்³கா³ஸனங் அக்³கோ³த³கங் அக்³க³பிண்ட³’’ந்தி. ஏகச்சே பி⁴க்கூ² ஏவமாஹங்ஸு – ‘‘யோ, ப⁴க³வா, ஸோதாபன்னோ ஸோ அரஹதி அக்³கா³ஸனங் அக்³கோ³த³கங் அக்³க³பிண்ட³’’ந்தி. ஏகச்சே பி⁴க்கூ² ஏவமாஹங்ஸு – ‘‘யோ, ப⁴க³வா, ஸகதா³கா³மீ…பே॰… யோ, ப⁴க³வா, அனாகா³மீ…பே॰… யோ, ப⁴க³வா , அரஹா ஸோ அரஹதி அக்³கா³ஸனங் அக்³கோ³த³கங் அக்³க³பிண்ட³’’ந்தி. ஏகச்சே பி⁴க்கூ² ஏவமாஹங்ஸு – ‘‘யோ, ப⁴க³வா, தேவிஜ்ஜோ ஸோ அரஹதி அக்³கா³ஸனங் அக்³கோ³த³கங் அக்³க³பிண்ட³’’ந்தி. ஏகச்சே பி⁴க்கூ² ஏவமாஹங்ஸு – ‘‘யோ, ப⁴க³வா, ச²ளபி⁴ஞ்ஞோ ஸோ அரஹதி அக்³கா³ஸனங் அக்³கோ³த³கங் அக்³க³பிண்ட³’’ந்தி.
Ekacce bhikkhū evamāhaṃsu – ‘‘yo, bhagavā, khattiyakulā pabbajito so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, brāhmaṇakulā pabbajito so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, gahapatikulā pabbajito so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, suttantiko so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, vinayadharo so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, dhammakathiko so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, paṭhamassa jhānassa lābhī so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, dutiyassa jhānassa lābhī so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, tatiyassa jhānassa lābhī so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, catutthassa jhānassa lābhī so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, sotāpanno so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, sakadāgāmī…pe… yo, bhagavā, anāgāmī…pe… yo, bhagavā , arahā so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, tevijjo so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, chaḷabhiñño so arahati aggāsanaṃ aggodakaṃ aggapiṇḍa’’nti.
311. அத² கோ² ப⁴க³வா பி⁴க்கூ² ஆமந்தேஸி – ‘‘பூ⁴தபுப்³ப³ங், பி⁴க்க²வே, ஹிமவந்தபதே³ஸே 1 மஹானிக்³ரோதோ⁴ அஹோஸி. தங் தயோ ஸஹாயா உபனிஸ்ஸாய விஹரிங்ஸு – தித்திரோ ச, மக்கடோ ச, ஹத்தி²னாகோ³ ச. தே அஞ்ஞமஞ்ஞங் அகா³ரவா அப்பதிஸ்ஸா அஸபா⁴க³வுத்திகா விஹரந்தி. அத² கோ², பி⁴க்க²வே, தேஸங் ஸஹாயானங் ஏதத³ஹோஸி – ‘அஹோ நூன மயங் ஜானெய்யாம யங் அம்ஹாகங் ஜாதியா மஹந்ததரங் தங் மயங் ஸக்கரெய்யாம க³ருங் கரெய்யாம மானெய்யாம பூஜெய்யாம, தஸ்ஸ ச மயங் ஓவாதே³ திட்டெ²ய்யாமா’தி.
311. Atha kho bhagavā bhikkhū āmantesi – ‘‘bhūtapubbaṃ, bhikkhave, himavantapadese 2 mahānigrodho ahosi. Taṃ tayo sahāyā upanissāya vihariṃsu – tittiro ca, makkaṭo ca, hatthināgo ca. Te aññamaññaṃ agāravā appatissā asabhāgavuttikā viharanti. Atha kho, bhikkhave, tesaṃ sahāyānaṃ etadahosi – ‘aho nūna mayaṃ jāneyyāma yaṃ amhākaṃ jātiyā mahantataraṃ taṃ mayaṃ sakkareyyāma garuṃ kareyyāma māneyyāma pūjeyyāma, tassa ca mayaṃ ovāde tiṭṭheyyāmā’ti.
