| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[156] 6. алийнажид̇д̇аж̇аад̇агаван̣н̣анаа
[156] 6. Alīnacittajātakavaṇṇanā
алийнажид̇д̇ам̣ ниссааяаад̇и ид̣̇ам̣ сад̇т̇аа ж̇зд̇аванз вихаранд̇о згам̣ оссадтавийрияам̣ бхигкум̣ аараб̣бха гат̇зси. вад̇т̇у згаад̣̇асанибаад̇з сам̣вараж̇аад̇агз (ж̇аа. 1.11.97 аад̣̇аяо) аавибхависсад̇и. со бана бхигку сад̇т̇аараа ‘‘сажжам̣ гира д̇вам̣, бхигку, вийрияам̣ оссаж̇ий’’д̇и вуд̇д̇з ‘‘сажжам̣, бхаг̇аваа’’д̇и ааха. ат̇а нам̣ сад̇т̇аа ‘‘нану д̇вам̣, бхигку, буб̣б̣з вийрияам̣ ависсаж̇ж̇зд̇ваа мам̣сабзсисад̣̇исасса д̣̇ахарагумаарасса д̣̇ваад̣̇асаяож̇анигз б̣аараан̣асинаг̇арз раж̇ж̇ам̣ г̇ахзд̇ваа ад̣̇ааси, ид̣̇аани гасмаа зваруубз саасанз баб̣б̣аж̇ид̇ваа вийрияам̣ оссаж̇асий’’д̇и вад̇ваа ад̇ийд̇ам̣ аахари.
Alīnacittaṃ nissāyāti idaṃ satthā jetavane viharanto ekaṃ ossaṭṭhavīriyaṃ bhikkhuṃ ārabbha kathesi. Vatthu ekādasanipāte saṃvarajātake (jā. 1.11.97 ādayo) āvibhavissati. So pana bhikkhu satthārā ‘‘saccaṃ kira tvaṃ, bhikkhu, vīriyaṃ ossajī’’ti vutte ‘‘saccaṃ, bhagavā’’ti āha. Atha naṃ satthā ‘‘nanu tvaṃ, bhikkhu, pubbe vīriyaṃ avissajjetvā maṃsapesisadisassa daharakumārassa dvādasayojanike bārāṇasinagare rajjaṃ gahetvā adāsi, idāni kasmā evarūpe sāsane pabbajitvā vīriyaṃ ossajasī’’ti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣аараан̣асид̇о авид̣̇уурз вад̣дхагийг̇аамо ахоси, д̇ад̇т̇а бан̃жасад̇аа вад̣дхагий васанд̇и. д̇з наавааяа убарисод̇ам̣ г̇анд̇ваа аран̃н̃з г̇зхасамбхаарад̣̇аарууни годдзд̇ваа д̇ад̇т̇зва згабхуумигад̣̇вибхуумигаад̣̇ибхзд̣̇з г̇зхасамбхаарз саж̇ж̇зд̇ваа т̇амбхад̇о бадтааяа саб̣б̣ад̣̇ааруусу сан̃н̃ам̣ гад̇ваа над̣̇ийд̇ийрам̣ нзд̇ваа наавам̣ ааробзд̇ваа анусод̇зна наг̇арам̣ ааг̇анд̇ваа яз яаад̣̇исаани г̇зхаани ааган̇канд̇и, д̇зсам̣ д̇аад̣̇исаани гад̇ваа гахаабан̣з г̇ахзд̇ваа буна д̇ад̇т̇зва г̇анд̇ваа г̇зхасамбхаарз аахаранд̇и. звам̣ д̇зсам̣ ж̇ийвигам̣ габбзнд̇аанам̣ згасмим̣ гаалз канд̇хааваарам̣ б̣анд̇хид̇ваа д̣̇аарууни годдзнд̇аанам̣ авид̣̇уурз зго хад̇т̇ий кад̣̇иракаан̣угам̣ аггами. д̇асса со каан̣уго баад̣̇ам̣ виж̇жхи, б̣алававзд̣̇анаа вад̇д̇анд̇и, баад̣̇о уд̣̇д̇хумааяид̇ваа буб̣б̣ам̣ г̇ан̣хи. со взд̣̇анааббад̇д̇о д̇зсам̣ д̣̇ааругодданасад̣̇д̣̇ам̣ суд̇ваа ‘‘имз вад̣дхагий ниссааяа маяхам̣ сод̇т̇и бхависсад̇ий’’д̇и ман̃н̃амаано д̇ийхи баад̣̇зхи д̇зсам̣ санд̇игам̣ г̇анд̇ваа авид̣̇уурз нибаж̇ж̇и, вад̣дхагий д̇ам̣ уд̣̇д̇хумаад̇абаад̣̇ам̣ д̣̇исваа убасан̇гамид̇ваа баад̣̇з каан̣угам̣ д̣̇исваа д̇икин̣аваасияаа каан̣угасса саманд̇ад̇о од̇хим̣ д̣̇ад̇ваа раж̇ж̇уяаа б̣анд̇хид̇ваа аагад̣дханд̇аа каан̣ум̣ нийхарид̇ваа буб̣б̣ам̣ можзд̇ваа ун̣ход̣̇агзна д̇ховид̇ваа д̇ад̣̇ануруубзхи бхзсаж̇ж̇зхи магкзд̇ваа нажирассзва ван̣ам̣ паасугам̣ гарим̣су.
