| Library / Tipiṭaka / તિપિટક • Tipiṭaka / ખુદ્દસિક્ખા-મૂલસિક્ખા • Khuddasikkhā-mūlasikkhā |
૧૦. અકપ્પિયમંસનિદ્દેસવણ્ણના
10. Akappiyamaṃsaniddesavaṇṇanā
૧૧૩-૪. મનુસ્સહત્થિઅસ્સાનઞ્ચ …પે॰… ઉરગસ્સ ચ યં મંસઞ્ચ, યં ઉદ્દિસ્સકતમંસઞ્ચ, અપ્પટિવેક્ખિતં યઞ્ચ મંસં, તેસુ મંસેસૂતિ એવં યોજેત્વા અત્થો વેદિતબ્બો. તત્થ સીસગીવાતરઙ્ગેન ચરન્તા અચ્છવિસેસાવ તરચ્છા. ઉરગસ્સાતિ ઇમિના સબ્બાપિ દીઘજાતિ સઙ્ગહિતા. ઉદ્દિસ્સકતમંસન્તિ ભિક્ખું ઉદ્દિસિત્વા કતં ઉદ્દિસ્સકતં, તઞ્ચ તં મંસઞ્ચ. એત્થ ચ મંસ-ગ્ગહણેન મચ્છાનમ્પિ ગહણં વેદિતબ્બં ઉપલક્ખણવસેન, ચ-સદ્દેન વા. પઞ્ચસુપિ સહધમ્મિકેસુ યં કિઞ્ચિ ઉદ્દિસ્સકતં સબ્બેસમ્પિ ન કપ્પતિ, તમ્પિ અદિટ્ઠઅસુતઅપરિસઙ્કિતતાય તિકોટિપરિસુદ્ધં વટ્ટતિ. અપ્પટિવેક્ખિતન્તિ અનુપપરિક્ખિતં, અનાપુચ્છિતન્તિ અત્થો. આપત્તિભીરુકેન હિ રૂપં સલ્લક્ખેન્તેનાપિ પુચ્છિત્વા પટિગ્ગહેતબ્બં પરિભુઞ્જિતબ્બઞ્ચ. મનુસ્સાનં મંસેસુ થુલ્લચ્ચયન્તિ યોજના. થૂલો અચ્ચયો એત્થાતિ રસ્સે, દ્વિત્તે ચ થુલ્લચ્ચયં. પારાજિકસઙ્ઘાદિસેસેહિ ઠપેત્વા ઇતો અધિકં વજ્જં નત્થિ. સેસેસૂતિ અવસેસેસુ એકાદસસુ.
113-4. Manussahatthiassānañca …pe… uragassa ca yaṃ maṃsañca, yaṃ uddissakatamaṃsañca, appaṭivekkhitaṃ yañca maṃsaṃ, tesu maṃsesūti evaṃ yojetvā attho veditabbo. Tattha sīsagīvātaraṅgena carantā acchavisesāva taracchā. Uragassāti iminā sabbāpi dīghajāti saṅgahitā. Uddissakatamaṃsanti bhikkhuṃ uddisitvā kataṃ uddissakataṃ, tañca taṃ maṃsañca. Ettha ca maṃsa-ggahaṇena macchānampi gahaṇaṃ veditabbaṃ upalakkhaṇavasena, ca-saddena vā. Pañcasupi sahadhammikesu yaṃ kiñci uddissakataṃ sabbesampi na kappati, tampi adiṭṭhaasutaaparisaṅkitatāya tikoṭiparisuddhaṃ vaṭṭati. Appaṭivekkhitanti anupaparikkhitaṃ, anāpucchitanti attho. Āpattibhīrukena hi rūpaṃ sallakkhentenāpi pucchitvā paṭiggahetabbaṃ paribhuñjitabbañca. Manussānaṃ maṃsesu thullaccayanti yojanā. Thūlo accayo etthāti rasse, dvitte ca thullaccayaṃ. Pārājikasaṅghādisesehi ṭhapetvā ito adhikaṃ vajjaṃ natthi. Sesesūti avasesesu ekādasasu.
૧૧૫. ઇદાનિ મનુસ્સાદીનં અટ્ઠિઆદીનિપિ અકપ્પિયાનીતિ દસ્સેતું ‘‘અટ્ઠિપી’’તિઆદિમાહ. પિ-સદ્દો ‘‘લોહિત’’ન્તિઆદીસુપિ અનુવત્તેતબ્બો. એસન્તિ મનુસ્સાદીનં દસન્નં. વસાસુ પન એકા મનુસ્સવસા ન વટ્ટતિ. ખીરાદીસુ અકપ્પિયં નામ નત્થિ. ઉદ્દિસ્સકતંયેવ સચિત્તકન્તિ યોજના. સચિત્તકન્તિ ઉદ્દિસ્સકતભાવજાનનચિત્તેન સહ વત્તતીતિ સચિત્તકં. વત્થુવીતિક્કમવિજાનનચિત્તેન હિ સચિત્તકત્તં. એત્થ ચ સચિત્તકત્તં આપત્તિયા એવ, ન ચ મંસસ્સ, તથાપિ મંસસીસેન આપત્તિ એવ વુત્તાતિ વિઞ્ઞાતબ્બન્તિ.
115. Idāni manussādīnaṃ aṭṭhiādīnipi akappiyānīti dassetuṃ ‘‘aṭṭhipī’’tiādimāha. Pi-saddo ‘‘lohita’’ntiādīsupi anuvattetabbo. Esanti manussādīnaṃ dasannaṃ. Vasāsu pana ekā manussavasā na vaṭṭati. Khīrādīsu akappiyaṃ nāma natthi. Uddissakataṃyeva sacittakanti yojanā. Sacittakanti uddissakatabhāvajānanacittena saha vattatīti sacittakaṃ. Vatthuvītikkamavijānanacittena hi sacittakattaṃ. Ettha ca sacittakattaṃ āpattiyā eva, na ca maṃsassa, tathāpi maṃsasīsena āpatti eva vuttāti viññātabbanti.
અકપ્પિયમંસનિદ્દેસવણ્ણના નિટ્ઠિતા.
Akappiyamaṃsaniddesavaṇṇanā niṭṭhitā.
