| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
15. ஆஹாரபச்சயனித்³தே³ஸவண்ணனா
15. Āhārapaccayaniddesavaṇṇanā
15. ஆஹாரபச்சயனித்³தே³ஸே கப³ளீகாரோ ஆஹாரோதி சதுஸந்ததிஸமுட்டா²னே ரூபே ஓஜா ஆஹாரோ நாம. ஸோ பன யஸ்மா கப³ளங் கரித்வா அஜ்ஜோ²ஹரிதோவ ஆஹாரகிச்சங் கரோதி, ந ப³ஹி டி²தோ, தஸ்மா ஆஹாரோதி அவத்வா ‘‘கப³ளீகாரோ ஆஹாரோ’’தி வுத்தங். கப³ளங் கரித்வா அஜ்ஜோ²ஹரிதப்³ப³வத்து²கத்தா வா கப³ளீகாரோதி நாமமேதங் தஸ்ஸ. அரூபினோ ஆஹாராதி ப²ஸ்ஸசேதனாவிஞ்ஞாணாஹாரா . தங்ஸமுட்டா²னானந்தி இதா⁴பி கம்மஸமுட்டா²னானி க³ஹிதானேவ. வுத்தஞ்ஹேதங் பஞ்ஹாவாரே – படிஸந்தி⁴க்க²ணே விபாகாப்³யாகதா ஆஹாரா ஸம்பயுத்தகானங் க²ந்தா⁴னங் கடத்தா ச ரூபானங் ஆஹாரபச்சயேன பச்சயோதி. அயங் தாவெத்த² பாளிவண்ணனா.
15. Āhārapaccayaniddese kabaḷīkāro āhāroti catusantatisamuṭṭhāne rūpe ojā āhāro nāma. So pana yasmā kabaḷaṃ karitvā ajjhoharitova āhārakiccaṃ karoti, na bahi ṭhito, tasmā āhāroti avatvā ‘‘kabaḷīkāro āhāro’’ti vuttaṃ. Kabaḷaṃ karitvā ajjhoharitabbavatthukattā vā kabaḷīkāroti nāmametaṃ tassa. Arūpino āhārāti phassacetanāviññāṇāhārā . Taṃsamuṭṭhānānanti idhāpi kammasamuṭṭhānāni gahitāneva. Vuttañhetaṃ pañhāvāre – paṭisandhikkhaṇe vipākābyākatā āhārā sampayuttakānaṃ khandhānaṃ kaṭattā ca rūpānaṃ āhārapaccayena paccayoti. Ayaṃ tāvettha pāḷivaṇṇanā.
அயங் பன ஆஹாரபச்சயோ ஸங்கே²பதோ கப³ளீகாரோ ஆஹாரோ, ப²ஸ்ஸோ, சேதனா, விஞ்ஞாணந்தி சத்தாரோவ த⁴ம்மா ஹொந்தி. தத்த² ட²பெத்வா கப³ளீகாராஹாரங் ஸேஸா தயோ அரூபாஹாரா ஜாதிவஸேன குஸலாகுஸலவிபாககிரியபே⁴த³தோ சதுதா⁴ பி⁴ஜ்ஜந்தி. புன பூ⁴மிபே⁴தே³ன குஸலோ சதுதா⁴, அகுஸலோ ஏகதா⁴, விபாகோ சதுதா⁴, கிரியா திதா⁴தி ஏவங் அனேகதா⁴ பி⁴ஜ்ஜந்தி. கப³ளீகாராஹாரோ பன ஜாதிதோ அப்³யாகதோ, பூ⁴மிதோ காமாவசரோவாதி ஏவமெத்த² நானப்பகாரபே⁴த³தோ விஞ்ஞாதப்³போ³ வினிச்ச²யோ.
Ayaṃ pana āhārapaccayo saṅkhepato kabaḷīkāro āhāro, phasso, cetanā, viññāṇanti cattārova dhammā honti. Tattha ṭhapetvā kabaḷīkārāhāraṃ sesā tayo arūpāhārā jātivasena kusalākusalavipākakiriyabhedato catudhā bhijjanti. Puna bhūmibhedena kusalo catudhā, akusalo ekadhā, vipāko catudhā, kiriyā tidhāti evaṃ anekadhā bhijjanti. Kabaḷīkārāhāro pana jātito abyākato, bhūmito kāmāvacarovāti evamettha nānappakārabhedato viññātabbo vinicchayo.
