Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā

[523] 3. аламб̣усааж̇аад̇агаван̣н̣анаа

[523] 3. Alambusājātakavaṇṇanā

ат̇аб̣равийд̇и ид̣̇ам̣ сад̇т̇аа ж̇зд̇аванз вихаранд̇о бураан̣ад̣̇уд̇ияигаабалобханам̣ аараб̣бха гат̇зси. вад̇т̇у инд̣̇рияаж̇аад̇агз (ж̇аа. 1.8.60 аад̣̇аяо) вид̇т̇аарид̇амзва. сад̇т̇аа бана д̇ам̣ бхигкум̣ ‘‘сажжам̣ гира д̇вам̣, бхигку, угган̣тид̇осий’’д̇и бужчид̇ваа ‘‘сажжам̣, бханд̇з’’д̇и вуд̇д̇з ‘‘гзна угган̣таабид̇осий’’д̇и вад̇ваа ‘‘бураан̣ад̣̇уд̇ияигааяаа’’д̇и вуд̇д̇з ‘‘бхигку зсаа ид̇т̇ий д̇уяхам̣ анад̇т̇агааригаа, д̇вам̣ зд̇ам̣ ниссааяа жхаанам̣ наасзд̇ваа д̇ийн̣и сам̣важчараани муул̣хо висан̃н̃ий нибаж̇ж̇ид̇ваа уббаннааяа сан̃н̃ааяа махаабарид̣̇звам̣ барид̣̇звий’’д̇и вад̇ваа ад̇ийд̇ам̣ аахари.

Athabravīti idaṃ satthā jetavane viharanto purāṇadutiyikāpalobhanaṃ ārabbha kathesi. Vatthu indriyajātake (jā. 1.8.60 ādayo) vitthāritameva. Satthā pana taṃ bhikkhuṃ ‘‘saccaṃ kira tvaṃ, bhikkhu, ukkaṇṭhitosī’’ti pucchitvā ‘‘saccaṃ, bhante’’ti vutte ‘‘kena ukkaṇṭhāpitosī’’ti vatvā ‘‘purāṇadutiyikāyā’’ti vutte ‘‘bhikkhu esā itthī tuyhaṃ anatthakārikā, tvaṃ etaṃ nissāya jhānaṃ nāsetvā tīṇi saṃvaccharāni mūḷho visaññī nipajjitvā uppannāya saññāya mahāparidevaṃ paridevī’’ti vatvā atītaṃ āhari.

ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о гаасирадтз б̣раахман̣агулз ниб̣б̣ад̇д̇ид̇ваа ваяаббад̇д̇о саб̣б̣асиббзсу нибпад̇д̇им̣ бад̇ваа исибаб̣б̣аж̇ж̇ам̣ баб̣б̣аж̇ид̇ваа аран̃н̃ааяад̇анз ванамуулапалаахааро яаабзси. ат̇згаа миг̇ий д̇асса бассаавадтаанз самбхавамиссагам̣ д̇ин̣ам̣ каад̣̇ид̇ваа уд̣̇агам̣ биви. зд̇д̇агзнзва жа д̇асмим̣ бадиб̣ад̣̇д̇хажид̇д̇аа г̇аб̣бхам̣ бадилабхид̇ваа д̇ад̇о бадтааяа гад̇т̇ажи аг̇анд̇ваа д̇ад̇т̇зва д̇ин̣ам̣ каад̣̇ид̇ваа ассамасса сааманд̇зязва вижарад̇и . махаасад̇д̇о бариг̇г̇ан̣ханд̇о д̇ам̣ гааран̣ам̣ ан̃н̃ааси. саа абарабхааг̇з мануссад̣̇аарагам̣ виж̇ааяи. махаасад̇д̇о д̇ам̣ буд̇д̇асинзхзна бадиж̇аг̇г̇и, ‘‘исисин̇г̇о’’д̇исса наамам̣ агааси. ат̇а нам̣ махаасад̇д̇о вин̃н̃уд̇аббад̇д̇ам̣ баб̣б̣ааж̇зд̇ваа ад̇д̇ано махаллагагаалз д̇ам̣ аад̣̇ааяа наариванам̣ наама г̇анд̇ваа, ‘‘д̇аад̇а, имасмим̣ химаванд̇з имзхи бубпзхи сад̣̇исаа ид̇т̇ияо наама хонд̇и, д̇аа ад̇д̇ано васам̣ г̇ад̇з махаавинаасам̣ баабзнд̇и, на д̇аасам̣ васам̣ наама г̇анд̇ум̣ ваддад̇ий’’д̇и овад̣̇ид̇ваа абарабхааг̇з б̣рахмалогабарааяан̣о ахоси.

Atīte bārāṇasiyaṃ brahmadatte rajjaṃ kārente bodhisatto kāsiraṭṭhe brāhmaṇakule nibbattitvā vayappatto sabbasippesu nipphattiṃ patvā isipabbajjaṃ pabbajitvā araññāyatane vanamūlaphalāhāro yāpesi. Athekā migī tassa passāvaṭṭhāne sambhavamissakaṃ tiṇaṃ khāditvā udakaṃ pivi. Ettakeneva ca tasmiṃ paṭibaddhacittā gabbhaṃ paṭilabhitvā tato paṭṭhāya katthaci agantvā tattheva tiṇaṃ khāditvā assamassa sāmanteyeva vicarati . Mahāsatto pariggaṇhanto taṃ kāraṇaṃ aññāsi. Sā aparabhāge manussadārakaṃ vijāyi. Mahāsatto taṃ puttasinehena paṭijaggi, ‘‘isisiṅgo’’tissa nāmaṃ akāsi. Atha naṃ mahāsatto viññutappattaṃ pabbājetvā attano mahallakakāle taṃ ādāya nārivanaṃ nāma gantvā, ‘‘tāta, imasmiṃ himavante imehi pupphehi sadisā itthiyo nāma honti, tā attano vasaṃ gate mahāvināsaṃ pāpenti, na tāsaṃ vasaṃ nāma gantuṃ vaṭṭatī’’ti ovaditvā aparabhāge brahmalokaparāyaṇo ahosi.

исисин̇г̇оби жхаанагийл̣ам̣ гийл̣анд̇о химаванд̇аббад̣̇зсз ваасам̣ габбзси. гхорад̇або барамад̇хид̇инд̣̇рияо ахоси. ат̇асса сийлад̇зж̇зна саггасса бхаванам̣ гамби, сагго ааваж̇ж̇знд̇о д̇ам̣ гааран̣ам̣ н̃ад̇ваа ‘‘аяам̣ мам̣ саггад̇д̇аа жаавзяяа, згам̣ ажчарам̣ бзсзд̇ваа сийламасса бхинд̣̇аабзссаамий’’д̇и сагалад̣̇звалогам̣ убабаригканд̇о ад̇д̇ано ад̣дхад̇зяяагодисан̇каанам̣ барижааригаанам̣ маж̇жхз згам̣ аламб̣усам̣ наама ажчарам̣ табзд̇ваа ан̃н̃ам̣ д̇асса сийлам̣ бхинд̣̇ид̇ум̣ самад̇т̇ам̣ ад̣̇исваа д̇ам̣ баггосаабзд̇ваа д̇асса сийлабхзд̣̇ам̣ гаад̇ум̣ аан̣аабзси. д̇амад̇т̇ам̣ аавигаронд̇о сад̇т̇аа батамам̣ г̇аат̇амааха –

Isisiṅgopi jhānakīḷaṃ kīḷanto himavantappadese vāsaṃ kappesi. Ghoratapo paramadhitindriyo ahosi. Athassa sīlatejena sakkassa bhavanaṃ kampi, sakko āvajjento taṃ kāraṇaṃ ñatvā ‘‘ayaṃ maṃ sakkattā cāveyya, ekaṃ accharaṃ pesetvā sīlamassa bhindāpessāmī’’ti sakaladevalokaṃ upaparikkhanto attano aḍḍhateyyakoṭisaṅkhānaṃ paricārikānaṃ majjhe ekaṃ alambusaṃ nāma accharaṃ ṭhapetvā aññaṃ tassa sīlaṃ bhindituṃ samatthaṃ adisvā taṃ pakkosāpetvā tassa sīlabhedaṃ kātuṃ āṇāpesi. Tamatthaṃ āvikaronto satthā paṭhamaṃ gāthamāha –

95.

‘‘ат̇аб̣рави б̣рахаа инд̣̇о, вад̇рабхуу ж̇аяад̇ам̣ бид̇аа;

‘‘Athabravi brahā indo, vatrabhū jayataṃ pitā;

д̣̇зваган̃н̃ам̣ бараабхзд̇ваа, суд̇хаммааяам̣ аламб̣уса’’нд̇и.

Devakaññaṃ parābhetvā, sudhammāyaṃ alambusa’’nti.