Atīte bārāṇasiyaṃ brahmadatte rajjaṃ kārente bārāṇasito avidūre vaḍḍhakīgāmo ahosi, tattha pañcasatā vaḍḍhakī vasanti. Te nāvāya uparisotaṃ gantvā araññe gehasambhāradārūni koṭṭetvā tattheva ekabhūmikadvibhūmikādibhede gehasambhāre sajjetvā thambhato paṭṭhāya sabbadārūsu saññaṃ katvā nadītīraṃ netvā nāvaṃ āropetvā anusotena nagaraṃ āgantvā ye yādisāni gehāni ākaṅkhanti, tesaṃ tādisāni katvā kahāpaṇe gahetvā puna tattheva gantvā gehasambhāre āharanti. Evaṃ tesaṃ jīvikaṃ kappentānaṃ ekasmiṃ kāle khandhāvāraṃ bandhitvā dārūni koṭṭentānaṃ avidūre eko hatthī khadirakhāṇukaṃ akkami. Tassa so khāṇuko pādaṃ vijjhi, balavavedanā vattanti, pādo uddhumāyitvā pubbaṃ gaṇhi. So vedanāppatto tesaṃ dārukoṭṭanasaddaṃ sutvā ‘‘ime vaḍḍhakī nissāya mayhaṃ sotthi bhavissatī’’ti maññamāno tīhi pādehi tesaṃ santikaṃ gantvā avidūre nipajji, vaḍḍhakī taṃ uddhumātapādaṃ disvā upasaṅkamitvā pāde khāṇukaṃ disvā tikhiṇavāsiyā khāṇukassa samantato odhiṃ datvā rajjuyā bandhitvā ākaḍḍhantā khāṇuṃ nīharitvā pubbaṃ mocetvā uṇhodakena dhovitvā tadanurūpehi bhesajjehi makkhetvā nacirasseva vaṇaṃ phāsukaṃ kariṃsu.
хад̇т̇ий арог̇о худ̇ваа жинд̇зси – ‘‘маяаа имз вад̣дхагий ниссааяа ж̇ийвид̇ам̣ лад̣̇д̇хам̣, ид̣̇аани д̇зсам̣ маяаа убагаарам̣ гаад̇ум̣ ваддад̇ий’’д̇и. со д̇ад̇о бадтааяа вад̣дхагийхи сад̣̇д̇хим̣ ругкз нийхарад̇и, д̇ажчзнд̇аанам̣ баривад̇д̇зд̇ваа д̣̇зд̇и, ваасиаад̣̇ийни убасам̣харад̇и, сон̣д̣ааяа взтзд̇ваа гаал̣асуд̇д̇агодияам̣ г̇ан̣хаад̇и. вад̣дхагийбисса бхож̇анавзлааяа згзгам̣ бин̣д̣ам̣ д̣̇знд̇аа бан̃жа бин̣д̣асад̇аани д̣̇знд̇и. д̇асса бана хад̇т̇исса буд̇д̇о саб̣б̣асзд̇о хад̇т̇ааж̇аанийяабод̇аго ад̇т̇и, д̇знасса зд̇ад̣̇ахоси – ‘‘ахам̣ зд̇арахи махаллаго. ид̣̇аани маяаа имзсам̣ вад̣дхагийнам̣ гаммагаран̣ад̇д̇ааяа буд̇д̇ам̣ д̣̇ад̇ваа г̇анд̇ум̣ ваддад̇ий’’д̇и. со вад̣дхагийнам̣ анаажигкид̇ваава аран̃н̃ам̣ бависид̇ваа буд̇д̇ам̣ аанзд̇ваа ‘‘аяам̣ хад̇т̇ибод̇аго мама буд̇д̇о, д̇умхзхи маяхам̣ ж̇ийвид̇ам̣ д̣̇иннам̣, ахам̣ во взж̇ж̇авзд̇анад̇т̇ааяа имам̣ д̣̇амми, аяам̣ д̇умхаагам̣ ид̇о бадтааяа гаммаани гариссад̇ий’’д̇и вад̇ваа ‘‘ид̇о бадтааяа, буд̇д̇ага, яам̣ маяаа гад̇д̇аб̣б̣ам̣ гаммам̣, д̇ам̣ д̇вам̣ гарохий’’д̇и буд̇д̇ам̣ овад̣̇ид̇ваа вад̣дхагийнам̣ д̣̇ад̇ваа саяам̣ аран̃н̃ам̣ баависи.
Hatthī arogo hutvā cintesi – ‘‘mayā ime vaḍḍhakī nissāya jīvitaṃ laddhaṃ, idāni tesaṃ mayā upakāraṃ kātuṃ vaṭṭatī’’ti. So tato paṭṭhāya vaḍḍhakīhi saddhiṃ rukkhe nīharati, tacchentānaṃ parivattetvā deti, vāsiādīni upasaṃharati, soṇḍāya veṭhetvā kāḷasuttakoṭiyaṃ gaṇhāti. Vaḍḍhakīpissa bhojanavelāya ekekaṃ piṇḍaṃ dentā pañca piṇḍasatāni denti. Tassa pana hatthissa putto sabbaseto hatthājānīyapotako atthi, tenassa etadahosi – ‘‘ahaṃ etarahi mahallako. Idāni mayā imesaṃ vaḍḍhakīnaṃ kammakaraṇattāya puttaṃ datvā gantuṃ vaṭṭatī’’ti. So vaḍḍhakīnaṃ anācikkhitvāva araññaṃ pavisitvā puttaṃ ānetvā ‘‘ayaṃ hatthipotako mama putto, tumhehi mayhaṃ jīvitaṃ dinnaṃ, ahaṃ vo vejjavetanatthāya imaṃ dammi, ayaṃ tumhākaṃ ito paṭṭhāya kammāni karissatī’’ti vatvā ‘‘ito paṭṭhāya, puttaka, yaṃ mayā kattabbaṃ kammaṃ, taṃ tvaṃ karohī’’ti puttaṃ ovaditvā vaḍḍhakīnaṃ datvā sayaṃ araññaṃ pāvisi.