‘‘அத² கோ², பி⁴க்க²வே, தித்திரோ ச மக்கடோ ச ஹத்தி²னாக³ங் புச்சி²ங்ஸு – ‘த்வங், ஸம்ம, கிங் போராணங் ஸரஸீ’தி? ‘யதா³ஹங், ஸம்மா, போதோ ஹோமி, இமங் நிக்³ரோத⁴ங் அந்தரா ஸத்தீ²னங் 3 கரித்வா அதிக்கமாமி, அக்³க³ங்குரகங் மே உத³ரங் சு²பதி. இமாஹங், ஸம்மா, போராணங் ஸராமீ’தி.
‘‘Atha kho, bhikkhave, tittiro ca makkaṭo ca hatthināgaṃ pucchiṃsu – ‘tvaṃ, samma, kiṃ porāṇaṃ sarasī’ti? ‘Yadāhaṃ, sammā, poto homi, imaṃ nigrodhaṃ antarā satthīnaṃ 4 karitvā atikkamāmi, aggaṅkurakaṃ me udaraṃ chupati. Imāhaṃ, sammā, porāṇaṃ sarāmī’ti.
‘‘அத² கோ², பி⁴க்க²வே, தித்திரோ ச ஹத்தி²னாகோ³ ச மக்கடங் புச்சி²ங்ஸு – ‘த்வங், ஸம்ம, கிங் போராணங் ஸரஸீ’தி? ‘யதா³ஹங், ஸம்மா, சா²போ ஹோமி, ச²மாயங் நிஸீதி³த்வா இமஸ்ஸ நிக்³ரோத⁴ஸ்ஸ அக்³க³ங்குரகங் கா²தா³மி. இமாஹங், ஸம்மா, போராணங் ஸராமீ’தி.
‘‘Atha kho, bhikkhave, tittiro ca hatthināgo ca makkaṭaṃ pucchiṃsu – ‘tvaṃ, samma, kiṃ porāṇaṃ sarasī’ti? ‘Yadāhaṃ, sammā, chāpo homi, chamāyaṃ nisīditvā imassa nigrodhassa aggaṅkurakaṃ khādāmi. Imāhaṃ, sammā, porāṇaṃ sarāmī’ti.
‘‘அத² கோ², பி⁴க்க²வே, மக்கடோ ச ஹத்தி²னாகோ³ ச தித்திரங் புச்சி²ங்ஸு – ‘த்வங், ஸம்ம, கிங் போராணங் ஸரஸீ’தி? ‘அமுகஸ்மிங், ஸம்மா, ஓகாஸே மஹானிக்³ரோதோ⁴ அஹோஸி. ததோ அஹங் ப²லங் ப⁴க்கி²த்வா இமஸ்மிங் ஓகாஸே வச்சங் அகாஸிங்; தஸ்ஸாயங் நிக்³ரோதோ⁴ ஜாதோ. ததா³ஹங், ஸம்மா, ஜாதியா மஹந்ததரோ’தி .
‘‘Atha kho, bhikkhave, makkaṭo ca hatthināgo ca tittiraṃ pucchiṃsu – ‘tvaṃ, samma, kiṃ porāṇaṃ sarasī’ti? ‘Amukasmiṃ, sammā, okāse mahānigrodho ahosi. Tato ahaṃ phalaṃ bhakkhitvā imasmiṃ okāse vaccaṃ akāsiṃ; tassāyaṃ nigrodho jāto. Tadāhaṃ, sammā, jātiyā mahantataro’ti .
‘‘அத² கோ², பி⁴க்க²வே, மக்கடோ ச ஹத்தி²னாகோ³ ச தித்திரங் ஏதத³வோசுங் – ‘த்வங், ஸம்ம, அம்ஹாகங் ஜாதியா மஹந்ததரோ. தங் மயங் ஸக்கரிஸ்ஸாம க³ருங் கரிஸ்ஸாம மானெஸ்ஸாம பூஜெஸ்ஸாம, துய்ஹஞ்ச மயங் ஓவாதே³ பதிட்டி²ஸ்ஸாமா’தி. அத² கோ², பி⁴க்க²வே, தித்திரோ மக்கடஞ்ச ஹத்தி²னாக³ஞ்ச பஞ்சஸு ஸீலேஸு ஸமாத³பேஸி, அத்தனா ச பஞ்சஸு ஸீலேஸு ஸமாதா³ய வத்ததி. தே அஞ்ஞமஞ்ஞங் ஸகா³ரவா ஸப்பதிஸ்ஸா ஸபா⁴க³வுத்திகா விஹரித்வா காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜிங்ஸு. ஏவங் கோ² தங், பி⁴க்க²வே, தித்திரியங் நாம ப்³ரஹ்மசரியங் அஹோஸி.