д̇ад̇т̇а б̣рахаад̇и махаа. вад̇рабхууд̇и вад̇расса наама асурасса абхибхавид̇аа. ж̇аяад̇ам̣ бид̇аад̇и ж̇аяанд̇аанам̣ ж̇аяаббад̇д̇аанам̣ сзсаанам̣ д̇зд̇д̇им̣сааяа д̣̇звабуд̇д̇аанам̣ бид̇угижжасаад̇ханзна бид̇аа. бараабхзд̇ваад̇и хад̣̇аяам̣ бхинд̣̇ид̇ваа ологзнд̇о вияа д̇ам̣ ‘‘бадиб̣алаа аяа’’нд̇и н̃ад̇ваад̇и ад̇т̇о. суд̇хаммааяанд̇и суд̇хаммааяам̣ д̣̇звасабхааяам̣.

Tattha brahāti mahā. Vatrabhūti vatrassa nāma asurassa abhibhavitā. Jayataṃ pitāti jayantānaṃ jayappattānaṃ sesānaṃ tettiṃsāya devaputtānaṃ pitukiccasādhanena pitā. Parābhetvāti hadayaṃ bhinditvā olokento viya taṃ ‘‘paṭibalā aya’’nti ñatvāti attho. Sudhammāyanti sudhammāyaṃ devasabhāyaṃ.

бан̣д̣угамб̣аласилаасанз нисинно д̇ам̣ аламб̣усам̣ баггосаабзд̇ваа ид̣̇амааха –

Paṇḍukambalasilāsane nisinno taṃ alambusaṃ pakkosāpetvā idamāha –

96.

‘‘миссз д̣̇зваа д̇ам̣ яаажанд̇и, д̇аавад̇им̣саа саинд̣̇агаа;

‘‘Misse devā taṃ yācanti, tāvatiṃsā saindakā;

исиббалобханз г̇ажча, исисин̇г̇ам̣ аламб̣усз’’д̇и.

Isippalobhane gaccha, isisiṅgaṃ alambuse’’ti.

д̇ад̇т̇а миссзд̇и д̇ам̣ аалабад̇и, ид̣̇ан̃жа д̇ассаа наамам̣, саб̣б̣аа банид̇т̇ияо бурисз гилзсамиссанзна миссанад̇о ‘‘миссаа’’д̇и вужжанд̇и, д̇зна саад̇хааран̣зна г̇ун̣анаамзнаалабанд̇о звамааха. исиббалобханзд̇и исийнам̣ балобханасамад̇т̇з. исисин̇г̇анд̇и д̇асса гира мад̇т̇агз миг̇асин̇г̇аагаарзна д̣̇вз жуул̣аа удтахим̣су, д̇асмаа звам̣ вужжад̇и.

Tattha misseti taṃ ālapati, idañca tassā nāmaṃ, sabbā panitthiyo purise kilesamissanena missanato ‘‘missā’’ti vuccanti, tena sādhāraṇena guṇanāmenālapanto evamāha. Isippalobhaneti isīnaṃ palobhanasamatthe. Isisiṅganti tassa kira matthake migasiṅgākārena dve cūḷā uṭṭhahiṃsu, tasmā evaṃ vuccati.

ид̇и сагго ‘‘г̇ажча исисин̇г̇ам̣ убасан̇гамид̇ваа ад̇д̇ано васам̣ аанзд̇ваа сийламасса бхинд̣̇аа’’д̇и аламб̣усам̣ аан̣аабзси.

Iti sakko ‘‘gaccha isisiṅgaṃ upasaṅkamitvā attano vasaṃ ānetvā sīlamassa bhindā’’ti alambusaṃ āṇāpesi.

97.

‘‘бурааяам̣ амхз ажжзд̇и, вад̇д̇аваа б̣рахмажарияаваа;

‘‘Purāyaṃ amhe acceti, vattavā brahmacariyavā;

ниб̣б̣аанаабхирад̇о вуд̣̇д̇хо, д̇асса маг̇г̇аани аавараа’’д̇и. – важанам̣ ааха;

Nibbānābhirato vuddho, tassa maggāni āvarā’’ti. – vacanaṃ āha;

д̇ад̇т̇а бурааяанд̇и аяам̣ д̇аабасо вад̇д̇асамбанно жа б̣рахмажарияаваа жа, со банзса д̣̇ийгхааяугад̇ааяа ниб̣б̣аанасан̇каад̇з маг̇г̇з абхирад̇о г̇ун̣авуд̣̇д̇хияаа жа вуд̣̇д̇хо. д̇асмаа яаава зса амхз наад̇иггамад̇и, на абхибхавид̇ваа имамхаа таанаа жаавзд̇и, д̇аавад̣̇зва д̇вам̣ г̇анд̇ваа д̇асса д̣̇звалогаг̇аманаани маг̇г̇аани аавара, яат̇аа ид̇ха нааг̇ажчад̇и, звам̣ гарохийд̇и ад̇т̇о.

Tattha purāyanti ayaṃ tāpaso vattasampanno ca brahmacariyavā ca, so panesa dīghāyukatāya nibbānasaṅkhāte magge abhirato guṇavuddhiyā ca vuddho. Tasmā yāva esa amhe nātikkamati, na abhibhavitvā imamhā ṭhānā cāveti, tāvadeva tvaṃ gantvā tassa devalokagamanāni maggāni āvara, yathā idha nāgacchati, evaṃ karohīti attho.

д̇ам̣ суд̇ваа аламб̣усаа г̇аат̇аад̣̇ваяамааха –

Taṃ sutvā alambusā gāthādvayamāha –

98.

‘‘д̣̇зварааж̇а гимзва д̇вам̣, мамзва д̇увам̣ сигкаси;

‘‘Devarāja kimeva tvaṃ, mameva tuvaṃ sikkhasi;

исиббалобханз г̇ажча, санд̇и ан̃н̃ааби ажчараа.

Isippalobhane gaccha, santi aññāpi accharā.

99.

‘‘маад̣̇исияо бавараа жзва, асогз нанд̣̇анз ванз;

‘‘Mādisiyo pavarā ceva, asoke nandane vane;

д̇аасамби ход̇у барияааяо, д̇ааби яанд̇у балобханаа’’д̇и.

Tāsampi hotu pariyāyo, tāpi yantu palobhanā’’ti.

д̇ад̇т̇а гимзва д̇ванд̇и гим̣ наамзд̇ам̣ д̇вам̣ гаросийд̇и д̣̇ийбзд̇и. мамзва д̇увам̣ сигкасийд̇и имасмим̣ сагалад̣̇звалогз мамзва д̇увам̣ игкаси, ан̃н̃ам̣ на бассасийд̇и ад̇хиббааязна вад̣̇ад̇и. са-гааро банзд̇т̇а б̣яан̃ж̇анасанд̇хигаро. исиббалобханз г̇ажчаад̇и гим̣гааран̣аа ман̃н̃зва звам̣ вад̣̇зсийд̇и ад̇хиббааяо . бавараа жзваад̇и маяаа уд̇д̇арид̇араа жзва. асогзд̇и согарахид̇з. нанд̣̇анзд̇и нанд̣̇иж̇анагз. барияааяод̇и г̇аманавааро.

Tattha kimeva tvanti kiṃ nāmetaṃ tvaṃ karosīti dīpeti. Mameva tuvaṃ sikkhasīti imasmiṃ sakaladevaloke mameva tuvaṃ ikkhasi, aññaṃ na passasīti adhippāyena vadati. Sa-kāro panettha byañjanasandhikaro. Isippalobhane gacchāti kiṃkāraṇā maññeva evaṃ vadesīti adhippāyo . Pavarā cevāti mayā uttaritarā ceva. Asoketi sokarahite. Nandaneti nandijanake. Pariyāyoti gamanavāro.

д̇ад̇о сагго д̇иссо г̇аат̇ааяо абхааси –

Tato sakko tisso gāthāyo abhāsi –

100.

‘‘ад̣̇д̇хаа хи сажжам̣ бхан̣аси, санд̇и ан̃н̃ааби ажчараа;

‘‘Addhā hi saccaṃ bhaṇasi, santi aññāpi accharā;

д̇аад̣̇исияо бавараа жзва, асогз нанд̣̇анз ванз.

Tādisiyo pavarā ceva, asoke nandane vane.

101.

‘‘на д̇аа звам̣ баж̇аананд̇и, баарижарияам̣ бумам̣ г̇ад̇аа;

‘‘Na tā evaṃ pajānanti, pāricariyaṃ pumaṃ gatā;

яаад̣̇исам̣ д̇вам̣ баж̇аанааси, наари саб̣б̣ан̇г̇асобханз.

Yādisaṃ tvaṃ pajānāsi, nāri sabbaṅgasobhane.

102.