д̇ад̇о бадтааяа хад̇т̇ибод̇аго вад̣дхагийнам̣ важанагаро оваад̣̇агкамо худ̇ваа саб̣б̣агижжаани гарод̇и. д̇зби д̇ам̣ бан̃жахи бин̣д̣асад̇зхи босзнд̇и, со гаммам̣ гад̇ваа над̣̇им̣ од̇арид̇ваа нхад̇ваа гийл̣ид̇ваа ааг̇ажчад̇и, вад̣дхагийд̣̇аарагааби д̇ам̣ сон̣д̣аад̣̇ийсу г̇ахзд̇ваа уд̣̇агзби т̇алзби д̇зна сад̣̇д̇хим̣ гийл̣анд̇и. ааж̇аанийяаа бана хад̇т̇иноби ассааби бурисааби уд̣̇агз ужжаарам̣ ваа бассаавам̣ ваа на гаронд̇и, д̇асмаа соби уд̣̇агз ужжаарабассаавам̣ агад̇ваа б̣ахинад̣̇ийд̇ийрзязва гарод̇и. ат̇згасмим̣ д̣̇ивасз убаринад̣̇ияаа д̣̇зво васси, ат̇а сугкам̣ хад̇т̇илан̣д̣ам̣ уд̣̇агзна над̣̇им̣ од̇арид̇ваа г̇ажчанд̇ам̣ б̣аараан̣асийнаг̇арад̇ид̇т̇з згасмим̣ г̇умб̣з лаг̇г̇зд̇ваа адтааси. ат̇а ран̃н̃о хад̇т̇иг̇обагаа ‘‘хад̇т̇ий нхаабзссаамаа’’д̇и бан̃жа хад̇т̇исад̇аани наяим̣су. ааж̇аанийяалан̣д̣асса г̇анд̇хам̣ гхааяид̇ваа згоби хад̇т̇ий над̣̇им̣ од̇арид̇ум̣ на уссахи. саб̣б̣зби нан̇г̇удтам̣ угкибид̇ваа балааяид̇ум̣ аарабхим̣су, хад̇т̇иг̇обагаа хад̇т̇аажарияаанам̣ аарожзсум̣. д̇з ‘‘уд̣̇агз барибант̇зна бхавид̇аб̣б̣а’’нд̇и уд̣̇агам̣ сод̇хаабзд̇ваа д̇асмим̣ г̇умб̣з д̇ам̣ ааж̇аанийяалан̣д̣ам̣ д̣̇исваа ‘‘ид̣̇амзд̇т̇а гааран̣а’’нд̇и н̃ад̇ваа жаадим̣ аахараабзд̇ваа уд̣̇агасса буурзд̇ваа д̇ам̣ д̇ад̇т̇а мад̣̇д̣̇ид̇ваа хад̇т̇ийнам̣ сарийрз син̃жаабзсум̣, сарийраани суг̇анд̇хаани ахзсум̣. д̇асмим̣ гаалз д̇з над̣̇им̣ од̇арид̇ваа нхааяим̣су.
Tato paṭṭhāya hatthipotako vaḍḍhakīnaṃ vacanakaro ovādakkhamo hutvā sabbakiccāni karoti. Tepi taṃ pañcahi piṇḍasatehi posenti, so kammaṃ katvā nadiṃ otaritvā nhatvā kīḷitvā āgacchati, vaḍḍhakīdārakāpi taṃ soṇḍādīsu gahetvā udakepi thalepi tena saddhiṃ kīḷanti. Ājānīyā pana hatthinopi assāpi purisāpi udake uccāraṃ vā passāvaṃ vā na karonti, tasmā sopi udake uccārapassāvaṃ akatvā bahinadītīreyeva karoti. Athekasmiṃ divase uparinadiyā devo vassi, atha sukkhaṃ hatthilaṇḍaṃ udakena nadiṃ otaritvā gacchantaṃ bārāṇasīnagaratitthe ekasmiṃ gumbe laggetvā aṭṭhāsi. Atha rañño hatthigopakā ‘‘hatthī nhāpessāmā’’ti pañca hatthisatāni nayiṃsu. Ājānīyalaṇḍassa gandhaṃ ghāyitvā ekopi hatthī nadiṃ otarituṃ na ussahi. Sabbepi naṅguṭṭhaṃ ukkhipitvā palāyituṃ ārabhiṃsu, hatthigopakā hatthācariyānaṃ ārocesuṃ. Te ‘‘udake paripanthena bhavitabba’’nti udakaṃ sodhāpetvā tasmiṃ gumbe taṃ ājānīyalaṇḍaṃ disvā ‘‘idamettha kāraṇa’’nti ñatvā cāṭiṃ āharāpetvā udakassa pūretvā taṃ tattha madditvā hatthīnaṃ sarīre siñcāpesuṃ, sarīrāni sugandhāni ahesuṃ. Tasmiṃ kāle te nadiṃ otaritvā nhāyiṃsu.
