| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
3. அகம்மனியவக்³க³வண்ணனா
3. Akammaniyavaggavaṇṇanā
21-22. ததியஸ்ஸ பட²மே அபா⁴விதந்தி அவட்³டி⁴தங் பா⁴வனாவஸேன அப்பவத்திதங். அகம்மனியங் ஹோதீதி கம்மக்க²மங் கம்மயொக்³க³ங் ந ஹோதி. து³தியே வுத்தவிபரியாயேன அத்தோ² வேதி³தப்³போ³. எத்த² ச பட²மே சித்தந்தி வட்டவஸேன உப்பன்னசித்தங், து³தியே விவட்டவஸேன உப்பன்னசித்தங். தத்த² ச வட்டங் வட்டபாத³ங், விவட்டங் விவட்டபாத³ந்தி அயங் பபே⁴தோ³ வேதி³தப்³போ³. வட்டங் நாம தேபூ⁴மகவட்டங், வட்டபாத³ங் நாம வட்டபடிலாபா⁴ய கம்மங், விவட்டங் நாம நவ லோகுத்தரத⁴ம்மா, விவட்டபாத³ங் நாம விவட்டபடிலாபா⁴ய கம்மங். இதி இமேஸு ஸுத்தேஸு வட்டவிவட்டமேவ கதி²தந்தி.
21-22. Tatiyassa paṭhame abhāvitanti avaḍḍhitaṃ bhāvanāvasena appavattitaṃ. Akammaniyaṃ hotīti kammakkhamaṃ kammayoggaṃ na hoti. Dutiye vuttavipariyāyena attho veditabbo. Ettha ca paṭhame cittanti vaṭṭavasena uppannacittaṃ, dutiye vivaṭṭavasena uppannacittaṃ. Tattha ca vaṭṭaṃ vaṭṭapādaṃ, vivaṭṭaṃ vivaṭṭapādanti ayaṃ pabhedo veditabbo. Vaṭṭaṃ nāma tebhūmakavaṭṭaṃ, vaṭṭapādaṃ nāma vaṭṭapaṭilābhāya kammaṃ, vivaṭṭaṃ nāma nava lokuttaradhammā, vivaṭṭapādaṃ nāma vivaṭṭapaṭilābhāya kammaṃ. Iti imesu suttesu vaṭṭavivaṭṭameva kathitanti.
23-24. ததியே வட்டவஸேனேவ உப்பன்னசித்தங் வேதி³தப்³ப³ங். மஹதோ அனத்தா²ய ஸங்வத்ததீதி தே³வமனுஸ்ஸஸம்பத்தியோ மாரப்³ரஹ்மஇஸ்ஸரியானி ச த³த³மானம்பி புனப்புனங் ஜாதிஜராப்³யாதி⁴மரணஸோகபரிதே³வது³க்க²தோ³மனஸ்ஸுபாயாஸே க²ந்த⁴தா⁴துஆயதனபடிச்சஸமுப்பாத³வட்டானி ச த³த³மானங் கேவலங் து³க்க²க்க²ந்த⁴மேவ தே³தீதி மஹதோ அனத்தா²ய ஸங்வத்ததி நாமாதி. சதுத்தே² சித்தந்தி விவட்டவஸேனேவ உப்பன்னசித்தங்.
23-24. Tatiye vaṭṭavaseneva uppannacittaṃ veditabbaṃ. Mahato anatthāya saṃvattatīti devamanussasampattiyo mārabrahmaissariyāni ca dadamānampi punappunaṃ jātijarābyādhimaraṇasokaparidevadukkhadomanassupāyāse khandhadhātuāyatanapaṭiccasamuppādavaṭṭāni ca dadamānaṃ kevalaṃ dukkhakkhandhameva detīti mahato anatthāya saṃvattati nāmāti. Catutthe cittanti vivaṭṭavaseneva uppannacittaṃ.
25-26. பஞ்சமச²ட்டே²ஸு அபா⁴விதங் அபாதுபூ⁴தந்தி அயங் விஸேஸோ. தத்ராமயதி⁴ப்பாயோ – வட்டவஸேன உப்பன்னசித்தங் நாம உப்பன்னம்பி அபா⁴விதங் அபாதுபூ⁴தமேவ ஹோதி. கஸ்மா ? லோகுத்தரபாத³கஜ்ஜா²னவிபஸ்ஸனாமக்³க³ப²லனிப்³பா³னேஸு பக்க²ந்தி³துங் அஸமத்த²த்தா. விவட்டவஸேன உப்பன்னங் பன பா⁴விதங் பாதுபூ⁴தங் நாம ஹோதி. கஸ்மா? தேஸு த⁴ம்மேஸு பக்க²ந்தி³துங் ஸமத்த²த்தா. குருந்த³கவாஸீ பு²ஸ்ஸமித்தத்தே²ரோ பனாஹ – ‘‘மக்³க³சித்தமேவ, ஆவுஸோ, பா⁴விதங் பாதுபூ⁴தங் நாம ஹோதீ’’தி.