‘‘д̇вамзва г̇ажча галяаан̣и, ид̇т̇ийнам̣ бавараа жаси;

‘‘Tvameva gaccha kalyāṇi, itthīnaṃ pavarā casi;

д̇авзва ван̣н̣аруубзна, савасамаанаяиссасий’’д̇и.

Taveva vaṇṇarūpena, savasamānayissasī’’ti.

д̇ад̇т̇а бумам̣ г̇ад̇аад̇и бурисам̣ убасан̇гаманд̇аа самаанаа бурисабалобхинибаарижарияам̣ на ж̇аананд̇и. ван̣н̣аруубзнаад̇и сарийраван̣н̣зна жзва руубасамбад̇д̇ияаа жа. савасамаанаяиссасийд̇и д̇ам̣ д̇аабасам̣ ад̇д̇ано васам̣ аанзссасийд̇и.

Tattha pumaṃ gatāti purisaṃ upasaṅkamantā samānā purisapalobhinipāricariyaṃ na jānanti. Vaṇṇarūpenāti sarīravaṇṇena ceva rūpasampattiyā ca. Savasamānayissasīti taṃ tāpasaṃ attano vasaṃ ānessasīti.

д̇ам̣ суд̇ваа аламб̣усаа д̣̇вз г̇аат̇аа абхааси –

Taṃ sutvā alambusā dve gāthā abhāsi –

103.

‘‘на ваахам̣ на г̇амиссаами, д̣̇зварааж̇зна бзсид̇аа;

‘‘Na vāhaṃ na gamissāmi, devarājena pesitā;

вибхзми жзд̇ам̣ аасаад̣̇ум̣, уг̇г̇ад̇зж̇о хи б̣раахман̣о.

Vibhemi cetaṃ āsāduṃ, uggatejo hi brāhmaṇo.

104.

‘‘анзгз нираяам̣ бад̇д̇аа, исимаасаад̣̇ияаа ж̇анаа;

‘‘Aneke nirayaṃ pattā, isimāsādiyā janā;

аабаннаа мохасам̣саарам̣, д̇асмаа ломаани хам̣саяз’’д̇и.

Āpannā mohasaṃsāraṃ, tasmā lomāni haṃsaye’’ti.

д̇ад̇т̇а на вааханд̇и на вз ахам̣. вибхзмийд̇и бхааяаами. аасаад̣̇унд̇и аасаад̣̇ид̇ум̣. ид̣̇ам̣ вуд̇д̇ам̣ ход̇и – наахам̣, д̣̇зва, д̇аяаа бзсид̇аа на г̇амиссаами, абижаахам̣ д̇ам̣ исим̣ сийлабхзд̣̇анад̇т̇ааяа аллийяид̇ум̣ бхааяаами, уг̇г̇ад̇зж̇о хи сод̇и. аасаад̣̇ияаад̇и аасаад̣̇зд̇ваа. мохасам̣сааранд̇и мохзна сам̣саарам̣, мохзна исим̣ балобхзд̇ваа сам̣саарам̣ аабаннаа ваддад̣̇угкз бад̇идтид̇аа сад̇д̇аа г̇ан̣анабат̇ам̣ ад̇игганд̇аа . д̇асмаад̇и д̇зна гааран̣зна. ломаани хам̣саязд̇и ахам̣ ломаани удтабзми, ‘‘д̇асса гираахам̣ сийлам̣ бхинд̣̇иссаамий’’д̇и жинд̇аяамаанааяа мз ломаани бахам̣санд̇ийд̇и вад̣̇ад̇и.

Tattha na vāhanti na ve ahaṃ. Vibhemīti bhāyāmi. Āsādunti āsādituṃ. Idaṃ vuttaṃ hoti – nāhaṃ, deva, tayā pesitā na gamissāmi, apicāhaṃ taṃ isiṃ sīlabhedanatthāya allīyituṃ bhāyāmi, uggatejo hi soti. Āsādiyāti āsādetvā. Mohasaṃsāranti mohena saṃsāraṃ, mohena isiṃ palobhetvā saṃsāraṃ āpannā vaṭṭadukkhe patiṭṭhitā sattā gaṇanapathaṃ atikkantā . Tasmāti tena kāraṇena. Lomāni haṃsayeti ahaṃ lomāni uṭṭhapemi, ‘‘tassa kirāhaṃ sīlaṃ bhindissāmī’’ti cintayamānāya me lomāni pahaṃsantīti vadati.

105.

‘‘ид̣̇ам̣ вад̇ваана баггаами, ажчараа гаамаван̣н̣иний;

‘‘Idaṃ vatvāna pakkāmi, accharā kāmavaṇṇinī;

миссаа миссид̇умижчанд̇ий, исисин̇г̇ам̣ аламб̣усаа.

Missā missitumicchantī, isisiṅgaṃ alambusā.

106.

‘‘саа жа д̇ам̣ ванамог̇аяха, исисин̇г̇зна рагкид̇ам̣;

‘‘Sā ca taṃ vanamogayha, isisiṅgena rakkhitaṃ;

б̣имб̣иж̇аалагасан̃чаннам̣, саманд̇аа ад̣̇д̇хаяож̇анам̣.

Bimbijālakasañchannaṃ, samantā addhayojanaṃ.

107.

‘‘баад̇ова баад̇араасамхи, уд̣̇ан̣хасамаяам̣ бад̇и;

‘‘Pātova pātarāsamhi, udaṇhasamayaṃ pati;

аг̇г̇идтам̣ баримаж̇ж̇анд̇ам̣, исисин̇г̇ам̣ убааг̇амий’’д̇и. – имаа абхисамб̣уд̣̇д̇хаг̇аат̇аа;

Aggiṭṭhaṃ parimajjantaṃ, isisiṅgaṃ upāgamī’’ti. – imā abhisambuddhagāthā;

д̇ад̇т̇а баггаамийд̇и д̇зна хи, д̣̇зварааж̇а, ааваж̇ж̇зяяааси манд̇и ад̇д̇ано саяанаг̇аб̣бхам̣ бависид̇ваа алан̇гарид̇ваа исисин̇г̇ам̣ гилзсзна миссид̇ум̣ ижчанд̇ий баггаами, бхигкавз, саа ажчараа д̇асса ассамам̣ г̇ад̇аад̇и. б̣имб̣иж̇аалагасан̃чаннанд̇и рад̇д̇ан̇гураванзна сан̃чаннам̣. баад̇ова баад̇араасамхийд̇и, бхигкавз, баад̇араасавзлааяа баад̇ова баг̇зязва ад̇ибаг̇зва. уд̣̇ан̣хасамаяам̣ бад̇ийд̇и суурияуг̇г̇аманавзлааяамзва. аг̇г̇идтанд̇и аг̇г̇исаалам̣. рад̇д̇им̣ бад̇хаанамануяун̃ж̇ид̇ваа баад̇ова нхад̇ваа уд̣̇агагижжам̣ гад̇ваа бан̣н̣асаалааяам̣ т̇огам̣ жхаанасукзна вийд̇инаамзд̇ваа нигкамид̇ваа аг̇г̇исаалам̣ саммаж̇ж̇анд̇ам̣ д̇ам̣ исисин̇г̇ам̣ саа убааг̇ами, ид̇т̇ивилаасам̣ д̣̇ассзнд̇ий д̇асса бурад̇о адтааси.

Tattha pakkāmīti tena hi, devarāja, āvajjeyyāsi manti attano sayanagabbhaṃ pavisitvā alaṅkaritvā isisiṅgaṃ kilesena missituṃ icchantī pakkāmi, bhikkhave, sā accharā tassa assamaṃ gatāti. Bimbijālakasañchannanti rattaṅkuravanena sañchannaṃ. Pātova pātarāsamhīti, bhikkhave, pātarāsavelāya pātova pageyeva atipageva. Udaṇhasamayaṃ patīti sūriyuggamanavelāyameva. Aggiṭṭhanti aggisālaṃ. Rattiṃ padhānamanuyuñjitvā pātova nhatvā udakakiccaṃ katvā paṇṇasālāyaṃ thokaṃ jhānasukhena vītināmetvā nikkhamitvā aggisālaṃ sammajjantaṃ taṃ isisiṅgaṃ sā upāgami, itthivilāsaṃ dassentī tassa purato aṭṭhāsi.

ат̇а нам̣ д̇аабасо бужчанд̇о ааха –

Atha naṃ tāpaso pucchanto āha –

108.

‘‘гаа ну виж̇ж̇уриваабхааси, осад̇хий вияа д̇аарагаа;

‘‘Kā nu vijjurivābhāsi, osadhī viya tārakā;

вижид̇д̇ахад̇т̇аабхаран̣аа, аамуд̇д̇аман̣игун̣д̣алаа.

Vicittahatthābharaṇā, āmuttamaṇikuṇḍalā.

109.