хад̇т̇аажарияаа ран̃н̃о д̇ам̣ бавад̇д̇им̣ аарожзд̇ваа ‘‘д̇ам̣ хад̇т̇ааж̇аанийяам̣ бариязсид̇ваа аанзд̇ум̣ ваддад̇и, д̣̇зваа’’д̇и аахам̣су. рааж̇аа нааваасан̇гхаадзхи над̣̇им̣ багканд̣̇ид̇ваа уд̣̇д̇хам̣г̇аамийхи нааваасан̇гхаадзхи вад̣дхагийнам̣ васанадтаанам̣ самбаабун̣и. хад̇т̇ибод̇аго над̣̇ияам̣ гийл̣анд̇о бхзрисад̣̇д̣̇ам̣ суд̇ваа г̇анд̇ваа вад̣дхагийнам̣ санд̇игз адтааси. вад̣дхагий ран̃н̃о бажжуг̇г̇аманам̣ гад̇ваа ‘‘д̣̇зва, сажз д̣̇ааруухи ад̇т̇о, гим̣ гааран̣аа ааг̇ад̇ад̇т̇а, гим̣ бзсзд̇ваа аахараабзд̇ум̣ на ваддад̇ий’’д̇и аахам̣су. ‘‘наахам̣, бхан̣з, д̣̇ааруунам̣ ад̇т̇ааяа ааг̇ад̇о, имасса бана хад̇т̇исса ад̇т̇ааяа ааг̇ад̇омхий’’д̇и. ‘‘г̇аахаабзд̇ваа г̇ажчат̇а, д̣̇зваа’’д̇и. хад̇т̇ибод̇аго г̇анд̇ум̣ на ижчи. ‘‘гим̣ гаараабзд̇и, бхан̣з, хад̇т̇ий’’д̇и? ‘‘вад̣дхагийнам̣ босааванигам̣ аахараабзд̇и, д̣̇зваа’’д̇и. ‘‘саад̇ху, бхан̣з’’д̇и рааж̇аа хад̇т̇исса жад̇уннам̣ баад̣̇аанам̣ сон̣д̣ааяа нан̇г̇удтасса жа санд̇игз сад̇асахассасад̇асахассагахаабан̣з табаабзси. хад̇т̇ий зд̇д̇агзнааби аг̇анд̇ваа саб̣б̣авад̣дхагийнам̣ д̣̇уссаяуг̇зсу вад̣дхагийбхарияаанам̣ ниваасанасаадагзсу д̣̇иннзсу сад̣̇д̇хим̣гийл̣ид̇аанам̣ д̣̇аарагаанан̃жа д̣̇аарагабарихаарз гад̇з нивад̇д̇ид̇ваа вад̣дхагий жа ид̇т̇ияо жа д̣̇аарагз жа ологзд̇ваа ран̃н̃аа сад̣̇д̇хим̣ аг̇амааси.
Hatthācariyā rañño taṃ pavattiṃ ārocetvā ‘‘taṃ hatthājānīyaṃ pariyesitvā ānetuṃ vaṭṭati, devā’’ti āhaṃsu. Rājā nāvāsaṅghāṭehi nadiṃ pakkhanditvā uddhaṃgāmīhi nāvāsaṅghāṭehi vaḍḍhakīnaṃ vasanaṭṭhānaṃ sampāpuṇi. Hatthipotako nadiyaṃ kīḷanto bherisaddaṃ sutvā gantvā vaḍḍhakīnaṃ santike aṭṭhāsi. Vaḍḍhakī rañño paccuggamanaṃ katvā ‘‘deva, sace dārūhi attho, kiṃ kāraṇā āgatattha, kiṃ pesetvā āharāpetuṃ na vaṭṭatī’’ti āhaṃsu. ‘‘Nāhaṃ, bhaṇe, dārūnaṃ atthāya āgato, imassa pana hatthissa atthāya āgatomhī’’ti. ‘‘Gāhāpetvā gacchatha, devā’’ti. Hatthipotako gantuṃ na icchi. ‘‘Kiṃ kārāpeti, bhaṇe, hatthī’’ti? ‘‘Vaḍḍhakīnaṃ posāvanikaṃ āharāpeti, devā’’ti. ‘‘Sādhu, bhaṇe’’ti rājā hatthissa catunnaṃ pādānaṃ soṇḍāya naṅguṭṭhassa ca santike satasahassasatasahassakahāpaṇe ṭhapāpesi. Hatthī ettakenāpi agantvā sabbavaḍḍhakīnaṃ dussayugesu vaḍḍhakībhariyānaṃ nivāsanasāṭakesu dinnesu saddhiṃkīḷitānaṃ dārakānañca dārakaparihāre kate nivattitvā vaḍḍhakī ca itthiyo ca dārake ca oloketvā raññā saddhiṃ agamāsi.
