| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
8. அம்ப³தா³யகத்தே²ரஅபதா³னவண்ணனா
8. Ambadāyakattheraapadānavaṇṇanā
அனோமத³ஸ்ஸீ ப⁴க³வாதிஆதி³கங் ஆயஸ்மதோ அம்ப³தா³யகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ அனோமத³ஸ்ஸிஸ்ஸ ப⁴க³வதோ காலே வானரயோனியங் நிப்³ப³த்தோ ஹிமவந்தே கபிராஜா ஹுத்வா படிவஸதி. தஸ்மிங் ஸமயே அனோமத³ஸ்ஸீ ப⁴க³வா தஸ்ஸானுகம்பாய ஹிமவந்தமக³மாஸி. அத² ஸோ கபிராஜா ப⁴க³வந்தங் தி³ஸ்வா பஸன்னமானஸோ ஸுமது⁴ரங் அம்ப³ப²லங் கு²த்³த³மது⁴னா அதா³ஸி. அத² ப⁴க³வா தஸ்ஸ பஸ்ஸந்தஸ்ஸேவ தங் ஸப்³ப³ங் பரிபு⁴ஞ்ஜித்வா அனுமோத³னங் வத்வா பக்காமி. அத² ஸோ ஸோமனஸ்ஸஸம்பன்னஹத³யோ தேனேவ பீதிஸோமனஸ்ஸேன யாவதாயுகங் ட²த்வா ததோ சுதோ தே³வலோகே நிப்³ப³த்தோ அபராபரங் தத்த² தி³ப்³ப³ஸுக²மனுப⁴வித்வா மனுஸ்ஸேஸு ச மனுஸ்ஸஸம்பத்திங் அனுப⁴வித்வா இமஸ்மிங் பு³த்³து⁴ப்பாதே³ விப⁴வஸம்பன்னே ஏகஸ்மிங் குலகே³ஹே நிப்³ப³த்தோ ஸத்த²ரி பஸீதி³த்வா பப்³ப³ஜித்வா நசிரஸ்ஸேவ ச²ளபி⁴ஞ்ஞப்பத்தோ அஹோஸி. புப்³ப³புஞ்ஞனாமேன அம்ப³தா³யகத்தே²ரோதி பாகடோ.
Anomadassī bhagavātiādikaṃ āyasmato ambadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto anomadassissa bhagavato kāle vānarayoniyaṃ nibbatto himavante kapirājā hutvā paṭivasati. Tasmiṃ samaye anomadassī bhagavā tassānukampāya himavantamagamāsi. Atha so kapirājā bhagavantaṃ disvā pasannamānaso sumadhuraṃ ambaphalaṃ khuddamadhunā adāsi. Atha bhagavā tassa passantasseva taṃ sabbaṃ paribhuñjitvā anumodanaṃ vatvā pakkāmi. Atha so somanassasampannahadayo teneva pītisomanassena yāvatāyukaṃ ṭhatvā tato cuto devaloke nibbatto aparāparaṃ tattha dibbasukhamanubhavitvā manussesu ca manussasampattiṃ anubhavitvā imasmiṃ buddhuppāde vibhavasampanne ekasmiṃ kulagehe nibbatto satthari pasīditvā pabbajitvā nacirasseva chaḷabhiññappatto ahosi. Pubbapuññanāmena ambadāyakattheroti pākaṭo.
53. ஸோ அபரபா⁴கே³ அத்தனா கதகுஸலபீ³ஜங் தி³ஸ்வா ஸோமனஸ்ஸஜாதோ அத்தனோ புப்³ப³சரிதாபதா³னங் பகாஸெந்தோ அனோமத³ஸ்ஸீ ப⁴க³வாதிஆதி³மாஹ. மெத்தாய அப²ரி லோகே, அப்பமாணே நிரூபதீ⁴தி ஸோ ப⁴க³வா ஸப்³ப³லோகே அப்பமாணே ஸத்தே ‘‘ஸுகீ² ஹொந்தூ’’திஆதி³னா நிருபதி⁴ உபதி⁴விரஹிதங் கத்வா மெத்தாய மெத்தசித்தேன அப²ரி பத்த²ரி வட்³டே⁴ஸீதி அத்தோ².
53. So aparabhāge attanā katakusalabījaṃ disvā somanassajāto attano pubbacaritāpadānaṃ pakāsento anomadassī bhagavātiādimāha. Mettāya aphari loke, appamāṇe nirūpadhīti so bhagavā sabbaloke appamāṇe satte ‘‘sukhī hontū’’tiādinā nirupadhi upadhivirahitaṃ katvā mettāya mettacittena aphari patthari vaḍḍhesīti attho.
54. கபி அஹங் ததா³ ஆஸிந்தி ததா³ தஸ்ஸாக³மனகாலே கபிராஜா அஹோஸிந்தி அத்தோ².
54.Kapi ahaṃ tadā āsinti tadā tassāgamanakāle kapirājā ahosinti attho.
அம்ப³தா³யகத்தே²ரஅபதா³னவண்ணனா ஸமத்தா.
Ambadāyakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 8. அம்ப³தா³யகத்தே²ரஅபதா³னங் • 8. Ambadāyakattheraapadānaṃ