‘‘аад̣̇ижжаван̣н̣асан̇гаасаа, хзмажанд̣̇анаг̇анд̇хиний;

‘‘Ādiccavaṇṇasaṅkāsā, hemacandanagandhinī;

сан̃н̃ад̇ууруу махаамааяаа, гумаарий жааруд̣̇ассанаа.

Saññatūrū mahāmāyā, kumārī cārudassanā.

110.

‘‘вилаг̇г̇аа муд̣̇угаа суд̣̇д̇хаа, баад̣̇аа д̇з суббад̇идтид̇аа;

‘‘Vilaggā mudukā suddhā, pādā te suppatiṭṭhitā;

г̇аманаа гааманийяаа д̇з, харанд̇иязва мз мано.

Gamanā kāmanīyā te, harantiyeva me mano.

111.

‘‘анубуб̣б̣аа жа д̇з ууруу, нааг̇анаасасамуубамаа;

‘‘Anupubbā ca te ūrū, nāganāsasamūpamā;

вимадтаа д̇уяхам̣ суссон̣ий, агкасса палагам̣ яат̇аа.

Vimaṭṭhā tuyhaṃ sussoṇī, akkhassa phalakaṃ yathā.

112.

‘‘уббалассзва гин̃ж̇агкаа, наабхи д̇з саад̇хусан̣тид̇аа;

‘‘Uppalasseva kiñjakkhā, nābhi te sādhusaṇṭhitā;

бураа ган̣хан̃ж̇анассзва, д̣̇уурад̇о бад̇ид̣̇иссад̇и.

Purā kaṇhañjanasseva, dūrato patidissati.

113.

‘‘д̣̇увид̇хаа ж̇аад̇аа ураж̇аа, аван̣даа саад̇хубажжуд̣̇аа;

‘‘Duvidhā jātā urajā, avaṇṭā sādhupaccudā;

баяод̇хараа абад̇ид̇аа, ад̣дхалааб̣усамаа т̇анаа.

Payodharā apatitā, aḍḍhalābusamā thanā.

114.

‘‘д̣̇ийгхаа гамб̣уд̇алаабхаасаа, г̇ийваа зн̣зяяагаа яат̇аа;

‘‘Dīghā kambutalābhāsā, gīvā eṇeyyakā yathā;

бан̣д̣арааваран̣аа ваг̇г̇у, жад̇уд̇т̇аманасаннибхаа.

Paṇḍarāvaraṇā vaggu, catutthamanasannibhā.

115.

‘‘уд̣̇д̇хаг̇г̇аа жа ад̇хаг̇г̇аа жа, д̣̇умаг̇г̇абаримаж̇ж̇ид̇аа;

‘‘Uddhaggā ca adhaggā ca, dumaggaparimajjitā;

д̣̇увиж̇аа нзласамбхууд̇аа, д̣̇анд̇аа д̇ава суд̣̇ассанаа.

Duvijā nelasambhūtā, dantā tava sudassanā.

116.

‘‘абан̣д̣араа лохид̇анд̇аа, ж̇ин̃ж̇уугапаласаннибхаа;

‘‘Apaṇḍarā lohitantā, jiñjūkaphalasannibhā;

ааяад̇аа жа висаалаа жа, нзд̇д̇аа д̇ава суд̣̇ассанаа.

Āyatā ca visālā ca, nettā tava sudassanā.

117.

‘‘наад̇ид̣̇ийгхаа сусаммадтаа, ганагаб̣яаасаможид̇аа;

‘‘Nātidīghā susammaṭṭhā, kanakabyāsamocitā;

уд̇д̇аман̇г̇арухаа д̇уяхам̣, гзсаа жанд̣̇анаг̇анд̇хигаа.

Uttamaṅgaruhā tuyhaṃ, kesā candanagandhikā.

118.

‘‘яаавад̇аа гасиг̇орагкаа, ваан̣иж̇аанан̃жа яаа г̇ад̇и;

‘‘Yāvatā kasigorakkhā, vāṇijānañca yā gati;

исийнан̃жа барагганд̇ам̣, сан̃н̃ад̇аанам̣ д̇абассинам̣.

Isīnañca parakkantaṃ, saññatānaṃ tapassinaṃ.

119.

‘‘на д̇з самасамам̣ бассз, асмим̣ бат̇авиман̣д̣алз;

‘‘Na te samasamaṃ passe, asmiṃ pathavimaṇḍale;

го ваа д̇вам̣ гасса ваа буд̇д̇о, гат̇ам̣ ж̇аанзму д̇ам̣ маяа’’нд̇и.

Ko vā tvaṃ kassa vā putto, kathaṃ jānemu taṃ maya’’nti.

д̇ад̇т̇а вижид̇д̇ахад̇т̇аабхаран̣аад̇и вижид̇д̇зхи хад̇т̇аабхаран̣зхи саманнааг̇ад̇аа. хзмажанд̣̇анаг̇анд̇хинийд̇и суван̣н̣аван̣н̣ажанд̣̇анаг̇анд̇хавилзбанаа. сан̃н̃ад̇уурууд̇и суваддид̇агханаууру самбаннауурулагкан̣аа. вилаг̇г̇аад̇и сам̣кид̇д̇амаж̇жхаа. муд̣̇угаад̇и муд̣̇у сукумаалаа. суд̣̇д̇хаад̇и ниммалаа. суббад̇идтид̇аад̇и самам̣ бат̇авим̣ пусанд̇аа судту бад̇идтид̇аа. г̇аманаад̇и г̇ажчамаанаа. гааманийяаад̇и ганд̇аа гаамид̇аб̣б̣аяуд̇д̇агаа. харанд̇иязва мз манод̇и зд̇з зваруубзна барамзна ид̇т̇ивилаасзна жан̇гаманд̇ияаа д̇ава баад̣̇аа мама жид̇д̇ам̣ харанд̇иязва. вимадтаад̇и висаалаа. суссон̣ийд̇и сунд̣̇арасон̣ий. агкассаад̇и сунд̣̇араван̣н̣асса агкасса суван̣н̣апалагам̣ вияа висаалаа д̇з сон̣ийд̇и вад̣̇ад̇и. уббалассзва гин̃ж̇агкаад̇и нийлуббалаган̣н̣игаа вияа. ган̣хан̃ж̇анассзваад̇и сукумаган̣халомажид̇д̇ад̇д̇аа звамааха.

Tattha vicittahatthābharaṇāti vicittehi hatthābharaṇehi samannāgatā. Hemacandanagandhinīti suvaṇṇavaṇṇacandanagandhavilepanā. Saññatūrūti suvaṭṭitaghanaūru sampannaūrulakkhaṇā. Vilaggāti saṃkhittamajjhā. Mudukāti mudu sukhumālā. Suddhāti nimmalā. Suppatiṭṭhitāti samaṃ pathaviṃ phusantā suṭṭhu patiṭṭhitā. Gamanāti gacchamānā. Kāmanīyāti kantā kāmitabbayuttakā. Harantiyeva me manoti ete evarūpena paramena itthivilāsena caṅkamantiyā tava pādā mama cittaṃ harantiyeva. Vimaṭṭhāti visālā. Sussoṇīti sundarasoṇī. Akkhassāti sundaravaṇṇassa akkhassa suvaṇṇaphalakaṃ viya visālā te soṇīti vadati. Uppalasseva kiñjakkhāti nīluppalakaṇṇikā viya. Kaṇhañjanassevāti sukhumakaṇhalomacittattā evamāha.

‘‘д̣̇увид̇хаа’’д̇иг̇аат̇ам̣ т̇анз ван̣н̣аяанд̇о ааха. д̇з хи д̣̇вз худ̇ваа урз ж̇аад̇аа ван̣дасса абхааваа аван̣даа, урз лаг̇г̇аа зва худ̇ваа судту нигканд̇ад̇д̇аа саад̇хубажжуд̣̇аа, баяасса д̇хааран̣ад̇о баяод̇хараа, абад̇ид̇аад̇и на бад̇ид̇аа, амилаад̇ад̇ааяа ваа аламб̣анад̇ааяа ваа на анд̇о бавидтаад̇и абад̇ид̇аа, суван̣н̣апалагз табид̇асуван̣н̣амаяаваддаалааб̣уно ад̣дхзна сад̣̇исад̇ааяа ад̣дхалааб̣усамаа т̇анаа. зн̣зяяагаа яат̇аад̇и зн̣иймиг̇асса хи д̣̇ийгхаа жа ваддаа жа г̇ийваа собхад̇и яат̇аа, звам̣ д̇ава г̇ийваа т̇огам̣ д̣̇ийгхаа. гамб̣уд̇алаабхаасаад̇и суван̣н̣аалин̇г̇ад̇аласаннибхаа г̇ийваад̇и ад̇т̇о. бан̣д̣арааваран̣аад̇и д̣̇анд̇ааваран̣аа. жад̇уд̇т̇аманасаннибхаад̇и жад̇уд̇т̇амано вужжад̇и жад̇уд̇т̇аманавад̇т̇убхууд̇аа ж̇ивхаа. абхирад̇д̇абхаавзна ж̇ивхаасад̣̇исам̣ д̇з одтабарияосаананд̇и вад̣̇ад̇и. уд̣̇д̇хаг̇г̇аад̇и хздтимад̣̇анд̇аа. ад̇хаг̇г̇аад̇и убаримад̣̇анд̇аа. д̣̇умаг̇г̇абаримаж̇ж̇ид̇аад̇и д̣̇анд̇агадтабаримаж̇ж̇ид̇аа барисуд̣̇д̇хаа. д̣̇увиж̇аад̇и д̣̇виж̇аа. нзласамбхууд̇аад̇и нид̣̇д̣̇осзсу ханумам̣сабарияосаанзсу самбхууд̇аа.