рааж̇аа д̇ам̣ аад̣̇ааяа наг̇арам̣ г̇анд̇ваа наг̇аран̃жа хад̇т̇исаалан̃жа алан̇гаараабзд̇ваа хад̇т̇им̣ наг̇арам̣ бад̣̇агкин̣ам̣ гаарзд̇ваа хад̇т̇исаалам̣ бавзсзд̇ваа саб̣б̣аалан̇гаарзхи алан̇гарид̇ваа абхисзгам̣ д̣̇ад̇ваа обаваяхам̣ гад̇ваа ад̇д̇ано сахааяадтаанз табзд̇ваа убад̣дхараж̇ж̇ам̣ хад̇т̇исса д̣̇ад̇ваа ад̇д̇анаа самаанабарихаарам̣ агааси. хад̇т̇исса ааг̇ад̇агаалад̇о бадтааяа ран̃н̃о сагалаж̇амб̣уд̣̇ийбз раж̇ж̇ам̣ хад̇т̇аг̇ад̇амзва ахоси. звам̣ гаалз г̇ажчанд̇з б̣од̇хисад̇д̇о д̇асса ран̃н̃о аг̇г̇амахзсияаа гужчимхи бадисанд̇хим̣ г̇ан̣хи. д̇ассаа г̇аб̣бхабарибаагагаалз рааж̇аа гааламагааси. хад̇т̇ий бана сажз ран̃н̃о гаалагад̇абхаавам̣ ж̇аанзяяа, д̇ад̇т̇звасса хад̣̇аяам̣ палзяяа, д̇асмаа хад̇т̇им̣ ран̃н̃о гаалагад̇абхаавам̣ аж̇аанаабзд̇ваава убадтахим̣су. ран̃н̃о бана гаалагад̇абхаавам̣ суд̇ваа ‘‘д̇ужчам̣ гира раж̇ж̇а’’нд̇и ананд̇арасааманд̇агосаларааж̇аа махад̇ияаа сзнааяа ааг̇анд̇ваа наг̇арам̣ бариваарзси. наг̇араваасино д̣̇ваараани бид̣̇ахид̇ваа госаларан̃н̃о саасанам̣ бахин̣им̣су – ‘‘амхаагам̣ ран̃н̃о аг̇г̇амахзсий барибун̣н̣аг̇аб̣бхаа ‘ид̇о гира сад̇д̇амз д̣̇ивасз буд̇д̇ам̣ виж̇ааяиссад̇ий’д̇и ан̇г̇авиж̇ж̇аабаатагаа аахам̣су. сажз саа буд̇д̇ам̣ виж̇ааяиссад̇и, маяам̣ сад̇д̇амз д̣̇ивасз яуд̣̇д̇хам̣ д̣̇ассаама, на раж̇ж̇ам̣, зд̇д̇агам̣ гаалам̣ ааг̇амзт̇аа’’д̇и. рааж̇аа ‘‘саад̇хуу’’д̇и самбадижчи.
Rājā taṃ ādāya nagaraṃ gantvā nagarañca hatthisālañca alaṅkārāpetvā hatthiṃ nagaraṃ padakkhiṇaṃ kāretvā hatthisālaṃ pavesetvā sabbālaṅkārehi alaṅkaritvā abhisekaṃ datvā opavayhaṃ katvā attano sahāyaṭṭhāne ṭhapetvā upaḍḍharajjaṃ hatthissa datvā attanā samānaparihāraṃ akāsi. Hatthissa āgatakālato paṭṭhāya rañño sakalajambudīpe rajjaṃ hatthagatameva ahosi. Evaṃ kāle gacchante bodhisatto tassa rañño aggamahesiyā kucchimhi paṭisandhiṃ gaṇhi. Tassā gabbhaparipākakāle rājā kālamakāsi. Hatthī pana sace rañño kālakatabhāvaṃ jāneyya, tatthevassa hadayaṃ phaleyya, tasmā hatthiṃ rañño kālakatabhāvaṃ ajānāpetvāva upaṭṭhahiṃsu. Rañño pana kālakatabhāvaṃ sutvā ‘‘tucchaṃ kira rajja’’nti anantarasāmantakosalarājā mahatiyā senāya āgantvā nagaraṃ parivāresi. Nagaravāsino dvārāni pidahitvā kosalarañño sāsanaṃ pahiṇiṃsu – ‘‘amhākaṃ rañño aggamahesī paripuṇṇagabbhā ‘ito kira sattame divase puttaṃ vijāyissatī’ti aṅgavijjāpāṭhakā āhaṃsu. Sace sā puttaṃ vijāyissati, mayaṃ sattame divase yuddhaṃ dassāma, na rajjaṃ, ettakaṃ kālaṃ āgamethā’’ti. Rājā ‘‘sādhū’’ti sampaṭicchi.