‘‘Atha kho, bhikkhave, makkaṭo ca hatthināgo ca tittiraṃ etadavocuṃ – ‘tvaṃ, samma, amhākaṃ jātiyā mahantataro. Taṃ mayaṃ sakkarissāma garuṃ karissāma mānessāma pūjessāma, tuyhañca mayaṃ ovāde patiṭṭhissāmā’ti. Atha kho, bhikkhave, tittiro makkaṭañca hatthināgañca pañcasu sīlesu samādapesi, attanā ca pañcasu sīlesu samādāya vattati. Te aññamaññaṃ sagāravā sappatissā sabhāgavuttikā viharitvā kāyassa bhedā paraṃ maraṇā sugatiṃ saggaṃ lokaṃ upapajjiṃsu. Evaṃ kho taṃ, bhikkhave, tittiriyaṃ nāma brahmacariyaṃ ahosi.
தி³ட்டே² த⁴ம்மே ச பாஸங்ஸா, ஸம்பராயே ச ஸுக்³க³தீ’’தி.
Diṭṭhe dhamme ca pāsaṃsā, samparāye ca suggatī’’ti.
‘‘தே ஹி நாம, பி⁴க்க²வே, திரச்சா²னக³தா பாணா அஞ்ஞமஞ்ஞங் ஸகா³ரவா ஸப்பதிஸ்ஸா ஸபா⁴க³வுத்திகா விஹரிஸ்ஸந்தி. இத⁴ கோ² தங், பி⁴க்க²வே, ஸோபே⁴த² யங் தும்ஹே ஏவங் ஸ்வாக்கா²தே த⁴ம்மவினயே பப்³ப³ஜிதா ஸமானா அஞ்ஞமஞ்ஞங் அகா³ரவா அப்பதிஸ்ஸா அஸபா⁴க³வுத்திகா விஹரெய்யாத²? நேதங், பி⁴க்க²வே , அப்பஸன்னானங் வா பஸாதா³ய…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, யதா²வுட்³ட⁴ங் அபி⁴வாத³னங், பச்சுட்டா²னங், அஞ்ஜலிகம்மங், ஸாமீசிகம்மங், அக்³கா³ஸனங், அக்³கோ³த³கங், அக்³க³பிண்ட³ங். ந ச, பி⁴க்க²வே, ஸங்கி⁴கங் யதா²வுட்³ட⁴ங் படிபா³ஹிதப்³ப³ங். யோ படிபா³ஹெய்ய, ஆபத்தி து³க்கடஸ்ஸா’’தி.
‘‘Te hi nāma, bhikkhave, tiracchānagatā pāṇā aññamaññaṃ sagāravā sappatissā sabhāgavuttikā viharissanti. Idha kho taṃ, bhikkhave, sobhetha yaṃ tumhe evaṃ svākkhāte dhammavinaye pabbajitā samānā aññamaññaṃ agāravā appatissā asabhāgavuttikā vihareyyātha? Netaṃ, bhikkhave , appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi – ‘‘anujānāmi, bhikkhave, yathāvuḍḍhaṃ abhivādanaṃ, paccuṭṭhānaṃ, añjalikammaṃ, sāmīcikammaṃ, aggāsanaṃ, aggodakaṃ, aggapiṇḍaṃ. Na ca, bhikkhave, saṅghikaṃ yathāvuḍḍhaṃ paṭibāhitabbaṃ. Yo paṭibāheyya, āpatti dukkaṭassā’’ti.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / விஹாரானுஜானநகதா² • Vihārānujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அக்³கா³ஸனாதி³அனுஜானநகதா²வண்ணனா • Aggāsanādianujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / விஹாரானுஜானநகதா²வண்ணனா • Vihārānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / விஹாரானுஜானநகதா² • Vihārānujānanakathā