‘‘Duvidhā’’tigāthaṃ thane vaṇṇayanto āha. Te hi dve hutvā ure jātā vaṇṭassa abhāvā avaṇṭā, ure laggā eva hutvā suṭṭhu nikkhantattā sādhupaccudā, payassa dhāraṇato payodharā, apatitāti na patitā, amilātatāya vā alambanatāya vā na anto paviṭṭhāti apatitā, suvaṇṇaphalake ṭhapitasuvaṇṇamayavaṭṭaalābuno aḍḍhena sadisatāya aḍḍhalābusamā thanā. Eṇeyyakā yathāti eṇīmigassa hi dīghā ca vaṭṭā ca gīvā sobhati yathā, evaṃ tava gīvā thokaṃ dīghā. Kambutalābhāsāti suvaṇṇāliṅgatalasannibhā gīvāti attho. Paṇḍarāvaraṇāti dantāvaraṇā. Catutthamanasannibhāti catutthamano vuccati catutthamanavatthubhūtā jivhā. Abhirattabhāvena jivhāsadisaṃ te oṭṭhapariyosānanti vadati. Uddhaggāti heṭṭhimadantā. Adhaggāti uparimadantā. Dumaggaparimajjitāti dantakaṭṭhaparimajjitā parisuddhā. Duvijāti dvijā. Nelasambhūtāti niddosesu hanumaṃsapariyosānesu sambhūtā.

абан̣д̣араад̇и ган̣хаа. лохид̇анд̇аад̇и рад̇д̇абарияанд̇аа. ж̇ин̃ж̇уугапаласаннибхаад̇и рад̇д̇адтаанз ж̇ин̃ж̇угапаласад̣̇исаа. суд̣̇ассанаад̇и бассанд̇аанам̣ ад̇ид̇д̇игараа бан̃жабасаад̣̇асаманнааг̇ад̇аа. наад̇ид̣̇ийгхаад̇и бамаан̣аяуд̇д̇аа. сусаммадтаад̇и судту саммадтаа. ганагаб̣яаасаможид̇аад̇и ганагаб̣яаа вужжад̇и суван̣н̣апан̣игаа, д̇ааяа г̇анд̇хад̇злам̣ аад̣̇ааяа бахарид̇аа суражид̇аа. гасиг̇орагкаад̇и иминаа гасин̃жа г̇орагкан̃жа ниссааяа ж̇ийванагасад̇д̇з д̣̇ассзд̇и. яаа г̇ад̇ийд̇и яад̇д̇агаа нибпад̇д̇и. барагганд̇анд̇и яад̇д̇агам̣ исийнам̣ барагганд̇ам̣, вид̇т̇аарийгад̇аа имасмим̣ химаванд̇з яад̇д̇агаа исаяо васанд̇ийд̇и ад̇т̇о. на д̇з самасаманд̇и д̇зсу саб̣б̣зсу згамби руубалийл̣аавилаасаад̣̇исамад̇ааяа д̇аяаа самаанам̣ на бассаами. го ваа д̇ванд̇и ид̣̇ам̣ д̇ассаа ид̇т̇ибхаавам̣ ж̇аананд̇о бурисавохааравасзна бужчад̇и.

Apaṇḍarāti kaṇhā. Lohitantāti rattapariyantā. Jiñjūkaphalasannibhāti rattaṭṭhāne jiñjukaphalasadisā. Sudassanāti passantānaṃ atittikarā pañcapasādasamannāgatā. Nātidīghāti pamāṇayuttā. Susammaṭṭhāti suṭṭhu sammaṭṭhā. Kanakabyāsamocitāti kanakabyā vuccati suvaṇṇaphaṇikā, tāya gandhatelaṃ ādāya paharitā suracitā. Kasigorakkhāti iminā kasiñca gorakkhañca nissāya jīvanakasatte dasseti. Yā gatīti yattakā nipphatti. Parakkantanti yattakaṃ isīnaṃ parakkantaṃ, vitthārīkatā imasmiṃ himavante yattakā isayo vasantīti attho. Na te samasamanti tesu sabbesu ekampi rūpalīḷāvilāsādisamatāya tayā samānaṃ na passāmi. Ko vā tvanti idaṃ tassā itthibhāvaṃ jānanto purisavohāravasena pucchati.

звам̣ баад̣̇ад̇о бадтааяа яаава гзсаа ад̇д̇ано ван̣н̣ам̣ бхаасанд̇з д̇аабасз аламб̣усаа д̇ун̣хий худ̇ваа д̇ассаа гат̇ааяа яат̇аанусанд̇хим̣ г̇ад̇ааяа д̇асса саммуул̣хабхаавам̣ н̃ад̇ваа г̇аат̇амааха –

Evaṃ pādato paṭṭhāya yāva kesā attano vaṇṇaṃ bhāsante tāpase alambusā tuṇhī hutvā tassā kathāya yathānusandhiṃ gatāya tassa sammūḷhabhāvaṃ ñatvā gāthamāha –

120.

‘‘на бан̃хагаало бхад̣̇д̣̇анд̇з, гассабзвам̣ г̇ад̇з сад̇и;

‘‘Na pañhakālo bhaddante, kassapevaṃ gate sati;

зхи самма рамиссаама, убхо асмаагамассамз;

Ehi samma ramissāma, ubho asmākamassame;

зхи д̇ам̣ убаг̇уухиссам̣, рад̇ийнам̣ гусало бхаваа’’д̇и.

Ehi taṃ upagūhissaṃ, ratīnaṃ kusalo bhavā’’ti.

д̇ад̇т̇а гассабзвам̣ г̇ад̇з сад̇ийд̇и гассабаг̇од̇д̇а звам̣ д̇ава жид̇д̇з бавад̇д̇з сад̇и бан̃хагаало на ход̇и. саммаад̇и ваяасса, бияаважанаалабанамзд̇ам̣. рад̇ийнанд̇и бан̃жагаамаг̇ун̣арад̇ийнам̣.

Tattha kassapevaṃ gate satīti kassapagotta evaṃ tava citte pavatte sati pañhakālo na hoti. Sammāti vayassa, piyavacanālapanametaṃ. Ratīnanti pañcakāmaguṇaratīnaṃ.

звам̣ вад̇ваа аламб̣усаа жинд̇зси – ‘‘нааяам̣ маяи тид̇ааяа хад̇т̇абаасам̣ ааг̇амиссад̇и, г̇ажчанд̇ий вияа бхависсаамий’’д̇и. саа ид̇т̇имааяаагусалад̇ааяа д̇аабасам̣ анубасан̇гамид̇ваа ааг̇ад̇амаг̇г̇аабхимукий бааяааси. д̇амад̇т̇ам̣ багаасзнд̇о сад̇т̇аа ааха –

Evaṃ vatvā alambusā cintesi – ‘‘nāyaṃ mayi ṭhitāya hatthapāsaṃ āgamissati, gacchantī viya bhavissāmī’’ti. Sā itthimāyākusalatāya tāpasaṃ anupasaṅkamitvā āgatamaggābhimukhī pāyāsi. Tamatthaṃ pakāsento satthā āha –

121.

‘‘ид̣̇ам̣ вад̇ваана баггаами, ажчараа гаамаван̣н̣иний;

‘‘Idaṃ vatvāna pakkāmi, accharā kāmavaṇṇinī;

миссаа миссид̇умижчанд̇ий, исисин̇г̇ам̣ аламб̣усаа’’д̇и.

Missā missitumicchantī, isisiṅgaṃ alambusā’’ti.

ат̇а нам̣ д̇аабасо г̇ажчанд̇им̣ д̣̇исваа ‘‘аяам̣ г̇ажчад̇ий’’д̇и ад̇д̇ано д̣̇анд̇хабараггамам̣ манд̣̇аг̇аманам̣ чинд̣̇ид̇ваа взг̇зна д̇хаавид̇ваа гзсзсу хад̇т̇зна бараамаси. д̇амад̇т̇ам̣ багаасзнд̇о сад̇т̇аа ааха –

Atha naṃ tāpaso gacchantiṃ disvā ‘‘ayaṃ gacchatī’’ti attano dandhaparakkamaṃ mandagamanaṃ chinditvā vegena dhāvitvā kesesu hatthena parāmasi. Tamatthaṃ pakāsento satthā āha –

122.

‘‘со жа взг̇зна нигкамма, чзд̇ваа д̣̇анд̇хабараггамам̣;

‘‘So ca vegena nikkhamma, chetvā dandhaparakkamaṃ;

д̇амуд̇д̇амаасу взн̣ийсу, аж̇жхаббад̇д̇о бараамаси.

Tamuttamāsu veṇīsu, ajjhappatto parāmasi.

123.

‘‘д̇амуд̣̇аавад̇д̇а галяаан̣ий, балиссаж̇и сусобханаа;

‘‘Tamudāvatta kalyāṇī, palissaji susobhanā;

жавид̇амхи б̣рахмажарияаа, яат̇аа д̇ам̣ ат̇а д̇осид̇аа.

Cavitamhi brahmacariyā, yathā taṃ atha tositā.

124.

‘‘манасаа аг̇амаа инд̣̇ам̣, васанд̇ам̣ нанд̣̇анз ванз;

‘‘Manasā agamā indaṃ, vasantaṃ nandane vane;

д̇ассаа сан̇габбаман̃н̃ааяа, магхаваа д̣̇звагун̃ж̇аро.

Tassā saṅkappamaññāya, maghavā devakuñjaro.

125.

‘‘баллан̇гам̣ бахин̣ий киббам̣, сован̣н̣ам̣ собавааханам̣;

‘‘Pallaṅkaṃ pahiṇī khippaṃ, sovaṇṇaṃ sopavāhanaṃ;

сауд̇д̇аражчад̣̇абан̃н̃аасам̣, сахассабадияад̇т̇ад̇ам̣.

Sauttaracchadapaññāsaṃ, sahassapaṭiyatthataṃ.

126.

‘‘д̇амзнам̣ д̇ад̇т̇а д̇хаарзси, урз гад̇ваана собханаа;

‘‘Tamenaṃ tattha dhāresi, ure katvāna sobhanā;

яат̇аа згамухуд̇д̇ам̣ва, д̇ийн̣и вассаани д̇хаараяи.

Yathā ekamuhuttaṃva, tīṇi vassāni dhārayi.

127.

‘‘вимад̣̇о д̇ийхи вассзхи, баб̣уж̇жхид̇ваана б̣раахман̣о;

‘‘Vimado tīhi vassehi, pabujjhitvāna brāhmaṇo;

ад̣̇д̣̇асааси харид̇аругкз, саманд̇аа аг̇г̇ияааяанам̣.

Addasāsi haritarukkhe, samantā aggiyāyanaṃ.

128.

‘‘навабад̇д̇аванам̣ пуллам̣, гогилаг̇г̇ан̣агхосид̇ам̣;

‘‘Navapattavanaṃ phullaṃ, kokilaggaṇaghositaṃ;

саманд̇аа бавилогзд̇ваа, руд̣̇ам̣ ассууни вад̇д̇аяи.

Samantā paviloketvā, rudaṃ assūni vattayi.

129.

‘‘на ж̇ухз на ж̇абз манд̇з, аг̇г̇ихуд̇д̇ам̣ бахаабид̇ам̣;

‘‘Na juhe na jape mante, aggihuttaṃ pahāpitaṃ;

го ну мз баарижарияааяа, буб̣б̣з жид̇д̇ам̣ балобхаяи.

Ko nu me pāricariyāya, pubbe cittaṃ palobhayi.

130.

‘‘аран̃н̃з мз вихарад̇о, яо мз д̇зж̇аа ха самбхуд̇ам̣;

‘‘Araññe me viharato, yo me tejā ha sambhutaṃ;

наанаарад̇анабарибуурам̣, наавам̣ва г̇ан̣хи ан̣н̣авз’’д̇и.

Nānāratanaparipūraṃ, nāvaṃva gaṇhi aṇṇave’’ti.

д̇ад̇т̇а аж̇жхаббад̇д̇од̇и самбад̇д̇о. д̇амуд̣̇аавад̇д̇а галяаан̣ийд̇и д̇ам̣ гзсз бараамасид̇ваа тид̇ам̣ исим̣ уд̣̇аавад̇д̇ид̇ваа нивад̇д̇ид̇ваа галяаан̣ад̣̇ассанаа саа судту собханаа. балиссаж̇ийд̇и аалин̇г̇и. жавид̇амхи б̣рахмажарияаа, яат̇аа д̇ам̣ ат̇а д̇осид̇аад̇и, бхигкавз, д̇асса исино д̇аавад̣̇зва жхаанам̣ анд̇арад̇хааяи. д̇асмим̣ д̇амхаа жхаанаа б̣рахмажарияаа жавид̇з яат̇аа д̇ам̣ саггзна бад̇т̇ид̇ам̣, д̇ат̇зва ахоси. ат̇а саггасса бад̇т̇анааяа самид̣̇д̇хабхаавам̣ вид̣̇ид̇ваа саа д̣̇зваган̃н̃аа д̇осид̇аа, д̇асса д̇зна б̣рахмажарияавинаасзна сан̃ж̇анид̇абийд̇ибаамож̇ж̇аад̇и ад̇т̇о.

Tattha ajjhappattoti sampatto. Tamudāvatta kalyāṇīti taṃ kese parāmasitvā ṭhitaṃ isiṃ udāvattitvā nivattitvā kalyāṇadassanā sā suṭṭhu sobhanā. Palissajīti āliṅgi. Cavitamhi brahmacariyā, yathā taṃ atha tositāti, bhikkhave, tassa isino tāvadeva jhānaṃ antaradhāyi. Tasmiṃ tamhā jhānā brahmacariyā cavite yathā taṃ sakkena patthitaṃ, tatheva ahosi. Atha sakkassa patthanāya samiddhabhāvaṃ viditvā sā devakaññā tositā, tassa tena brahmacariyavināsena sañjanitapītipāmojjāti attho.

манасаа аг̇амаад̇и саа д̇ам̣ аалин̇г̇ид̇ваа тид̇аа ‘‘ахо вад̇а сагго баллан̇гам̣ мз бзсзяяаа’’д̇и звам̣ бавад̇д̇зна манасаа инд̣̇ам̣ аг̇амаа. нанд̣̇анз ванзд̇и нанд̣̇иж̇ананасамад̇т̇ад̇ааяа нанд̣̇анаванасан̇каад̇з д̇аавад̇им̣сабхаванз васанд̇ам̣. д̣̇звагун̃ж̇арод̇и д̣̇звасздто . бахин̣ийд̇и бзсзси. ‘‘баахин̣ий’’д̇иби баато. собаваахананд̇и сабариваарам̣. сауд̇д̇аражчад̣̇абан̃н̃аасанд̇и бан̃н̃аасааяа уд̇д̇аражчад̣̇зхи бадижчаад̣̇ид̇ам̣. сахассабадияад̇т̇ад̇анд̇и сахассад̣̇иб̣б̣агож̇авад̇т̇ад̇ам̣. д̇амзнам̣ д̇ад̇т̇аад̇и д̇ам̣ исисин̇г̇ам̣ д̇ад̇т̇а д̣̇иб̣б̣абаллан̇гз нисиннаа саа урз гад̇ваа д̇хаарзси. д̇ийн̣и вассаанийд̇и згамухуд̇д̇ам̣ вияа мануссаг̇ан̣анааяа д̇ийн̣и вассаани д̇ам̣ урз нибаж̇ж̇аабзд̇ваа д̇ад̇т̇а нисиннаа д̇хаарзси.

Manasā agamāti sā taṃ āliṅgitvā ṭhitā ‘‘aho vata sakko pallaṅkaṃ me peseyyā’’ti evaṃ pavattena manasā indaṃ agamā. Nandane vaneti nandijananasamatthatāya nandanavanasaṅkhāte tāvatiṃsabhavane vasantaṃ. Devakuñjaroti devaseṭṭho . Pahiṇīti pesesi. ‘‘Pāhiṇī’’tipi pāṭho. Sopavāhananti saparivāraṃ. Sauttaracchadapaññāsanti paññāsāya uttaracchadehi paṭicchāditaṃ. Sahassapaṭiyatthatanti sahassadibbakojavatthataṃ. Tamenaṃ tatthāti taṃ isisiṅgaṃ tattha dibbapallaṅke nisinnā sā ure katvā dhāresi. Tīṇi vassānīti ekamuhuttaṃ viya manussagaṇanāya tīṇi vassāni taṃ ure nipajjāpetvā tattha nisinnā dhāresi.