д̣̇звий сад̇д̇амз д̣̇ивасз буд̇д̇ам̣ виж̇ааяи. д̇асса наамаг̇г̇ахан̣ад̣̇ивасз бана махааж̇анасса алийнажид̇д̇ам̣ баг̇г̇ан̣ханд̇о ж̇аад̇од̇и ‘‘алийнажид̇д̇агумааро’’д̇взвасса наамам̣ агам̣су. ж̇аад̇ад̣̇ивасад̇оязва банасса бадтааяа нааг̇араа госаларан̃н̃аа сад̣̇д̇хим̣ яуж̇жхим̣су. ниннааяагад̇д̇аа сан̇г̇аамасса маханд̇амби б̣алам̣ яуж̇жхамаанам̣ т̇огам̣ т̇огам̣ осаггад̇и. амажжаа д̣̇звияаа д̇амад̇т̇ам̣ аарожзд̇ваа ‘‘маяам̣ звам̣ осаггамаанз б̣алз барааж̇аяабхаавасса бхааяаама, амхаагам̣ бана ран̃н̃о гаалагад̇абхаавам̣, буд̇д̇асса ж̇аад̇абхаавам̣, госаларан̃н̃о ааг̇анд̇ваа яуж̇жхаанабхааван̃жа ран̃н̃о сахааяаго ман̇г̇алахад̇т̇ий на ж̇аанаад̇и, ж̇аанаабзма на’’нд̇и бужчим̣су. саа ‘‘саад̇хуу’’д̇и самбадижчид̇ваа буд̇д̇ам̣ алан̇гарид̇ваа д̣̇угуулажумб̣адагз нибаж̇ж̇аабзд̇ваа баасаад̣̇аа оруяха амажжаг̇ан̣абаривуд̇аа хад̇т̇исаалам̣ г̇анд̇ваа б̣од̇хисад̇д̇ам̣ хад̇т̇исса баад̣̇амуулз нибаж̇ж̇аабзд̇ваа ‘‘саами, сахааяо д̇з гаалагад̇о, маяам̣ д̇уяхам̣ хад̣̇аяапааланабхаязна наарожаяимха, аяам̣ д̇з сахааяасса буд̇д̇о, госаларааж̇аа ааг̇анд̇ваа наг̇ара м̣ бариваарзд̇ваа д̇ава буд̇д̇зна сад̣̇д̇хим̣ яуж̇жхад̇и, б̣алам̣ осаггад̇и, д̇ава буд̇д̇ам̣ д̇ван̃н̃зва ваа маарзхи, раж̇ж̇ам̣ ваасса г̇ан̣хид̇ваа д̣̇зхий’’д̇и ааха.
Devī sattame divase puttaṃ vijāyi. Tassa nāmaggahaṇadivase pana mahājanassa alīnacittaṃ paggaṇhanto jātoti ‘‘alīnacittakumāro’’tvevassa nāmaṃ akaṃsu. Jātadivasatoyeva panassa paṭṭhāya nāgarā kosalaraññā saddhiṃ yujjhiṃsu. Ninnāyakattā saṅgāmassa mahantampi balaṃ yujjhamānaṃ thokaṃ thokaṃ osakkati. Amaccā deviyā tamatthaṃ ārocetvā ‘‘mayaṃ evaṃ osakkamāne bale parājayabhāvassa bhāyāma, amhākaṃ pana rañño kālakatabhāvaṃ, puttassa jātabhāvaṃ, kosalarañño āgantvā yujjhānabhāvañca rañño sahāyako maṅgalahatthī na jānāti, jānāpema na’’nti pucchiṃsu. Sā ‘‘sādhū’’ti sampaṭicchitvā puttaṃ alaṅkaritvā dukūlacumbaṭake nipajjāpetvā pāsādā oruyha amaccagaṇaparivutā hatthisālaṃ gantvā bodhisattaṃ hatthissa pādamūle nipajjāpetvā ‘‘sāmi, sahāyo te kālakato, mayaṃ tuyhaṃ hadayaphālanabhayena nārocayimha, ayaṃ te sahāyassa putto, kosalarājā āgantvā nagara ṃ parivāretvā tava puttena saddhiṃ yujjhati, balaṃ osakkati, tava puttaṃ tvaññeva vā mārehi, rajjaṃ vāssa gaṇhitvā dehī’’ti āha.
д̇асмим̣ гаалз хад̇т̇ий б̣од̇хисад̇д̇ам̣ сон̣д̣ааяа бараамасид̇ваа угкибид̇ваа гумбхз табзд̇ваа род̣̇ид̇ваа б̣од̇хисад̇д̇ам̣ од̇аарзд̇ваа д̣̇звияаа хад̇т̇з нибаж̇ж̇аабзд̇ваа ‘‘госаларааж̇ам̣ г̇ан̣хиссаамий’’д̇и хад̇т̇исаалад̇о нигками. ат̇асса амажжаа ваммам̣ бадимун̃жид̇ваа алан̇гарид̇ваа наг̇арад̣̇ваарам̣ аваабурид̇ваа д̇ам̣ бариваарзд̇ваа нигкамим̣су. хад̇т̇ий наг̇араа нигкамид̇ваа гон̃жанаад̣̇ам̣ гад̇ваа махааж̇анам̣ санд̇аасзд̇ваа балаабзд̇ваа б̣алагодтагам̣ бхинд̣̇ид̇ваа госаларааж̇аанам̣ жуул̣ааяа г̇ахзд̇ваа аанзд̇ваа б̣од̇хисад̇д̇асса баад̣̇амуулз нибаж̇ж̇аабзд̇ваа мааран̣ад̇т̇ааяасса удтид̇з ваарзд̇ваа ‘‘ид̇о бадтааяа аббамад̇д̇о хохи, ‘гумааро д̣̇ахаро’д̇и сан̃н̃ам̣ маа гарий’’д̇и овад̣̇ид̇ваа уяяож̇зси. д̇ад̇о бадтааяа сагалаж̇амб̣уд̣̇ийбз раж̇ж̇ам̣ б̣од̇хисад̇д̇асса хад̇т̇аг̇ад̇амзва ж̇аад̇ам̣, ан̃н̃о бадисад̇д̇у наама удтахид̇ум̣ самад̇т̇о наахоси. б̣од̇хисад̇д̇о сад̇д̇авассигагаалз абхисзгам̣ гад̇ваа алийнажид̇д̇арааж̇аа наама худ̇ваа д̇хаммзна раж̇ж̇ам̣ гаарзд̇ваа ж̇ийвид̇абарияосаанз саг̇г̇абурам̣ буурзси.