25-26. Pañcamachaṭṭhesu abhāvitaṃ apātubhūtanti ayaṃ viseso. Tatrāmayadhippāyo – vaṭṭavasena uppannacittaṃ nāma uppannampi abhāvitaṃ apātubhūtameva hoti. Kasmā ? Lokuttarapādakajjhānavipassanāmaggaphalanibbānesu pakkhandituṃ asamatthattā. Vivaṭṭavasena uppannaṃ pana bhāvitaṃ pātubhūtaṃ nāma hoti. Kasmā? Tesu dhammesu pakkhandituṃ samatthattā. Kurundakavāsī phussamittatthero panāha – ‘‘maggacittameva, āvuso, bhāvitaṃ pātubhūtaṃ nāma hotī’’ti.
27-28. ஸத்தமட்ட²மேஸு அப³ஹுலீகதந்தி புனப்புனங் அகதங். இமானிபி த்³வே வட்டவிவட்டவஸேன உப்பன்னசித்தானேவ வேதி³தப்³பா³னீதி.
27-28. Sattamaṭṭhamesu abahulīkatanti punappunaṃ akataṃ. Imānipi dve vaṭṭavivaṭṭavasena uppannacittāneva veditabbānīti.
29. நவமே ‘‘ஜாதிபி து³க்கா²’’திஆதி³னா நயேன வுத்தங் து³க்க²ங் அதி⁴வஹதி ஆஹரதீதி து³க்கா²தி⁴வஹங். து³க்கா²தி⁴வாஹந்திபி பாடோ². தஸ்ஸத்தோ² – லோகுத்தரபாத³கஜ்ஜா²னாதி³ அரியத⁴ம்மாபி⁴முக²ங் து³க்கே²ன அதி⁴வாஹீயதி பேஸீயதீதி து³க்கா²தி⁴வாஹங். இத³ம்பி வட்டவஸேன உப்பன்னசித்தமேவ. தஞ்ஹி வுத்தப்பகாரா தே³வமனுஸ்ஸாதி³ஸம்பத்தியோ த³த³மானம்பி ஜாதிஆதீ³னங் அதி⁴வஹனதோ து³க்கா²தி⁴வஹங், அரியத⁴ம்மாதி⁴க³மாய து³ப்பேஸனதோ து³க்கா²தி⁴வாஹஞ்ச நாம ஹோதீதி.
29. Navame ‘‘jātipi dukkhā’’tiādinā nayena vuttaṃ dukkhaṃ adhivahati āharatīti dukkhādhivahaṃ. Dukkhādhivāhantipi pāṭho. Tassattho – lokuttarapādakajjhānādi ariyadhammābhimukhaṃ dukkhena adhivāhīyati pesīyatīti dukkhādhivāhaṃ. Idampi vaṭṭavasena uppannacittameva. Tañhi vuttappakārā devamanussādisampattiyo dadamānampi jātiādīnaṃ adhivahanato dukkhādhivahaṃ, ariyadhammādhigamāya duppesanato dukkhādhivāhañca nāma hotīti.
30. த³ஸமே விவட்டவஸேன உப்பன்னசித்தமேவ சித்தங். தஞ்ஹி மானுஸகஸுக²தோ தி³ப்³ப³ஸுக²ங், தி³ப்³ப³ஸுக²தோ ஜா²னஸுக²ங், ஜா²னஸுக²தோ விபஸ்ஸனாஸுக²ங், விபஸ்ஸனாஸுக²தோ மக்³க³ஸுக²ங், மக்³க³ஸுக²தோ ப²லஸுக²ங், ப²லஸுக²தோ நிப்³பா³னஸுக²ங் அதி⁴வஹதி ஆஹரதீதி ஸுகா²தி⁴வஹங் நாம ஹோதி, ஸுகா²தி⁴வாஹங் வா. தஞ்ஹி லோகுத்தரபாத³கஜ்ஜா²னாதி³அரியத⁴ம்மாபி⁴முக²ங் ஸுபேஸயங் விஸ்ஸட்ட²இந்த³வஜிரஸதி³ஸங் ஹோதீதி ஸுகா²தி⁴வாஹந்திபி வுச்சதி. இமஸ்மிம்பி வக்³கே³ வட்டவிவட்டமேவ கதி²தந்தி.
30. Dasame vivaṭṭavasena uppannacittameva cittaṃ. Tañhi mānusakasukhato dibbasukhaṃ, dibbasukhato jhānasukhaṃ, jhānasukhato vipassanāsukhaṃ, vipassanāsukhato maggasukhaṃ, maggasukhato phalasukhaṃ, phalasukhato nibbānasukhaṃ adhivahati āharatīti sukhādhivahaṃ nāma hoti, sukhādhivāhaṃ vā. Tañhi lokuttarapādakajjhānādiariyadhammābhimukhaṃ supesayaṃ vissaṭṭhaindavajirasadisaṃ hotīti sukhādhivāhantipi vuccati. Imasmimpi vagge vaṭṭavivaṭṭameva kathitanti.
அகம்மனியவக்³க³வண்ணனா.
Akammaniyavaggavaṇṇanā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. அகம்மனியவக்³கோ³ • 3. Akammaniyavaggo
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3. அகம்மனியவக்³க³வண்ணனா • 3. Akammaniyavaggavaṇṇanā