вимад̣̇од̇и ниммад̣̇о виг̇ад̇асан̃н̃абхааво. со хи д̇ийн̣и сам̣важчараани висан̃н̃о саяид̇ваа бажчаа бадилад̣̇д̇хасан̃н̃о баб̣уж̇жхи. д̇асмим̣ баб̣уж̇жхамаанз хад̇т̇аад̣̇ипанд̣̇анам̣ д̣̇исваава аламб̣усаа д̇асса баб̣уж̇жханабхаавам̣ н̃ад̇ваа баллан̇гам̣ анд̇арад̇хаабзд̇ваа саяамби анд̇арахид̇аа адтааси. ад̣̇д̣̇асаасийд̇и со ассамабад̣̇ам̣ ологзнд̇о ‘‘гзна ну комхи сийлавинаасам̣ баабид̇о’’д̇и жинд̇зд̇ваа маханд̇зна сад̣̇д̣̇зна барид̣̇звамаано ад̣̇д̣̇асааси. харид̇аругкзд̇и аг̇г̇ияааяанасан̇каад̇ам̣ аг̇г̇исаалам̣ саманд̇аа бариваарзд̇ваа тид̇з харид̇абад̇д̇аругкз. навабад̇д̇авананд̇и д̇арун̣зхи навабад̇д̇зхи сан̃чаннам̣ ванам̣. руд̣̇анд̇и барид̣̇званд̇о.

Vimadoti nimmado vigatasaññabhāvo. So hi tīṇi saṃvaccharāni visañño sayitvā pacchā paṭiladdhasañño pabujjhi. Tasmiṃ pabujjhamāne hatthādiphandanaṃ disvāva alambusā tassa pabujjhanabhāvaṃ ñatvā pallaṅkaṃ antaradhāpetvā sayampi antarahitā aṭṭhāsi. Addasāsīti so assamapadaṃ olokento ‘‘kena nu khomhi sīlavināsaṃ pāpito’’ti cintetvā mahantena saddena paridevamāno addasāsi. Haritarukkheti aggiyāyanasaṅkhātaṃ aggisālaṃ samantā parivāretvā ṭhite haritapattarukkhe. Navapattavananti taruṇehi navapattehi sañchannaṃ vanaṃ. Rudanti paridevanto.

на ж̇ухз на ж̇абз манд̇зд̇и аяамасса барид̣̇званаг̇аат̇аа. бахаабид̇анд̇и хаабид̇ам̣, ба-гааро убасаг̇г̇амад̇д̇ам̣. баарижарияааяаад̇и го ну гилзсабаарижарияааяа ид̇о буб̣б̣з мама жид̇д̇ам̣ балобхаяийд̇и барид̣̇звад̇и. яо мз д̇зж̇аа ха самбхуд̇анд̇и ха-гааро нибаад̇амад̇д̇ам̣. яо мама саман̣ад̇зж̇зна самбхууд̇ам̣ жхаанаг̇ун̣ам̣ наанаарад̇анабарибун̣н̣ам̣ маханд̇ам̣ махан̣н̣авз наавам̣ вияа г̇ан̣хи, винаасам̣ баабзси, го наамзсод̇и барид̣̇звад̇ийд̇и.

Najuhe na jape manteti ayamassa paridevanagāthā. Pahāpitanti hāpitaṃ, pa-kāro upasaggamattaṃ. Pāricariyāyāti ko nu kilesapāricariyāya ito pubbe mama cittaṃ palobhayīti paridevati. Yo me tejā ha sambhutanti ha-kāro nipātamattaṃ. Yo mama samaṇatejena sambhūtaṃ jhānaguṇaṃ nānāratanaparipuṇṇaṃ mahantaṃ mahaṇṇave nāvaṃ viya gaṇhi, vināsaṃ pāpesi, ko nāmesoti paridevatīti.

д̇ам̣ суд̇ваа аламб̣усаа жинд̇зси – ‘‘сажаахам̣ на гат̇зссаами, аяам̣ мз абхисабиссад̇и, ханд̣̇асса гат̇зссаамий’’д̇и. саа д̣̇иссамаанзна гааязна тад̇ваа г̇аат̇амааха –

Taṃ sutvā alambusā cintesi – ‘‘sacāhaṃ na kathessāmi, ayaṃ me abhisapissati, handassa kathessāmī’’ti. Sā dissamānena kāyena ṭhatvā gāthamāha –

131.

‘‘ахам̣ д̇з баарижарияааяа, д̣̇зварааж̇зна бзсид̇аа;

‘‘Ahaṃ te pāricariyāya, devarājena pesitā;

авад̇хим̣ жид̇д̇ам̣ жид̇д̇зна, бамаад̣̇о д̇вам̣ на б̣уж̇жхасий’’д̇и.

Avadhiṃ cittaṃ cittena, pamādo tvaṃ na bujjhasī’’ti.

со д̇ассаа гат̇ам̣ суд̇ваа бид̇араа д̣̇иннаоваад̣̇ам̣ сарид̇ваа ‘‘бид̇у важанам̣ агад̇ваа махаавинаасам̣ бад̇д̇омхий’’д̇и барид̣̇званд̇о жад̇ассо г̇аат̇ааяо абхааси –

So tassā kathaṃ sutvā pitarā dinnaovādaṃ saritvā ‘‘pitu vacanaṃ akatvā mahāvināsaṃ pattomhī’’ti paridevanto catasso gāthāyo abhāsi –

132.

‘‘имаани гира мам̣ д̇аад̇о, гассабо анусаасад̇и;

‘‘Imāni kira maṃ tāto, kassapo anusāsati;

гамалаасад̣̇исид̇т̇ияо, д̇ааяо б̣уж̇жхзси маан̣ава.

Kamalāsadisitthiyo, tāyo bujjhesi māṇava.

133.

‘‘урзг̇ан̣д̣ааяо б̣уж̇жхзси, д̇ааяо б̣уж̇жхзси маан̣ава;

‘‘Uregaṇḍāyo bujjhesi, tāyo bujjhesi māṇava;

ижжаанусааси мам̣ д̇аад̇о, яат̇аа мам̣ анугамбаго.

Iccānusāsi maṃ tāto, yathā maṃ anukampako.

134.

‘‘д̇ассаахам̣ важанам̣ наагам̣, бид̇у вуд̣̇д̇хасса саасанам̣;

‘‘Tassāhaṃ vacanaṃ nākaṃ, pitu vuddhassa sāsanaṃ;

аран̃н̃з ниммануссамхи, сваж̇ж̇а жхааяаами згаго.

Araññe nimmanussamhi, svajja jhāyāmi ekako.

135.

‘‘сохам̣ д̇ат̇аа гариссаами, д̇хирад̇т̇у ж̇ийвид̇зна мз;

‘‘Sohaṃ tathā karissāmi, dhiratthu jīvitena me;

буна ваа д̇аад̣̇исо хзссам̣, маран̣ам̣ мз бхависсад̇ий’’д̇и.

Puna vā tādiso hessaṃ, maraṇaṃ me bhavissatī’’ti.

д̇ад̇т̇а имаанийд̇и имаани важанаани. гамалаасад̣̇исид̇т̇ияод̇и гамалаа вужжад̇и наарибубпалад̇аа, д̇аасам̣ бубпасад̣̇исаа ид̇т̇ияо. д̇ааяо б̣уж̇жхзси маан̣аваад̇и маан̣ава д̇вам̣ д̇ааяо ж̇аанзяяааси, н̃ад̇ваа д̣̇ассанабат̇ам̣ аг̇анд̇ваа балаабзяяаасийд̇и яаани зваруубаани важанаани д̇ад̣̇аа мам̣ д̇аад̇о анусаасад̇и, имаани гира д̇аанийд̇и. урзг̇ан̣д̣ааяод̇и урамхи д̣̇вийхи г̇ан̣д̣зхи саманнааг̇ад̇аа. д̇ааяо б̣уж̇жхзси, маан̣аваад̇и, маан̣ава, д̇ааяо ад̇д̇ано васам̣ г̇ад̇з винаасам̣ баабзнд̇ийд̇и д̇вам̣ ж̇аанзяяааси. нааганд̇и наагарим̣. жхааяаамийд̇и баж̇жхааяаами барид̣̇зваами. д̇хирад̇т̇у ж̇ийвид̇зна мзд̇и д̇хирад̇т̇у г̇арахид̇ам̣ мама ж̇ийвид̇ам̣, ж̇ийвид̇зна мз го ад̇т̇о. буна ваад̇и д̇ат̇аа гариссаами, яат̇аа буна ваа д̇аад̣̇исо бхависсаами, надтам̣ жхаанам̣ уббаад̣̇зд̇ваа вийд̇арааг̇о бхависсаами, маран̣ам̣ ваа мз бхависсад̇ийд̇и.