ஏவங் பி⁴ன்னே பனெத்த² சதுபூ⁴மகாபி தயோ குஸலாஹாரா பஞ்சவோகாரே அத்தனா ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச ஆஹாரபச்சயேன பச்சயோ, ட²பெத்வா பன ரூபாவசரங் அவஸேஸா ஆருப்பே ஸம்பயுத்தத⁴ம்மானஞ்ஞேவ ஆஹாரபச்சயேன பச்சயோ. அகுஸலாஹாரேஸுபி ஏஸேவ நயோ. சதுபூ⁴மகவிபாகாஹாரா பன ஸப்³ப³த்த² ஸம்பயுத்தகானங் ஆஹாரபச்சயா ஹொந்தி. காமாவசரரூபாவசரவிபாகா பனெத்த² பஞ்சவோகாரே உப்பஜ்ஜமானா பவத்தே சித்தஸமுட்டா²னரூபஸ்ஸ படிஸந்தி⁴யங் கடத்தாரூபஸ்ஸாபி ஆஹாரபச்சயா ஹொந்தி. லோகுத்தரா பன சித்தஸமுட்டா²னரூபஸ்ஸேவ, ஆருப்பே உப்பன்னா ரூபஸ்ஸ பச்சயா ந ஹொந்தி. தேபூ⁴மகாபி தயோ கிரியாஹாரா பஞ்சவோகாரே ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச, காமாவசராரூபாவசரா பன ஆருப்பே ஸம்பயுத்தத⁴ம்மானஞ்ஞேவ ஆஹாரபச்சயேன பச்சயோ . சதுஸந்ததிஸமுட்டா²னோ கப³ளீகாராஹாரோ கிஞ்சாபி ‘‘இமஸ்ஸ காயஸ்ஸா’’தி அவிஸேஸதோ வுத்தோ, விஸேஸதோ பனாயமெத்த² ஆஹாரஸமுட்டா²னரூபஸ்ஸ ஜனகோ சேவ அனுபாலகோ ச ஹுத்வா ஆஹாரபச்சயேன பச்சயோ ஹோதி, ஸேஸதிஸந்ததிஸமுட்டா²னஸ்ஸ அனுபாலகோவ ஹுத்வா ஆஹாரபச்சயேன பச்சயோ ஹோதீதி ஏவமெத்த² பச்சயுப்பன்னதோபி விஞ்ஞாதப்³போ³ வினிச்ச²யோதி.
Evaṃ bhinne panettha catubhūmakāpi tayo kusalāhārā pañcavokāre attanā sampayuttadhammānañceva cittasamuṭṭhānarūpassa ca āhārapaccayena paccayo, ṭhapetvā pana rūpāvacaraṃ avasesā āruppe sampayuttadhammānaññeva āhārapaccayena paccayo. Akusalāhāresupi eseva nayo. Catubhūmakavipākāhārā pana sabbattha sampayuttakānaṃ āhārapaccayā honti. Kāmāvacararūpāvacaravipākā panettha pañcavokāre uppajjamānā pavatte cittasamuṭṭhānarūpassa paṭisandhiyaṃ kaṭattārūpassāpi āhārapaccayā honti. Lokuttarā pana cittasamuṭṭhānarūpasseva, āruppe uppannā rūpassa paccayā na honti. Tebhūmakāpi tayo kiriyāhārā pañcavokāre sampayuttadhammānañceva cittasamuṭṭhānarūpassa ca, kāmāvacarārūpāvacarā pana āruppe sampayuttadhammānaññeva āhārapaccayena paccayo . Catusantatisamuṭṭhāno kabaḷīkārāhāro kiñcāpi ‘‘imassa kāyassā’’ti avisesato vutto, visesato panāyamettha āhārasamuṭṭhānarūpassa janako ceva anupālako ca hutvā āhārapaccayena paccayo hoti, sesatisantatisamuṭṭhānassa anupālakova hutvā āhārapaccayena paccayo hotīti evamettha paccayuppannatopi viññātabbo vinicchayoti.
ஆஹாரபச்சயனித்³தே³ஸவண்ணனா.
Āhārapaccayaniddesavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / (2) பச்சயனித்³தே³ஸோ • (2) Paccayaniddeso