Tasmiṃ kāle hatthī bodhisattaṃ soṇḍāya parāmasitvā ukkhipitvā kumbhe ṭhapetvā roditvā bodhisattaṃ otāretvā deviyā hatthe nipajjāpetvā ‘‘kosalarājaṃ gaṇhissāmī’’ti hatthisālato nikkhami. Athassa amaccā vammaṃ paṭimuñcitvā alaṅkaritvā nagaradvāraṃ avāpuritvā taṃ parivāretvā nikkhamiṃsu. Hatthī nagarā nikkhamitvā koñcanādaṃ katvā mahājanaṃ santāsetvā palāpetvā balakoṭṭhakaṃ bhinditvā kosalarājānaṃ cūḷāya gahetvā ānetvā bodhisattassa pādamūle nipajjāpetvā māraṇatthāyassa uṭṭhite vāretvā ‘‘ito paṭṭhāya appamatto hohi, ‘kumāro daharo’ti saññaṃ mā karī’’ti ovaditvā uyyojesi. Tato paṭṭhāya sakalajambudīpe rajjaṃ bodhisattassa hatthagatameva jātaṃ, añño paṭisattu nāma uṭṭhahituṃ samattho nāhosi. Bodhisatto sattavassikakāle abhisekaṃ katvā alīnacittarājā nāma hutvā dhammena rajjaṃ kāretvā jīvitapariyosāne saggapuraṃ pūresi.
сад̇т̇аа имам̣ ад̇ийд̇ам̣ аахарид̇ваа абхисамб̣уд̣̇д̇хо худ̇ваа имам̣ г̇аат̇аад̣̇ваяамааха –
Satthā imaṃ atītaṃ āharitvā abhisambuddho hutvā imaṃ gāthādvayamāha –
11.
11.
‘‘алийнажид̇д̇ам̣ ниссааяа, бахадтаа махад̇ий жамуу;
‘‘Alīnacittaṃ nissāya, pahaṭṭhā mahatī camū;
госалам̣ сзнаасанд̇удтам̣, ж̇ийваг̇г̇аахам̣ аг̇аахаяи.
Kosalaṃ senāsantuṭṭhaṃ, jīvaggāhaṃ agāhayi.
12.
12.
‘‘звам̣ ниссаяасамбанно, бхигку аарад̣̇д̇хавийрияо;
‘‘Evaṃ nissayasampanno, bhikkhu āraddhavīriyo;
бхааваяам̣ гусалам̣ д̇хаммам̣, яог̇агкзмасса бад̇д̇ияаа;
Bhāvayaṃ kusalaṃ dhammaṃ, yogakkhemassa pattiyā;
баабун̣з анубуб̣б̣зна, саб̣б̣асам̣яож̇анагкаяа’’нд̇и.
Pāpuṇe anupubbena, sabbasaṃyojanakkhaya’’nti.
д̇ад̇т̇а алийнажид̇д̇ам̣ ниссааяаад̇и алийнажид̇д̇ам̣ рааж̇агумаарам̣ ниссааяа. бахадтаа махад̇ий жамууд̇и ‘‘бавзн̣ийраж̇ж̇ам̣ но д̣̇идта’’нд̇и хадтад̇удтаа худ̇ваа махад̇ий сзнаа. госалам̣ сзнаасанд̇удтанд̇и госаларааж̇аанам̣ сзна раж̇ж̇зна асанд̇удтам̣ барараж̇ж̇алобхзна ааг̇ад̇ам̣. ж̇ийваг̇г̇аахам̣ аг̇аахаяийд̇и амаарзд̇ваава саа жамуу д̇ам̣ рааж̇аанам̣ хад̇т̇инаа ж̇ийваг̇г̇аахам̣ г̇ан̣хаабзси. звам̣ ниссаяасамбаннод̇и яат̇аа саа жамуу, звам̣ ан̃н̃оби гулабуд̇д̇о ниссаяасамбанно галяаан̣амид̇д̇ам̣ б̣уд̣̇д̇хам̣ ваа б̣уд̣̇д̇хасаавагам̣ ваа ниссаяам̣ лабхид̇ваа. бхигкууд̇и барисуд̣̇д̇хаад̇хиважанамзд̇ам̣. аарад̣̇д̇хавийрияод̇и баг̇г̇ахид̇авийрияо жад̇уд̣̇осаабаг̇ад̇зна вийриязна саманнааг̇ад̇о. бхааваяам̣ гусалам̣ д̇хамманд̇и гусалам̣ нираваж̇ж̇ам̣ сад̇д̇ад̇им̣саб̣од̇хибагкияасан̇каад̇ам̣ д̇хаммам̣ бхаавзнд̇о. яог̇агкзмасса бад̇д̇ияаад̇и жад̇уухи яог̇зхи кзмасса ниб̣б̣аанасса баабун̣анад̇т̇ааяа д̇ам̣ д̇хаммам̣ бхаавзнд̇о. баабун̣з анубуб̣б̣зна, саб̣б̣асам̣яож̇анагкаяанд̇и звам̣ вибассанад̇о бадтааяа имам̣ гусалам̣ д̇хаммам̣ бхаавзнд̇о со галяаан̣амид̇д̇убаниссаяасамбанно бхигку анубуб̣б̣зна вибассанаан̃аан̣аани жа хздтимамаг̇г̇апалаани жа баабун̣анд̇о барияосаанз д̣̇асаннамби сам̣яож̇анаанам̣ каяанд̇з уббаннад̇д̇аа саб̣б̣асам̣яож̇анагкаяасан̇каад̇ам̣ арахад̇д̇ам̣ баабун̣аад̇и. яасмаа ваа ниб̣б̣аанам̣ ааг̇амма саб̣б̣асам̣яож̇анаани кийяанд̇и, д̇асмаа д̇амби саб̣б̣асам̣яож̇анагкаяамзва, звам̣ анубуб̣б̣зна ниб̣б̣аанасан̇каад̇ам̣ саб̣б̣асам̣яож̇анагкаяам̣ баабун̣аад̇ийд̇и ад̇т̇о.
Tattha alīnacittaṃ nissāyāti alīnacittaṃ rājakumāraṃ nissāya. Pahaṭṭhā mahatī camūti ‘‘paveṇīrajjaṃ no diṭṭha’’nti haṭṭhatuṭṭhā hutvā mahatī senā. Kosalaṃ senāsantuṭṭhanti kosalarājānaṃ sena rajjena asantuṭṭhaṃ pararajjalobhena āgataṃ. Jīvaggāhaṃ agāhayīti amāretvāva sā camū taṃ rājānaṃ hatthinā jīvaggāhaṃ gaṇhāpesi. Evaṃ nissayasampannoti yathā sā camū, evaṃ aññopi kulaputto nissayasampanno kalyāṇamittaṃ buddhaṃ vā buddhasāvakaṃ vā nissayaṃ labhitvā. Bhikkhūti parisuddhādhivacanametaṃ. Āraddhavīriyoti paggahitavīriyo catudosāpagatena vīriyena samannāgato. Bhāvayaṃ kusalaṃ dhammanti kusalaṃ niravajjaṃ sattatiṃsabodhipakkhiyasaṅkhātaṃ dhammaṃ bhāvento. Yogakkhemassa pattiyāti catūhi yogehi khemassa nibbānassa pāpuṇanatthāya taṃ dhammaṃ bhāvento. Pāpuṇe anupubbena, sabbasaṃyojanakkhayanti evaṃ vipassanato paṭṭhāya imaṃ kusalaṃ dhammaṃ bhāvento so kalyāṇamittupanissayasampanno bhikkhu anupubbena vipassanāñāṇāni ca heṭṭhimamaggaphalāni ca pāpuṇanto pariyosāne dasannampi saṃyojanānaṃ khayante uppannattā sabbasaṃyojanakkhayasaṅkhātaṃ arahattaṃ pāpuṇāti. Yasmā vā nibbānaṃ āgamma sabbasaṃyojanāni khīyanti, tasmā tampi sabbasaṃyojanakkhayameva, evaṃ anupubbena nibbānasaṅkhātaṃ sabbasaṃyojanakkhayaṃ pāpuṇātīti attho.
ид̇и бхаг̇аваа амад̇амахааниб̣б̣аанзна д̇хаммад̣̇зсанааяа гуудам̣ г̇ахзд̇ваа уд̇д̇ариби сажжаани багаасзд̇ваа ж̇аад̇агам̣ самод̇хаанзси, сажжабарияосаанз оссадтавийрияо бхигку арахад̇д̇з бад̇идтахи. ‘‘д̇ад̣̇аа маад̇аа махаамааяаа, бид̇аа суд̣̇д̇ход̣̇анамахаарааж̇аа ахоси, раж̇ж̇ам̣ г̇ахзд̇ваа д̣̇иннахад̇т̇ий аяам̣ оссадтавийрияо бхигку, хад̇т̇исса бид̇аа саарибуд̇д̇о, сааманд̇агосаларааж̇аа мог̇г̇аллаано, алийнажид̇д̇агумааро бана ахамзва ахоси’’нд̇и.
Iti bhagavā amatamahānibbānena dhammadesanāya kūṭaṃ gahetvā uttaripi saccāni pakāsetvā jātakaṃ samodhānesi, saccapariyosāne ossaṭṭhavīriyo bhikkhu arahatte patiṭṭhahi. ‘‘Tadā mātā mahāmāyā, pitā suddhodanamahārājā ahosi, rajjaṃ gahetvā dinnahatthī ayaṃ ossaṭṭhavīriyo bhikkhu, hatthissa pitā sāriputto, sāmantakosalarājā moggallāno, alīnacittakumāro pana ahameva ahosi’’nti.
алийнажид̇д̇аж̇аад̇агаван̣н̣анаа чадтаа.
Alīnacittajātakavaṇṇanā chaṭṭhā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 156. алийнажид̇д̇аж̇аад̇агам̣ • 156. Alīnacittajātakaṃ