Tattha imānīti imāni vacanāni. Kamalāsadisitthiyoti kamalā vuccati nāripupphalatā, tāsaṃ pupphasadisā itthiyo. Tāyo bujjhesi māṇavāti māṇava tvaṃ tāyo jāneyyāsi, ñatvā dassanapathaṃ agantvā palāpeyyāsīti yāni evarūpāni vacanāni tadā maṃ tāto anusāsati, imāni kira tānīti. Uregaṇḍāyoti uramhi dvīhi gaṇḍehi samannāgatā. Tāyo bujjhesi, māṇavāti, māṇava, tāyo attano vasaṃ gate vināsaṃ pāpentīti tvaṃ jāneyyāsi. Nākanti nākariṃ. Jhāyāmīti pajjhāyāmi paridevāmi. Dhiratthu jīvitena meti dhiratthu garahitaṃ mama jīvitaṃ, jīvitena me ko attho. Puna vāti tathā karissāmi, yathā puna vā tādiso bhavissāmi, naṭṭhaṃ jhānaṃ uppādetvā vītarāgo bhavissāmi, maraṇaṃ vā me bhavissatīti.

со гаамарааг̇ам̣ бахааяа буна жхаанам̣ уббаад̣̇зси. ат̇асса саман̣ад̇зж̇ам̣ д̣̇исваа жхаанасса жа уббаад̣̇ид̇абхаавам̣ н̃ад̇ваа аламб̣усаа бхийд̇аа камаабзси. д̇амад̇т̇ам̣ багаасзнд̇о сад̇т̇аа д̣̇вз г̇аат̇ааяо абхааси –

So kāmarāgaṃ pahāya puna jhānaṃ uppādesi. Athassa samaṇatejaṃ disvā jhānassa ca uppāditabhāvaṃ ñatvā alambusā bhītā khamāpesi. Tamatthaṃ pakāsento satthā dve gāthāyo abhāsi –

136.

‘‘д̇асса д̇зж̇ам̣ вийрияан̃жа, д̇хид̇им̣ н̃ад̇ваа авадтид̇ам̣;

‘‘Tassa tejaṃ vīriyañca, dhitiṃ ñatvā avaṭṭhitaṃ;

сирасаа аг̇г̇ахий баад̣̇з, исисин̇г̇ам̣ аламб̣усаа.

Sirasā aggahī pāde, isisiṅgaṃ alambusā.

137.

‘‘маа мз гуж̇жха махаавийра, маа мз гуж̇жха махааисз;

‘‘Mā me kujjha mahāvīra, mā me kujjha mahāise;

махаа ад̇т̇о маяаа жин̣н̣о, д̇ид̣̇асаанам̣ яасассинам̣;

Mahā attho mayā ciṇṇo, tidasānaṃ yasassinaṃ;

д̇аяаа багамбид̇ам̣ ааси, саб̣б̣ам̣ д̣̇звабурам̣ д̇ад̣̇аа’’д̇и.

Tayā pakampitaṃ āsi, sabbaṃ devapuraṃ tadā’’ti.

ат̇а нам̣ со ‘‘камаами д̇з, бхад̣̇д̣̇з, яат̇аасукам̣ г̇ажчаа’’д̇и виссаж̇ж̇знд̇о г̇аат̇амааха –

Atha naṃ so ‘‘khamāmi te, bhadde, yathāsukhaṃ gacchā’’ti vissajjento gāthamāha –

138.

‘‘д̇аавад̇им̣саа жа яз д̣̇зваа, д̇ид̣̇асаанан̃жа ваасаво;

‘‘Tāvatiṃsā ca ye devā, tidasānañca vāsavo;

д̇ван̃жа бхад̣̇д̣̇з сукий хохи, г̇ажча ган̃н̃з яат̇аасука’’нд̇и.

Tvañca bhadde sukhī hohi, gaccha kaññe yathāsukha’’nti.

саа д̇ам̣ ванд̣̇ид̇ваа д̇знзва суван̣н̣абаллан̇гзна д̣̇звабурам̣ г̇ад̇аа. д̇амад̇т̇ам̣ багаасзнд̇о сад̇т̇аа д̇иссо г̇аат̇ааяо абхааси –

Sā taṃ vanditvā teneva suvaṇṇapallaṅkena devapuraṃ gatā. Tamatthaṃ pakāsento satthā tisso gāthāyo abhāsi –

139.

‘‘д̇асса баад̣̇з г̇ахзд̇ваана, гад̇ваа жа нам̣ бад̣̇агкин̣ам̣;

‘‘Tassa pāde gahetvāna, katvā ca naṃ padakkhiṇaṃ;

ан̃ж̇алим̣ баг̇г̇ахзд̇ваана, д̇амхаа таанаа абаггами.

Añjaliṃ paggahetvāna, tamhā ṭhānā apakkami.

140.

‘‘яо жа д̇ассааси баллан̇го, сован̣н̣о собаваахано;

‘‘Yo ca tassāsi pallaṅko, sovaṇṇo sopavāhano;

сауд̇д̇аражчад̣̇абан̃н̃аасо, сахассабадияад̇т̇ад̇о;

Sauttaracchadapaññāso, sahassapaṭiyatthato;

д̇амзва баллан̇гамааруяха, аг̇аа д̣̇зваана санд̇игз.

Tameva pallaṅkamāruyha, agā devāna santike.

141.

‘‘д̇амоггамива ааяанд̇им̣, ж̇аланд̇им̣ виж̇ж̇уд̇ам̣ яат̇аа;

‘‘Tamokkamiva āyantiṃ, jalantiṃ vijjutaṃ yathā;

бад̇ийд̇о сумано вид̇д̇о, д̣̇звинд̣̇о ад̣̇ад̣̇аа вара’’нд̇и.

Patīto sumano vitto, devindo adadā vara’’nti.

д̇ад̇т̇а оггамиваад̇и д̣̇ийбагам̣ вияа. ‘‘бад̇ийд̇о’’д̇иаад̣̇ийхи д̇удтаагаарова д̣̇ассид̇о ад̣̇ад̣̇аа варанд̇и ааг̇анд̇ваа ванд̣̇ид̇ваа тид̇ааяа д̇удто варам̣ ад̣̇ааси.

Tattha okkamivāti dīpakaṃ viya. ‘‘Patīto’’tiādīhi tuṭṭhākārova dassito adadā varanti āgantvā vanditvā ṭhitāya tuṭṭho varaṃ adāsi.

саа д̇асса санд̇игз варам̣ г̇ан̣ханд̇ий осаанаг̇аат̇амааха –

Sā tassa santike varaṃ gaṇhantī osānagāthamāha –

142.

‘‘варан̃жз мз ад̣̇о сагга, саб̣б̣абхууд̇аанамиссара;

‘‘Varañce me ado sakka, sabbabhūtānamissara;

нисиббалобхигаа г̇ажчз, зд̇ам̣ сагга варам̣ варз’’д̇и.

Nisippalobhikā gacche, etaṃ sakka varaṃ vare’’ti.

д̇ассад̇т̇о – ‘‘сагга д̣̇зварааж̇а, сажз мз д̇вам̣ варам̣ ад̣̇о, буна исибалобхигааяа на г̇ажчзяяам̣, маа мам̣ зд̇ад̣̇ад̇т̇ааяа бахин̣зяяааси, зд̇ам̣ варам̣ варз яаажаамий’’д̇и.

Tassattho – ‘‘sakka devarāja, sace me tvaṃ varaṃ ado, puna isipalobhikāya na gaccheyyaṃ, mā maṃ etadatthāya pahiṇeyyāsi, etaṃ varaṃ vare yācāmī’’ti.

сад̇т̇аа д̇асса бхигкуно имам̣ д̇хаммад̣̇зсанам̣ аахарид̇ваа сажжаани багаасзд̇ваа ж̇аад̇агам̣ самод̇хаанзси, сажжабарияосаанз со бхигку сод̇аабад̇д̇ипалз бад̇идтахи. д̇ад̣̇аа аламб̣усаа бураан̣ад̣̇уд̇ияигаа ахоси, исисин̇г̇о угган̣тид̇абхигку, бид̇аа махааиси бана ахамзва ахосинд̇и.

Satthā tassa bhikkhuno imaṃ dhammadesanaṃ āharitvā saccāni pakāsetvā jātakaṃ samodhānesi, saccapariyosāne so bhikkhu sotāpattiphale patiṭṭhahi. Tadā alambusā purāṇadutiyikā ahosi, isisiṅgo ukkaṇṭhitabhikkhu, pitā mahāisi pana ahameva ahosinti.

аламб̣усааж̇аад̇агаван̣н̣анаа д̇ад̇ияаа.

Alambusājātakavaṇṇanā tatiyā.

Next: [524] 4. сан̇кабаалаж̇аад̇агаван̣н̣анаа • [524] 4. Saṅkhapālajātakavaṇṇanā

Related texts:

д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 523. аламб̣усааж̇аад̇агам̣ • 523. Alambusājātakaṃ

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact