Library / Tipiṭaka / തിപിടക • Tipiṭaka / സംയുത്തനികായ (അട്ഠകഥാ) • Saṃyuttanikāya (aṭṭhakathā)

    ൫. ഭിക്ഖുനീസംയുത്തം

    5. Bhikkhunīsaṃyuttaṃ

    ൧. ആളവികാസുത്തവണ്ണനാ

    1. Āḷavikāsuttavaṇṇanā

    ൧൬൨. ഭിക്ഖുനീസംയുത്തസ്സ പഠമേ ആളവികാതി ആളവിയം ജാതാ ആളവിനഗരതോയേവ ച നിക്ഖമ്മ പബ്ബജിതാ. അന്ധവനന്തി കസ്സപസമ്മാസമ്ബുദ്ധസ്സ ചേതിയേ നവകമ്മത്ഥായ ധനം സമാദപേത്വാ ആഗച്ഛന്തസ്സ യസോധരസ്സ നാമ ധമ്മഭാണകസ്സ അരിയപുഗ്ഗലസ്സ അക്ഖീനി ഉപ്പാടേത്വാ തത്ഥേവ അക്ഖിഭേദപ്പത്തേഹി പഞ്ചഹി ചോരസതേഹി നിവുത്ഥത്താ തതോ പട്ഠായ ‘‘അന്ധവന’’ന്തി സങ്ഖം ഗതം വനം. തം കിര സാവത്ഥിതോ ദക്ഖിണപസ്സേ ഗാവുതമത്തേ ഹോതി രാജാരക്ഖായ ഗുത്തം. തത്ഥ പവിവേകകാമാ ഭിക്ഖൂ ച ഭിക്ഖുനിയോ ച ഗച്ഛന്തി. തസ്മാ അയമ്പി കായവിവേകത്ഥിനീ യേന തം വനം, തേനുപസങ്കമി. നിസ്സരണന്തി നിബ്ബാനം. പഞ്ഞായാതി പച്ചവേക്ഖണഞാണേന. ന ത്വം ജാനാസി തം പദന്തി ത്വം ഏതം നിബ്ബാനപദം വാ നിബ്ബാനഗാമിമഗ്ഗപദം വാ ന ജാനാസി. സത്തിസൂലൂപമാതി വിനിവിജ്ഝനത്ഥേന സത്തിസൂലസദിസാ. ഖന്ധാസം അധികുട്ടനാതി ഖന്ധാ തേസം അധികുട്ടനഭണ്ഡികാ. പഠമം.

    162. Bhikkhunīsaṃyuttassa paṭhame āḷavikāti āḷaviyaṃ jātā āḷavinagaratoyeva ca nikkhamma pabbajitā. Andhavananti kassapasammāsambuddhassa cetiye navakammatthāya dhanaṃ samādapetvā āgacchantassa yasodharassa nāma dhammabhāṇakassa ariyapuggalassa akkhīni uppāṭetvā tattheva akkhibhedappattehi pañcahi corasatehi nivutthattā tato paṭṭhāya ‘‘andhavana’’nti saṅkhaṃ gataṃ vanaṃ. Taṃ kira sāvatthito dakkhiṇapasse gāvutamatte hoti rājārakkhāya guttaṃ. Tattha pavivekakāmā bhikkhū ca bhikkhuniyo ca gacchanti. Tasmā ayampi kāyavivekatthinī yena taṃ vanaṃ, tenupasaṅkami. Nissaraṇanti nibbānaṃ. Paññāyāti paccavekkhaṇañāṇena. Na tvaṃ jānāsi taṃ padanti tvaṃ etaṃ nibbānapadaṃ vā nibbānagāmimaggapadaṃ vā na jānāsi. Sattisūlūpamāti vinivijjhanatthena sattisūlasadisā. Khandhāsaṃ adhikuṭṭanāti khandhā tesaṃ adhikuṭṭanabhaṇḍikā. Paṭhamaṃ.







    Related texts:



    തിപിടക (മൂല) • Tipiṭaka (Mūla) / സുത്തപിടക • Suttapiṭaka / സംയുത്തനികായ • Saṃyuttanikāya / ൧. ആളവികാസുത്തം • 1. Āḷavikāsuttaṃ

    ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൧. ആളവികാസുത്തവണ്ണനാ • 1. Āḷavikāsuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact